“Tala Kino Kifwatulo!”

Le i misunsa inga yokodi munene bino binenwa nansha kunena’byo bantu bakwabo kitatyi kyowaputwile nimelo mipya ya dino dipepala? Bifwatulo bilumbuluke ne mafoto alupwilwe biyampe, adi’mo mwanda wa kitungo kampanda. I bingidilwa bya bufundiji bitukwasha tulanguluke. Bikokeja kwitukwasha bininge shi twiteakanya ne kulondolola ku Kwifunda kwa Kiteba kya Mulami.

Kimfwa, langulukila pa mwanda mwine utudilwe kifwatulo ku ngalwilo kwa kishinte ne kishinte kya kwifunda. Le kitufundija bika? Le i muswelo’ka okikwatañene na mutwe wa mwanda wa kishinte nansha na kisonekwa powimanine? Langulukila ne pa muswelo ukwatañene bifwatulo bikwabo na mutwe wa mwanda ubandaulwa ne na bobe būmi.

Mwendeji wa Kiteba kya Mulami ukasangela kupa kipwilo mukenga wa kwisambila pa kifwatulo ne kifwatulo, kulombola muswelo obikwatañene na mutwe wa mwanda ne abyo bine bibafundija bika. Kyaba kimo, tubilembwa tudi munshi mwa kifwatulo tulombola musango mwine okikwatañene nao. Ku mutamba mukwabo kadi, mwendeji ubwanya kutonga musango wamona amba i muyampe kwisambila pa kifwatulo ne kifwatulo. Mu uno muswelo, bonso bakamwena ne pa mfulo mu mwingilo onso waingilwe mwanda wa kukwasha mutangi alangulukile pa myanda idi mu Kinenwa kya Leza yotwefunda.

Tutu umo unena’kyo uno muswelo amba: “Pa kupwa kutanga kishinte kilembwe senene, bifwatulo bibwejanga ku buya bwakyo.”