1. Ítara kei meha apostolugu, ka giñe wabusenrubei wasubudirun?

GUMUMÉMEELI meha lani Hesusu ministeriu ubouagu, ani memeniha meha hanigi lani disipulugu hasubudiruni kaba lan asusereda ámuñegü. Ligíati fiuraü lubéi dan lubaragiñe lounwen, aba hálügüdüni gádürü hádangiñe lani apostolugu: “Ídaba [...] lasusereda sun le ani kaba [...] liseinin bagiribudun ubouagun, luma lagumuchagüle ubóu?” (Mat. 24:3; Mar. 13:3). Aba lóunabuniña Hesusu lau líchuguni limigifen profesía le wadarirubei lidan kapítulu 24 luma 25 tidan liliburun Matéu. Lidan profesía le, ariñaga lumuti Hesusu kaba lan buga sügǘ wariha. Wéiriti lisudinin sun le lariñagubei woun, lugundun wéiriti giñe wabusenrun wasubudiruni le lunbei lasuseredun ámuñegü.

2. a) Eibu lásügürün dan, ka katei furangutimabei gunfuranda wamani? b) Kaba ǘrüwa álügüdahani wakutiha?

² Eibu lásügürün dan, ani lábugiñe furíei, aturiaha hamaali lubúeingu Heowá profesía le líchugubei Hesusu libügürü lagumuhóun dan. Ka uagu hadügei? Lun furangutima lan gunfuranda hamani kaba lan dan lagunfulira le lariñagubei. Lun wafuranguagüdüni ida liña lan aganwoundeina lan gunfurandaü le ibiha wamaalibei, akutiha waméi ǘrüwa álügüdahani le: Ídaba lagumesera “saragu asufuriruni”? Ídaba laguseragüdaña Hesusu gürigia keisi “mudún” o “gábara”? Ani ídaba liabin o lachülüra Hesusu? (Mat. 24:21; 25:31-33).

3. Lidan dan le sügühalibei, ka meha gunfuranda wabéi libügürü lidaani lasuseredun “saragu asufuriruni”?

³ Barühadiwa meha saragu irumu asaminara luagu gumese lan saragu asufuriruni dan le lagumeserunbei Furumiñeti Wuribu Wéiriti lidan irumu 1914, ani ‘dürügua lani’ Heowá “dan [lánina wuribu] ligía” lidan irumu 1918 lun gachansin hamá kristiánugu [anuadirúaaña] ha añahaguabaña ubouagu lun hapurichihani uganu buiti houn sun néchanigu (Mat. 24:21, 22). Ani lárigiñe lanme lásurun apurichihani, ábame lagünrinchawagun ubóu le lábugiñebei lubafu Satanási. Ligíati saminawa lubéi meha ñeinbei lan ǘrüwa fánreinti lidan lidaani saragu asufuriruni: le furumiñeti lidan irumu 1914 darí  lumoun irumu 1918, lárigiñe ábame ladüraawagun asufuriruni lúmagiñe irumu 1918 lun lubaruaguóun, lagumuchameti lidan Arümahedón.

4. Ka katei furangutimabei gunfuranda wamani libügürü lani Hesusu profesía?

⁴ Gama lumoun, lárigiñeya wakutihani, ariha wamaali luagu anihein lan aban fánreinti lídangiñe lani Hesusu profesía libügürü lagumuhóun dan agunfuliruti bián wéiyaasu (Mat. 24:4-22). Lumúanrugu Hudéa lidan furumiñeti sígulu lagunfulira luagu furumiñeti wéiyaasu, leti libiaman lídanba wadaani lagunfulira ani lídanbei sun ubóu. Adügati gunfurandaü le lun lafurangudun saragu katei. *

5. a) Ka dan hénrenguti agumeserubei lidan irumu 1914? b) Ídabuga lagunfulira lidaani asufuriruni lidan furumiñeti sígulu?

⁵ Aba giñe wíchugun fe mama lan lidan irumu 1914 lagumesera lagunfulirun furumiñeti fánreinti lánina saragu asufuriruni. Ka uagu? Ladüga arufudati profesía tídangiñeti Bíbülia luagu mámaba lan lau hawuribuhan néchanigu hámagua lagumesera saragu asufuriruni, lubaragiñe lira, lagumeseruba lau lábürühouniwa luagun sun relihión le mama inarüniti. Ligíati mama lubéi meha lagumeserun saragu asufuriruni sügǘ burí le agumeserubei lidan irumu 1914, lubaragiñe lira, ‘lagumeseharügügili meha le lunbei lasufurirúniwa’ (Mat. 24:8). Gúnfuliti profesía luáguti ‘asufuriruni’ le, furumiñeti wéiyaasu Herusalén luma Hudéa lúmagiñe irumu 33 darí irumu 66 lárigiñe lidaani Hesusu.

