1. ¿Nitre apóstol erere ni tö dre mikai gare jai?

KÖBÖ kukwe driekäre Jesús ie Kä tibienbätä ye jatanina krüte, aune dre rabai bare ja känenkäre ye nitre ja tötikaka tö namani mikai gare jai. Ye medenbätä, niara murie keta jämi ye känenkri apóstol nibokä käkwe ngwanintari ie: “¿Jondron ne rabai bare ñongwane, bätä mä rabairata nunbe aune kukweta ükaninte ye rabaira krüte ye abokän dre käkwe bämikai tuare?” (Mat. 24:3, TNM; Mar. 13:3). Kukwe ye mikakäre gare ietre niarakwe blitabare kukwe rabai bare nieta Bibliakwe tä Mateo kapitulo 24 aune 25 yebätä. Kukwe keta kabre rabai bare niebare kwe abokän ni rabadre mike gare jai. Kukwe niebare kwe ye tä kukwe ütiäte mike gare nie, ñobätä ñan aune dre rabai bare ja känenkäre ye ni tö mikai gare jai arato.

2. a) ¿Mekerabe nita ja di ngwen kukwe meden mikakäre nüke gare bäri kwin jai? b) ¿Kukwe meden ketamä ngwantarita abokänbätä ni bike ja tötike?

² Jesukwe kukwe niebare kä krüte yebätä ye nitre Jehová mikaka täte tä mekerabe ja tötikebätä aune tätre nuainne orasion yebiti. ¿Ñokäre tätre nuainne? Kukwe rabai bare niebare Jesukwe ye ñongwane rakaikä ye mikakäre gare jai. Ñodre, ani ja tötike kukwe ketamä ngwantarita nebätä: ¿Ñongwane “ja tare nikadi kri krübäte” ye kömikai? ¿Ñongwane Jesukwe kukwe ükaite “obeja” aune “kabra” yebe? ¿Ñongwane Jesús jatai o rükai? (Mat. 24:21; 25:31-33.)

3. ¿Kä kwati krubäte te ni nämä dre nütüre “ja tare nikadi kri krubäte” yebätä?

³ Kä kwati krubäte te ni nämä nütüre kä 1914 Rübare Kri Kena ye ngwane “ja tare nikadi kri krubäte” ye kömikani. Aune kä 1918 yete rü mikani krüte ye ngwane Jehovakwe “köbö ye keta[nin]bätä” ni nämä nütüre, ne kwe nitre dianinkä nänkäre kä kwinbiti ye kukwe kwin driedre juta kwatire kwatire te (Mat. 24:22, TNM). Kukwe driedi täte angwane juta dite kri Satanakwe ye gaite. Arato ni nämä nütüre ja tare nikadi kri krubäte ye ñaka rabai bare jökrä bengwairebe,  ñakare aune ye kömikani kä 1914 nemen 1918, ketebukäre, ja tare nikadi ye ketaninbätä kä 1918 ja känenkäre aune mrä mikai krüte Armagedón yete.

4. ¿Kukwe rabai bare niebare Jesukwe yebätä dre nükani gare nie?

⁴ Akwa nikwe ja tötikabare nguseta kukwe rabai bare niebare Jesukwe yebätä angwane, nükani gare nie kukwe niebare kä krüte yebätä ye rabai bare ketebu jatäri (Mat. 24:4-22). Käne, kukwe ye namani bare Judea siklo kena yete, ketebukäre kukwe ye rabai bare kä jökräbiti tibien ni näire. Kukwe ye namani gare nie ye köböire kukwe mada nükani gare nie kukwe rabai bare niebare Jesukwe yebätä. *

5. a) ¿Kukwe meden kömikani kä 1914 yete? b) ¿Ja tare nika jatani krire kena ye namani bare ñongwane siklo kena yete?

⁵ Ja tare nikadi kri krubäte ye ñaka kömikani kä 1914 yete ye nükani gare nie arato. ¿Ñokänti gare nie? Ñobätä ñan aune Biblia tä mike gare ja tare nikadi kri krubäte ye kömikai nitre kukwe ngwarbe driekä Ngöböbätä ye rüere rüdi ye ngwane, aune ñaka juta kwatire kwatire rüdi jabe ye ngwane. Ye medenbätä, kukwe namani bare kä 1914 ja känenkäre ye ñaka ja tare nikadi kri krubäte kömikani, ñakare aune “ja tare nika jata[ni] krire kena” (Mat. 24:8). “Ja tare nika jata[ni] krire kena” ye namani bare käne Jerusalén aune Judea kä 33 nememe 66 yete.

