1. Met sia mochen silei usun chék ekkewe aposel?

 ÁN Jesus angangen afalafal wóón fénúfan a fetál ngeni an epwele wesiló, me néún kewe chón káé ra fókkun mochen silei met epwe fis ngeniir lón fansoun mwer. Iwe, fitu chék rán me mwen án Jesus epwele máló, fémén me lein néún kewe aposel ra eisini: “Inet epwe fis ekei mettoch meinisin? Kopwe pwäri ngenikem asisilen . . . ewe fansoun sopolan.” (Mat. 24:3; Mark. 13:3) Jesus a pélúweni ar kapas eis ren an eáni eú oesini mi tichik, mi mak lón Mateus sópwun 24 me 25. Lón ena oesini, Jesus a fós usun chómmóng mettóch mi lamot repwe fis. Minne a apasa a pwal fókkun weneitikich pún sia pwal mochen silei met epwe fis lón fansoun mwach.

2. (a) Lón ekkewe fite fite ier ra ló, met sia achocho ngeni ach sipwe weweéchúti? (b) Ikkefa ekkewe úlúngát kapas eis sipwele pélúweni?

² Ren fite fite ier néún Jiowa kewe chón angang ra káéfichi fiti iótek án Jesus we oesini usun ekkewe ránin lesópwólóón. Ra achocho ar repwe wewefichiti ineet atun epwe pwénúetá ekkewe mettóch Jesus a fós usun. Sipwele pélúweni úlúngát kapas eis ren ach sipwe kúna ifa usun ach weweiti ekkena mettóch a fen ffatoló. Ineet epwe poputá ewe riáfféú mi lapalap? Ineet Jesus epwe apwúngaló ika ié ekkewe “sip” me ekkewe “kuuch”? Ineet Jesus epwe “war,” are feito?​—Mat. 24:21; 25:31-33.

3. Met sia fen piin weweiti usun ewe riáfféú mi lapalap me ineet atun a fis?

³ Ren fite ier, sia lúkú pwe ewe riáfféú mi lapalap a poputá lón ewe ier 1914 lupwen a fis ewe Áeúin Maunen Fénúfan nge Jiowa a “amochomochala ekewe rän” atun ewe maun a kaúló lón 1918 pwe ekkewe mi kepit mi chúen nóm wóón fénúfan repwe tongeni afalafala ewe kapas allim ngeni chón ekkewe mwú meinisin. (Mat. 24:21, 22) Wesin ewe angangen afalafal, án Satan we mwú epwe taló. Weween pwe ewe riáfféú mi lapalap epwe wor úlúngát kinikin lón: Epwe wor  poputáán (seni 1914 tori 1918), epwe kaúló ren och fansoun (seni 1918 feiló), me epwe wesiló atun Armaketon.

4. Met sia mirititi a álisikich le pwal alapaaló ach weweiti án Jesus we oesini usun ekkewe ránin lesópwólóón?

⁴ Iwe nge, lupwen sia etittinasefáli án Jesus we oesini, sia mirititi pwe pwénútáán och kinikinin án Jesus we oesini usun ekkewe ránin lesópwólóón a weneiti ruu fansoun. (Mat. 24:4-22) Akkomw a pwénútá lón Jutea lón fansoun Jesus we me ekkewe aposel, nge epwe pwal wor pwénútáán wóón unusen fénúfan lón ach ei fansoun. Ach mirititi ena, a álisikich le alapaaló ach weweiti pwal fitu mettóch. *

5. (a) Menni fansoun weires a poputá lón 1914? (b) Ena fansoun a usun chék menni fansoun le atun ekkewe aposel?

⁵ Sia pwal mirititi pwe poputáán ewe riáfféú mi lapalap ese fis lón 1914. Pwata? Pún ekkewe oesini lón Paipel ra pwáraatá pwe lepoputáán ewe riáfféú mi lapalap epwe fis katalóón lamalam chofona, nge esap fen maun lefilen ekkewe mwú. Iwe, ekkewe mettóch mi fis lón 1914 “ra usun chök ekewe metek eman fefin a eäni me mwen an epwe nöünöüla,” nge esap ina poputáán ewe riáfféú mi lapalap. (Mat. 24:8) Ekkeei “metek” ra pwal wewe ngeni met a fis lón Jerusalem me Jutea seni ewe ier 33 C.E. tori 66 C.E.

