1. Nk’entumwa za Yesu eza ira, twine ekihika ky’okumanya ki?

YESU akaba ari haihi kuhendera obuheereza bwe omu nsi, kandi abeegi be bakaba nibenda kumanya ebiraabeho omu biro by’omumaisho. N’ahabw’ekyo, harikuburayo ebiro bikye akaitwa, bana aha ntumwa ze bakamubuuza bati: ‘Tugambire ebi ahu biribeeraho, n’akamanyiso k’okubaho kwawe oku kariba, n’ak’obunaku obu ensi egi erihweraho.’ (Mat. 24:3; Mak. 13:3) Yesu akabagarukamu arikugamba obunabi oburi omu Matayo eshuura 24 na 25. Omu bunabi obwo, akagamba bingi ebyabaire nibiza kubaho. Ebi yaagambire nibitukwataho ahabw’okuba nitwenda kumanya ebirikuza kubaho omu biro by’omumaisho.

2. (a) Niki eki tutwire nituteeraho kwetegyereza gye? (b) Ni bibuuzo ki bishatu ebi turikuza kushwijuma?

² Abaheereza ba Yehova batwire nibashwijuma obunabi bwa Yesu oburikukwata aha biro by’emperu. Batwire nibateeraho kwetegyereza gye obu obunabi bwa Yesu buraahikiirire. Kubaasa kworeka oku enyetegyereza yaitu eyongyeire kushoboororwa gye, ka tushwijume ebibuuzo bishatu ebi: “Okubonabona kwingi” nikuza kutandika ryari? Ni ryari obu Yesu araashoroore “entaama” omu “mbuzi”? Yesu akaba naaza ‘kwija’ ryari?​—Mat. 24:21; 25:31-33.

3. Tukaba nituteekateeka ngu okubonabona kwingi kukatandika ryari?

³ Enyimaho, tubaire nituteekateeka ngu okubonabona kwingi kukatandika omu 1914 obu Orutaro rw’Ensi Yoona orw’Okubanza rwatandika, kandi ngu Yehova ‘akacwa bugufu ebiro ebyo’ omuri 1918 obu orutaro orwo rwahendera, kugira ngu abashukirweho amajuta abaabaire bakiriho babaase kubuurira amakuru marungi omu mahanga goona. (Mat. 24:21, 22) Kandi ngu omurimo gw’okubuurira gwahwa, obutegyeki bwa Sitaane nibuza kucwekyerezibwa. N’ahabw’ekyo kikaba nikiteekateekwa ngu okubonabona kwingi nikuza kubaho  omu bicweka bishatu: Ngu kukatandika (1914-1918), kwayemerezibwamu (kuruga 1918 n’okweyongyerayo), ngu reero kukaahendeire ahari Haramagedoni.

4. Niki ekituhwereire kwetegyereza gye obunabi bwa Yesu oburikukwata aha biro by’emperu?

⁴ Kwonka okweyongyera kushwijuma obunabi bwa Yesu kutuhwereire kwetegyereza ngu obunabi bwa Yesu oburikukwata aha biro by’emperu bukaba nibuza kuhikiirizibwa omu bicweka bibiri. (Mat. 24:4-22) Okuhikirizibwa okw’okubanza kukabaho omu kyasha ky’okubanza omuri Buyudaaya, kwonka bukaba nibuza kuhikiirizibwa omu bwijwire omu bunaku obu. Okwetegyereza ekyo kuhwereire omu kushoboorora gye enshonga zitari zimwe na zimwe. *

5. (a) Niki ekyatandikire kubaho kuruga 1914? (b) Kandi obusaasi nk’obwo bukabaho ryari omu kyasha ky’okubanza?