6. Kaba sügǘ arufudei lagumeserun saragu asufuriruni?

⁶ Kaba arufudei lagumeserun saragu asufuriruni? Ru lumuti Hesusu profesía le: “Abürühati meha profeta Danieli luagu katei iyereeguti le gagünrinchagúagüdadibei; danme le harihin chülühali lan katei ligía lidoun fulasu le sánduti ‘le aliihabei, gunfurandalá’, hámeti Hudeabaña, lúntime hanurahan luagun burí wübü” (Mat. 24:15, 16). Le furumiñeti lagunfulirun profesía luáguti ‘achülürǘni lidoun fulasu sánduti’, susereti lidan irumu 66 lárigiñe lidaani Hesusu, dan le hábürühanbei rómana (“katei iyereeguti”) luagun uburugu Herusalén luma tuagun ténpulu to ñeinboun (fulasu le meha sándubei houn huríu). Lagunfuliruba profesía le luagu libiaman wéiyaasu danme le lábürühan Óundaruni hani Néchanigu (“katei iyereeguti” le uguñebei weyu) luagun sun relihión  mama inarüniti le ídanbei hariñaga lílana hawougua kristiánugu hamá (relihión burí le harihibei lílana kei sánduti) luma luagun le líbiri relihión le tídangiñebei Babilónia to Wéiriboun. Afuranguagüdawati giñe lidan Arufudúni 17:16-18 ida luba lan agünrinchawagúni le. Lauba sügǘ le lagumesera saragu asufuriruni.

7. a) Lidan furumiñeti sígulu, ida liña lagunfulirun füramasei libügürü ñéinbaña lan buga ‘asalbarutiña’? b) Ka gayarabei wagurabun lasusereduba lan ámuñegü?

⁷ Ariñagati giñe Hesusu: “Ladüraagubei [Bungiu dan ligía]”. Lidan irumu 66 lárigiñe lidaani Hesusu lagunfulira profesía le luagu furumiñeti wéiyaasu, dan le ‘hadüraagunbalin’ rómana hábürühan luagun Herusalén. Ligía gayara lubéi meha hanurahan kristiánugu anuadirúaaña Herusaléngiñe luma Hudeagiñe, ladüga ítararügübei buga gayara lan ‘hasalbarun’ (aliiha huméi Matéu 24:21; Mal. 3:17). Ligíati, ka gayarabei wagurabun lasusereduba lan lídanme saragu asufuriruni? “Ladüraagubei” lan Heowá tábürühan Óundaruni hani Néchanigu luagun relihión mama inarüniti, luéi tagumuchun lau relihión le inarüniti úara luma le mámabei inarüniti. Ladügüba katei le lun hasalbarun lumutuniña Bungiu.

8. a) Kaba burí katei asusereda lárigiñe lagunfulirun furumiñeti fánreinti lánina saragu asufuriruni? b) Según warihin lun, kaba dan heresibirei hagumuhóun kristiánugu anuadirúaaña hafayeiruaha sielu? (Ariha huméi abürüdǘni.)

 ⁸ Kaba asusereda lárigiñe sügühali lanme furumiñeti fánreinti lánina saragu asufuriruni? Arufudati le lariñagubei Hesusu ñeinbei lan fiú dan le lunbei ladurarun darí lagumeserun Arümahedón. Kábati asusereda lidan burí dan le? Darí wamuti óunabagülei lidan Esekiéli 38:14-16 luma Matéu 24:29-31 (aliiha huméi). * Lárigiñeme katei le, warihubei Arümahedón, sügǘ le genegeguabei luma lagünrinchawagún Herusalén lidan irumu 70 lárigiñe lidaani Hesusu (Mal. 4:1). Lídanba Arümahedón lagumucha saragu asufuriruni, sügǘ “le úagili [aban] libe lúmagiñe lagumeserun ubóu” (Mat. 24:21). Lárigiñe lagumuchun, ábame lagumeserun Larúeihan Kristu le lánina Milu irumu.

