1. Kid kede semeriar el mo medengei a ngera el tekoi?

 NGAR sel ulebongel er a omesiungel a Jesus er tia el chutem, e a redisaiplo er ngii a mle semeriar el mo medengelii a tekoi el kirel a ngar mederir el taem. Sesei el klebesei er a uchei er a kodellel, e a reteua el apostol er ngii a uleker el kmo: “Ka msbedemam el kmo ng oingera e a ikal rokui el tekoi a mo duubech, e ngera mo olechotel sel cho mei, e mo oingera ulebongel er a beluulechad.” (Mt. 24:3; Mk. 13:3) Me a Jesus a ulenger er tir el milsaod el kirel a betok el tekoi el mo duubech el llechukl er a 24 me a 25 el bliongel er a Mateus. Me kede dirrek el kmal semeriar er a tekingel e le kede uai tirka el apostol el soad el mo medengei a tekoi el mo duubech er a ngar medad el klebesei.

2. (a) Ngmla mo betok el rak el dolasem el menglou er a klemedengei er kid el kirel a ngerang? (b) Ngera el edei el ker a bo dosaod?

² Ngar er aika el mereko el betok el rak, e a remesiungel a Jehovah a mla mesuub e meluluuch me bo lodengei a belkul a ulochel a Jesus el kirel a taem er a ulebongel. Ngmle sorir el mo medengei el kmo ngoingerang e ngmo tmaut a tekingel a Jesus. Me chelechang e ngmla obeketakl a klemedengei er kid el kirel tia el ulochel a Jesus. Ngar tia el suobel e kede mo mesaod a edei el ker: Ngoingerang e ngomuchel a “kloul ringel”? Ngoingerang e a Jesus a mo oukerrekeriil er a “sib” me a “kaming”? Ngoingerang e ng “mei” a Jesus?​—Mt. 24:21, BT; 25:31-33.

3. Ngera mle uldesued el kirel a temel a kloul ringel er a ngar er a mong?

³ Ngar er a chelsel a betok el rak, e kede ulemdasu el kmo a kloul ringel a ulemuchel er a rak er a 1914 er a Kot el Mekemedil a Beluulechad. Me a Jehovah a kildebengii a mekemad er a 1918 me lebo er ngii a techellir a rengellitel el mo omerk er a ungil chais el mo er a rokui el renged. (Mt.  24:21, 22) Me sel lemecherrungel a ureor er a berkel a klumech, e a beluulechad er a Satan a mo nguemed. Me kede ulemdasu el kmo a kloul ringel a ulebii el mo edei el bliongel: Ngmla er ngii a uchelel el 1914-1918, e mlo medeb er a 1918 el mei, e mo merek er a Armakedon.

4. Ngera el klemedengei a mlo uchul e ngulebeketakl a ulochel a Jesus el kirel a uriul sils?

⁴ Engdi sera deluut el merriter er tia el ulochel a Jesus, e kede milsa el kmo a telkib er tia el ulaoch el kirel a uriul sils a mesaod el kirel a eru el kakerous el tekoi. (Mt. 24:4-22) A tekingel a millutk el kirel aike el tekoi el dilubech er a Judea er a delongelel a rak er a 33 me a rak er a 70, e dirrek el melutk el kirel a tekoi el mo duubech er a beluulechad er chelechang. Tia el klemedengei a mlo uchul e ngulebeketakl a lmuut el bebil er a tekoi. *

5. (a) Ngera el meringel el taem a ulemuchel er a rak er a 1914? (b) Tia el taem er a ringel ngdi ua ngera el taem er a irechar?

⁵ Kede dirrek el mlo medengei el kmo a kloul ringel a dimlak lomuchel er a rak er a 1914. E ngera uchul? E le ulaoch er a Biblia a ochotii el kmo a kloul ringel a mo omuchel sel bo lemodechelakl a klsuul el klechelid el diak el sel leduubech a klaumekemad er a delongelel a meklou el beluu. Me aike el tekoi el dilubech er a 1914 el mei “a di ua ikel kot el ringel er a rengelel a cheroll” el dimlak el uchelel a kloul ringel. (Mt. 24:8) Aika el “ringel er a rengelel a cheroll” a di ua aike el tekoi el dilubech er a Jerusalem me a Judea er a rak er a 33 el mo er a 66.