⁵ Kandi twetegyereize ngu ekicweka ky’okubanza eky’okubonabona kwingi tikiratandikire omu 1914. Ahabw’enki? Ahakuba obunabi bwa Baibuli nibworeka ngu okubonabona kwingi kukaba kutarikwija kutandika n’okurwanagana kw’amahanga, kureka n’okutaahirirwa okuraabe aha madiini g’ebishuba. N’ahabw’ekyo, ebyatandikire kubaho omu 1914 ekaba etari ntandikiro y’okubonabona kwingi, kureka ekaba eri ‘entandikiro y’obusaasi.’ (Mat. 24:8) ‘Obusaasi’ obu ni nk’obwo obwabaireho omuri Yerusaalemu na Buyudaaya omu gwa 33 kuhika omu gwa 66.

6. Niki ekiraayoreke ngu okubonabona kwingi kuri haihi kutandika?

 ⁶ Niki ekiraayoreke ngu okubonabona kwingi kuri haihi kutandika? Yesu akagira ati: “Kandi ku murireeba ekirikuzira ekirikuhwerekyereza, ekyagambirwe nabi Danieli, kyemereire omu Mwanya ogurikwera, (orikushoma ayetegyereze) abo abariba bari Buyudaaya omu bunaku obwo bahungire aha nshozi.” (Mat. 24:15, 16) Okwemerera omu mwanya ogurikwera kukabanza kubaho omu mwaka gwa 66, obu amahe g’Abarooma (“ekirikuzira”) gaataahirira Yerusaalemu  na hekalu (omwanya ogurikwera kurugiirira aha Bayudaaya). ‘Okwemerera’ omu mwanya ogurikwera okw’aha muheru ni kwija kubaho obu Amahanga Ageteeraine (“ekirikuzira” eky’omu bunaku obu) garaataahirire amadiini g’ebishuba (agu baingi barikureeba ngu gahikire). Okutaahirirwa okwo nikushoboororwaho omu Okushuuruurwa 17:16-18. Kandi nikwija kuba entandikiro y’okubonabona kwingi.

7. (a) Omu kyasha ky’okubanza abashukirweho amajuta bakahonokaho bata? (b) Niki ekirikwija kubaho omu biro by’omumaisho?

 ⁷ Kandi Yesu akagira ngu, “ebiro ebyo biryacuubwaho.” Eki kikabanza kuhikiirira omu mwaka gwa 66 obu amahe g’Abarooma gaacwamu kutagumizamu okutaahirira kwago. Abashukirweho amajuta ab’omuri Yerusaalemu na Buyudaaya bakahunga kubaasa kuhonokaho. (Shoma Matayo 24:22; Mal. 3:17) Niki ekirikwija kubaho omu bunaku bw’okubonabona kwingi? Amahanga Ageteeraine ku garaataahirire amadiini g’ebishuba, okutaahirira okwo Yehova naija kukucwa bugufu kugira ngu ediini ey’amazima etacwekyerezibwa hamwe nago. Ekyo nikiija kuhwera abaheereza ba Ruhanga kuhonokaho.

8. (a) Nihaija kubaho ki ekicweka ky’okubanza eky’okubonabona kwingi ku kiraahwe? (b) Oraahererukeyo aha 144,000, ni ryari obu araatungye omugabo gwe omu iguru? (Reeba eby’aha muheru.)

  ⁸ Nihaija kubaho ki ekicweka ky’okubanza eky’okubonabona kwingi ku kiraahwe? Ebigambo bya Yesu nibyoreka ngu nihaija kuhinguraho obwire reero Haramagedoni etandikye. Ni bintu ki ebiraabeho bwanyima y’okutaahirira kucuubwa bugufu? Nitubaasa kutunga eky’okugarukamu kuruga omu Ezekieli 38:14-16 na Matayo 24:29-31. (Kishome.) * Bwanyima y’ebyo, nihaija kubaho Haramagedoni, eraahendere okubonabona kwingi nk’oku okucwekyerezibwa kwa Yerusaalemu kwabaireho omu mwaka gwa 70. (Mal. 4:1) Okubonabona kwingi okuraahendere ahari Haramagedoni n’okw’omutaano, ahakuba ‘tikukabahoga okwiha aha kuhangwa kw’ensi.’ (Mat. 24:21) Ku kuraahwe,  obutegyeki bwa Kristo obw’emyaka rukumi nibwija kutandika kutegyeka.