9. Ka lánibei profesía luáguti saragu asufuriruni efekütu wawagu?

⁹ Ruti profesía luáguti saragu asufuriruni dǘgüdaguaü woun. Ka uagu? Ladüga chóurugüda lumuti woun luagu meberesenga lanme lénrengunga  leme úmati wagagibudagua, herederuba lan lumutuniña Heowá, kei sétanu, wínwanñu lárigiñe óunwenbu asufuriruni (Aruf. 7:9, 14). Ani lóugiñe sun katei, gúndaaguagüda lumutiwa larufudubei lan Heowá, lidan Arümahedón, ligía lan garichabei lun larúeihan ani ladügüba lun inebewa lan liri le sándubei (Sal. 83:18; Ese. 38:23).

10. Lidan meha dan le sügühalibei, ka meha gunfuranda wabéi libügürü dan le ídanba lubéi haguseragüdüwa mudún hama gábara?

¹⁰ Guentó akutiha waméi ídaba lan lagunfulira amu fánreinti lídangiñe lani Hesusu profesía: hénpulu luáguti haguserawagüdün mudún hama gábara (Mat. 25:31-46, TNM). Saminatiwa yebe meha haguserawagüdüba lan gürigia keisi mudún o gábara lidan sun dan le lunbei ladurarun lagumuhóun dan lúmagiñe irumu 1914 lun lubaruaguóun. Aba yebeti wasaminarun sun lan gürigia ha máhabaña lun uganu luáguti Larúeihan Bungiu ha óunwegutiña lubaragiñe lagumeserun saragu asufuriruni, hóunweguba lan keisi gábara: sin emenigini luagu háguyuguba lan.

11. Ka uagu subudi wabalin magumeserun lan haguserawagüdün gürigia keisi mudún o gábara lidan irumu 1914?

¹¹ Lidan irumu 1995, akutihaya tumuti Garüdia Atalaya Matéu 25:31, ñein lubéi lariñaga: “Danme nagiribudun, au le Wügüri Garaüwarügüti, ubouagun, niábinba kei urúei geyegu ánheligu nau, ábame nañuurun luagu nala lau uéiriguni”. Ariñawagúaali lurúeitehali lan Larúeihan Bungiu Hesusu lúmagiñe irumu 1914, lau sun lira, mañuurunti ‘luagu lala lau uéiriguni lun laguseragüdüniña sun gürigia’ lidan irumu ligía (Mat. 25:32; konparárü huméi luma Danieli 7:13). Gama lumoun, tuágutima ligaradan Hesusu keisi aguseragüdüti ladimurehóua lidan hénpulu hawaguti mudún hama gábara (aliiha huméi Matéu 25:31-34, 41, 46). * Kei meha magumeserun lubalin Hesusu luadigimari keisi aguseragüdüti houn sun gürigia lidan irumu 1914, magumeserungili giñe haguserawagüdün gürigia keisi mudún o gábara. * Ídabati lagumesera laguseragüdün Hesusu?

12. a) Ídaba lagumesera Hesusu adügei luadigimari kei aguseragüdüti houn sun néchanigu? b) Ka burí sügǘ uágubei ladimurehóua lidan Matéu 24:30, 31 luma Matéu 25:31-33, 46? (Ariha huméi abürüdǘni.)

 ¹² Arufudati lani Hesusu profesía libügürü lagumuhóun dan luagu lagumeserubei lan luadigimari keisi aguseragüdüti houn sun néchanigu lárigiñerügüme lagumuchúniwa lau relihión mama inarüniti. Kei buga wafurendeiruni lidan  párafu 8, adimurehati Matéu 24:30, 31 luagu fiú sügǘ leme lunbei lasuseredun lidan dan ligía. Dan le wakutihani bérusu burí le, rútiwa fe genegegua lan sügǘ burí le uágubei ladimureha Hesusu lidan profesía le luma le lariñagubei lidan hénpulu hawaguti mudún hama gábara. Lidan profesía le, ariñagati lachülürüba lan Wügüri Garaüwarügüti lau uéiriguni geyegu hau ánheligu; hóundarawaguba lan gürigia ha lílana sun fulasu ligibugiñe; hame lúnbaña haguserawagüdün kei mudún ‘hiñuragubei hachügü’ ladüga habihiba lan “ibagari magumuchaditi”. * Ánhañati ha aguserawagüdütiña kei gábara “hasakürihaba”, ladüga híchuguba lan fe luagu ‘lagidarúa lan habagari’ hawéi lun sun dan (Mat. 25:31-33, 46, TNM).

