Kɛ́ onine shɛ Buu-Mɔɔ hee ko nɔ ni okwɛ mfonirii ni yɔɔ mli lɛ, ani okɛɔ nɔ ko ni tamɔ nɛkɛ? Yiŋtoo ko hewɔ akɛ mfonirii fɛfɛji ni agboɔ deŋme kɛtsuɔ he nii lɛ woɔ mli lɛ. Mfonirii lɛ yeɔ amɛbuaa wɔ ni wɔsusuɔ nii ahe, ni wɔnuɔ sane lɛ shishi jogbaŋŋ. Amɛhe baa sɛɛnamɔ waa kɛji wɔmiisaa wɔhe yɛ shĩa kɛha Buu-Mɔɔ Nikasemɔ lɛ kɛ agbɛnɛ beni wɔmiiha saji ahetoo.

Akɛ nɔkwɛmɔnɔ lɛ, susumɔ mfonirii ni yɔɔ nikasemɔ fɛɛ nikasemɔ shishijee lɛ he okwɛ. Mɛni he ekɔɔ? Te ekɔɔ nikasemɔ lɛ saneyitso lɛ loo ŋmalɛ ni nikasemɔ lɛ damɔ nɔ lɛ he ehaa tɛŋŋ? Susumɔ bɔ ni mfonirii krokomɛi lɛ kɔɔ sane ni asusuɔ he lɛ he, kɛ bɔ ni ebaanyɛ eye ebua bo yɛ oshihilɛ mli lɛ he.

Esa akɛ Buu-Mɔɔ Nikasemɔ nɔkwɛlɔ lɛ aha asafoŋbii lɛ hegbɛ ni amɛwie mfonirii lɛ eko fɛɛ eko he, ni amɛtsɔɔ bɔ ni ekɔɔ nikasemɔ lɛ he, kɛ bɔ ni amɛná he sɛɛ amɛha. Bei komɛi lɛ, aŋmaa nɔ ko yɛ mfoniri lɛ he kɛtsɔɔ kuku pɔtɛɛ ni wieɔ he. Shi kɛ́ atsɔko lɛ, nɔkwɛlɔ lɛ baanyɛ ahala kuku ni kɛ́ ashɛ nɔ lɛ ebaaha awie mfoniri ko he. Kɛ́ awie mfonirii lɛ ahe yɛ nɛkɛ gbɛ nɔ lɛ, ebaaha mɔ fɛɛ mɔ anyɛ afee saji ni yɔɔ Nyɔŋmɔ Wiemɔ lɛ mli lɛ ahe mfoniri yɛ ejwɛŋmɔŋ.

Nyɛmi nuu ko wie akɛ, ‘Kɛ́ mikane sane ko ni yɔɔ miishɛɛ yɛ wɔwoji lɛ amli lɛ, mfonirii lɛ ji nɔ ni haa etaa mitsuiŋ waa.’