9. Obunabi bwa Yesu oburikukwata aha kubonabona kwingi nibuha matsiko ki abaheereza ba Yehova?

⁹ Obunabi obu oburikukwata aha kubonabona kwingi nibutuha amatsiko. Ahabw’enki? Ahabw’okuba nibutuhamiza ngu n’obu twakuhikwaho buremeezi ki, abaheereza ba Yehova baingi nibaija kucungurwa kuraba omu kubonabona kwingi. (Kush. 7:9, 14) Okukira munonga nitushemererwa ahabw’okugira ngu Yehova naija kweza eiziina rye kandi ayorekye ngu niwe ahikire kutegyeka byona.​—Zab. 83:18; Ezk. 38:23.

10. Tukaba nituteekateeka ngu okushoroora entaama omu mbuzi kukatandika ryari?

¹⁰ Ka tureebe ekindi eki Yesu yaagambireho omu bunabi bwe oburikukwata aha kushoroora entaama omu mbuzi. (Mat. 25:31-46) Tukaba nituteekateeka ngu okushoroora okwo kukatandika kubaho obu ebiro by’emperu byatandika omuri 1914 n’okweyongyerayo. Tukaba nitumanya ngu abo abarikwanga amakuru g’Obukama kandi bakafa okubonabona kwingi kutakatandikire nibatwarwa kuba embuzi bataine matsiko g’okuzooka.

11. Ahabw’enki nitubaasa kugira ngu okushoroora entaama omu mbuzi tikuratandikire omu 1914?

¹¹ Omuri 1995, Watchtower ekashoboorora ebiri omu Matayo 25:31, aharikugira hati: “Omwana w’omuntu ku ariizira omu kitiinisa kye hamwe na baamaraika be boona, aryashutama aha kitebe kye eky’ekitiinisa.” Ekagira ngu Yesu akaba Omugabe w’Obukama bwa Ruhanga omuri 1914, kwonka taraashutamire “aha kitebe kye eky’ekitiinisa” kucwera emanja “amahanga goona.” (Mat. 25:32; gyeragyeranisa na Danieli 7:13.) Kwonka, omu nfumu erikukwata aha ntaama n’embuzi Yesu naagambwaho nk’omucwi w’emanja. (Shoma Matayo 25:31-34, 41, 46.) Ahabw’okugira ngu omuri 1914 Yesu akaba atakatandikire kucwera amahanga goona emanja, okushoroora entaama omu mbuzi tikuratandikire omu mwaka ogwo. * Mbwenu shi Yesu naija kutandika ryari kucwa emanja?

12. (a) Ni ryari obu Yesu araacwere amahanga goona emanja? (b) Ni bintu ki ebirikugambwaho omu Matayo 24:30, 31 na Matayo 25:31-33, 46?

  ¹² Obunabi bwa Yesu oburikukwata aha biro by’emperu nibworeka ngu naija kutandika kucwera emanja amahanga goona, amadiini g’ebishuba gaaheza kucwekyerezibwa. Nk’oku kirikworekwa omu  kacweka 8, ebintu ebimwe ebiraabeho omu bwire obwo nibigambwaho omuri Matayo 24:30, 31. Waashwijuma ekyahandiikirwe eki, nooyetegyereza ngu Yesu akagamba aha bintu ebirikushushana n’ebyo ebiri omu nfumu erikukwata aha ntaama n’embuzi. Nk’eky’okureeberaho, Omwana w’omuntu ku ariizira omu kitiinisa kye hamwe na baamaraika be boona, aryashutama aha kitebe kye eky’ekitiinisa, enganda zoona n’amahanga goona gateeranirwe omu maisho ge, abo abari nk’entaama nibaija ‘kwimutsya emitwe yaabo’ ahabw’okugira ngu baine amatsiko g’okutunga “amagara agatahwaho.” * Abo abaraabe bari nk’embuzi nibaija ‘kucura’ ahabw’okugira ngu nibaza kucwekyerezibwa.​—Mat. 25:31-33, 46.

