1. Hanesan ho apóstolu sira, ita hakarak hatene kona-ba saida?

 BAINHIRA loron neʼebé Jesus mate besik daudaun, ninia apóstolu sira hakarak hatene kona-ba sira-nia futuru. Tan neʼe, sira naʼin-haat husu nia: “Dehan mai ami wainhira buat neʼe hotu sei mosu, sinál ida-neʼebé mak sei hatudu . . . mundu neʼe atu hotu.” (Mt 24:3; Mc 13:3) Ita bele hetan Jesus nia resposta iha Mateus kapítulu 24 no 25. Iha profesia neʼe, Jesus fó-hatene nanis kona-ba akontesimentu oioin neʼebé importante. Ita mós hakarak hatene didiʼak kona-ba buat neʼebé sei akontese iha ita-nia futuru.

2. (a) Ba tinan barak ona, Jeová nia atan sira buka-hatene saida? (b) Ita sei koʼalia kona-ba pergunta tolu saida?

² Ba tinan barak ona, Jeová nia atan sira estuda Jesus nia liafuan kona-ba loron ikus sira. Sira halo orasaun hodi husu Maromak nia ajuda atu hatene ho klaru bainhira mak Jesus nia profesia sei sai loos. Iha lisaun neʼe, ita sei hetan resposta ba pergunta tolu tuirmai neʼe: Bainhira mak “terus boot” sei hahú? Bainhira mak Jesus sei komesa ninia tesi-lia ba “bibi-malae” no “bibi-timur”? Bainhira mak Jesus sei “mai”?—Mt 24:21; 25:31-33.

3. Iha tempu uluk, Maromak nia atan sira hanoin saida kona-ba terus boot?

³ Iha tempu uluk, Maromak nia atan sira hanoin katak terus boot hahú ona iha tinan 1914 ho Funu Mundiál Primeiru. Tuir sira-nia hanoin, iha tinan 1918 Jeová halo funu neʼe “sai badak” hodi fó tempu ba ema kose-mina sira atu haklaken lia-foun diʼak ba nasaun hotu. (Mt 24:21, 22) No sira hein katak kuandu serbisu haklaken ramata, Maromak sei halakon Satanás nia mundu aat neʼe. Tan neʼe, Maromak nia atan sira iha tempu uluk fiar katak terus boot iha parte tolu: Ulukliu terus boot komesa iha tinan 1914, tuirmai terus neʼe sai menus iha tinan 1918,  no ikusliu terus boot sei ramata ho funu Armagedon.

4. Nuʼudar ita estuda liután Jesus nia profesia, saida mak ita komprende?

⁴ Liutiha neʼe, ita komprende katak Jesus nia profesia kona-ba loron ikus sira sai loos dala rua. (Mt 24:4-22) Profesia neʼe ulukliu sai loos iha apóstolu sira-nia tempu iha rai-Judeia, no ikusmai ohin loron iha mundu tomak. Nuneʼe, ita troka fali ita-nia hanoin kona-ba dalan neʼebé ita komprende parte balu husi Jesus nia profesia. a

5. (a) Saida mak komesa iha tinan 1914? (b) Iha apóstolu sira-nia tempu, bainhira mak “terus” akontese iha Jerusalém no Judeia?

⁵ Porezemplu, terus boot la hahú iha tinan 1914. Tanbasá? Tanba Bíblia hatudu ho klaru katak terus boot hahú bainhira relijiaun falsu mak lakon, laʼós bainhira nasaun sira halo funu hasoru malu. Nuneʼe, funu iha tinan 1914 laʼós kona-ba tempu “terus boot”, maibé funu neʼe mak sinál ida neʼebé hatudu katak loron ikus sira-nia “terus foin hahú”. (Mt 24:8) Iha apóstolu sira-nia tempu, “terus” hanesan neʼe akontese ona iha Jerusalém no Judeia husi tinan 33 toʼo 66 liutiha Kristu.

6. Oinsá mak ita bele hatene katak “terus boot” komesa?

⁶ Entaun, oinsá mak ita bele hatene katak “terus boot” komesa? Jesus hatete: “Wainhira imi haree buat aat boot neʼebé profeta Daniel dehan nanis mosu iha fatin santu—ema neʼebé lee buka-hatene bá—, iha oras neʼe ema sira neʼebé iha Judeia halai ba foho bá.” (Mt 24:15, 16) Ulukliu, liafuan neʼe sai loos iha tinan 66 bainhira tropa Roma (“buat aat boot”) mak ataka sidade Jerusalém no ninia templu (fatin santu ba ema judeu sira). Iha futuru, Jesus nia liafuan neʼe sei sai loos dala ida tan kuandu Nasoins Unidus  (“buat aat boot”) mak ataka relijiaun kristaun falsu (neʼebé santu ba ema neʼebé bolu an nuʼudar ema kristaun) no relijiaun seluk hotu neʼebé parte husi Babilónia Boot, hanesan fó-hatene nanis iha Apokalipse 17:16-18. Klaru katak terus boot sei komesa bainhira Babilónia Boot mak lakon.

