Ŋɔɔ lɛ akɛ, ehe ebahia ni afee bo opireshɛŋ yɛ hela ko ni baanyɛ agbe bo lɛ hewɔ. Obaasumɔ ni datrɛfonyo ni baafee bo opireshɛŋ lɛ afee mɔ ni oyɔɔ hekɛnɔfɔ̃ɔ diɛŋtsɛ yɛ emli, akɛni owala baayaje edɛŋ lɛ hewɔ. Aso nilee bɛ mli akɛ obaapɛi bɔ ni etsu shihilɛi ni tamɔ nakai lɛ ahe nii yɛ bei ni eho lɛ amli?

Nakai nɔŋŋ nilee yɔɔ mli akɛ obaapɛi jamɔ mli jogbaŋŋ okwɛ. Kɛ́ oyɛ jamɔ ko mli lɛ, yɛ gbɛ ko nɔ lɛ, okɛ owala miiwo jamɔ nɛɛ dɛŋ yɛ mumɔŋ gbɛfaŋ ji no. Ohiɛnɔkamɔ kɛha naanɔ wala hu fata he.

Yesu ha wɔ shishitoo mla ko ni baaye abua wɔ koni wɔkɛ Biblia lɛ apɛi wɔjamɔ lɛ mli jogbaŋŋ wɔkwɛ. Ekɛɛ akɛ: “Tso fɛɛ tso diɛŋtsɛ yibii aŋɔleɔ lɛ.” (Luka 6:44) Ákɛ nɔkwɛmɔ lɛ, kɛ́ okwɛ jamɔ loo sɔlemɔ pɔtɛɛ ko lɛ, mɛɛ yibii nɛkɛ ewoɔ? Ani ehiɛnyiɛlɔi lɛ kɛ amɛjwɛŋmɔ maa shika nɔ titri? Ani emlibii lɛ hiɔ shi yɛ Biblia shishitoo mlai ni kɔɔ ta kɛ jeŋba he lɛ anaa? Kɛfata he lɛ, ani jamɔ ko yɛ ni abaanyɛ akɛ he afɔ̃ nɔ? Wɔbaasumɔ ni opɛi saji ni nyiɛ sɛɛ nɛɛ amli okwɛ.