Seʻi faapea o lea e te aafia i se maʻi tugā, ma ua manaʻomia ai se taotoga. E te manaʻomia se fomaʻi tipitipi e te mautinoa atoatoa e malamalama i le galuega o loo ia faia, auā e faalagolago i ai lou ola. Pe e lē o se gaoioiga atamai la lou iloiloina muamua o lona tomai faafomaʻi?

I se tulaga tutusa, o se mea atamai le iloilo ma le faaeteete o tapuaʻiga. Afai o loo e auai i se faalapotopotoga faalelotu, ua i o latou lima lou ola faaleagaga, e aofia ai ma lou mauaina o le ola e faavavau.

Na faailoa mai e Iesu mataupu silisili e tatou te iloa ai pe e moni le tapuaʻiga o loo tatou iai. Na ia fetalai: “E iloa laau taʻitasi i ona fua.” (Luka 6:44) Pe a e iloiloina se tapuaʻiga, po o lotu eseese, o ā fua o loo latou fuaina mai? Pe e faamuamua e o latou taʻitaʻi lotu le saʻilia o tupe? Pe e mulimuli ona tagata lotu i mataupu silisili e faatatau i faigātaua ma amioga tatau? Pe e iai se lotu e maufaatuatuaina? Seʻi o tatou iloiloina vala o loo sosoo mai.