7. (a) Oinsá mak ema kristaun sira hetan salvasaun iha tempu uluk? (b) Saida mak sei akontese iha futuru?

⁷ Jesus mós hatete: “Loron neʼe sei sai badak duni.” Iha tempu uluk, liafuan neʼe sai loos iha tinan 66 bainhira tropa Roma husik sidade Jerusalém. Ida-neʼe loke dalan ba ema kristaun kose-mina sira iha Jerusalém no Judeia atu halai hodi labele lakon sira-nia moris. (Lee Mateus 24:22; Mal 3:17) Entaun, oinsá ho terus boot iha futuru? Jeová sei habadak tempu neʼebé Nasoins Unidus mak ataka relijiaun falsu hodi la husik relijiaun neʼebé loos atu lakon hamutuk ho relijiaun falsu sira. Hodi halo nuneʼe, Jeová sei proteje ninia povu.

8. (a) Liutiha parte primeiru husi terus boot, saida deʼit mak sei akontese? (b) Bainhira mak ema kose-mina ikus sei saʼe ba lalehan? (Haree nota [2] iha pájina 8.)

 ⁸ Liutiha parte primeiru husi terus boot, saida mak sei akontese? Jesus nia liafuan hatudu katak sei hela tempu balu antes funu Armagedon komesa. Kona-ba tempu neʼe, ita bele lee Ezequiel 38:14-16 no Mateus 24:29-31. (Lee.) b Depois, ita sei haree funu Armagedon. Ida-neʼe bele kompara ho tempu neʼebé sidade Jerusalém naksobu iha tinan 70. (Mal 4:1) Sin, funu Armagedon neʼe mak sei sai parte ikus husi terus boot neʼebé “hori mundu hahú toʼo ohin seidauk mosu”. (Mt 24:21) Ikusmai, Kristu nia Ukun ba Tinan Rihun Ida sei hahú.

9. Jesus nia profesia kona-ba terus boot book ita oinsá?

⁹ Profesia kona-ba terus boot neʼe  hametin ita-nia fiar. Tanbasá? Tanba ida-neʼe hatudu katak maski ita hasoru susar naran deʼit, maibé Jeová nia povu nuʼudar grupu sei moris liu terus boot. (Apok 7:9, 14) Iha Armagedon, Jeová sei hatudu sai katak nia deʼit mak iha direitu atu ukun nuʼudar Ukun-Naʼin neʼebé diʼak liu hotu, no halo santu ninia naran.—Sal 83:18; Eze 38:23.

10. Uluk, ita hanoin saida kona-ba tempu neʼebé Jesus halaʼo tesi-lia ba ema hotu?

¹⁰ Hanoin toʼok kona-ba akontesimentu ida tan iha Jesus nia profesia. Bainhira mak Jesus sei tesi lia ba ema hotu nuʼudar bibi-malae ka bibi-timur? (Mt 25:31-46) Uluk, ita hanoin katak Jesus komesa tesi lia ba ema hotu husi tinan 1914. Ita mós hanoin katak ema neʼebé la simu mensajen Reinu nian no mate antes terus boot akontese, sira simu ona tesi-lia nuʼudar bibi-timur no la iha esperansa atu hetan moris-hiʼas iha futuru.

11. Tanbasá mak ita bele fiar katak Jesus nia tesi-lia ba povu hotu seidauk komesa iha tinan 1914?

¹¹ Maibé iha tinan 1995, livru Menara Pengawal esplika liafuan iha Mateus 25:31 neʼebé dehan: “Wainhira Oan-Mane mai iha nia glória ho nia anju sira hotu hamutuk ho nia, nia sei tuur iha nia kadunan glória nian.” Livru neʼe esplika katak Jesus sai Liurai ba Maromak nia Ukun iha tinan 1914, maibé nia seidauk sai Tesi-Lia Naʼin ba “povu hotu”. (Mt 25:32; kompara ho Daniel 7:13.) No ai-knanoik bibi-malae ho bibi-timur nian mak kona-ba Jesus nia knaar nuʼudar Tesi-Lia Naʼin. (Lee Mateus 25:31-34, 41, 46.) Tanba Jesus seidauk sai Tesi-Lia Naʼin ba povu hotu iha tinan 1914, ida-neʼe katak Jesus seidauk komesa tesi lia hodi haketak bibi-malae husi bibi-timur. c Se nuneʼe, bainhira mak Jesus sei komesa tesi lia ba povu hotu?

