Fa ye kɛ ɔwɔ kɛ bɛyɛ wɔ apelehyɛne wɔ ewule bie mɔɔ bahola ahu wɔ la anwo. Ɔwɔ kɛ ɛnyia dɔketa ne anu anwodozo bɔkɔɔ ɔluakɛ wɔ ngoane wɔ ɔ sa nu. Asoo nrɛlɛbɛ ɛnle nu kɛ ɛbazuzu anwubielɛ mɔɔ ɔlɛ la anwo?

Zɔhane ala a nrɛlɛbɛ wɔ nu kɛ yɛbazuzu ɛzonlenlɛ nwo kpalɛ a. Saa ɛwɔ ɛzonlenlɛ bie anu a, ɛnee ɔle kɛ ɛlɛfa wɔ ngoane wɔawula ɔ sa nu la. Anyelazo mɔɔ ɛlɛ kɛ ɛbanyia ngoane la boka ɛhye anwo.

Gyisɛse ɛmaa yɛ ngyinlazo mɔɔ baboa yɛ yeamaa yɛazuzu ɛzonlenlɛ nwo kpalɛ la. Ɔhanle kɛ: “Baka biala ma yɛɛ bɛfa bɛnwu ye a.” (Luku 6:44) Kɛ neazo la, saa ɛnea ɛzonlenlɛ anzɛɛ asɔne bie a, duzu ma a ɔso a? Asoo bɛ mgbanyima ne mɔ twe adwenle sie ezukoa zo titile? Asoo menli mɔɔ wɔ nu la di Baebolo ngyinlazo mɔɔ fane konle nee ɛbɛlabɔlɛ kpalɛ nwo la azo? Awieleɛ kolaa ne, asoo ɔwɔ kɛ ɛdie ɛzonlenlɛ bie ɛdi? Yɛsɛlɛ wɔ suzu edwɛkɛ mɔɔ doa zo la anwo.