6. Met esissillen poputáán ewe riáfféú mi lapalap?

⁶ Ifa esissillen poputáán ewe riáfféú mi lapalap? Jesus a apasa: “Ämi oupwe küna ewe ‘Mettoch mi Eniweniw’, ewe soufos Taniel a kapas usun. Epwe nom lon ewe leni mi pin. (Ewe chon aleani epwe weweiti met wewen ei.) Mürin chokewe mi nom Jutea repwe sütä won ekewe chuk.” (Mat. 24:15, 16) Lón ewe áeúin fansoun a pwénúetá ena kapas, ewe mwichen soufiun Rom (ina ewe “Mettoch mi Eniweniw”) a “nom lon ewe leni mi pin” lón ewe ier 66 C.E. atun a maun ngeni Jerusalem me ewe imwenfel (ina och leeni mi pin me ren ekkewe chón Jus). Nge pwénútáán ewe oesini mi kon lamot seni ena, ewe United Nations (ina ewe “Mettoch mi Eniweniw” lón ach ei fansoun) epwe “nom lon ewe leni mi pin”  lupwen epwe maun ngeni ekkewe tipitipin lamalamen Chón Kraist (mi pin me ren chókkewe mi pwisin eita ngeniir Chón Kraist) me pwal ekkewe lusun lamalam lón Papilon mi Lapalap. Ina ewe maun Pwärätä 17:16-18 a pwal fós usun. Ena mettóch a wewe ngeni poputáán ewe riáfféú mi lapalap.

7. (a) Ifa usun ekkewe aramas ra kúna manaw lón fansoun ekkewe aposel? (b) Met sia ésúkúsúkú lón fansoun mwach?

⁷ Jesus a pwal apasa pwe epwe ‘mochomochola’ ekkena rán. Lón ewe áeúin fansoun a pwénútá ewe oesini, ena mettóch a fis lón ewe ier 66 C.E. lupwen ekkewe soufiun Rom ra “amochomochala” ar maun ngeni Jerusalem. Mwirin, ekkewe Chón Kraist mi kepit lón Jerusalem me Jutea ra sú pwe repwe tongeni manaw. (Álleani Mateus 24:22; Mal. 3:17) Iwe, met sia ésúkúsúkú an epwe fis lón ewe riáfféú mi lapalap? Jiowa epwe “amochomochala” án ewe United Nations maun ngeni lamalam mi chofona pwe ewe lamalam mi enlet esap fitiir le kataló. Iei usun, néún Kot kewe aramas repwe kúna manaw.

8. (a) Ikkefa ekkewe mettóch repwe fis mwirin wesin ewe áeúin kinikin lón ewe riáfféú mi lapalap? (b) Ineet atun usun itá repwe unus ekkewe 144,000 le tolong lón ar feiéch lón láng? (Ppii ewe sópwósópwun pwóróus.)

 ⁸ Met epwe fis mwirin wesin ewe áeúin kinikin lón ewe riáfféú mi lapalap? Sia kúna seni met Jesus a apasa pwe epwe wor och fansoun mwen Armaketon epwe poputá. Ikkefa ekkewe mettóch repwe fis lón ena fansoun? Sipwe kúna pélúwen ena kapas eis me lón Isikiel 38:14-16 me Mateus 24:29-31. (Álleani.) * Mwirin ena, usun met a fis lupwen Jerusalem a taló lón 70 C.E., epwe fis Armaketon, ina ewe kinikin lón ewe riáfféú mi lapalap mi kon ssenúk eriáfféún. (Mal. 4:1) Ewe riáfféú mi lapalap kapachelong ewe maunen Armaketon epwe kkóló eriáfféún pwe ina och sókkun mettóch esaamwo “fis seni lepoputän fanüfan.” (Mat. 24:21) Lupwen a wes ena, epwele poputá án Kraist Nemenem Úkúkún Engeréú Ier.

