1. Kála o jipoxolo, ihi ué i tua mesena kuijiia?

KUA zukamene kiá o kithangana kia Jezú ku zubha o kikalakalu kia ku boka mu ixi, mu kiki, o maxibulu mê a mesenene kuijiia ihi ieji bhita na-iu ku hádia. Kua kambele ngó izuua iofele phala Jezú kufuá, o maxibulu mê a mu ebhuidisa: ‘Tu tangele, ima íii ia ka bhita thembu kuxi? Kijimbuete kiê kiahi, kia ku tukuluka kué, ni kia dizubhilu dia mundu?’ (Mat. 24:3; Mar. 13:3) Jezú ua tambuijila bhu kaxi ka kikanenu kia dikota ki tu sanga mu divulu dia Matesu mu kibatulu 24 ni 25. Mu ibatulu íii Jezú ua kanena izulukutu iavulu. Izuelu iê iala ni valolo iavulu phala etu mukonda tua mesena kuijiia ihi ia-nda bhita n’etu ku hádia.

2. (a) Mu ku bhita mivu iavulu maka’hi u tua soto kuijiia kiambote? (b) Iebhi o ibhuidisu itatu i tua-nda di longa?

² Ku mivu iavulu o jiselevende ja Jihova ene mu samba ni ku di longa o kikanenu kia Jezú kia lungu ni izuua isukidila-ku. Ene a mesenene kuijiia kiambote o kithangana kieji di kumbidila o izuelu ia Jezú. Phala ku londekesa kiebhi kia jimbulula kiambote o milongi phala etu, tu di longe ibhuidisu itatu ia lungu ni “thembu kuxi.” Thembu kuxi kia-nda mateka o ‘hadi ia dikota?’ Thembu kuxi kia-nda fundisa Jezú o “jimbudi” ni “jihombo?” Thembu kuxi kia-nda ‘tukuluka’ mba kuíza Jezú?—Mat. 24:21; 25:31-33.

3. Kiebhi ki tua kexile mu tendela o hadi ia dikota mu ukulu?

³ Ku mivu iavulu tua kexile mu banza kuma o hadi ia dikota ia mateka ku muvu ua 1914, kioso kia mateka o Ita ia Dianga ia Bhiti ku Mundu Uoso, ni kuila Jihova, ‘izuua ienhoio ia phaxi, ua i tolesa tolesa’ kioso kia bhu o ita ku muvu ua 1918, phala o Jikidistá a a undu, a subhukile a tene kuboka o njimbu iambote ku jixi joso. (Mat. 24:21, 22) Kioso kieji zubha o kikalakalu kia kuboka, eji buika o mundu ua Satanaji. Mu kiki, o hadi ia  dikota ieji di kumbidila mu ithangana itatu: Kueji kala dimatekenu (1914-1918), eji tolesa o hadi ia dikota (tundé ku muvu ua 1918 katé ku pholo), ni kuila kieji bhua ku Alumajedone.

4. Kidi kiebhi kia tu kuatekesa ku tendela kiambote o kikanenu kia Jezú, kia lungu ni izuua isukidila-ku?

⁴ Maji kioso ki tua di longo kiambote o kikanenu kia Jezú, tua mono kuila mbandu ia kikanenu kia Jezú kieji di kumbidila mu veji jiiadi. (Mat. 24:4-22) Mbandu ia kikanenu kia dikumbidila ku Judeia ku hama ia dianga K.K., o mbandu ia mukuá ieji di kumbidila ku mundu uoso mu izuua ietu. O kuijiia o kidi kiki, kia tu kuatekesa ku tendela dingi o milongi ia mukuá. *

5. (a) Izulukutu iahi ia mateka ku muvu ua 1914? (b) O kithangana kia malamba kia lungu ni kithangana kiebhi ku hama ia dianga K.K.?

