1. ¿Imatata ñucanchicunapash yachangapaj munanchi?

JESÚS villachishpa purina punllacuna ña tucurijujpimi paipa catijcunaca shamuj punllacunapi ima tucunata yachangapaj munarca. Chaimandami Jesús huañuna punllacuna ña chayamujujpica chushcu apostolcunaca ‘¿ima horata chashna ninan llaquicunaca tianga? ¿Imata ricushpata can shamuna punlla chayamujujtapash, cai pacha tucurinatapash yachashun?’ nishpa tapurca (Mat. 24:3; Mar. 13:3). Shina tapujpimi Jesusca Mateo capítulo 24, 25​pi shimicunata paicunaman yachachirca. Ñucanchicunapash shamuj punllacunapi ima tucunata yachangapaj munaimandami Jesuspa shimicunata aliguta intindina canchi.

2. a) ¿Imatata ashtaca huatacunata ali intindingapaj munashcanchi? b) ¿Ima quimsa tapuicunatata yachajupashun?

² Jehová Diosta sirvijcunaca ashtaca huatacunata Diospa espíritu santopa ayudata mañashpami, Mateo capítulo 24, 25​pi Jesuspa shimicunata aliguta estudianajushcanchi. Shinaca cai quimsa tapuicuna ima hora pactarijta yachangapaj ricupashunchi: 1) “Ninan manllanai llaqui” punllacuna o gran tribulacionga ¿ima horata callarin?, 2) Jesusca ¿ima horata llamagucunata chivocunamanda separanga?, 3) ¿Ima horata Jesusca shamunga? (Mat. 24:21; 25:​31-33.)

3. Punda huatacunaca ¿imatata ninan manllanai llaqui punllacunamandaca crircanchi?

³ Testigo de Jehovacunaca ashtaca huatacunatami crircanchi, huata 1914pi Primera Guerra Mundial callarijpimi, ninan manllanai llaqui punllacunaca callarirca nishpa. Shinallata yanmi carcanchi, ungidocuna tucui llactacunapi villachichunmi Jehová Diosca huata 1918pi guerrata tucuchishpa “chai llaqui punllacuna na unaicaman tiachun” saquirca nishpa (Mat. 24:​21, 22). Ashtahuangarin, villashpa tucuchijpimi Diablopa mundoca  tucuringa ninmi carcanchi. Imashinami ricupashcanchi pundacunaca crircanchimi, ninan manllanai llaqui punllacunaca huata 1914pimi callarirca nishpa. Cutin 1918manda ñaupamanga asha tiempota tranquilomi causashun, chai jipami Armagedonga shamunga nin carcanchi.

4. Jesuspa shimicunamandaca ¿imatata ashtahuan ali intindircanchi?

⁴ Huaquin huata jipaca, aliguta estudiashpami intindircanchi tucurimui punllacunamanda parlaj profeciapa huaquin partecunaca ishcai viaje pactarijta (Mat. 24:​4-22). Primeroca huata 33manda huata 70camanmi Judea llactapi pactarirca. Jipaca ñucanchi punllacunapimi mundo enteropi pactarina can. Shinami Jesuspa profeciamandaca shuj yuyaicunatapash ashtahuan intindinajunchi. *

5. a) Huata 1914pica ¿imata tiai callarirca? b) Jatun nanaicunaca ¿ima horata primeroca pactarirca?

⁵ ¿Imamandata ninchi ninan manllanai llaqui punllacunaca na huata 1914pichu callarirca nishpa? Bibliapi profeciacunaca ninmi, panda religionguna llaquichi tucujpimi ninan manllanai llaqui punllacunaca callaringa nishpa. Shinapash panda religionguna llaquichi tucunapaj randica guerracunami huata 1914pica callarirca. Chaimandami ninchi, huata 1914pica na ninan manllanai llaqui punllacuna callarircachu nishpa. Huata 1914pica “jatun nanaicunami” tiai callarirca’ (Mat. 24:​8, NM). Cai jatun nanaicunaca huata 33manda huata 66camanmi Jerusalén, Judea llactacunapi primeroca pactarirca.