6. ¿Dre käkwe ja tare nikadi kri krubäte kömikai?

⁶ Ye erere akräke, ¿dre käkwe ja tare nikadi kri krubäte kömikai? Jesukwe mikani gare: “[Jondron] käme käkwe jändrän deme Ngöbökwe mikadi ngwarbe jae, ye mdenbtä abko ni Ngöbö kukwei niekä kädian nämane Daniel käkwe tärä tikani kira. Drebtä tita blite rüka gare munye, ñobtä ñan angwane ni ye tädi nünaninkä kä deme [...] känti [...]. Angwane mun tädre Judeate ye abko gitia mintokwäre” (Mat. 24:15, 16). Kena kukwe ye namani bare kä 66, ye ngwane nitre rükä juta Roma yekri (“[jondron] käme”) namani “nünaninkä kä deme [...] känti”, ye abokän niaratre rü ganinkä Jerusalén aune templo kwetre rüere (nitre Judea nämene ju ye mike deme  jai). Ketebukäre, Organización de las Naciones Unidas (“[jondron] käme” kä nengwane) käkwe rü gaikä nitre kukwe ngwarbe driekä Ngöböbätä (nitre ye tuin deme ni ja bianka kristiano yei) aune Babilonia Kri rüere, ye ngwane rabai “nünaninkä kä deme [...] känti”. Kukwe kädrieta Apocalipsis 17:16-18 ye rabai bare angwane ja tare nikadi kri krubäte ye kömikai.

7. a) ¿Nitre rabaite “nire” käbämikani ye namani bare ño siklo kena yete? b) ¿Kukwe meden rabai bare ja känenkäre?

⁷ Jesukwe mikani gare arato: “Köbö ye ketaibätä”. Kukwe ne namani bare käne kä 66, ye ngwane nitre Roma käkwe köbö “ketaninbätä”, ñobätä ñan aune nikaninta ja jiebiti aune ñaka rübare kwetre. Ye medenbätä, nitre kristiano Judea aune Jerusalén nämene dianinkä nänkäre kä kwinbiti ye ngitiani mento aune ye köböire namaninte “nire” (mäkwe ñäkä Mateo 24:22 yebätä; * Mal. 3:17). ¿Kukwe niebare Jesukwe ye rabai bare ño ja känenkäre? Ja tare nikadi kri krubäte ye ngwane Naciones Unidas rüdi nitre kukwe ngwarbe driekä Ngöböbätä rüere, akwa Jehovakwe köbö “ketaibätä” ne kwe nitre kukwe metre mikaka täte ñaka gadrete arato. Ye köböire juta Ngöbökwe mikai kwäre.

8. a) ¿Ja tare nikadi kri krubäte kömikai ye bitikäre dre rabai bare? b) ¿Ñongwane nitre 144.000 jökrä rabai nüne kä kwinbiti? (Nota 2 mikadre ñärärä.)

 ⁸ ¿Ja tare nikadi kri krubäte kömikai ye bitikäre dre rabai bare? Kukwe niebare Jesukwe ye tä mike gare Armagedón kömikadre känenkri kä rikai ruäre ta. Akwa, ¿dre rabadi bare kä ye ngwane? Kukwe ye mikata gare Ezequiel 38:14-16 aune Mateo 24:29-31 (ñäkädrebätä). * Ye bitikäre Armagedón rükai, ye käkwe ja tare nikadi kri krubäte ye mikai krüte, namani bare Jerusalén ganinte kä 70 ye erere (Mal. 4:1). “Ja tare nika ñakare krübäte kore abko erere ja tare nikadi kri krübäte” Armagedón yete (Mat. 24:21). Kä ye rikai ta angwane, Kristo Gobrandi Kä mil krati.

9. ¿Ja tare nikadi kri krubäte yebätä kukwe mikata gare ye tä ni töi mike ño?

