“Amulange Zifwanikiso!”

Zili zyongaye ziindi nomwakaambide kale majwi aali atala aawa naa kwaambila bamwi ciindi nomwakajalula magazini mpya ya Ngazi Yamulindizi yakwiiya? Zifwanikiso zibotu alimwi azifwoto zyalo zibambwa cakubikkila maano zilijisi makanze. Zyakabambilwa kutuyiisya alimwi akutugwasya kuyeeya. Kwaambisya zilakonzya kutugwasya ciindi notulibambila alimwi anotupa bwiinguzi mu Ciiyo ca Ngazi Yamulindizi.

Mucikozyanyo, amuyeeye kaambo cifwanikiso cakusaanguna mucibalo cakwiiya cimwi acimwi ncocakasalilwa kuti cibikkwe mucibalo eeco. Ino citondezya nzi? Ino ceendelana buti amutwe wacibalo naa alugwalo lwamutwe? Kujatikizya cifwanikiso cilicoonse, amuyeeye mboceendelana amakani aabandikwa alimwi ambocikonzya kumugwasya mubuumi bwanu.

Mweendelezi wa Ciiyo ca Ngazi Yamulindizi uyakupa baswiilizi coolwe cakupandulula cifwanikiso cili coonse, kwaamba mboceendelana aciiyo naa mbocabagwasya kubagama. Zimwi ziindi, ansi aacifwanikiso inga kuli majwi masyoonto aatondezya muncali uugaminide uupandulula cifwanikiso eeco. Zimwi ziindi weendelezya ciiyo ulasala muncali mocikonzya kugwasya kapati kubandika cifwanikiso eeco. Munzila eeyi, boonse bayakugwasyigwa kapati azifwanikiso izyabikkwa kugwasya basikubala kweezeezya ziiyo zijanika mu Jwi lya Leza.

Mukwesu umwi wakaamba kuti: “Wamana kubala cibalo icakalembwa kabotu, zifwanikiso zilayungizya bubotu bwacibalo.”