6. Ninan manllanai llaqui punllacuna callarishcataca ¿imashinata yachashun?

⁶ Shinaca ninan manllanai llaqui punllacuna callarishcataca ¿imashinata yachashun? Jesusca nircami: ‘Ninanda millanayachi tucushcami Diospa huasitaca llaquinaita tucuchijunga. (Cashna villashcata liijca, aliguta yarichun ninimi). Chaita ricushpaca, Judeapi causajcunaca urcucunapi pacajugrichun ninimi’ nishpa (Mat. 24:​15, 16). Cai shimicunaca  huata 66pimi primeroca pactarirca. Ninanda millanayachi tucushcaca romano soldadocunami carca. Chai romano soldadocunami huata 66pica Jerusalén llactatapash Diospa huasitapash atacarca. Judiocunapaca Jerusalenbash Diospa huasipash santomi carca. Mateo 24:​15, 16 shimicuna cutinbash pactarijpimi, ninanda millanayachi tucushca Organización de las Naciones Unidasca Jesusta catinchi nij tucushca religiongunatapash tucui shujta panda religiongunatapash atacanga. Jesusta catinchij nij tucushca religiongunaca limpio ali cuendami gentecunapa ñaupajpica ricurin. Jesusta catinchi nij tucushca religiongunatapash tucui shujta panda religiongunatapash Organización de las Naciones Unidas atacanataca Apocalipsis 17:​16-18​pimi nijun. Chaita ricushpami ninan manllanai llaqui punllacuna callarijta yachashun.

7. a) Huata 66pica ¿imashinata huaquingunaca salvarirca? b) Shamuj punllacunapica ¿imashi tucunga?

⁷ Jesusca nircapashmi chai punllacunaca na unaicamanllu tianga nishpa. Cai shimicunaca romanocuna huata 66pi Jerusalenda atacagrijushpapash na atacashpa tigrajpimi primeroca pactarirca. Chaimi Jerusalenbi, Judeapi ungidocunaca pacajungapaj rishpa salvarirca (Mateo 24:​22, liingui; Mal. 3:17). Shamuj punllacunapica, ninan manllanai llaqui punllacunapi causanajujpimi Organización de las Naciones Unidasca panda religiongunata atacanga. Shinapash ali religiondapash ama atacachunmi Jehová Diosca Organización de las Naciones Unidastaca trancanga. Shinami Jehová Diosta ali sirvijcunaca salvari ushanga.

8. a) Ninan manllanai llaqui punllacuna callarishca jipaca ¿imashi tucunga? b) ¿Ima horata 144.000manda último ungidoca cielopi mandana bendicionda chasquinga. (Tucuri notacunapa recuadropi nota 2ta ricupangui.)

⁸ Ninan manllanai llaqui punllacuna callarishca jipaca ¿imashi tucunga? Jesusca nircami, ninan manllanai llaqui punllacuna callarishca jipaca asha tiempo yalingarami nishpa. Chai tiempopimi Ezequiel 38:​14-16;  Mateo 24:​29-31​pi shimicuna pactaringa (cai textota liingui). * Chai jipami Armagedón callaringa. Armagedonga romanocuna Jerusalenda huata 70tapi tucuchishcashnami canga (Mal. 4:1). Ninan manllanai llaqui punllacuna tucurishca jipaca ‘cai pacha tiai callarishcamanda na tiashca jatun llaquimi’ Armagedonbica tianga (Mat. 24:21). Chai jipami Jesusca huaranga huatacunata mandai callaringa.

9. Ninan manllanai llaqui punllacunapi ima tucunata yachashpaca ¿imashinata sintiripanchi?

⁹ Ninan manllanai llaqui punllacunapica ima llaquicuna ricurijpipash Diospa llactaca salvaringami (Apoc. 7:​9, 14). Ashtahuangarin Armagedonbimi Jehová Diosca pailla mandana cashcata ricuchinga, paipa shutitapash tucui llullacunamanda limpianga (Sal. 83:18; Ezeq. 38:23). Ninan manllanai llaqui punllacunapi ima tucunata yachashpaca ashtacatapachami cushijunchi.

10. Ñaupa huatacunapica ¿imatata crircanchi?

¹⁰ Cunanga llamagucunata chivocunamanda ima hora separanata intindichij profeciata ricupashunchi (Mat. 25:​31-46). Punda huatacunaca crircanchimi, tucuri punllacunaca huata 1914pi callarijpimi llamagucunataca chivocunamanda separai callarirca nishpa. Shinallata ninmi carcanchi, Diospa Reinomanda villajpi na cazushpa ninan manllanai llaqui punllacuna nara callarijpillata huañujcunaca chivoshna nali gentecunami can, na causaringachu nishpa.