6. Ngera mo ochotii el kmo ngmla omuchel a kloul ringel?

⁶ Ngera mo ochotii el kmo ngmla omuchel a kloul ringel? A Jesus a dilu el kmo: “Me cho mesengei a melemall a chedaol el meldu ra profet el Daniel, el mocha dechor ra chedaol (e kemiu el menguiu momtab), isei e tirikel ngara Judea le chiis el mora rois.” (Mt. 24:15, 16, BT; Mk. 13:14) Sera lekot el mutaut tia el tekoi, e a ulaoch el kirel a “dechor ra chedaol” a dilubech er a rak er a 66 er sel taem el urrurt er a resoldau er a Rom (el ngike el “melemall a chedaol”) a uleldechelakl er  a Jerusalem me a templo er ngii (el ngii a basio el chedaol er a osengir a rechad er a Judea). Me tia el ulaoch el kirel a “dechor ra chedaol” a lmuut el mo tmaut er sel taem el United Nations (el chelechang e ngomtechei er ngike el “melemall a chedaol”) a mo oldechelakl er a Klsuul el Klekristiano (el ngii a chedaol er a osengir tirke el leko te Kristiano) me aike el bebil er a klechelid er a Kloul Babilon. A osisiu el odechelakl a losaod er ngii a Ocholt 17:16-18. Tia el tekoi a mo uchelel a kloul ringel.

7. (a) Te milekerang e silobel a Rekristiano er a irechar? (b) Me kede omdasu el kmo ngera mo duubech er a ngar medad el taem?

⁷ A Jesus a dirrek el dilu el kmo: “A Dios a mo mengesadel a ikel sils.” Tia el tekoi a mle kot el mutaut er a rak er a 66 er sel taem el resoldau er a Rom a ‘kilsadel’ a temir el oldechelakl. E seikid e a rengellitel el Kristiano el ngar er a Jerusalem me a Judea a chiliis me bo el sebechir el “mo suobel.” (Monguiu er a Mateus 24:22; Mal. 3:17) Me kede omdasu el kmo ngera mo duubech er sel kloul ringel el di kmedu el mei? A Jehovah a mo ‘kosadel a ikel sils’ el United Nations a oldechelakl er a klsuul el klechelid e le ngdiak lekengei er a mera el omengull me bo lengemed el obengkel a klsuul el klechelid. Me tiang a mo uchul e a rechedal a Dios a mo suobel.

8. (a) Ngera mo duubech sel bo lengemed a klsuul el klechelid er a uchelel a kloul ringel? (b) Kede omdasu el kmo ngoingerang e tirke el mo ulebongel el chedal a 144,000 a mengai el mo er a eanged? (Momes er a bebil el omesodel.)

 ⁸ Ngera mo duubech sel bo lengemed a klsuul el klechelid er a uchelel a kloul ringel? A tekingel a Jesus a ochotii el kmo ngmo melemolem a kloul ringel el telkib el taem er a uchei er a lemei a Armakedon. Me ngera mo duubech er a chelsel tiakid el taem? A nger a llechukl er a Esekiel 38:14-16 me a Mateus 24:29-31. (Monguiu.) * Me a uriul er a ledubech aika el tekoi, e ngomuchel a Armakedon, el ngii a mo ulebongel er a kloul ringel, el sebeched el omekesiu er ngii er a telemellel a Jerusalem er a rak er a 70. (Mal. 4:1) Me tia el merael el mei el kloul ringel a tekoi el mo duubech el dirkak a ta el lebo er ngii “er  ser a lomuchel a beluulchad el me lmuut er chelechang.” (Mt. 24:21) Me sel bo lemerek, e ngomuchel a Ta el Telael el Rak el Omengederederel a Kristus.

