Panda biaje maʼ huaniʼluʼ ca diidxaʼ riʼ, o panda biaje huayaʼbuʼ ni sti binni ora guxheluʼ ti revista nacubi casi ni naazuʼ riʼ. Riquiiñeʼ stale tiempu ne stipa para gaca ca dibuju ne ca foto sicarú ni reeda lu ca revista stinu, ne nuu xi pur nga reeda cani. Racanécani laanu guiníʼ ique chaahuinu lu ni cazíʼdinu ne rucaacani laanu guni sentirnu ni runi sentir ca binni ca. Ne zanda gacanécani laanu ora maʼ cadúʼndanu revista Torre stiʼ ni rapa ne ora guicábinu lu ca guendaridagulisaa.

Galán cueeluʼ tiempu para guiníʼ íqueluʼ xiñee gulícabe dibuju ni reeda lu primé tema stiʼ cada revista. Xidé caniʼni. Ximodo ridxaaga dibuju riʼ tema stiʼ ti revista o ximodo ridxaaga ni textu ni zeeda ra ruzulú tema ca. De racá maʼ zanda gúʼyaluʼ xcaadxi dibuju ni zeeda lu tema stini ne guníʼ ique ximodo ridxaaga ni tema ni cayuundaluʼ ne ximodo zanda gacaneni lii lu xquendanabániluʼ.

Xpinni Cristu ni ruundané laanu Torre stiʼ ni rapa ra ridagulisaanu zanábabe laanu gusiénenu modo ridxaaga ca dibuju ca ne tema cadúʼndanu ne ximodo zanda gacanécani laanu. Nuu biaje reeda caadxi diidxaʼ cueʼ ca dibuju riʼ ne rábicani laanu xi párrafo nga cusiene de laani. Peru xcaadxi la? maʼ xpinni Cristu ni cayuundané laanu revista riʼ nga guiníʼ xi párrafo gusiénenu cani. Ora gúnibe zacá, guiranu zazíʼdinu stale cosa de ca dibuju o ca foto riʼ ne ziénenu xii nga racalaʼdxiʼ Stiidxaʼ Dios gusiidiʼ laanu.

Ti xpinni Cristu guníʼ: «Ora maʼ biindaʼ binni tobi de ca tema nabé sicarú riʼ, ca dibuju ne ca foto stini nga cani rudii xnixe tema ca».