9. Met meefien néún Jiowa kewe aramas usun án Jesus we oesini usun ewe riáfféú mi lapalap?

⁹ Ei oesini usun ewe riáfféú mi lapalap a kan  apéchékkúlakich. Pwata? Pún a alúkúlúkúkich pwe néún Jiowa kewe aramas, usun eú mwich, repwe manawewu seni ewe riáfféú mi lapalap, ese lifilifil ika met sókkun weires repwe kúna. (Pwär. 7:9, 14) Nge ewe ákkáeúin popun sia pwapwa, pún lón Armaketon Jiowa epwe epinaaló itan we me ánnetatá pwúngún an nemenem.​—Kölf. 83:18; Is. 38:23, NW.

10. Met sia piin lúkú usun ineet a fis ewe angangen kapwúng usun ekkewe siip me siike?

¹⁰ Ekieki usun fansoun pwénútáán pwal eú kinikinin án Jesus we oesini, ewe kapas áwewe usun kapwúngún ekkewe siip me ekkewe kuuch, are siike. (Mat. 25:31-46) Sia fen piin lúkú pwe ewe angangen apwúngaló ika aramas iir siip are siike a fis lón fansoun ekkewe ránin lesópwólóón seni ewe ier 1914 feiló. Sia ekieki pwe chókkewe mi oputa pwóróusen ewe Mwú me ra máló mwen poputáán ewe riáfféú mi lapalap, a fen pwúngúló pwe iir siike me resap tongeni manawsefál.

11. Met popun ewe angangen kapwúng ika ié ekkewe siip me ié ekkewe siike ese tongeni poputá lón ewe ier 1914?

¹¹ Lón ewe ier 1996, lón Ewe Leenien Mas, sia etittinasefáli Mateus 25:31, a apasa: “Lupwen Nöün Aramas epwe war lon lingan o chon läng meinisin repwe eti, epwe mot won an lenien motun king [“nemenem,” Agapé] mi ling.” Ena Leenien Mas a affata pwe Jesus a wiliti Kingen án Kot we Mwú lón 1914, nge lón ena atun ese “mot” wóón an leenien motun nemenem mi ling lón wisan we wisen emén Sou Kapwúng wóón “chon ekewe mwü meinisin.” (Mat. 25:32; apépé ngeni Taniel 7:13.) Iwe nge, lón ewe kapas áwewe usun ekkewe siip me ekkewe siike, a fós usun Jesus lón wisan we wisen Sou Kapwúng. (Álleani Mateus 25:31-34, 41, 46.) Pokiten Jesus esaamwo poputááni an angangen Sou Kapwúng wóón chón ekkewe mwú meinisin lón 1914, iwe, an angangen apwúngaló ika ié ekkewe siip me ié ekkewe siike ese pwal tongeni poputá lón ena ier. * Iwe, ineet chék epwe poputá án Jesus angangen kapwúng?

12. (a) Ineet Jesus epwe kerán féri ewe angangen Sou Kapwúng wóón chón ekkewe mwú meinisin? (b) Ikkefa ekkewe mettóch Mateus 24:30, 31 me Mateus 25:31-33, 46 ra fós usun?

 ¹² Án Jesus we oesini usun ekkewe ránin lesópwólóón a pwáraatá pwe epwe kerán wiseni ewe wis Sou Kapwúng wóón chón ekkewe mwú meinisin mwirin katalóón ekkewe lamalam mi chofona. Usun met sia fen fós usun lón  parakraf 8, ekkóch me lein ekkewe mettóch repwe fis lón ena fansoun ra mak lón Mateus 24:30, 31. Ika ka álleaniéchú ekkena wokisin, kopwe kúna pwe met Jesus a fós usun a léllé ngeni ekkewe mettóch mi fis lón ewe kapas monomon usun ekkewe siip me siike. Áwewe chék, ewe Néún aramas epwe war lón lingan me ekkewe chónláng, chón ekkewe mwú meinisin repwe mwichfengen, me chókkewe a pwúngúló pwe iir siip repwe ‘awenatä mökürer,’ pún repwe kúna “manau esemüch.” * (Ppii ewe sópwósópwun pwóróus.) Pwal och, chókkewe Jesus a apwúngaló pwe iir siike repwe “kechü” pún ra mirititi pwe repwele kúna “apwüng esemüch,” are málófóchofóch.​—Mat. 25:31-33, 46.