9. Ngera ngrullii er a rechedal a Jehovah sel ulochel a Jesus el kirel a kloul ringel?

⁹ Tia el ulaoch el kirel a kloul ringel a melisiich er kid. E ngera uchul? E le ngoterekeklii a rengud el kmo a rechedal a Jehovah el ua ta el cheldebechel a mo suobel er a kloul ringel alta e te mo chuarm er a betok el tekoi. (Och. 7:9, 14) E a ngarbab er ngii el rokui, e ngdmeu a rengud e le sel taem er a Armakedon, e a Jehovah a mo meketeklii a llemeltel el mengedereder e mo chemedolii tia el chedaol el ngklel.​—Psa. 83:18; Ese. 38:23.

10. Ngera mle uldesued er a uchei el kirel a temel a kerrekerilel a sib me a kaming?

¹⁰ Me bo dosaod er a otutel a ta er a tekoi el ngar sel ulochel a Jesus, el okesiu el kirel a kerrekeriil el mo er a sib me a kaming. (Mt. 25:31-46) Me a uchei, e kede ulemdasu el kmo a kerrekeriil el mo er a rechad el kmo te ua sib me a kaming a mo er ngii er sel taem er a uriul sils el lulemuchel er a rak er a 1914 el mei. Kede ulemdasu el kmo tirke el otngeklii a klumech er a Renged e mad er a uchei er a lomuchel a kloul ringel a mla mukerrekeriil el ua kaming me ngmo diak a omeltkir el kirel a okiis.

11. Kede mekerang e medengei el kmo a kerrekeriil er a rechad el ua sib me a kaming a dimlak lomuchel er a rak er a 1914?

¹¹ Sera rak er a 1996, e a Ongkerongel a liluut el mesaod er a belkul a Mateus 25:31. Tia el bades a kmo: “A Ngelekel a Chad sel le mei el King, ma rokui el anghel lobengkel el mei, e ng mo dengchokl er a kingellel a king.” Tia el babier a milsaod el kmo alta Jesus a mlo King er a Rengedel a Dios er a rak er a 1914, engdi ngdimlak bo el “dengchokl er a kingellel a king” el ua Chad el Oukerrekeriil a “bek el beluu er a beluulchad” er sel taem. (Mt. 25:32; momekesiu er a Daniel 7:13.) Engdi tia el okesiu el kirel a sib me a kaming a mesaod er a Jesus el Chad el Oukerrekeriil. (Monguiu er a Mateus 25:31-34, 41, 46.) Me a lsekum sera rak er a 1914 e a Jesus a dirkak bo el Chad el Oukerrekeriil a bek el beluu, e ngbelkul a kmo a kerrekerilel er a rechad el kmo te ua sib me a kaming a dimlak lomuchel er seikid el taem. * Me a leuaisei, e ngmo omuchel el oukerrekeriil er oingerang?

12. (a) A Jesus ngmo omuchel el oukerrekeriil er a bek el beluu er a beluulechad er oingerang? (b) Ngera el tekoi a losaod a Mateus 24:30, 31 me a Mateus 25:31-33, 46?

 ¹² A ulochel a Jesus el kirel a uriul sils a ochotii el kmo ngmo omuchel el oukerrekeriil a bek el beluu er a uriul er a telemellel a klsuul el klechelid. Me ngdi ua dulsaod er a  parakurab 8, a bebil er aike el tekoi el mo duubech er tia el taem a llechukl er a Mateus 24:30, 31. Me sel morriter aike el bades, e ke mo medengei el kmo a Jesus a ulemlaoch el kirel a osisiu el tekoi el losaod el ngar er a okesiu el kirel a sib me a kaming. El ua tiang, a Ngelekel a Chad a mei el ngar er a klebkellel e obengterir a rechanghel; me a rechad er a bek el beluu er a beluulechad a mo kldibel; e tirke el mo mukerrekeriil el ua sib a “mekiis el mo dmangesbab” e le te mo nguu a “diak a ulebengelel klengar.” * Tirke el mo mukerrekeriil el ua kaming a “mo lmangel” e le te mocha medengei el kmo te mo nguu a “diak a ullebengelel blals” el ngii a kodall.​—Mt. 25:31-33, 46, BT.

