¿Jaytéen tsʼoʼok a tuklik wa a waʼalik tiʼ u maasil bukaʼaj jatsʼutsil le dibujoʼob yéetel le fotoʼob ku taasik junpʼéel túumben revistaoʼ? Yaʼab meyaj ku beetaʼal utiaʼal u tsʼaʼabaloʼob teʼ revistaʼoboʼ. Ku beetkoʼob u tuukul máak yéetel ku kʼuchul tu puksiʼikʼal máak. Jach jeʼel u yáantkech ken a líiʼsuba yéetel u Xookil U Pʼíich Tulumil Kanan bey xan ken comentarnakech.

Jóoʼs u súutukil utiaʼal a tuklik baʼaxten tsʼaʼab le dibujo wa le foto tu káajbal cada xookoʼ. ¿Baʼax ku yeʼesik? ¿Baʼax yaan u yil yéetel u kʼaabaʼ le xook wa yéetel le teksto yaan tu káajbal le xookoʼ? Tsʼoʼoleʼ ilawil le uláakʼ dibujoʼob yéetel fotoʼob ku taaskoʼ. Ken tsʼoʼokkeʼ tukult baʼax yaan u yiloʼob yéetel le xookoʼ bey xan yéetel bix jeʼel u yáantkech ichil a kuxtaleʼ.

Le máax nuʼuktik u Xookil U Pʼíich Tulumil Kananoʼ unaj u chaʼik u yaʼalik le sukuʼunoʼob baʼax yaan yil le dibujoʼob wa fotoʼob yéetel le xookoʼ wa u yaʼalikoʼob baʼax ku kankoʼob. Yaan kʼiineʼ kabal tiʼ le dibujo wa fotooʼ yaan junpʼéel tsolajil ku túuxtik máak tiʼ junpʼéel xóotʼol. Yaan horaeʼ letiʼe máax nuʼuktik le xook ken u yil tiʼ baʼax xóotʼolil kun úuchul comentar tiʼ le dibujo wa fotooʼ. Beyoʼ tuláakal yaan u jóoʼsik u yutsil le dibujoʼob yéetel le fotoʼob ku tsʼáaikoʼob kuxtal tiʼ le baʼax ku kaʼansik le Bibliaoʼ.

Juntúul sukuʼuneʼ tu yaʼalaj: «Kex jatsʼuts tsʼíibtaʼanil junpʼéel xookeʼ, ku maas jatsʼutstal yoʼolal le dibujoʼob yéetel le fotoʼob ku taaskoʼ».