⁵ Tua mono ué kuila o hadi ia dikota ki ia mateka ku muvu ua 1914. Mukonda diahi? Mukonda o kikanenu kia Bibidia ki lombolola kuila o hadi ia dikota ki ieji mateka kioso o jixi kieji bhânga mudia, maji ieji mateka kioso kieji zukutisa o jingeleja ja makutu. Mu kiki o izulukutu ia mateka ku muvu ua 1914 ki iexile o dimatekenu kia hadi ia dikota, maji o “dimatekenu ngó dia malamba, kala misusu ia muhatu ua-nda kuvuala.” (Mat. 24:8) O “malamba, kala misusu ia muhatu ua-nda kuvuala,” kia lungu ni maka a bhiti mu Jeluzaleme ni mu Judeia tundé ku muvu ua 33 K.K., katé ku muvu ua 66 K.K.

6. Kizulukutu kiahi kia-nda londekesa o dimatekenu dia hadi ia dikota?

⁶ Ihi ia-nda londekesa o dimatekenu dia hadi ia dikota? Jezú uambe: “Ki mu mona o Kisunji ki buidisa mundu, kia tangele polofeta Daniiele, kiemana bhu kididi kikôla, uoso u tanga a tongolole. Kieniókio oso ala mu Judeia a kà lengele ku milundu.” (Mat. 24:15, 16) O ki kumbidilu kia dianga kia lungu ni ‘kuimana bhu kididi kikôla,’ kia di kumbidila ku muvu ua 66 K.K., kioso o masoladi a Loma (‘o Kisunji,’) a zukutisa Jeluzaleme ni tembulu iê (o kididi kikôla kia  Jijudé). O ki kumbidilu kia beta-kota, o ‘kuimana,’ kia-nda di kumbidila kioso o kisangela kia Nações Unidas (o “Kisunji” mu izuua ietu) kia-nda zukutisa o Kidistándade (o kididi kikôla kia ió a mu kuamba kuila Jikidistá) ni athu a mukua a tokala mu Babilonha ia Dikota. O kizulukutu kiki, a ki tange ué mu divulu dia Dijingunuinu 17:16-18. O kizulukutu kiki kia-nda londekesa o dimatekenu dia hadi ia dikota.

7. (a) Kiebhi kia bhulula o “xitu” ku hama ia dianga? (b) Ihi i tu tena ku kingila ia-nda bhita ku hádia?

⁷ Jezú ua kanena: “Izu’uoio a kà i fikisa.” Kia dianga, kia dikumbidila ku muvu ua 66 K.K., kioso o masoladi a Loma a “tolesa” o kibuika. Mu kiki o Jikidistá a a undu mu Jeluzaleme ni mu Judeia a lenge phala ‘ku bhulula o xitu [mba mienhu] iâ.’ (Tanga Matesu 24:22; Mal. 3:17) Mu kiki ihi ia-nda bhita mu kithangana kia hadi ia dikota? Jihova ua-nda “tolesa” o kibuika kia-nda bheka o kisangela kia Nações Unidas ku jingeleja ja makutu, muéne ka-nda kuehela ku buika o abhezi a kidi kumoxi ni jingeleja ja makutu. Mu kiki, o mundu ua Nzambi ua-nda bhuluka.

8. (a) Izulukutu iahi ia-nda bhita kioso kia-nda di kumbidila o mbandu ia dianga ia hadi ia dikota? (b) Thembu kuxi kia-nda tambula o athu a suku-ku, ku 144.000, o kifutu kiá ku diulu? (Tala ku luiji.)

 ⁸ Ihi ia-nda bhita kioso kia-nda bhua o kithangana kia dianga kia hadi ia dikota? Jezú uambe kuila kua-nda bhita kithangana kia-nda sukila ku dimatekenu dia Alumajedone. Ihi ia-nda bhita mu kithangana kieniókio? O kitambuijilu kiosoneke mu divulu dia Izekiiele 38:14-16 ni dia Matesu 24:29-31. (Tanga.) * Kioso kia-nda bhita o izulukutu íii tua-nda mona o Alumajedone, o disukilu dia hadi ia dikota, ia sokela ni kibuika kia Jeluzaleme ku muvu ua 70 K.K. (Mal. 4:1) O kizulukutu kia Alumajedone o disukilu ia hadi ia dikota nuka ia bhitile-ku—kizulukutu “kiluua ngó i kala-ku, tunde ku dimatekenu dia’xi katé ni kiki.” (Mat. 24:21) Kioso kia-nda bhua o Alumajedone, o Utuminu ua Kristu ua-nda mateka.