 ⁹ Ja tare nikadi kri krubäte yebätä kukwe mikata gare ye tä ni mike dite. ¿Ñobätä? Ñobätä ñan aune ja tuai kukwe tare ben, akwa juta Ngöbökwe rabaite nire (Apoc. 7:9, 14). Kätä bäri juto nibätä, ñobätä ñan aune gare nie Armagedón yete nitre jökrä ie rabai gare Jehová aibe gobranka kri aune niarakwe ja kä mikai deme (Sal. 83:18; Ezeq. 38:23).

10. ¿Ñongwane kukwe ükate jatani obeja aune kabra yebe ni nämä nütüre?

¹⁰ Kukwe mada rabai bare niebare Jesukwe abokän rabai bare ñongwane yebätä ani ja tötike. Niarakwe kukwe bämikani känti niebare kwe kukwe ükaite obeja aune kabra yebe (Mat. 25:31-46). Kä 1914 ja känenkäre kä krüte kömikani, ye ngwane nitre obeja o kabra kwrere diainkä jenena ni nämä nütüre. Arato, nire nire käkwe ñaka Gobran Ngöbökwe kukwei kadre ngäbiti aune krütadre ja tare nikadi kri krubäte kömika jämi känenkri, ye abokän kabra aune ñaka mikaita nire ni nämä nütüre.

11. ¿Ñobätä Jesukwe ñaka kukwe ükaninte obeja aune kabra yebe kä 1914?

¹¹ Kä 1995 ye ngwane, La Atalaya kukwe mikani gare bäri kwin Mateo 25:31 yebätä, tä niere: “Ni Kä Nebtä Ngobo jatadita ja di kri bä nuärebti angwane, angeletre [...] rabadi jökrä bäre temen angwane, kürä gobrankrä bti [...] rabadi täkänintbe”. Mikani gare kä 1914 Jesús namani Reire Gobran Ngöbökwe yete, akwa ñaka namani täkäni “kürä gobrankrä bti” Kukwe Ükatekäre “nitre nünanka kä jökräbti temen” yebe (Mat. 25:32; Daniel 7:13 mikadre ñärärä). Akwa, kukwe bämikani obeja aune kabra yebätä yekänti nieta Kristo tä metrere ni Kukwe Ükatekä (mäkwe ñäkä Mateo 25:31-34, 41, 46 yebätä). Kä 1914 Jesús ñaka namani täkäni kukwe ükatekäre nitre nünanka kä jökräbiti tibien yebe, ye medenbätä, kä ye ngwane niara ñaka obeja aune kabra dianinkä mento. * ¿Ñongwane niara kukwe ye nuaindi?

12. a) ¿Ñongwane Jesús rabai Kukwe Ükatekä nitre nünanka kä jökräbiti yebe? b) ¿Kukwe meden rabai bare nieta Mateo 24:30, 31 bätä Mateo 25:31-33, 46 yebätä? (Nota 4 mikadre ñärärä arato.)

 ¹² Kukwe rabai bare niebare Jesukwe kä krüte yebätä ye tä mike gare nitre kukwe ngwarbe driekä Ngöböbätä gaite ye bätäräbe niara rabai Kukwe Ükatekä nitre kä jökräbiti tibien yebe. Miri gare nie  párrafo 8 yekänti erere, kukwe ruäre rakaikä kä ye ngwane tä tikani Mateo 24:30, 31 yete. Nikwe ja tötikadre bersikulo yebätä angwane, raba nüke gare nie Jesukwe kukwe bämikani obeja aune kabra yebätä ngwane kukwe niebare kwe ye erere bäsi kukwe nieta yete. Kukwe keta kabre rakaikä niebare kwe, ñodre, Ngöbö monsoi ütiäte jatadi angeletre ben; nitre nünanka kä jökräbiti tibien rabai niara ngwärekri; nitre obeja kwrere ben kukwe ükaite ye ngwane niaratre “dokwä ga[i]krö krö” ñobätä ñan aune niaratre “nün[ain] kärekäre”, * arato mikata gare nire abokän kabra kwrere “rabadi nekwetekä krübäte ja jiebti, käkwe ja müaidi” ñobätä ñan aune niaratre “näin kä [...] [gatekäre, TNM] kärekäre ye känti” (Mat. 25:31-33, 46).

