“Pọ́n Lehe Yẹdide lọ Yọnwhanpẹ Do!”

Whla nẹmu wẹ hiẹ ko yí hogbe enẹlẹ zan to whenue a mọ linlinnamẹwe yọyọ de yí? Lẹndai de wutu wẹ yẹdide po fọto whanpẹnọ lẹ po do nọ yin awuwlena po sọwhiwhe po. Nuyizan mẹpinplọn tọn ehelẹ nọ gọalọna mí nado lẹnnupọndo nuhe mí to pinplọn ji bo ze míde do ninọmẹ lọ mẹ. Yé sọgan gọalọna mí taun to whenue mí to awuwlena Oplọn Atọ̀họ̀-Nuhihọ́ lọ tọn podọ to whenue mí to mahẹ tindo to e mẹ.

Di apajlẹ, eyin a to awuwlena hosọ oplọn tọn de, pọ́n yẹdide he tin to bẹjẹeji hosọ lọ tọn. Etẹwẹ e dohia? Kanṣiṣa tẹwẹ e tindo hẹ hosọ lọ kavi wefọ he ji hosọ lọ sinai do? Lẹnnupọndo lehe yẹdide he tin to hosọ lọ mẹ lẹ sọgan gọalọna we nado mọnukunnujẹ oplọn lọ mẹ po lehe e gando gbẹzan towe go do ji.

Mẹhe nọ deanana Oplọn Atọ̀họ̀-Nuhihọ́ lọ tọn dona na dotẹnmẹ mẹmẹsunnu lẹ nado dọho gando yẹdide dopodopo go, podọ nado dọ lehe e gando nupinplọn lọ go do kavi lehe e yinuwado yé ji do. To whedelẹnu, nudọnamẹ kleun de nọ zọnpọ hẹ yẹdide lọ he nọ gọalọ nado yọ́n hukan he tindo kanṣiṣa hẹ yẹdide lọ. Mẹhe nọ deanana oplọn lọ sọgan de hukan he yọ́n hugan nado dọhodo yẹdide dopodopo ji. Gbọnmọ dali, mẹlẹpo na mọaleyi to gigọ́ mẹ sọn nuplọnmẹ he tin to Ohó Jiwheyẹwhe tọn mẹ lẹ mẹ.

Mẹmẹsunnu de dọmọ, “To whenue mẹde hia hosọ dagbe de godo, yẹdide lẹ nọ hẹn nuplọnmẹ hosọ lọ tọn họnwun na ẹn dogọ.”