13. (a) Ineet Jesus epwe apwúngaló ika aramas iir siip are siike? (b) Pokiten ach weweiti ena, itá epwe met meefiach usun ewe angangen afalafal?

¹³ Iwe, met sia tongeni apasa mwirin ach etittina ekkena wokisin? Lupwen Jesus epwe war atun ewe riáfféú mi lapalap epwe apwúngaló ika chón ekkewe mwú meinisin iir siip are siike. Iwe, mwirin ena, lón Armaketon, lesópwólóón ewe riáfféú mi lapalap, ekkewe siike repwe málófóchofóch. Ifa usun ach weweiti ena mettóch a kkúú meefiach usun ach angangen afalafal? A álisikich le meefi úkúkún watteen lamoten ena angang. Me mwen esaamwo poputá ewe riáfféú mi lapalap, a chúen wor fansoun án aramas repwe tongeni siwili ar ekiek me poputá le aleni ewe al mi chékúkkún mi “ale ngeni manau  esemuch.” (Mat. 7:13, 14) Pwúngún pwe ikenái chómmóng aramas ra napanapeni napanapen siip are siike. Iwe nge, sipwe chechchemeni pwe esap mwo pwúngúló ika iir siip are siike tori ewe riáfféú mi lapalap. Ina minne a lamot ach sipwe achocho le afalafala aramas meinisin pwe repwe tongeni aúseling me etiwa pwóróusen ewe Mwú.

14, 15. Menni ekkewe rúáánú wokisin ra weneiti warotoon Kraist lón mwachkkan lón wisan we wisen Sou Kapwúng?

¹⁴ Ika sia etittinasefáli án Jesus we oesini, a ffat pwe mi lamot sipwe siwili ach weweiti ineet epwe pwénúetá pwal ekkóch mettóch. Sipwe kúna ffatéchún ren ach nengeni pwal ekkóch wokisin lón an we oesini.

¹⁵ Lón án Jesus we oesini mi mak lón Mateus 24:29–25:46, i a ákkáeúin fós usun met epwe fis lón ekkeei ránin lesópwólóón me atun warotoon ewe riáfféú mi lapalap. Fán walú Jesus a fós usun an “feito,” are war. * (Ppii ewe sópwósópwun pwóróus.) Iei met a apasa usun ewe riáfféú mi lapalap: “Repwe küna Nöün Aramas epwe feito won kuchu.” “Ousap silei lon meni rän ämi Samol epwe wareto.” “Nöün Aramas epwe war lon eu otun ousap ekieki ngeni.” Pwal och, lón an we kapas áwewe usun ekkewe siip me siike, Jesus a apasa: “Nöün Aramas epwe war lon lingan.” (Mat. 24:30, 42, 44; 25:31) Eú me eú ekkeei rúáánú pwóróus ra weneiti warotoon Kraist lón mwachkkan lón wisan we wisen Sou Kapwúng. Lón án Jesus we oesini ia a nóm ie ekkewe pwal rúáánú pwóróus usun an war?

16. Ikkefa ekkewe wokisin ra pwal kapas usun án Jesus feito are war?

¹⁶ Iei met Jesus a apasa usun ewe chón angang mi alúkúlúk me tipachem: “Feiöchün ewe chon angang, are an we masta a küna pwe a föri iei usun lupwen a war.” Lón an we kapas áwewe usun ekkewe fépwúl, Jesus a apasa: “Lupwen ra feila, ewe mwän apwüpwülü söfö a war.” Lón án Jesus we kapas áwewe usun ekkewe féún moni, a apasa: “Mürin fansoun langatam än ekewe chon angang we masta a liwinsefäl [“feito,” Kingdom Interlinear].” Lón pwal chék ena kapas áwewe, ewe masta a apasa: “Lupwen üpwe liwinsefäl [“feito,” Int.] üpwe angesefäli nei we moni fiti manauan.” (Mat. 24:46; 25:10,  19, 27) Lón ekkeei rúáánú pwóróus usun án Jesus feito, menni fansoun ra fós usun?