9. Mbote iahi ia-nda katula o mundu ua Jihova mu kikanenu kia Jezú kia lungu ni hadi ia dikota?

 ⁹ O kikanenu kiki kia hadi ia dikota ki tu suínisa. Mukonda diahi? Mukonda tu tena ku dielela kuila né muene se tu di bhana ni ibhidi iavulu, o mundu ua Jihova ua-nda bhuluka ku hadi ia dikota. (Dij. 7:9, 14) Tu sanguluka ué mukonda ku Alumajedone, Jihova ua-nda londekesa o ungana ué ni ku zelesa o dijina diê.—Jisá. 83:18; Ize. 38:23.

10. Ihi i tua kexile mu banza ia lungu ni kithangana kia xindi phala ku fundisa kiá o jimbudi ni jihombo?

¹⁰ Xinganeka o kithangana kia xindi phala ku mateka o mbandu ia mukua ia kikanenu kia Jezú—o kifika kia lungu ni kufundisa o jimbudi ni jihombo. (Mat. 25:31-46) Mu ukulu tua banzele kuila o kufundisa kua athu a a sokesa ni jimbudi mba jihombo, kueji bhita mu kithangana kia izuua isukidila-ku, ia mateka ku muvu ua 1914 katé ku pholo. Tua banze kuila, o athu ió a ditunu o njimbu ia Utuminu ande dia ku mateka o hadi ia dikota, eji fuá kála jihombo—sé kidielelu kia ku fukunuka.

11. Mukonda diahi o kufundisa kua athu a sokesa ni jimbudi ni jihombo ki kua mateka ku muvu ua 1914?

¹¹ Ku muvu ua 1990, O Mulangidi ua tonginina dingi o divulu dia Matesu 25:31 diamba: “Mu kuzubha maka Jezú uixi: Kià keza Mon’a Muthu-phe, ni ungana uê, kumoxi ni ji-anju joso, ua kà xikama ku kialu kiê kia ungana.” O Mulangidi uambe kuila Jezú ua kituka Sobha ia Utuminu ua Nzambi ku muvu ua 1914, maji muéne ka “xikama ku kialu kiê kia ungana” mu Kufundisa o “jixi joso.” (Mat. 25:32; sokesa ni Dan. 7:13.) Maji o kifika kia lungu ni jimbudi ni jihombo ia dianga ku mu tumbula kuila mufundixi. (Tanga Matesu 25:31-34, 41, 46.) Mukonda Jezú kexile luua mu fundisa o ifuxi ioso ku muvu ua 1914, mu kiki-phe o kufundisa o athu a a sokesa ni jimbudi mba jihombo ki kua mateka ku muvu iú. * Thembu kuxi-phe kia-nda mateka Jezú ku fundisa?

12. (a) Thembu kuxi Jezú kia-nda fundisa o jixi joso mu veji ia dianga? (b) Izulukutu iebhi ia tange mu divulu dia Matesu 24:30, 31 ni Matesu 25:31-33, 46?

 ¹² O kikanenu kia Jezú kia lungu ni izuua isukidila-ku kilondekesa kuila muéne ua-nda fundisa o ixi ioso mu veji ia dianga, kioso kia-nda buika o jingeleja ja makutu. Kála ki tua mono bhu  kaxi 8 o izulukutu ia-nda bhita mu kithangana kieniókio, a i soneka mu divulu dia Matesu 24:30, 31. Se u tonginina o jivelusu jiji, ua-nda mona kuila Jezú ua kanena izulukutu ia sokela ni izulukutu ia tange mu kifika kia lungu ni jimbudi ni jihombo. Mu kifika, o Mon’a Muthu-phe, ni ungana uê, kumoxi ni ji-anju joso, ua ka bhongolola akua jixi joso, o ió a a solo kala jimbudi an-nda ‘bhetula o mitué iâ’ mukonda o ‘muenhu ki ua bhua,’ ua a kingila. * Maji o ió a a fundisa kala jihombo a “kala mu dila” kioso kia-nda mona kuila o “phaxi ki iabhua,” ia a kingila.—Mat. 25:31-33, 46.

