Kua lagafiha e talahau pihia a koe ki a koe ni po ke ke he falu he mogo ka veveu e koe e fufuta fakaako foou he Ko e Kolo Toko? Kua lahi mahaki e magaaho mo e gahua ke tauteute e tau fakatino mo e tau ata fulufuluola, ti fai kakano aoga lahi kua fakaaoga i loto he tau mekasini. Kua ha ha i ai ke aamotia e tau loto ha tautolu mo e ke lagomatai a tautolu ke manamanatu ke he fakaakoaga. Maeke ai ke lagomatai lahi a tautolu ka tauteute mo e ka fai vala ke he Fakaakoaga Kolo Toko.

Ma e fakatai, he tau magaaho takitaha ka tauteute a koe he vala tala, manamanatu ke he kakano ne fifili e fakatino fakamua, ko e fakatino he tapa he mataulu. Ko e heigoa ne fakakite i ai? Ko e ha ne fifili ai? Felauaki fēfē mo e mataulu he vala tala po ke matapatu kupu tohi? Ti manamanatu ke he puhala he falu fakatino he vala tala kua lagomatai a koe ke maama e matakupu ne fakatutala ki ai mo e puhala ka lagomatai ai a koe ke he moui haau.

Ko e takitaki he Fakaakoaga Kolo Toko kua lata ke fakaatā e tau matakainaga ke tali hagaao ke he tau fakatino takitaha. Maeke a lautolu ke fakamaama e puhala kua hagaao ki ai e fakatino ke he fakaakoaga mo e puhala ne logona hifo a lautolu ki ai. He falu magaaho, ko e fakamaamaaga ne tū he fakatino ne matutaki ke he numera he paratafa. Lagomatai he mena nei e tagata ne takitaki ke iloa e magaaho ke fakatutala hagaao ke he fakatino. Ka nakai fai numera he paratafa he fakamaamaaga, maeke he tagata takitaki ke fifili e magaaho kua lata ke fakatutala e fakatino. Ke he puhala nei, to aoga katoatoa oti mai he tau fakatino kua lagomatai a tautolu ke kitia e tau fakaakoaga mai he Kupu he Atua.

Taha e matakainaga taane ne talahau ko e tau fakatino he vala tala kua tuga e mena fakahumelie. Kua fakaauatu foki e mitaki he vala tala kua fitā he tohia.