13. a) Ídaba laguseragüdaña Hesusu gürigia keisi mudún o gábara? b) Ka lánibei gunfurandaü le efekütu lidan ligaburi warihini wani ministeriu?

¹³ Kábati wasaminara guentó? Laguseragüdübaña lan Hesusu gürigia lídangiñetiña sun néchani keisi mudún o gábara danme le lachülürün lidan saragu asufuriruni. Lárigiñe, ábame ‘lagidaruni habagari’ gábara hawéi lun sun dan lidan Arümahedón, sügǘ leme ídanba lubéi lagumucha saragu asufuriruni. Ka lánibei gunfurandaü le efekütu lidan ligaburi warihini wani ministeriu? Íderagua lumutiwa lun wíchugun fe weiri lan lisudinin wawisaruniña gürigia, ladüga gachansingiña lun hasansiruni ligaburi hasaminan luma lun héibugun lidan “üma [muruguati] le anügübei [...] lidoun ibagari le magumuchaditi” (Mat. 7:13, 14). Uguñe weyu, gayarati harufudun gürigia ítara haña lan kei mudún o kei gábara. Gama lumoun, mabulieida waméi luagu lídanba lan saragu asufuriruni  lasubudirúa anhein le lubéi lúgubu mudún lan aban gürigia o gábara lan. Ligíati, anihein buiti resun wama lun wasigirun íchiga chansi houn sun gürigia ha wayara lun haganbuni uganu buiti luáguti Larúeihan Bungiu óunaba hagíame lun.

14, 15. Ka gádürü bérusu tídangiñeti Bíbülia ídanbei ladimurehóua luagu liabin Kristu keisi aguseragüdüti líteme?

¹⁴ Larufuduba san wakutihani lani Hesusu profesía ámuya wéiyaasu luagu megei wamá wasansiruni ligaburi gunfuranda wamani amu burí sügǘ súdiniti? Ígira wamá lun lafuranguagüdüni profesía le.

¹⁵ Luágutima le lunbei lasuseredun lidan lagumuhóun dan luma luagu saragu asufuriruni le yarafaalibei, ladimureha Hesusu lidan profesía le bürüwañubei lidan Matéu 24:29–25:46. Ñein, adimurehati Hesusu widü wéiyaasu luagu liabin o lachülürün. * Ani ariñagati libügürü saragu asufuriruni: “Harihi[bei] niábinya, au le Wügüri Garaüwarügüti, lidan huánriñu”, “ibidiñeti hun kaba lan oura niabin, au le Habureme”, “leme oura magaradahan humá, ligíaba niabin, au le Wügüri Garaüwarügüti”. Ani lidan hénpulu le labahüdagubei hawagu mudún hama gábara, ariñagati Hesusu: “Danme nagiribudun, au le Wügüri Garaüwarügüti, [...] lau uéiriguni” (Mat. 24:30, 42, 44; 25:31). Layahuhaña gádürügubei bérusu le luagu liabin Kristu keisi aguseragüdüti líteme. Halíaba wadarirei le líbiri gádürü wéiyaasu le ídanbei ladimureha Hesusu lidan lani profesía luagu liabin?

16. Ka amu bérusu tídangiñeti Bíbülia adimurehabei luagu lachülürün Hesusu?

¹⁶ Ariñagati Hesusu libügürü Musu Úaraguati ani Gunfurandati: “Gúndaabei musu ligía danme le liabin [o, según abürüdǘni le tídanbei Traducción del Nuevo Mundo, “danme chülühali”] iyubudiri anhein ladarira agunfulira lau lifisiute”. Ariñagati Hesusu lidan hénpulu hawaguti diisi nibureingiña: “Danti añangüra lan [...] agañeiha gasi, ligía liabin [“lachülürün adari”, El nuevo testamento griego palabra por palabra (NTGPP)]”. Lidan hénpulu luáguti seinsu, ariñagati Hesusu: “Saragu dan lárigiñe, aba lagiribudun iyubudiri”. Lidan ligiaméme hénpulu, aba lariñagun iyubudiri: “dan [...] hamuga nagiribudun [“nachülürün”, NTGPP], neresibiruni le nani” (Mat. 24:46; 25:10, 19, 27). Luagu ka dan libügürü lachülürün Hesusu uágubei ladimurehóua gádürü bérusu le?