13. (a) Ni ryari obu Yesu araayorekye abantu abari nk’entaama nari embuzi? (b) Okwetegyereza ekyo nikikwata kita aha kubuurira kwaitu?

 ¹³ Ebyo nibituhwera kwetegyereza ki? Yesu naaza kucwera emanja abantu b’amahanga goona, ashoroore entaama omu mbuzi ku araije omu bunaku bw’okubonabona kwingi. Kandi ahari Haramagedoni, abo abariba bari nk’embuzi baryacwekyerezibwa. Okwetegyereza ekyo nikikwata kita aha kubuurira kwaitu? Nikituhwera kukutwara nka kukuru munonga. Obu okubonabona kwingi kutakatandikire, abantu bakiine omugisha gw’okukora empindahinduka bakaza omu muhanda ogufunzire ogurikutaatsya omu magara. (Mat. 7:13, 14) Abantu hati omu mitwari ze yaabo nibabaasa kworeka ngu bari nk’entaama nari embuzi. Kwonka twine kuguma nitwijuka ngu Yesu niwe araayorekye abari nk’entaama nari embuzi ku araije omu bunaku bw’okubonabona kwingi. N’ahabw’ekyo tushemereire kugumizamu nituhwera abantu baingi kumanya amakuru g’Obukama.

14, 15. Ni nyiriri ki ina ezirikugamba aha kwija kwa Kristo nk’omucwi w’emanja omu biro by’omumaisho?

¹⁴ Mbwenu shi okwongyera kushwijuma obunabi bwa Yesu oburikworeka ebindi ebyabaire nibaza kubaho nikworeka ngu enyetegyereza yaitu eine kuhindurwamu? Obunabi obwo nibituhwera kutunga eky’okugarukamu. Ka tureebe.

¹⁵ Omu bunabi bwa Yesu oburi omu Matayo 24:29–25:46, okukira munonga akagamba aha biraabeho omu biro by’emperu n’omu bunaku bw’okubonabona kwingi. Omu bunabi obwo, Yesu akagamba aha kwija kwe emirundi munaana. * Arikugamba aha kubonabona kwingi, akagira ati: “Baryareeba Omwana w’omuntu naizira omu bicu by’omu iguru.” “Timurikumanya kiro eki Mukama waanyu ariiziraho.” “Ahabw’okuba obunaku obu mutarikuteekateeka, nibwo Omwana w’omuntu ariiziramu.” Kandi omu nfumu erikukwata aha ntaama n’embuzi, Yesu akagira ati: ‘Omwana w’omuntu ariizira omu kitiinisa kye.’ (Mat. 24:30, 42, 44; 25:31) Zoona enyiriri ezi ina nizigamba aha kwija kwa Kristo nk’omucwi w’emanja omu biro by’omumaisho. Omu bunabi obu, ni nyiriri ki ezindi ina ezirikugamba aha kwija kwa Yesu?

16. Ni byahandiikirwe ki ebindi ebirikugamba aha kwija kwa Yesu?

¹⁶ Aha mwambari omwesigwa kandi ow’obwengye, Yesu akagira ati: “Aine omugisha omwambari ogwo, ou mukama we arigaruka akashanga naakora atyo.” Omu nfumu erikukwata aha baishiki, Yesu akagira ati: “Ku baabaire bagiire kugura, kishwera yaija.” Omu nfumu y’etalanta, Yesu akagira ati: “Ebiro bingi ku byahingwireho, mukama w’abambari abo yaagaruka.” Omu nfumu niyo emwe mukama waabo akabagira ati: “Naanye ku naakwizire, nkaagigaruriirwe.” (Mat. 24:46; 25:10, 19, 27) Enyiriri ezo ina zikaba nizigamba aha bunaku ki obw’okwija kwa Yesu?