13. a) ¿Ñongwane Jesukwe kukwe ükaite nitre obeja o kabra kwrere yebe? b) ¿Kukwe nüke gare nie ne käkwe ni töi mikadre ño kukwe drie yebätä?

¹³ ¿Kukwe ye tä dre mike gare nie? Ja tare nikadi kri krubäte ye ngwane Jesukwe kukwe ükaite nitre kä jökräbiti tibien obeja o kabra kwrere yebe. Ja tare nikadi kri krubäte ye mikai krüte Armagedón yete, ye bitikäre nitre kabra kwrere “gaite” kärekäre. ¿Kukwe nüke gare nie ne käkwe ni töi mikadre ño kukwe driebätä? Ye tä mike gare nie ütiäte krubäte nikwe nitre mikadre mokre. Ja tare nikadi kri krubäte kömikai ye ngwane kä täi niaratre yei ja töi kwitakäre aune nänkäre ji krä chi “käta niken ni ngwena nüne kärekäre” yebiti (Mat. 7:13, 14). Kä nengwane nitre kwati niena ja ngwen obeja o kabra ye kwrere, akwa ja tare nikadi kri krubäte yete kukwe ükaite bentre ye ngwane niaratre ye obeja o kabra rabai gare. Ye medenbätä ni ñaka rabadre  nemen kwekebe. ¡Nikwe ja di ngwandre ne kwe nitre jökrä käkwe Gobran Ngöbökwe kukwei nuadre aune kadre ngäbiti!

14, 15. ¿Texto meden ketabokä tä blite Kristo jatai Kukwe Ükatekäre yebätä?

¹⁴ Kukwe niebare Jesukwe yebätä nita ja tötike jankunu nguseta köböire nüke gare nie ñongwane kukwe mada ütiäte rabai bare, ¿yebätä ni rabadre ja töi ükete arato? Kukwe rabai bare nieta ye arabe raba kukwe ye mike gare nie.

¹⁵ Kukwe rabai bare nieta Mateo 24:29–25:46, yekänti Jesukwe blitabare metrere dre rabai bare kä krüte bätä ja tare nikadi kri krubäte näire yebätä. Texto yekänti niara rükai o jatai yebätä blitabare kwe bä kwä. * Ja tare nikadi kri krubäte yebätä niebare kwe: “Ni Kä Nebtä Ngobo abko jatadi tuen ja di kri bä nuärebti mütabti abko ni jökrä käkwe tuadi”. Niebare kwe arato: “Mun Dänkien jatadita ñongwane, ye abko gare ñakare munye”. Aune niebare kwe: “Ni Kä Nebtä Ngobo [...] jatadre ñakare jötrö mun tädi nütüre, aisete mun tädi ngibiare ngäbti ñakare angwane, batibe rükadita”. Ne madakäre, Jesukwe kukwe bämikani obeja aune kabra yebätä angwane niebare kwe “ni Kä Nebtä Ngobo jatadita ja di kri bä nuärebti” (Mat. 24:30, 42, 44; 25:31). Bersikulo ketabokä ye tä blite Jesús jatai Kukwe Ükatekäre yebätä. ¿Bersikulo mada ketabokä tä blite niara jatai yebätä ye raba kwen medente nie?

16. ¿Jesús rükai ye texto meden meden tä mike gare?

¹⁶ Ni klabore ie tö ngwan raba bätä töbätä yebätä Jesukwe blitabare angwane niebare kwe: “¡Bökänkä rükadreta [nota tä niere, “jatani nüke”] ye ngwane, kwandre ye erere nuainne ie angwane, kä rabai juto ni klabore yebätä!”. Ne madakäre, kukwe bämikani kwe meritre kaibe deme yebätä ngwane mikani gare kwe: “Meri nirike töi ñakare ye nikani aseite kökö jae. Ye btäräbe ni ja mikaka gure nükani [“ni jamäkätekä jantani”, Biblia Kuke Koin, tärä okwä ükaninte]”. Jesús kukwe bämikani ngwian yebätä angwane niebare kwe: “Kä nikanina raire ta angwane, sribikä bkänkä nükaninta”. Niebare kwe arato: “Ti jatadre nüketa [nota tä niere, “jatani nüke, TNM] angwane ngwian mda biandre tie ngwian tikwe ye bärire mda näre” (Mat. 24:46; 25:10, 19, 27). Bersikulo ketabokä tä blite Jesús jatai o rükai yebätä. ¿Ñongwane kukwe ye rabai bare?

