?Olsem wanem? ?Yu tu yu talem tok ya taem yu luk ol pija long ol niufala magasin? Oli jusum gud ol naesfala pija mo ol foto from we oli blong tijim yumi. Oli mekem yumi tingting. Oli givhan long yumi taem yumi rerem Wajtaoa blong yumi, mo taem yumi givim ansa long miting.

Yu traem tingbaot from wanem oli jusum blong putum wan pija long stat blong ol stadi blong Wajtaoa. ?Pija ya i blong soemaot wanem? ?Hem i joen olsem wanem wetem taetel mo stamba vas? Taem yu luk ol narafala pija, i gud we yu tingbaot se oli joen olsem wanem wetem stadi, mo laef blong yu.

Brata we i mekem Wajtaoa Stadi bambae i askem long olgeta we oli lesin blong oli tokbaot wan pija, mo blong oli talem samting we oli lanem long pija ya. Samtaem, i gat wan smol tok long pija, we i soemaot haf we pija ya i joen long hem. Be long sam narafala pija, brata nomo i jusum wanem haf we pija i joen wetem. Long rod ya, evriwan bambae oli harem gud from ol pija ya we oli jusum gud blong tijim ol man long ol samting we i stap long Baebol.

Wan brata i talem se: “Taem mi ridim wan naesfala haf finis, ol pija oli olsem swit krim antap long wan kek.”