17. Ebitabo byaitu bitwire nibishoboorora bita okugaruka kwa Yesu okurikugambwaho omuri Matayo 24:46?

 ¹⁷ Enyima, ebitabo byaitu bikaba nibigira ngu enyiriri ezi nizikwata aha kwija kwa Yesu omuri 1918. Ka tushwijume ebi Yesu yaagambire ebirikukwata aha ‘mwambari ow’okwesigwa kandi ow’obwengye.’ (Shoma Matayo 24:45-47.) Tubaire nituteekateeka ngu ‘okugaruka’ okurikugambwaho omu runyiriri 46 nikukwata aha bu Yesu yaija kushwijuma embeera y’eby’omwoya ei abashukirweho amajuta baabaire barimu omuri 1918 kandi ngu okukwatsa omwambari ebi aine byona kukabaho omu gwa 1919. (Mal. 3:1) Kwonka okwongyera kushwijuma obunabi bwa Yesu, kituhwereire kumanya ngu twine kuhindura omu ku tubaire nitwetegyereza ebimwe ebiri omu bunabi bwe obu. Ahabw’enki?

18. Twashwijuma ebiri omu bunabi bwa Yesu ebirikukwata aha kwija kwe nikutuhwera kwetegyereza ki?

 ¹⁸ N’omu Matayo 24:46, ekigambo ‘okugaruka’ nikikwata aha bunaku obu Yesu araije kucwa emanja omu bunaku bw’okubonabona kwingi. (Mat. 24:30, 42, 44) Kandi nk’oku twareeba omu  kacweka 12, okwija kwa Yesu okurikugambwaho omuri Matayo 25:31 nikukwata aha biro by’omumaisho obu araije kucwa emanja. N’ahabw’ekyo kihikire okugira ngu okugaruka kwa Yesu kukwatsa omwambari omwesigwa ebi aine byona nk’oku kirikworekwa omu Matayo 24:46, 47, nikukwata n’aha kwija kwe okw’omu biro by’omumaisho omu bunaku bw’okubonabona kwingi. * Buzima, ebi Yesu yaagambireho omu bunabi bwe nibyoreka ngu enyiriri ezo munaana ezirikugamba aha kwija kwe, nizikwata aha kucwa emanja okw’omu biro by’omumaisho okuraabeho omu kubonabona kwingi.

19. Ni mpindahinduka ki ezi twareeba kandi ni bibuuzo ki ebi turaashwijume omu bicweka ebiraakurateho?

¹⁹ Twayega ki? Omu kutandika, twareeba ebibuuzo bishatu. Eky’okubanza twayetegyereza ngu okubonabona kwingi tikuratandikire omuri 1914, kureka ngu nikwija kutandika obu Amahanga Ageteeraine garaataahirire amadiini g’ebishuba. Ekindi, twareeba ahabw’enki Yesu ataratandikire kworeka abari nk’entaama nari embuzi omuri 1914, beitu ngu naija kukikora omu bunaku bw’okubonabona kwingi. Kandi, twareeba ngu Yesu taraizire omuri 1919 kukwatsa omwambari omwesigwa ebi aine byona, kwonka ngu ekyo nikiija kubaho omu bunaku bw’okubonabona kwingi. N’ahabw’ekyo ebibuuzo ebyo bishatu nibikwata aha biro by’omumaisho omu bunaku bw’okubonabona kwingi. Mbwenu shi empindahinduka ezi nizikwata zita aha ku turikwetegyereza enfumu y’omwambari omwesigwa? Kandi shi ekyo nikikwata kita aha ku turikwetegyereza enfumu za Yesu ezindi eziriyo nizihikiirizibwa omu bunaku obu? Omu bicweka ebirikukurataho nitwija kushwijuma ebibuuzo ebyo.