Talaga kasin iyaansakit itayo nen Jehova, o anggapoy pibabali tod paniirap na totoo? Makapaligliwa so ebat na Biblia ed satan ya tepet. Iyaansakit na Dios iray totoo, tan labay ton na-enjoy tayoy bilay. Inagew-agew ton ipapanengneng ed totoo—anggan saramay agmangaapresya—so agnaparaan ya kamaongan to. Imanoey imbaga nen apostol Pablo.—Basaen so Gawa 14:16, 17.

Oniay imbaga nen Pablo ed saray taga syudad na Listra ya agmandadayew ed Dios: “Diad apalabas iran kailalakan et inabuloyan [na Dios] so amin a nasyon a gawaen day labay da, anggaman diad tua et agto inabuloyan ya anggapoy mamaneknek a sikatoy nanggawa na maong, a mangiiter ed sikayo na uran manlapud tawen tan mabunga iran panaon, tan mamepenek a maong ed kapusoan yo diad panamegley na naakan tan maabig a panliliket.” Antoy labay ya ibaga na satan ya imbaga nen Pablo ed sikara?

Agla kaukolan na saray totood Listra so mananap na ebidensya pian napruebaan ya tuay ibabaga nen Pablo. Manaayam irad lugar ya say anapan na totoo et panagdalus. Mabunay dalin tan agproblemay danum. Balet, singa ed impaimano nen Pablo, say Dios so Lapuan na uran tan mabunan panaon. Kanian kada no dakel so naani da tan mananam so panangan da, minanabang irad agnaparaan ya kamaongan na Dios.

Diad saman ya imbaga nen Pablo ed saray taga Listra, wala ray naaralan tayon importantin leksion nipaakar ed si Jehova a Dios.

Inikdan itayo nen Jehova na abilidad a manggaway sarilin desisyon. Tandaan ya inabuloyan nen Jehova iray totood amin a bansa ya “gawaen day labay da.” Unong ed sakey a reperensya parad saray managpatalos na Biblia, nayarin say labay ya ibaga na saya et “akauley iran mandesisyon” odino “gawaen da no antoy iisipen dan duga.” Agpipiliten nen Jehova so siopaman ya mandayew ed sikato. Inikdan to itayo na abilidad a manggaway sarilin desisyon.—Deuteronomio 30:19.

Labay nen Jehova ya sikatoy nakabat tayo. Oniay imbaga nen Pablo: “Agto inabuloyan ya anggapoy mamaneknek a sikatoy nanggawa na maong.” Unong ed samay reperensyan abitla, nayarin ipatalos iyan “impanengneng na Dios ed totoo iray kualidad to.” Nanengneng ed saray pinalsa na Dios iray “agnanengneng a kualidad to,” kaiba lay kamaongan, karunongan, pakayari, tan aro. (Roma 1:20) Dakel ni ray impaamta nen Jehova nipaakar ed sarili to diad Biblia. (2 Timoteo 3:16, 17) Agta paneknek iratan ya labay ton sikatoy nakabat tayo?

Labay nen Jehova ya maliket itayo. Inkuan nen Pablo ya sikato so “mamepenek a maong ed kapusoan” tayo. Anggan saray makasalanan ya agmanisiad si Jehova et napepesel tan makakalikna met na liket. Balet labay na Dios ya nagamoran tayoy tua tan agmanampot ya liket. Posible labat itan no aralen tayo ray katuaan nipaakar ed sikato tan iyaplika tayo iratan ed bilay tayo.—Salmo 144:15; Mateo 5:3.

Inagew-agew itayon minanabang ed kamaongan nen Jehova. Aral mo sirin no panon mon nipanengneng so pisasalamat ed Dios ya “mamepenek a maong ed kapusoan” tayo.