Eia taime toou tuatua anga i te reira e ki tetai ke me akara koe i tetai itiu ou o teia makatini? E akakoroanga tetai i tukuia mai ei te au tutu manea. Ka tauturu te reira ia tatou kia akamanako meitaki i te apii. E ka tauturu katoa ia tatou me akapapa e me paupau no te Apii Punanga Tiaki.

Ei akaraanga, akamanako ana i te tumu i ikiia ai te tutu mua o te au atikara apii. Eaa ta te reira e akaari maira? Eaa te pirianga o te tutu ki te upoko tuatua me kore ki te irava akatumuia o te atikara? Akamanako katoa i te pirianga o te au tutu ke ki te tumu tuatua e uriuriia ra, e ki toou oraanga.

Kia oronga te akaaere o te Apii Punanga Tiaki i tetai tuatau no te putuputuanga kia tuatua no runga i te au tutu, kia akakite mai i te pirianga o te tutu ki te apii me kore akapeea te reira te akakeu anga ia ratou. Tetai taime, e tataanga tetai i raro ake i te tutu te akakite maira i te numero o te parakarapa. No tetai au tutu, penei ka iki te akaaere apii e ko teea parakarapa ka uriuriia. Na roto i teia mataara, ka puapingaia te katoatoa mei te au tutu te ka tauturu ia tatou kia kite i te au apiianga i roto i te Tuatua a te Atua.

Akakite mai tetai taeake e: “Me oti au i te tatau i tetai atikara meitaki, riro te au tutu ei akareka atu i te atikara.”