A re re o swanetše go dirwa ophareišene bakeng sa bolwetši bjoo bo beago bophelo bja gago kotsing. Go tla nyakega gore o bote mmui wa gago ka mo go feletšego, ka ge bophelo bja gago bo tla ba diatleng tša gagwe. Na e be e ka se be gabohlale go hlahloba pego ya phihlelo ya gagwe?

Ka mo go swanago, ke gabohlale gore o hlahlobišiše bodumedi. Ge e ba o le mokgatlong o itšego wa bodumedi, ge e le gabotse o beile bophelo bja gago bja moya diatleng tša wona. Se se akaretša ditebelelo tša gago tša go phologa.

Jesu o re neile molao wa motheo wa go bapiša Beibele le mekgwa ya bodumedi. O itše: “Sehlare se sengwe le se sengwe se tsebja ka dienywa tša sona.” (Luka 6:44) Ka mohlala, ge o lebelela bodumedi bjo itšego goba mokgatlo o itšego wa bodumedi, na o tšweletša dienywa tša mohuta mang? Na baetapele ba wona ba bodumedi ba gatelela kudu taba ya tšhelete? Na ditho tša wona di latela melao ya motheo ya Beibele mabapi le ntwa le boitshwaro? Sa mafelelo, na go na le bodumedi bjo bo ka botwago? Re go laletša gore o hlahlobe dihlogo tše di latelago.