No no ḓivhudza lungana zwenezwo kana u zwi vhudza vhaṅwe musi ni tshi vula thero ntswa ya uno magazini? Zwifanyiso zwo nakaho na zwinepe zwo dzheniswaho nga vhuronwane, zwo vhewa nga tshiitisi. Zwi thusa u funza nahone zwi ri ita uri ri humbule na u pfa. Zwi nga ri thusa nga maanḓa musi ri tshi lugiselela na u fhindula kha Pfunzo ya Tshiingamo.

Sa tsumbo, humbulani uri ndi ngani tshifanyiso tsha u thoma tsha thero iṅwe na iṅwe tsho dzheniswa kha yeneyo thero. Tshi sumbedza mini? Tshi tshimbidzana hani na tshiṱoho tsha thero kana luṅwalo lwa tshiṱoho? Kha tshifanyiso tshiṅwe na tshiṅwe, humbulani nga ha nḓila ine tsha tshimbidzana ngayo na tshiṱoho tshine tsha khou haseledzwa na kha vhutshilo haṋu.

Mufari wa Pfunzo ya Tshiingamo u ḓo ṱoḓa u ṋea muṅwe na muṅwe tshivhidzoni tshibuli tsha u amba nga ha tshifanyiso tshiṅwe na tshiṅwe, u itela u vhona uri tshi shuma hani kha yeneyo ngudo kana tshi ḓo kwama hani muṅwe na muṅwe tshivhidzoni. Kha maṅwe masia, tshifanyiso tshi na maipfi ane a ri vhudza uri ndi tsha phara ifhio. Kha zwiṅwe zwifanyiso, mufari wa pfunzo ya Tshiingamo a nga khetha uri ndi ifhio phara yo faneleaho ine ya nga haseledzwa ho katelwa tshifanyiso. Nga zwenezwo, vhoṱhe vha ḓo vhuyelwa nga vhuḓalo nga zwe zwa itwa u itela u thusa muvhali uri a vhone nga maṱo a muhumbulo ngudo dzine dza wanala Ipfini ḽa Mudzimu.

Muṅwe wahashu wa tshinnani o amba uri, “Nga murahu ha u vhala thero yo ṅwalwaho zwavhuḓi, zwifanyiso zwi engedza dzangalelo ḽa yeneyo thero.”