¿La makglit wanita uma tachuwin o waninita atanu latamanin akxni akxilha akgtum xasasti revista? Lu xalilakgatit dibujo chu fotografías nema liminkgo revista ni kaj akglakgwa kawilikanit. Umakgolh kinkamakgtayayan wi tuku xatlan nalakpuwanaw chu wi tuku kinkamamakgkatsiniyan. Chu tlan limaklakaskinaw akxni lakkaxwiliyaw Takgalhtawakga xla Makatsinina chu akxni mastaya mincomentario ktamakxtumit.

Kalimaxtu kilhtamaku xlakata nalakpuwana tuku xlakata laksakkanit xapulana dibujo nema limin akgatunu artículo nema natalikgalhtawakga. ¿Tuku limasiya? ¿La kgalhmakgtaya título o texto niku takilhti artículo? Alistalh kaʼakxilhti amakgapitsi dibujos chu kakgalhskikanti la tamalakxtumikgo tema xla artículo chu milatamat.

Tiku pulalinkgo Takgalhtawakga xla Makatsinina nakamaxki talakaskin tiku wilakgo ktamakxtumit nalichuwinankgo la tamalakxtumikgo dibujo tuku lichuwinan artículo o nawankgo la kamakgtaya uma dibujo. Kmakgapitsi dibujo wi akgtum nota nema wan tuku párrafo kgalhmakgtaya; kʼatanu wa tiku pulalima takgalhtawakga nawan tukuya párrafo nalichuwinankan. Chuna putum natalitamakgtayakgo dibujos nema lhuwa liskujkan xlakata xTachuwin Dios wi tuku nakamasiyani tiku likgalhtawakgakgo.

Chatum tala chuna wa: «Akxni klikgalhtawakgakgonita akgtum artículo nema lu tlan la tsokgkanit, dibujo wa tuku tlakg tlan limakgatsikan».