Kasi nkhalinga apo muli kujifumbapo panji kufumba ŵanji fumbo ili mukati mwajura magazini yiphya ya Gongwe la Mulinda? Vithuzithuzi vyakutowa ivyo vikuŵa mu magazini ghithu vikujambulika na cilato. Ni vyakusambizga ndipo vikutovwira kuti tighanaghanenge kweniso kuti tiŵe nga ni para nase tikaŵapo apo vinthu ivyo tikusambira vikacitikanga. Vikovwira comene pakunozgekera na pakuzgorapo pa Sambiro la Gongwe la Mulinda.

Mwaciyelezgero, ghanaghaniranipo cifukwa ico cithuzithuzi cakwamba cikaŵikikira pa nkhani yiliyose yakusambira pa mpingo. Kasi pa cithuzithuzi ici pali vici? Kasi cikukolerana wuli na mutu wa nkhani panji lemba ilo pajintha mutu wa nkhani? Ghanaghaniranipo umo cithuzithuzi cilicose cikukolerana na nkhani iyo mukusambira ndiposo ivyo imwe mukusambirapo pa cithuzithuzi ico.

Wakucitiska Sambiro la Gongwe la Mulinda wapelekenge mpata ku ŵabali na ŵadumbu kuti ŵayowoyepo pa umo cithuzithuzi cilicose cikukolelerana na nkhani iyo, panji umo cakhwaskira waliyose payekha. Nyengo zinyake pa cithuzithuzi pakuŵa mazgu agho ghakulongora ndime iyo yikukolerana na cithuzithuzi ico. Nyengo zinyake, wakucitiska sambiro ili wangawona ndime izo ŵategherezgi ŵangalongosorapo cithuzithuzi cilicose. Para vingaŵa nthena, tose tisangenge candulo cikuru na ivyo vyanozgeka kuti vitovwire kuŵa na cithuzithuzi ca visambizgo vya mu Mazgu gha Ciuta.

Mubali munyake wakati: “Para naŵazga nkhani yakukondweska, vithuzithuzi vikovwira kuti niconthekenge mtima comene.”