Ke ka makga a makae moo o ilego wa bolela mantšu ao o le noši goba wa a botša batho ba bangwe ka morago ga go bula tokollo e mpsha ya makasine wo? Diswantšho tše di kgahlišago le dinepe tšeo di tšweleditšwego ka šedi e kgolo di tsenywa ka dimakasineng tša rena ka morero. Ke dithušo tša go ithuta tšeo di dirago gore re nagane re be re ntšhe maikwelo a rena. E ka ba tše di holago kudu ge re lokišetša Thuto ya Morokami gomme re tšea karolo go yona.

Ka mohlala, naganišiša ka lebaka leo seswantšho seo se beilwego mathomong a sehlogo se ilego sa kgethelwa sehlogo seo. Se re ruta eng? Se sepedišana bjang le sehlogo seo goba lengwalo la sehlogo? Ge e le mabapi le diswantšho tše dingwe ka moka, nagana kamoo di sepedišanago ka gona le sehlogo seo o ithutago sona gotee le ka moo di kgomago bophelo bja gago.

Moswari wa Thuto ya Morokami o tla nea phuthego sebaka sa gore e bolelele seswantšho se sengwe le se sengwe, e bolele kamoo se sepedišanago ka gona le sehlogo seo goba kamoo se e kgomago ka gona e le motho ka o tee ka o tee. Maemong a mangwe, go ba le mantšu ao a sepedišanago le seswantšho gomme a bontšha gore se hlalosa serapa sefe. Go a mangwe, moswari wa thuto a ka dira phetho ya gore seswantšho se sengwe le se sengwe se ka ahlaahlwa gakaone ge go badilwe serapa sefe. Ka tsela ye, bohle ba tla holega ka botlalo go tšwa go seo se dirilwego go thuša mmadi go bona seo re se rutwago ka Lentšung la Modimo.

Ngwanabo rena yo mongwe o beile taba ye ka gore: “Ka morago ga go bala sehlogo se se kgahlišago, diswantšho tšeo di lego ka go sona di tsefiša taba le go feta.”