12. (a) Bainhira mak Jesus sei komesa tesi lia ba povu hotu? (b) Tuir Mateus 24:30, 31 no Mateus 25:31-33, 46, saida deʼit mak sei akontese?

 ¹² Jesus nia profesia hatudu katak depois relijiaun falsu sira lakon tiha mak nia sei komesa halaʼo tesi-lia ba povu hotu. Hanesan ita lee iha  parágrafu 8, Mateus 24:30, 31 esplika kona-ba buat balu neʼebé sei akontese iha tempu neʼebá. Kuandu ita lee didiʼak versíkulu sira-neʼe, ita bele hatene katak iha buat balu neʼebé hanesan ho ai-knanoik kona-ba bibi-malae ho bibi-timur. Porezemplu, Oan-Mane sei mai iha nia glória ho ninia anju sira; povu hotu sei halibur an iha ninia oin; sira neʼebé hetan tesi-lia nuʼudar bibi-malae sei ‘foti aas sira-nia ulun’ tanba sira sei hetan “moris ba nafatin”. d No ema neʼebé hetan tesi-lia nuʼudar bibi-timur sei “baku sira-nia hirus-matan” hodi hatene katak lakleur sira sei “lakon ba nafatin”.—Mt 25:31-33; Mt 25:46, MF.

13. (a) Bainhira mak Jesus sei tesi lia ba povu hotu nuʼudar bibi-malae ka bibi-timur? (b) Oinsá mak ida-neʼe sei kona ita-nia serbisu haklaken?

¹³ Sin, Jesus sei halaʼo tesi-lia ba povu hotu nuʼudar bibi-malae ka bibi-timur bainhira nia sei mai durante terus boot. Ikusmai, iha funu Armagedon, ema neʼebé hatudu hahalok hanesan bibi-timur sei “lakon ba nafatin”. Oinsá mak ida-neʼe sei kona ita-nia serbisu haklaken? Ida-neʼe hatudu katak haklaken mak serbisu neʼebé importante tebes. Toʼo terus boot hahú, ema sei iha tempu atu troka sira-nia hanoin no komesa laʼo iha dalan kloot neʼebé “lori ema ba moris”. (Mt 7: 13, 14) Klaru katak ohin loron ema hotu hatudu daudauk hahalok hanesan bibi-malae ka bibi-timur. Maibé ita labele haluha katak tesi-lia ikus nian sei akontese durante terus boot. Ida-neʼe book ita atu kontinua fó oportunidade ba ema barak liután hodi sira bele rona no simu mensajen kona-ba Maromak nia Ukun.

14, 15. Eskritura haat saida deʼit mak koʼalia kona-ba tempu neʼebé Kristu sei mai nuʼudar Tesi-Lia Naʼin?

¹⁴ Nuʼudar ita estuda didiʼak Jesus nia profesia, iha mós buat balu tan neʼebé ita presiza troka ita-nia hanoin kona-ba bainhira loos mak Jesus nia liafuan balu sei akontese. Mai ita haree hamutuk.

¹⁵ Jesus nia profesia neʼebé hakerek iha Mateus 24:29–25:46, nia koʼalia liuliu kona-ba buat neʼebé sei akontese iha loron ikus sira no durante terus boot neʼebé besik ona atu hahú. Iha eskritura sira-neʼe, Jesus hatete ba dala ualu kona-ba tempu neʼebé nia sei “mai”, ka “fila mai”. e Porezemplu, kona-ba terus boot, nia hatete: “Sira sei haree Oan-Mane mai husi kalohan leten.” “Imi la hatene iha loron neʼebé mak imi-nia Naʼi hiʼit an mai.” “Imi la hatene iha sá oras Oan-Mane sei mai.” No iha ai-knanoik kona-ba bibi-malae ho bibi-timur, Jesus hatete: “Oan-Mane mai iha nia glória.” (Mt 24:30, 42, 44; 25:31) Iha eskritura haat neʼe, Jesus koʼalia kona-ba tempu neʼebé nia sei “mai” nuʼudar Tesi-Lia Naʼin iha futuru. Maibé oinsá kona-ba eskritura haat tan neʼebé Jesus temi liafuan “mai”?