13. (a) Thembu kuxi kia-nda fundisa Jezú o athu kala jimbudi mba jihombo? (b) Kiebhi ki tu kuatekesa o milongi íii ku mona o sidivisu ia ku boka?

¹³ Mu kiki phe ihi i tua di longo? Jezú ua-nda fundisa o athu a ifuxi ioso kala jimbudi mba jihombo, kioso kia-nda kuíza mu kithangana kia hadi ia dikota. Ku Alumajedone, o disukilu dia hadi ia dikota, o athu a sokela ni jihombo a-nda ku a buika. Kiebhi ki tu kuatekesa o milongi íii ku mona o sidivisu ia ku boka? I tu kuatekesa ku mona kuila o sidivisu ia ku boka iala ni valolo. Katé o kizuua kia-nda mateka o hadi ia dikota, o athu a-nda kala ni kithangana phala ku lungulula o ibanzelu iâ ni kuenda mu njila iofele, “kaia ku muenhu.” (Mat. 7:13, 14) Mu kidi, nange o athu a londekesa o ukexilu ua jimbudi mba ua jihombo. Maji tua tokala ku lembalala kuila o kufundisa kua suku-ko, kua lungu ni ku sola o jimbudi ni jihombo,  kua-nda bhita ngó mu kithangana kia hadi ia dikota. Mu kiki, tua tokala ku kolokota mu ku boka o njimbu ia Utuminu ku athu, phala n’a lungulule o ukexilu uâ.

14, 15. Iebhi o izuelu iuana ia lungu ni kizuua kia-nda kuíza o mufundixi, Kristu?

¹⁴ O kuila mu ku tonginina dingi o kikanenu kia Jezú, kia londekesa kuila ki tua tendela kiambote o kithangana kia xindi phala ku bhita o izulukutu ia mukuá, ia tange mu kikanenu kiki, ni kuila kua bhingile ku jimbulula dingi kiambote o kikanenu kiki? Tua-nda sanga o kitambuijilu mu kikanenu kiki. Tu mone kiebhi.

¹⁵ Mu mbandu ia kifika kiê kio soneke mu divulu dia Matesu 24:29–25:46, Jezú ua dianga kuzuela o ima ia-nda bhita mu izuua isukidila-ku, ni ima ia-nda bhita mu kithangana kia hadi ia dikota. Mu mbandu íii ia kifika, Jezú u tumbula o ‘kuíza’ kuê mu dinake dia veji. * Kia lungu ni hadi ia dikota muéne uambe: “Kia kà mona Mon’a Muthu iú uiza ku matuta.” O “kizuua kià keza Ngana ienu ki mua k’ijiia.” O “kithangana ki mua ki fikile, kiene kia kà tukuluka o Mon’a Muthu.” Mu kifika kiê kia lungu ni jimbudi ni jihombo Jezú uambe: “Kià keza Mon’a Muthu-phe, ni ungana uê.” (Mat. 24:30, 42, 44; 25:31) O izuelu iuana íii ia lungu ni kizuua kia-nda kuíza o mufundixi, Kristu. Kuebhi ku tu sanga o izuelu iuana ia suku-ko, mu kikanenu kia Jezú?

16. Mu ibatulu iebhi ia mukuá mua tange o kuíza kua Jezú?

¹⁶ Kia lungu ni kimbadi kia fiiele Jezú uambe: ‘O kimbadi’okio ki zediua, k’iza ngana iê ni a mu sange kiene kiala mu bhanga.’ Mu kifika kia lungu ni kuinhi dia ilumba, Jezú uambe: “Kioso-phe ki aii mu kusumba, ngà-iala u tula.” Mu kifika kia jitalendu Jezú uambe: “Kuila thembu ia lebha kiá, mukua jiselevende’ojo uiza.” Mu kifika kieniókio o Mesene uambe ué: O “kingez’iki o kiami ngeji ku ki tambula.” (Mat. 24:46; 25:10, 19, 27) O ibatulu iuana íii i tumbula o kuíza kua Jezú, kua lungu ni kithangana kiebhi?