13. (a) Ngoingerang e a Jesus a mo oukerrekeriil er a rechad el kmo te ua sib me a kaming? (b) Me tia el klemedengei ngerang rullii er a osenged el kirel a omesiunged?

¹³ Me a leuaisei, e sel lemei a Jesus er a taem er a kloul ringel e ngmo oukerrekeriil er a rechad er a bek el beluu el kmo te ua sib me a kaming. Me sel taem er a Armakedon, el ngii a ulebengelel a kloul ringel, e tirke el ua kaming a mo mad e dikea lluut el mekiis. Me tia el klemedengei ngerang rullii er a osenged el kirel a omesiunged? Ngosukid el mo medengelii a klungel a ultutelel a urered er a berkel a klumech. Me chelechang  el mo lmuut er sel lomuchel a kloul ringel, e a rechad a dirk ngar er ngii a techellir el melodech a uldesuir e mo omuchel el merael er a obutek el “siseball el mor a klengar.” (Mt. 7:​13, 14) Me alta e chelechang e kede omes a blekerdelir a rechad el ua sib me a lechub e te ua kaming, engdi ngdiak dobes el kmo te mo mukerrekeriil el kmo te sib me a kaming er sel temel a kloul ringel. Me ngkmal kired el melemolem el ouchais er a rechad el kirel tia el klumech er a Renged me lebo er ngii a techellir el mo ngmodech a blekerdelir.

14, 15. Ngera el eua el bades a melutk el kirel sel taem el lemei a Kristus el Chad el Oukerrekeriil?

¹⁴ A dmolech el omerriter er kid er tia el ulochel a Jesus ngochotii el kmo ngkired el ngodechii a uldesued el kirel a otutel a kuk bebil er a tekoi el lulsaod er ngii? Tia el ulaoch a ngosukid el mo medengelii a nger er tia el ker. Me bo dosaod.

¹⁵ Ngar sel telkib er a ulochel el llechukl er a Mateus 24:29–25:46, e a Jesus a mle ileakl el mesaod aike el mo duubech er a uriul sils me sel merael el mei el temel a kloul ringel. Ngar tiang e a Jesus a mle eai el taem el losaod er a temel el “mei.” * Me a losaod el kirel a kloul ringel, e ngdilu el kmo: Te mo mesang a “Ngelekel a Chad el mermang el ngar a eabed.” “Ng diak modengelii a le mer ngii a Rubak er kemiu.” “Ngelekel a Chad a mei er sel kmal diak momdasu el kmo ng mei er ngii.” E ngar sel okesiu el kirel a sib me a kaming, e a Jesus a dilu el kmo: “A Ngelekel a Chad sel le mei el King.” (Mt. 24:30, 42, 44; 25:31) Aika el eua el bades a melutk el kirel sel taem el lemei a Kristus el Chad el Oukerrekeriil. Me ngar er a keskelel a ulochel a Jesus e ngsebeched el metik a lmuut el eua el omesodel a luut er ngii?

16. Ngera bebil er a bades el mesaod er a luut er a Jesus?

¹⁶ A Jesus a milsaod el kirel a blak a rengul e mellomes a rengul el mesiou el kmo: “Ngii el mesiou a mo ungil a rengul a lsekum a mastang er ngii a lmuut el me remei e metik er ngii el dirk meruul a ngerchelel!” E ngar sel okesiu er a reteruich el ekebil, e ngdilu el kmo: “E tiaikid el lorael, e ngii a mei ngikel chad el mlo bechiil.” E kuk ngar sel okesiu er a udoud, e ngdilu el kmo: “Ng mlo meketeket e a mastang er tir a liluut el mei.” E ngar tia el osisiu el okesiu e a mastang a dilu el kmo: “Ma kluut el mei, e ak mo nguu el uldak er olengil.” (Mt. 24:46; 25:10, 19, 27) Me aika  el eua el tekingel a Jesus ngmesaod er oingera el taem?

