Sylvia ni be’ ni ma maruwel u bang ni yima ayuweg e girdi’ riy nib m’ar e yog ni gaar: “Nap’an ni nggu un ko skul nib tolang, ma boor e piin ni gamad nga skul ni yad ma yog ni yad ba m’ing ko teliw rorad, machane nap’an ni yad ra fek e skeng u skul ma yad ma sasalap, maku yad ma fek e falay nib kireb. Dariy fan e teliw rorad u wan’rad.”

Reb e pumoon ni Lionel fithingan e yog ni gaar: “Piin ni gamad nga maruwel e yad ma call nga tabon e maruwel nga rogned ni yad ba m’ar, machane bin riyul’ riy e gathi yad ba m’ar. Ma bay e teliw rorad machane darur ted fan, ni bod ba chugum ni ma par u naun, machane danir maruwel ngay.”

Pi teliw e darur pied e athamgil nga laniyan’ boor e girdi’ ni ngar rin’ed e tin nib mat’aw ban’en. Boor e girdi’ e ngiyal’ ney ni “bay ur dake yad be liyor ngak Got” machane “bay ra pied keru’rad nga gelngin.” (2 Timothy 3:5) Pi tayugang’ ko teliw rorad e darur daged e bin nib mat’aw e kanawo’, maku danur fonownagrad ko tirok Got ban’en, ya nge yag ni ngar rin’ed e tin nib mat’aw. Dabisiy ni aram fan ni boor e girdi’ nib mich u wan’rad ni der ma lemnagrad Got.

Be tamilangnag e thin ko Bible ni Got e ma lemnag boch ban’en, mab ga’ fan e ngongol rodad u wan’. Nap’an ni togopuluw piyu Israel ngak Got kakrom mar “kirebniged laniyan’.” (Psalm 78:40) Machane, “ba ga’ e felfelan’ ni yira tay u tharmiy” u nap’an nra thilyeg be’ e ngongol rok nib kireb. (Luke 15:7) Nap’an nra fel’ u wan’ be’ pi fel’ngin e Chitamangidad nu tharmiy, ma ra gel e t’ufeg rok ngak, ma ra k’aring ni nge t’uf rok e pi n’en nib t’uf rok Got, me fanenikay e pi’ n’en ni ma fanenikay Got.​—Amos 5:15.

Rogon e thin u reb e shimbung e gaar, “Pi Mich Rok Jehovah e yad ma ayuweg e girdi’ ni nge fel’ e tha’ u thilrad girdien e tabinaw rorad, mar nanged rogon ni ngar ayuweged e girdi’, mar manged e girdi’ ni yad ba yul’yul’. Girdi’ ko re teliw nem e ba mich u wan’rad ni mathoy tamagow nge chingaw nge falay nib kireb ni yima fek, nge gosgos ni yima fek e salpiy riy, nge ngongol ndarngal nge par ko pumoon nge pumoon ara par ko ppin nge ppin e rayog ni nge kirebnag e tha’ u thilrad Got.”​—Deseret News of Salt Lake City, Utah, U.S.A.

Faanra fil e Pi Mich murung’agen pi fel’ngin Got, ma uw rogon nrayog ni nge ayuwegrad? I weliy Sylvia ni “salpiy ni yima fek u fithik’ e sasaliyeb” e ban’en nib ga’ ni yima rin’ ko maruwel ni bay rogon ko tafalay. Miki yog ni gaar: “Ba mom rog ni nggu un ko biney e ngongol. Machane bochan ni kug nang rogon e lem rok Jehovah * u murung’agen e re n’ey e ke ayuwegneg ni nggu rin’ e tin nib mat’aw. Kug felfelan’, me ke yag ni nggu pirieg e bin riyul’ e gapas.” Ke mich u wan’ Sylvia ni bochan ni be fol ko thin nu Bible, ma ke yag ni nge fel’ rogon e yafas rok.