Nagaulikid gid bala si Jehova sa aton, ukon wala sia sing labot sa mga nagakatabo sa mga tawo sa sini nga kalibutan? Makapalipay ang sabat sang Biblia sa sina nga pamangkot. Nagaulikid gid ang Dios sa mga tawo, kag luyag niya nga mangin malipayon kita. Kada adlaw ginahatagan niya ang mga tawo—bisan ang mga wala nagapasalamat sa iya—sing madamo nga pagpakamaayo. Binagbinaga ang ginsiling ni apostol Pablo.—Basaha ang Binuhatan 14:16, 17.

Ginsilingan ni Pablo ang pumuluyo sang siudad sang Listra nga mga indi sumilimba sang Dios: “Sa nagligad nga mga kaliwatan gintugutan [sang Dios] ang tanan nga pungsod nga maglakat sa ila mga dalanon, bisan pa wala gid niya ginpabay-an ang iya kaugalingon nga wala sing pamatuod bangod naghimo sia sang maayo, nga nagahatag sa inyo sang ulan gikan sa langit kag sang mapatubason nga mga panag-on, nga nagahatag sang bugana nga kalan-on kag nagapuno sang inyo tagipusuon sang kasadya.” Ano ang buot silingon sini sa mga tagpalamati ni Pablo?

Nahangpan dayon sang mga taga-Listra ang ginsiling ni Pablo. Bahin sila sang komunidad nga bugana ang pananom kag nagaistar sa rehiyon nga matambok ang duta kag bugana ang tubig. Pero, ginpahanumdom sila ni Pablo nga ang Dios amo ang Ginhalinan sang ulan kag mabungahon nga panag-on. Gani, kada nagaani sila sing bugana kag nagakaon sang manamit nga pagkaon, nagabenepisyo sila sa kaayo sang Dios.

Ang ginsiling ni Pablo sa mga taga-Listra nagatudlo sa aton sang pila ka importante nga leksion parte kay Jehova nga Dios.

Ginhatagan kita ni Jehova sang kahilwayan sa pagpili. Talupangda nga gintugutan ni Jehova ang mga tawo sa tanan nga pungsod nga “maglakat sa ila mga dalanon.” Ang isa ka reperensia para sa mga translator sang Biblia nagasiling nga ini nga ekspresyon nagakahulugan nga “maglakat sa kon ano ang ila luyag” ukon “himuon kon ano ang sa banta nila nga pinakamaayo.” Wala ginapilit ni Jehova ang bisan sin-o nga simbahon sia. Ginhatagan niya kita sing kahilwayan sa pagpili—ang ikasarang nga magdesisyon kon ano ang himuon naton sa aton kabuhi.—Deuteronomio 30:19.

Luyag ni Jehova nga makilala naton sia. Wala niya ginpabay-an “ang iya kaugalingon nga wala sing pamatuod,” siling ni Pablo. Ang ginsambit kaina nga reperensia nagsiling nga ini nga prase mahimo nagakahulugan nga “maathag nga ginpakita niya sa mga tawo kon ano nga klase sia sang Dios.” Ginapamatud-an sang mga tinuga sang Dios ang iya “di-makita nga mga kinaiya,” lakip ang kaayo, kaalam, gahom, kag gugma. (Roma 1:20) Ginapakilala pa gid ni Jehova ang iya kaugalingon sa Biblia. (2 Timoteo 3:16, 17) Indi bala maathag nga luyag gid niya nga makilala naton sia?

Luyag ni Jehova nga mangin malipayon kita. Sia ang “nagahatag sang bugana nga kalan-on kag nagapuno sang inyo tagipusuon sang kasadya,” siling ni Pablo. Bisan ang makasasala nga wala nagakilala kay Jehova mahimo makakaon kag malipay. Pero, luyag sang Dios nga matigayon naton ang matuod kag wala sing katapusan nga kalipay. Posible lamang ini kon tun-an naton ang kamatuoran parte sa iya kag iaplikar ini sa aton kabuhi.—Salmo 144:15; Mateo 5:3.

Tanan kita nagabenepisyo sa kaayo ni Jehova kada adlaw. Ngaa indi magtuon sing dugang pa kon paano mo mapakita ang imo pagpasalamat sa Dios nga ‘nagahatag sang bugana nga kalan-on kag nagapuno sang imo tagipusuon sang kasadya’?