“Ha! Siswaniso se Kwa Bunde”

Kana mu kile mwa bulela cwalo kamba ku bulelela batu ba bañwi manzwi a fahalimu ao ka nako ye ne mu bala magazini ye nca ya hatiso ya ku ituta ya Tawala ya Mulibeleli? Ku lukisa maswaniso a mande kuli a be mwa limagazini za luna ki musebezi o mutuna hahulu mi ku na ni libaka maswaniso ao ha beiwanga mwa limagazini. Maswaniso ao a lukiselizwe ku lu tusa ku bona mo lu kona ku tusezwa ki litaba ze lu ituta. Maswaniso ao a kona ku lu tusa sihulu ka nako ye lu itukiseza Tuto ya Tawala ya Mulibeleli ni ka nako ye lu alaba kwa mikopano.

Ka mutala, nako kaufela ha mu itukiseza taba ye ñwi ya mwa Tawala ya Mulibeleli, mu nyakisisange siswaniso se si kwatuko ni toho ya taba. Siswaniso seo si bonisañi? Ki kabakalañi ha ne si ketilwe? Siswaniso seo si swalisana cwañi ni toho ya taba kamba ni liñolo fo i tomile tuto? Mi kona mu ka nyakisisa mo maswaniso a mañwi a mwa taba yeo a kona ku mi tuseza ku utwisisa ze itutiwa ni mo li kona ku mi tuseza litaba zeo mwa bupilo bwa mina.

Muzwale ya zamaisa Tuto ya Tawala ya Mulibeleli u swanela ku fa mizwale ni likaizeli kolo ya ku alaba fa siswaniso ni siswaniso se si mwa taba ye itutiwa. Mizwale ni likaizeli ba kona ku talusa mo si swalisanela siswaniso seo ni taba ye itutiwa ni mo ba ikutwela ka za siswaniso seo. Fokuñwi, kwa boniswanga nombolo ya paragilafu mwa litaba ze ñozwi bukaufi ni siswaniso. Taba yeo i tusa muzamaisi ku ziba nako ye nde ya ku nyakisisa siswaniso. Haiba kuli ha ku si ka boniswa nombolo ya paragilafu ye zamaelela ni siswaniso seo, muzamaisi wa Tuto ya Tawala ya Mulibeleli u ka bona fo si swanela ku nyakisisezwa siswaniso seo. Ka ku eza cwalo, kaufelaa luna lu ka tusiwa ki maswaniso a lu tusa ku bona ze lu ituta mwa Linzwi la Mulimu.

Muzwale yo muñwi naa bulezi kuli, “Maswaniso a fumanehanga mwa litaba ze lu ituta, a swana sina nyanisi mwa busunso. Maswaniso ao a tahisanga kuli lu ikole hahulu taba ye itutiwa.”