Kasi Visopa Vikovwira Ŵanthu Kuŵa na Nkharo Ziwemi?
Sylvia uyo wakugwira nchito pa kacipatala kanyake wakati: “ Nkhaluta ku koleji uko kukaŵa ŵanthu ŵanandi awo ŵakatenge ŵakusopa. Kweni ŵakibiranga mayeso na kumwa munkhwala wakutimbanizga wongo. Visopa vyawo vikuŵawovwira yayi kuti ŵasinthe.”
Munthu munyake zina lake Lionel wakati: “Ŵanyane awo nkhugwira nawo nchito ŵakuteta ndipo ŵakuyowoya kuti ŵalwara uku ŵandalware. Ŵanthu aŵa ŵali navyo visopa vyawo, kweni ŵalije navyo nchito, ndipo vili nga ni katundu wakuwoneskera waka.”
Visopa vikuŵawovwira yayi ŵanthu ŵawo kuti ŵaŵe na nkharo ziwemi. Mazuŵa ghano, ŵanthu ŵanandi ŵakuwoneka nga ‘ŵakusopa Ciuta mwakujipeleka kweni ŵakukana nkhongono zake.’ (2 Timote 3:5) Nanga ni vyakucita vya ŵalongozgi ŵawo ni viwemi viŵi yayi. Kweniso ŵaliska ŵakutondeka kupa mberere zawo ulongozgi wa mu Malemba wakuti uŵawovwire kuŵa na nkharo yiwemi. Lekani nchakuzizika yayi kuti ŵanthu ŵanandi ŵakughanaghana kuti Ciuta walije navyo nchito ivyo ŵakucita.
KASI BAIBOLO LIKUSAMBIZGACI?
Baibolo likulongora kuti ivyo tikucita Ciuta vikumukhwaska comene. Kale usange Ŵaisrayeli ŵagalukira Ciuta, ‘ŵakamukaripiskanga mtima.’ (Salmo 78:40) Ndipouli, ‘kucanya kukuŵa cimwemwe cikuru’ usange munthu waleka viheni. (Luka 15:7) Para munthu wamanya mikhaliro yiwemi ya Ŵadada ŵithu ŵa kucanya, wakwamba kuŵatemwa comene, kweniso wakutemwa ivyo Ciuta wakutemwa na kutinkha ivyo wakutinkha.—Amosi 5:15.
KASI ŴAKABONI ŴA YEHOVA ŴAKUCITA WULI?
Nyuzipepara yinyake yikati: “Ŵakaboni ŵa Yehova ŵakuciska ŵanthu kuti ŵaŵenge na nthengwa zakukhora kweniso kuti ŵalimbikirenge nchito na kuŵa ŵakugomezgeka.” (The Deseret News of Salt Lake City, Utah, U.S.A.) Nyuzipepara iyi yikatiso: “Ŵanthu aŵa ŵakulondezga fundo izo zikuŵawovwira kuti ŵaŵenge na nkharo yiwemi. Ŵakumanya kuti kukhweŵa, kuloŵera, kugwiliskira nchito uheni munkhwala, njuga, uleŵi, uzaghali kweniso kugonana kwa ŵanalume panji ŵanakazi pera kukunanga ubwezi wawo na Yehova.”
Kasi ŵalongozgi ŵa visopa ŵakovwira ŵanthu ŵawo kulondezga fundo za mu Baibolo izo zingaŵawovwira kuŵa na nkharo yiwemi?
Kasi Ŵakaboni ŵa Yehova ŵakusanga candulo wuli cifukwa ca kusambira vya Ciuta? Sylvia uyo wazunulika mu nkhani iyi wakati: “Vimbundi ni vyakuzara comene mu mabizinesi ghanandi, ndipo nchipusu kuti munthu wambe kucitako. Kweni cifukwa cakuti nkhumanya umo Yehova * wakuwonera nkhani iyi, vyanovwira kuti nicite ico nchiwemi. Ndine wakukondwa kweniso nili na mtende wa mu mtima.” Sylvia wakuwona kuti kucita vinthu mwakukolerana na vigomezgo vyake, kwamovwira kuti waŵe na umoyo uwemi.
^ ndime 9 Yehova ni zina la Ciuta nga umo Baibolo likuyowoyera.