17. ¿Jesús rükai nieta Mateo 24:46 ye nämene nüke gare ño nie käne?

 ¹⁷ Texto ketabokä kädrite mrä ye nämene blite Jesús nükani o jatani kä 1918 yete, ye ni nämä niere täräkwata sribe nämene nikwe yebätä. Ñodre, niarakwe blitabare “ni klabore ie tö ngwan raba bätä töbätä” yebätä (TNM), ye nämä nüke gare ño nie yebätä ani töbike (mäkwe ñäkä Mateo 24:45-47 yebätä). Jesús rükadreta nieta bersikulo 46 ye namani bare kä 1918 yete, ye ngwane niara nükani nitre dianinkä nänkäre kä kwinbiti nämene ño kukwe ja üaire yebiti ye mikakäre gare jai ni nämä nütüre, aune kä 1919 ni klabore kädekani jondron jökrä Bökänkäkwe ye ngübabitikäre ni nämä nütüre arato (Mal. 3:1). Akwa, Jesukwe kukwe niebare yebätä nita ja tötike nguseta köböire kukwe niebare kwe ye ruäre rabai bare ñongwane ye nüke gare nie, aune ye ererebätä ja töi ükadrete. Ñobätä nikwe nuaindre ye ani mike gare jai.

18. ¿Jesukwe kukwe niebare yebätä nikwe ja tötiri ye köböire dre nü gare nie?

¹⁸ Bersikulo mada Mateo 24:46 känenkri ye tä blite Jesús jatai yebätä, ye abokän jatai ja tare nikai kri krubäte ye näire kukwe ükatekäre (Mat. 24:30, 42, 44). Miri gare  párrafo 12 ye erere, Jesús rükai nieta Mateo 25:31 ye tä blite kukwe ükaite ja känenkäre ye arabebätä. Ye medenbätä, nüke gare nie Jesús rükai “ni klabore ie tö ngwan raba bätä töbätä” kädeke jondron jökrä kwe ye ngübakäre nieta Mateo 24:46, 47, ye abokän ja känenkäre niara rükai ja tare nikadi kri krubäte ye näire gärätä. * Erametre, Jesukwe kukwe niebare yebätä nikwe ja tötiri täte, ye köböire nü gare metre nie, niara rükaita kädrieta bersikulo keta kwä yebätä, ye abokän niarakwe kukwe ükaite ja känenkäre ja tare nikadi kri krubäte näire gärätä.

19. a) ¿Kukwe meden nükani gare mrä abokänbätä nikwe ja tötiri? b) ¿Kukwe meden ngwantarita abokän mikai gare jai kukwe ja tötikara mada yekänti?

¹⁹ Ani ngwenta törö jai. Kukwe ruäre rabai bare ñongwane ye ngwinintari bämä jatäri kukwe ja tötikara nekänti. Kena nibi gare nie ja tare nikadi kri krubäte ye ñaka kömikani kä 1914, ñakare aune Naciones Unidas käkwe rü gaikä Babilonia Kri rüere ye ngwane ja tare nikadi kri krubäte kömikai. Kukwe ükadrete obeja aune kabra ben ye ñobätä Jesukwe ñaka kömikani kä 1914 yete, ye nibi gare nie arato. Mrä nibi gare nie, Jesús ñaka jatani ni klabore ie tö ngwan raba bätä töbätä kädeke jondron jökrä kwe ngübabitikäre kä 1919, ñakare aune nuaindi kwe ja tare nikadi kri krubäte näire. Kukwe ketamä rakaikä ye jökrä rabai bare ja tare nikadi kri krubäte näire. ¿Kukwe ne tä ni töi ükete ño kukwe mada bämikani ni kablore ie tö ngwan raba bätä töbätä yebätä? ¿Jesukwe kukwe mada bämikani abokän rabai bare kä mrä näire ye nüke gare ño nie? Kukwe ütiäte ngwantarita ne mikai gare jai kukwe ja tötikara mada yekänti.