17. Ngera sel dimla uldesued el kirel a luut er a Jesus el losaod er ngii a Mateus 24:⁠46?

¹⁷ A uchei, e kede milsaod el ngar er a babilenged el kmo aika el eua el tekoi a melutk el kirel sera lemei a Jesus er a rak er a 1918. Ka molatk er sel tekingel el kirel a “blak a rengul e mellomes a rengul el mesiou.” (Monguiu er a Mateus 24:45-47.) Kede ulemdasu el kmo a tekoi el “lmuut el me remei” el llechukl er a 46 el kekerei el bades a melutk er sel taem el Jesus a mlei er a rak er a 1918 el mo omes a urerir a rengellitel e sola e millilt er tir el mo oungerachel a rokui el kloklel er a rak er a 1919. (Mal. 3:⁠1) Nguaisei engdi a dmolech el omerriter er kid er a ulochel a Jesus a mla ochotii el kmo ngkired el sumecheklii tia el klemedengei er kid el kirel a temel a bebil er a omesodel tia el ulochel. E ngera uchul?

18. Ngokiu a omesubed er a ulochel a Jesus e ngmla lmuut el obeketakl a ngera el tekoi el kirel a luut er ngii?

¹⁸ Ngar er aike el bades er a uchei er a Mateus 24:46, e a tekoi el “mei” a di blechoel el melutk er sel taem el luut a Jesus el mei el mo oukerrekeriil er a rechad el rokui e mo okngemedeterir tirke el mekngit er a temel a kloul ringel. (Mt. 24:30, 42, 44) Me a tekoi el ngar er a Mateus 25:31 el mesaod er a Jesus el “mei” a dirrek el melutk el kirel sel kerrekeriil el mo er ngii er a temel a kloul ringel el di ua dulsaod er a  parakurab 12. Me seikid a uchul me kede oumerang el kmo a tekoi el ngar er a Mateus 24:46, 47 el mesaod er a taem el Jesus a tutkii a mesiou el mo oungerachel a rokui el kloklel, a dirrek el melutk er sel taem el dirkak lemei el ngii a temel a kloul ringel. * Me nguaisei, a omesodel tia el ulochel a Jesus a olecholt el kmo a derta er aika el eai el bades el kirel a luut er ngii a melutk el kirel sel merael el mei el taem er a kerrekeriil er a chelsel a kloul ringel.

19. Ngera el omeldechel a klemedengei er kid a bla desaod? E ngera el ker a bo dosaod er aike el ongingil el suobel?

¹⁹ Me ngera kede mla suubii? Ngar er a uchelel tia el suobel, e kede uleker a edei el ker el ngoingerang. A kot e kede milsang el kmo a kloul ringel a dimlak lomuchel er a 1914 e ngbai mo omuchel er sel taem el United Nations a oldechelakl er a Kloul Babilon. Kede dirrek el milsaod er a uchul me a kerrekerilel a Jesus er a rechad el kmo te ua sib me a kaming a dimlak lomuchel er a 1914 e ngbai mo er ngii er a temel a kloul ringel. E a ulebongel er ngii e kede mlo medengei el kmo a Jesus a dimlak ltetkii a blak a rengul el mesiou el mo oungerachel a rokui el kloklel er a rak er a 1919 e ngbai mo meruul el uaisei er a temel a kloul ringel. Me a leuaisei, e aike el edei el ker el ngoingerang a melutk el kirel a osisiu el taem el ngii a taem er a kloul ringel. Me aika el beches el tekoi ngera ngrullii er a klemedengei er kid el kirel a okesiu el mesaod er a blak a rengul el mesiou? E ngera ngrullii er a klemedengei er kid er a kuk bebil er a okesiu er a Jesus el ngii a mo tmaut er a taem er a ulebongel? Kede mo mesaod aika el meklou a ultutelel el ker er aike el ongingil el suobel.