16. Iha eskritura seluk saida deʼit mak Jesus temi kona-ba tempu neʼebé nia sei mai?

¹⁶ Kona-ba atan neʼebé laran-metin no matenek, Jesus hatete: “Ksolok ba atan neʼebé, wainhira naʼi fila mai, nia sei hetan nia badinas nuneʼe.” Iha ai-knanoik feto-raan sanulu nian, Jesus hatete: “Wainhira sira bá sosa [mina], noivu toʼo mai.” Iha ai-knanoik osan talenta nian, Jesus dehan: “Kleur tiha, atan sira-neʼe nia naʼin fila mai.” Iha ai-knanoik neʼe, naʼi hatete: “Fila tiha mai, haʼu bele foti haʼu-nia osan.” (Mt 24:46; 25:10, 19, 27) Iha eskritura sira-neʼe, Jesus temi dala haat tan  kona-ba tempu neʼebé nia sei mai. Maibé bainhira loos mak nia sei mai?

17. Uluk ita-nia livru sira hatete saida kona-ba tempu neʼebé Mateus 24:46 sai loos?

¹⁷ Ba tinan barak, ita-nia livru sira hatete katak eskritura haat neʼe mak kona-ba buat neʼebé akontese iha tinan 1918. Porezemplu, mai ita hanoin Jesus nia liafuan kona-ba ‘atan laran-metin no matenek’. (Lee Mateus 24:45-47.) Ba tempu kleur, ita hanoin katak Jesus kumpre ninia liafuan iha Mateus 24:46 iha tinan 1918 hodi haree didiʼak ema kose-mina nia adorasaun, no iha tinan 1919 Jesus entrega ninia rikusoin tomak ba atan laran-metin neʼe. (Mal 3:1) Maibé, ita presiza halo mudansa ba dalan neʼebé ita komprende kona-ba tempu neʼebé Jesus nia profesia neʼe sai loos. Tanbasá?

18. Hodi estuda didiʼak Jesus nia profesia, ita bele hatene saida kona-ba tempu neʼebé Jesus “mai”?

¹⁸ Kuandu Jesus temi liafuan “mai” iha versíkulu sira antes Mateus 24:46, ida-neʼe mak kona-ba tempu neʼebé Jesus sei mai atu tesi lia ba povu hodi halakon ema aat sira durante terus boot. (Mt 24:30, 42, 44) Hanesan ita haree iha  parágrafu 12, Mateus 25:31 mós koʼalia kona-ba futuru neʼebé Jesus sei “mai” hodi tesi lia ba povu hotu. Tan neʼe, ita bele fiar katak, hodi tuir Mateus 24:46, 47, Jesus sei mai atu entrega ninia rikusoi tomak ba atan laran-metin iha futuru durante terus boot. Sin, nuʼudar ita estuda didiʼak eskritura sira-neʼe, ita hatene katak Jesus nia liafuan “mai” neʼebé nia temi ba dala ualu hotu mak kona-ba futuru neʼebé nia sei tesi lia durante terus boot.

19. Ita aprende saida deʼit iha lisaun neʼe? No iha lisaun sira tuirmai neʼe, ita sei estuda kona-ba saida?

¹⁹ Entaun, iha lisaun neʼe, ita aprende saida deʼit? Iha parágrafu 2, ita husu pergunta tolu. Ulukliu, ita aprende katak terus boot la hahú iha tinan 1914, maibé sei hahú kuandu Nasoins Unidus mak ataka Babilónia Boot. Tuirmai, Jesus la komesa tesi lia ba povu hodi haketak bibi-malae husi bibi-timur iha tinan 1914, maibé ida-neʼe sei akontese durante terus boot. No ikusliu, ita aprende katak Jesus la entrega ninia rikusoin tomak ba atan laran-metin iha tinan 1919, maibé sei halo nuneʼe iha futuru. Neʼe katak iha futuru durante terus boot mak buat tolu neʼe hotu sei akontese. Oinsá mak esplikasaun foun neʼe sei kona dalan neʼebé ita komprende ai-knanoik kona-ba atan laran-metin? No oinsá mak ida-neʼe mós kona Jesus nia ai-knanoik sira seluk neʼebé sai loos daudauk iha loron ikus sira-neʼe? Mai ita buka-hatene iha lisaun sira tuirmai neʼe.