17. Met sia fen apasa usun án Jesus war mi mak lón Mateus 24:46?

¹⁷ Me mwan, a mak lón néúch kewe puk ekkewe rúáánú pwóróus sia kerán fós usun pwe ra weneiti án Jesus waroto are feito lón 1918. Áwewe chék ren alon Jesus usun ewe “chon angang mi allükülük o tipachem.” (Álleani Mateus 24:45-47.) Sia fen lúkú pwe ena kapas “war” mi mak lón wokisin 46 a weneiti ewe fansoun Jesus a feito pwe a cheki nónnómun ekkewe mi kepit lón ewe ier 1918, nge ewe fansoun ewe chón angang a seikitá an epwe nemenem wóón meinisin pisekin ewe Masta kewe, a fis lón 1919. (Mal. 3:1) Iwe nge, mwirin ach etittinasefáli án Jesus we oesini, a ffatoló pwe a lamot sipwe siwili ach lúkú ineet epwe pwénútá ekkóch kinikinin ena oesini. Pwata?

18. Ach etittina unusen masouen án Jesus we oesini a álisikich le weweiti met usun an war?

¹⁸ Lón ekkewe wokisin mwen Mateus 24:46, iteiten an pwá ewe kapas “war,” a wewe ngeni ewe fansoun lupwen Jesus epwe war pwe epwe apasa me apwénúetá an kapwúng atun ewe riáfféú mi lapalap. (Mat. 24:30, 42, 44) Pwal och, usun met sia fen káé lón  parakraf 12, pwe án Jesus “war” mi mak lón Mateus 25:31 a pwal wewe ngeni ewe fansoun kapwúng lón mwachkkan. Iwe a ffat pwe án Jesus war ren an epwe seikaatá ewe chón angang mi alúkúlúk an epwe nemenem wóón pisekin meinisin, ewe a mak lón Mateus 24:46, 47, a pwal weneiti an war lón mwachkkan, atun ewe riáfféú mi lapalap. (Ppii ewe sópwósópwun pwóróus.) * Ewer, ach etittinafichi unusen masouen án Jesus we oesini, a affata pwe eú me eú ekkewe walú pwóróus usun an war ra weneiti ewe fansoun kapwúng lón ewe riáfféú mi lapalap lón mwachkkan.

19. Ikkefa ekkewe ekkesiwil sia káé usun, me ikkefa ekkewe kapas eis repwe pélú lón ekkewe lesen mwirin ei?

¹⁹ Iwe, met sia fen káé lón ei lesen? Lepoputáán, sia eppiietá úlúngát kapas eis mi lamot. Sia akkomw káé pwe ewe riáfféú mi lapalap ese poputá lón 1914 nge epwe poputá atun án ewe United Nations epwe ataieló Papilon mi Lapalap. Mwirin, sia enniwili ika pwata án Jesus kapwúng wóón ekkewe siip me ekkewe siike ese poputá lón 1914, nge epwe poputá atun ewe riáfféú mi lapalap. Sáingolóón, sia etittina ika pwata án Jesus war pwe epwe seikaatá ewe chón angang mi alúkúlúk an epwe nemenem wóón meinisin pisekin kewe ese fis lón 1919 nge epwap fis atun ewe riáfféú mi lapalap. Iwe meinisin ekkewe kapas eis ra weneiti eú chék fansoun lón mwachkkan, ina ewe riáfféú mi lapalap. Ifa usun ei ekkesiwil a kkúú ach weweiti ewe kapas áwewe usun ewe chón angang mi alúkúlúk me tipachem? Pwal och, ifa usun a kkúú ach weweiti pwal ekkóch án Jesus kapas áwewe mi pwénútá lón ekkeei ránin lesópwólóón? Sipwe pwóróus wóón ekkeei kapas eis mi lamot lón ekkewe lesen mwirin ei.