17. Ihi i tua zuela ia lungu ni kuíza kua tange mu divulu dia Matesu 24:46?

¹⁷ Mu ukulu, tuambe mu madivulu metu kuila o ibatulu iuana íii, ia suku-ko, ia mu zuela ia lungu ni kizuua kia mu kuíza Jezú, ku muvu ua 1918. Mu kifika, xinganeka mu  izuelu ia Jezú ia lungu ni ‘kimbadi kia fiiele.’ (Tanga Matesu 24:45-47.) Tua tendela kuma o ‘kuíza’ kua tange mu kibatulu 46 kia lungile ni kithangana kiéza Jezú mu kuongola o Jikidistá a a undu ku muvu ua 1918, ni kuila a tumina o kimbadi ku langa o ima ioso ia Ngana iê ku muvu ua 1919. (Mal. 3:1) Maji kioso ki tua tonginina kiambote o kikanenu kia Jezú, tua mono kuila kua bhingile ku jimbulula kiambote o kithangana kia xindi phala ku bhita o jimbandu ja mukuá ja kikanenu kiki. Mukonda diahi?

18. O ku di longa o kikanenu kia Jezú, ki tu kuatekesa ku xinganeka ihi, ia lungu ni kizuua kia-nda kuíza Jezú?

¹⁸ Mu jivelusu ja dianga ja sukina mu divulu dia Matesu 24:46, o kizuelu ‘kuíza’ kia lungu ni kithangana kia-nda kuíza Jezú, mu tangela ni ku fundisa o athu mu kithangana kia hadi ia dikota. (Mat. 24:30, 42, 44) Kála ki tua zuela ué bhu  kaxi 12, o ‘kuíza’ kua Jezú kua tange mu divulu dia Matesu 25:31, kia lungu ué ni kithangana kia ku fundisa. Mu kiki, tu tena kuzuela kuila o kuíza kua Jezú, phala ku bhana o kikalakalu ku kimbadi kia fiiele, kia ku langa o ima ioso iala na-iu, kia tange mu divulu dia Matesu 24:46, 47, kia lungu ué ni kithangana kia-nda kuíza, o kithangana kia hadi ia dikota. * Mu kidi, o ku xinganeka mu kikanenu kia Jezú ki londekesa kuila dinake dia ibatulu i tumbula o kizuua kia-nda kuíza Jezú, ia lungu ni kithangana kia ku fundisa, mu kithangana kia hadi ia dikota.

19. Iebhi o milongi ia ubhe i tua di longo, ni ibhuidisu iebhi i tua-nda di longa mu milongi ia-nda kaiela?

¹⁹ Mu kidi ihi i tua di longo? Ku dimatekenu dia milongi íii tua bhange ibhuidisu itatu, ia lungu ni “thembu kuxi.” Kia dianga, tua di longo kuma o hadi ia dikota ki i mateka ku muvu ua 1914, maji ia-nda mateka kioso o kisangela kia Nações Unidas, kia-nda mateka ku zukutisa Babilonha ia Dikota. Mu ku suluka, tua di longo kuila Jezú ka mateka ku fundisa o athu a a sokesa ni jimbudi mba jihombo ku muvu ua 1914, maji ua-nda mateka ku a fundisa mu kithangana kia hadi ia dikota. Mu ku suka-ko, tua di longo se mukonda diahi o kuiza kua Jezú phala ku bhana ku kimbadi kia fiiele, o kikalakalu kia ku tambula konda ia ima ioso iala na-iu, ki ku bhiti ku muvu ua 1919, maji muéne ua-nda bhanga kiki mu kithangana kia hadi ia dikota. Mu kiki, o ibhuidisu itatu ia lungu ni “thembu kuxi,” ia lungu ni kithangana kimoxi ku hádia—o hadi ia dikota. Kiebhi o milongi íii ia ubhe, i tu kuatekesa ku tendela kiambote o kifika kia lungu ni kimbadi kia fiiele? Kiebhi ué ki i tu kuatekesa ku tendela kiambote o ifika ia mukua ia Jezú, ia mu dikumbidila mu izuua íii isukidila-ku? Tua-nda di longa o ibhuidisu íii mu milongi ia-nda kaiela.