17. Ka meha wasaminarubei lúmagiñe saragu dan libügürü achülürüni le uágubei ladimurehóua lidan Matéu 24:46?

¹⁷ Lidan dan le sügühalibei, ariñagatiwa meha tidan burí wani agumeiraguagüdüni luagu  lan liabin o lachülürün Hesusu lidan irumu 1918 ladimurehóua lidan gádürü bérusu le uágubei ladimurehóua lidan párafu disisi. Keisi hénpulu, adimureha wamá luagu le lariñagubei Hesusu luagu “musu úaraguati ani gunfuranda[ti]” (aliiha huméi Matéu 24:45-47). Saminatiwa yebe meha ladimurehaña lan bérusu 46 luagu dan le lachülürünbei Hesusu lidan irumu 1918, dan le liábinbei arihei ida liña lan hamadagua kristiánugu anuadirúaaña luma Bungiu, ani ru lani Iyubudiri lumusun lun larihin lau sun lumegen lidan irumu 1919 (Mal. 3:1). Gama lumoun, lárigiñe wakutihani lani Hesusu profesía buidu buidu ariha wamaali mosu lan wasansiruni ligaburi gunfuranda wamani lóurate lasuseredun fiú katei lídangiñe le lariñagubei Hesusu lidan lani profesía. Ariha waméi ka lan uagu.

18. Ka gayarabei wasaminaruni luagu lachülürün Hesusu lárigiñe wakutihani sun le lariñagubei lidan lani profesía?

¹⁸ Lidan burí bérusu le lubaragiñebei Matéu 24:46, sun dimurei achülürüni le bürüwañubei ñein súnwandan ladimurehaña lan luagu lidaani lanügüni Hesusu lasiadihan Bungiu lídanme saragu asufuriruni (Mat. 24:30, 42, 44). Akutiha wamaali giñe buga lidan  párafu 12, luagu ladimurehaña lan giñe Matéu 25:31 luagu ligiaméme dan leme ídanba lubéi lachülüra Hesusu líteme lun lagunfulirun lau lasiadihan Bungiu. Ligíati, gayara lubéi wasaminarun luagu lídanba lanme lidaani saragu asufuriruni líteme lagunfulira profesía le lídanbei Matéu 24:46, 47 luáguti liabin Hesusu lun líchuguni musu úaraguati lun larihin lau sun lumegen. Le linarün katei, arufudati sun le lariñagubei Hesusu lidan lani profesía libügürü kada aban lídangiñe widü wéiyaasu le ídanbei ladimurehan luagu liabin, ladimurehaña lan luagu dan leme ídanba lubéi lagunfulira lau lasiadihan Bungiu lídanme saragu asufuriruni líteme.

19. Ka asansiruni lidan ligaburi gunfuranda wamani burí profesía le akutiha wamaalibei ani kaba burí álügüdahani wóunaba lidan le líbiri arütíkulu?

¹⁹ Águyuguagüda waméi le furendei wamaalibei. Dan le wagumeserunbei akutihei arütíkulu le, adügǘwati ǘrüwa álügüdahani libügürü ídaba lan lagumesera fiú sügǘ. Lidan furumiñeti lúgaaru, ariha wamuti magumeserun lan saragu asufuriruni lidan irumu 1914, lubaragiñe lira, lagumeseruba danme le tábürühan Óundaruni hani Néchanigu tuagun Babilónia to Wéiriboun. Lárigiñe, aba wakutihani ka lan uéigiñe mama lubéi lidan irumu 1914 lagumesera Hesusu aguseragüdaña gürigia keisi mudún o gábara, lubaragiñe lira, lagumeseruba lan lídanme saragu asufuriruni. Lagumuhóun, akutiha wamaali ka lan uagu mama lubéi lidan irumu 1919 líchigei Hesusu musu úaraguati lun larihin lau sun lumegen, lubaragiñe lira, lídanba saragu asufuriruni lasusereda lira. Ligíati, ligiaméme lóunabagülebei ǘrüwagubei álügüdahani le: lasusereduba ǘrüwagubei katei le lidan saragu asufuriruni. Ida liña lasansiruni gunfurandaü le ligaburi gunfuranda wamani amu burí katei libügürü hénpulu luáguti musu úaraguati ani gunfuranda ligía? Ani ka efekütu lánibei luagu ligaburi gunfuranda wamani amu burí hénpulu le labahüdagubei Hesusu le burí lunbei lagunfulirun lidan lidaani lagumuchagüle ubóu? Lounabúba álügüdahani burí súdiniti le lidan le líbiri arütíkulu.