Yehowa utuku bushuwa ututabalela anyi? Peshi katu umvuila bantu ku ntatu idi ibakuata pa buloba anyi? Diandamuna didi Bible ufila bua nkonko eyi didi ditukolesha. Nzambi udi bushuwa utabalela bantu ne mmusue bua tuikala ne nsombelu muimpe. Dituku dionso udi witabila bantu nansha badi bashadile bua kumonabu ne kuanyishabu bunene bua bulenga buende. Tukonkononayi mêyi a mupostolo Paulo.​—Bala Bienzedi 14:16, 17.

Pavua Paulo wakula bua bantu ba mu tshimenga tshia Luseta bavua kabayi batendelela Nzambi, wakamba ne: “Mu bikondo bia kale [Nzambi] wakanyishila bisamba bionso bua kulonda njila ivuabi bisue. Kadi wakafila tshijadiki bua kuleja tshidiye padiye wenza malu mimpe, unulokeshila mvula mu diulu, unupesha mivu ya biakudia, uwuja mioyo yenu tente ne biakudia ne disanka.” Mêyi a Paulo aa avua umvuija tshinyi kudi bantu bavua bamuteleja?

Bantu ba mu Luseta bavua mua kumvua bipepele bulelela buvua mu mêyi a Paulo. Bualu bamue bavua babidime ne bavua bansombele mu buloba buvua ne bufuke ne tshitelela tshimpe. Kadi, anu muvua Paulo mubavuluije, Nzambi ke muena mvula ne bikondo bia bufuke. Nunku, misangu yonso ivuabu banowa ne bapeta biakudia bia bungi, Nzambi ke uvua ubaleja bulenga buende.

Tudi tupeta malongesha a bungi a mushinga mukole pa bidi bitangila Yehowa Nzambi mu mêyi avua Paulo muambile bena Luseta.

Yehowa mmutupeshe bukokeshi bua kudisunguila malu. Tumanye ne: Yehowa wakanyishila bisamba bionso “bua kulonda njila ivuabi bisue.” Mukanda kampanda udi wakula bua bakudimunyi ba Bible udi wamba ne: tshiambilu etshi tshidi mua kumvuija “kuenza malu mudibu basue” anyi “kuenza tshidi bobu nkayabu bamona ne: ntshimpe.” Yehowa katu wenzeja muntu bua kumutendelela to. Mmutupeshe bukole bua kudisunguila tshitudi basue.​—Dutelonome 30:19.

Yehowa mmusue bua tumumanye. Paulo udi wamba ne: “wakafila tshijadiki bua kuleja tshidiye.” Mukanda utuvua batele kuulu eku udi wamba ne: tshiambilu etshi badi mua kutshikudimuna kabidi ne: “wakaleja bantu patoke bua bamanye ne: udi Nzambi wa mushindu kayi.” Bintu bidi Nzambi mufuke bidi tshijadiki tshinene tshia “ngikadilu yende idi kayiyi imueneka,” bu mudi bulenga, meji, bukole ne dinanga. (Lomo 1:20) Yehowa mmuleje malu a bungi adi amutangila mu Bible. (2 Timote 3:16, 17) Kabienaku bimueneka patoke ne: mmusue bua tumumanye anyi?

Yehowa mmusue bua tuikale ne disanka. Paulo udi wamba ne: Udi uwuja mioyo yetu “tente ne biakudia ne disanka.” Nansha muntu mubi udi kayi muanji kumanya Yehowa udi mua kudia biakudia too ne padiye uukuta, ne udi mua kupeta ndambu wa disanka mu nsombelu wende. Kadi, Nzambi mmusue bua tupete disanka dilelela ne dia kashidi. Tudi mua kudipeta anu tuetu balonge bulelela budi bumutangila ne tubutumikile mu nsombelu wetu.​—Musambu 144:15; Matayi 5:3.

Tuetu bonso tudi ne diakalenga dia kumoma bulenga bua Yehowa dituku dionso. Kuenaku mua kulonga malu a bungi adi atangila mushindu uudi mua kuleja dianyisha kudi Nzambi udi uwuja muoyo webe “tente ne biakudia ne disanka anyi?”