11. ¿Imamandata ninchi, na huata 1914pichu llamagucunata chivocunamanda separai callarica nishpa?

¹¹ Huata 1995pica La Atalaya revistaca Mateo 25:31​ta aliguta intindishpami cashna nirca: “Runa Aichayu tucushca ñucami, punchapamba shamusha. Jucha illaj ñuca angelcunapashmi ñucahuan shamunga. Shina shamushpami, punchapamba [tronopi] tiarishpa” gentecunataca juzgasha nishpa. Chai revistaca intindichircami, huata 1914pimi Jesusca Diospa Reinopi Rey tucurca nishpa. Shinapash tucui llactacunata juzgangapaca nara tronopi tiarinllu nircami (Mat. 25:32; Daniel 7:13​huan chimbapurangui). Cutin llamagucunata chivocunamanda separana profeciaca ninmi, Jesusca tronopi tiarishpami llamagucunataca chivocunamanda separanga nishpa (Mateo 25:​31-34, 41, 46, liingui). Chaimandami ninchi Jesusca na huata 1914pichu llamagucunata chivocunamanda separai callarishcanga nishpa. * Shinaca ¿ima horashi Jesusca llamagucunata chivocunamanda separai callaringa?

12. a) Jesusca ¿ima horata tucui llactamanda gentecunata juzgai callaringa? b) Mateo 24:​30, 31; 25:​31-33, 46​pica ¿imatata nin? (Tucuri notacunapa recuadropi nota 4tapah ricupangui.)

 ¹² Tucuri punllacunamanda parlaj profeciapica intindichinmi, panda religiongunata tucuchishca jipami Jesusca tronopi tiarishpa tucui llactacunata juzganga nishpa. Imashinami párrafo 8pi yachajuparcanchi, Mateo 24:​30, 31​pi huaquin shimicunaca chai punllacunapimi pactaringa. Mateo 24:​30, 31​pi profeciacunata llamagucunata chivocunamanda separana chimbapuraihuan ricujpica casi igualmi can. Ishcandi profeciacunapica ninmi, Jesusca paipa angelcunahuan punchapambaguta shamushpami tucui llactacunata juzganga. Llamagucunashna ali gentecunaca causaita causana caimandami ‘shinlli tucushpa vichai ricunga’. * Cutin chivocunashna nali gentecunaca tucuchi tucuna caimandami “ninanda huacanajunga” (Mat. 25:​31-33, 46).

13. a) Jesusca ¿ima horata llamagucunataca chivocumanda separanga? b) Chaimanda ¿imashinata villachina capanchi?

 ¹³ Imashinami ricupashcanchi, Jesusca ninan manllanai llaqui punllacunapimi llamagucunashna ali gentecunataca chivocunashna nali gentecunamanda separanga. Armagedonbimi  chivoshna nali gentecunataca tucuchitapacha tucuchinga. Chaimandami gentecunataca ‘causaiman apaj ñanbi’ purichun uchashpa ayudana canchi (Mat. 7:​13, 14). Huaquin gentecunaca cunanbillatami llamagucunashna ali cashcata o chivocunashna nali cashcata ricuchinajun. Shinapash, ninan manllanai llaqui punllacunapimi llamagucunataca chivocunamanda separanga. Shinaca ali villaicunata gentecuna uyashpa chasquichunga ama shaijushpa gentecunaman villachipashunchi.

14, 15. ¿Maijan chuscu textocunata ricuchin, tronopi tiarishpa Jesús juzganata?

¹⁴ Jesuspa profeciamandaca shuj yuyaigucunatashpami intindina capanchi. Shinaca chaicunata ricupashun.

¹⁵ Mateo 24:29–25:46​pica Jesusca tucuri punllacunapi, ninan manllanai llaqui punllacunapi ima tucunatami parlajurca. Ashtahuangarin, chai textocunapimi pai shamunamandaca 8 viajeta parlan. * Ninan manllanai llaqui punllacunamanda parlashpaca Jesusca nircami: ‘Runa Aichayu tucushca ñucami, fuyu jahuapi shamusha’ nishpa. Shinallata nircami: ‘Cangunata Mandaj ñuca ima hora tigramunataca na yachanguichichu’ nishpa. Ashtahuanbash nircami: ‘Runa Aichayu tucushca ñucaca cungashcapimi ñapash shamusha’ nishpa. Ashtahuangarin, llamagucunata chivocunamanda separana profeciapica nircapashmi: “Runa aichayu tucushca ñucami, punchapamba shamusha” nishpa (Mat. 24:​30, 42, 44; 25:31). Cai chuscu textocunaca Jesús tronopi tiarishpa juzganatami nijun. Cutin ¿Jesús shamunataca maijan textocunapita nijun?

