Yikando yingapi wa uyunga nonkango odo ndi o tantere wopeke apa wa penwine sirongwa sosipe somoRuhungu? Mafano gomawa aga ava tura mosifo esi kugatulira mo nositambo. Ago yirongeseso eyi ayi tu vatere tu gazadare ko nokukundama malizuvho getu. Ago kuvatera unene po nsene kuna kuliwapaikira Elirongo lyoRuhungu nokukalihameka mo.

Pasihonena, gazara ko kweyi ava horowere efano eli ali kara ketamekero lyankenye sirongwa selirongo. Yisinke ali likida? Ngapi omu ali likwatakana nosiparatjangwa sosirongwa ndi etjangwa lyosiparatjangwa? Kwankenye efano, gazara omu ali likwatakana nosirongwa esi vana kuzogera ntani neparu lyoge.

Mupitisili gElirongo lyoRuhungu ga hepa kugava mpito kovanavazinyetu va kumburure ko kwankenye efano, va faturure omu lina likwatakana nosirongwa ndi omu lina kuvakundama. Poyiruwo yimwe konhi zefano kutjanga ko nonkango edi dina kwatakanesa efano olyo noparagarafu zongandi. Ano pamwe, mupitisili kuvhura a horowore paragarafu na zogera kumwe nefano lyongandi. Monkedi zangesi, navenye ngava gwanena mo uwa yipo va mone momagano gawo yirongwa eyi ya kara moNonkango daKarunga.

Munazinyetugara gumwe kwa uyunga asi: “Konyima zokuresa sirongwa sosiwa, mafano kuninkisa sirongwa oso va si hafere unene.”