16. Jesús shamunamandaca ¿ima textocunapita ashtahuan parlajun?

¹⁶ Jesusca aliguta cazushpa aliguta yarishpa sirvij esclavomanda parlashpaca nircami: ‘Mingashcata pactachijujta amo japij shamujpica, chai runaguca ninandami cushijunga’ nishpa. Shinallata, jarihuan nara tacarishca cuitsacunamanda chimbapuraipica Jesusca nircami: “Cuitsacuna aceiteta randingapaj rinajujpimi, novioca chayamurca” nishpa. Talentocunamanda parlashpaca Jesusca nircami, sirvijcunapa amoca ‘tauca huatacunapimi  tigramurca o [“shamurca”, NM]’ nishpa. Chai jipapash Jesusca nircami: ‘Ñuca shamushpaca mirashca culquindimi japiman carcani’ nishpa (Mat. 24:46; 25:​10, 19, 27). Cai chuscu versocunapica ¿imatata yachajunchi?

17. Mateo 24:46​ta ricushpaca ¿imatata punda huatacunapica nin carcanchi?

¹⁷ Ñaupa huata publicaciongunapica nircanchimi, Mateo 24:46; 25:​10, 19, 27 textocunaca Jesús huata 1918pi shamushcatami intindichijun nishpa. Aliguta cazushpa aliguta yarishpa sirvij esclavomanda parlashpaca crircanchimi, Mateo 24:46​pica ungidocuna espiritualmente imashina cashcata ricungapami Jesusca huata 1918pi shamurca nishpa (Mateo 24:​45- 47, liingui). Shinallata crircanchimi, huata 1919pimi Jesusca paipa tucui charishcacunata chai esclavoman mingarca nishpa (Mal. 3:1). Shinapash, Jesuspa profeciataca aliguta intindinarami cashcanchi. Ricupashun imatami ashtahuan aliguta intindina cashcata.

18. Jesuspa profeciata ashtahuan aliguta intindishpaca ¿imatata yachajupashcanchi?

¹⁸ Mateo 24:46​pa punda textocunapi “shamunga” nishpaca, ninan manllanai llaqui punllacunapi Jesús juzgangapaj shamunatami intindichijun (Mat. 24:​30, 42, 44). Shinallata imashinami  párrafo 12pi yachajuparcanchi, Mateo 25:31​pi Jesús shamuna nishcaca jipa punllacunapimi pactaringa. Chaimandami yanchi, Mateo 24:46, 47​pi shimicunaca ninan manllanai llaqui punllacunapimi pactaringa nishpa. Shinaca cai profeciapash jipa punllacunapimi pactaringa. * Jesús parlashca profeciamanda aliguta yachajushpami intindinchi, Jesús shamunata parlajuj 8 textocunaca ninan manllanai llaqui punllacunapi pactarina cashcata.

19. a) Cunanbica ¿imatata ashtahuan aliguta intindishcanchi? b) Shamuj temacunapita ¿imatata yachajupashun?

¹⁹ Cai temapica cai quimsa yuyaicunatami aliguta intindipashcanchi: 1) Ninan manllanai llaqui punllacunaca na huata 1914pichu callarirca. Chai punllacunaca, Babilonia shuti jatun pueblota Naciones Unidas atacajpimi callaringa. 2) Llamagucunata chivocunamanda separanapash na huata 1914pichu callarirca. Ninan manllanai llaqui punllacunapimi Jesusca llamagucunata chivocunamanda separanga. 3) Jesusca na huata 1919pichu aliguta cazushpa aliguta yarishpa sirvij esclavomanga paipa tucuilla charishcacunata mingarca. Ashtahuangarin ninan manllanai llaqui punllacunapimi Jesusca paipa tucuilla charishcacunataca esclavomanga minganga. Shinaca cai quimsa yuyaicunaca ninan manllanai llaqui punllacunapimi pactaringa. Shinapash, aliguta cazushpa aliguta yarishpa sirvij esclavomandaca ¿imacunatallata intindina capashcanchi? Tucuri punllacunapi pactarina shuj profeciacunataca ¿imashinata intindinchi? Cai tapuicunataca shamuj temacunapimi yachajupashun.