“Sumati Kami, San-o Ini Mahitatabo?”
“Ano an magigin tigaman han imo presensya ngan han ikatarapos hini nga sistema?”—MAT. 24:3.
1. Pariho ha mga apostol, ano an karuyag gud naton hibaroan?
HIRANI na matapos an ministeryo ni Jesus ha tuna, ngan karuyag gud hibaroan han iya mga disipulo kon ano an mahitatabo ha tidaraon. Salit pipira ka adlaw antes hiya mamatay, upat han iya mga apostol an nagpakiana ha iya: “San-o ini mahitatabo, ngan ano an magigin tigaman han imo presensya ngan han ikatarapos hini nga sistema?” (Mat. 24:3; Mar. 13:3) Binaton hi Jesus pinaagi hin tagna nga may damu nga detalye, nga nakarekord ha Mateo kapitulo 24 ngan 25. Hito nga tagna, nag-unabi hiya hin damu nga makatirigamnan nga panhitabo. An iya ginsiring importante gud ha aton kay karuyag liwat naton hibaroan an mahitatabo ha tidaraon.
2. (a) Ha paglabay han mga tuig, ano an ginpangalimbasogan naton nga mas masabtan? (b) Ano an tulo nga pakiana nga aton hihisgotan?
2 An mga surugoon ni Jehova maiha na nga nag-aaram han tagna ni Jesus mahitungod han kataposan nga mga adlaw ngan nag-aampo ha Dios nga buligan hira nga masabtan ito. Ginpangalimbasogan nira nga mas masabtan kon san-o matutuman an mga panhitabo ha tagna ni Jesus. Basi ipakita kon paonan-o nagin mas matin-aw an aton pagsabot, aton hisgotan inin tulo nga pakiana: San-o magtitikang an “daku nga kasakitan”? San-o huhukman ni Jesus an mga tawo sugad nga “mga karnero” o “mga kanding”? San-o ‘maabot’ hi Jesus?—Mat. 24:21; 25:31-33.
SAN-O MAGTITIKANG AN DAKU NGA KASAKITAN?
3. Ano an aton pagsabot hadto mahitungod han daku nga kasakitan?
3 Hadto, ginhunahuna naton nga an daku nga kasakitan nagtikang han 1914 han Girra ha Kalibotan I ngan ‘ginpahalipot [ni Jehova] ito nga mga adlaw’ han 1918 han natapos an girra basi an nanhibilin magkaada higayon nga isangyaw an maopay nga sumat ha ngatanan nga nasud. (Mat. 24:21, 22) Kon matapos na ito nga pagsangyaw nga buruhaton, bubungkagon an kalibotan ni Satanas. Salit ginhunahuna nga an daku nga kasakitan may tulo nga bahin: Nagtikang ito han 1914, temporaryo nga ginpaundang han 1918, ngan matatapos ha Armagedon.
4. Ano an aton nasabtan mahitungod han tagna ni Jesus may kalabotan ha kataposan nga mga adlaw?
4 Kondi tungod han dugang nga pag-usisa ha tagna ni Jesus, nasabtan naton nga an usa nga bahin han iya tagna mahitungod han kataposan nga mga adlaw may duha nga katumanan. (Mat. 24:4-22) Natuman ito ha Judea han siyahan nga siglo C.E., ngan magkakaada liwat ito katumanan ha bug-os nga kalibotan ha aton panahon. Salit kinahanglan naton bag-uhon an aton pagsabot ha iba nga mga bahin han tagna. *
5. (a) Ano an nagtikang han 1914? (b) Ito nga peryodo han kasakitan puropariho ha ano nga peryodo han siyahan nga siglo C.E.?
5 Nasabtan liwat naton nga an daku nga kasakitan waray magtikang han 1914. Kay ano? Kay iginpapakita han mga tagna ha Biblia nga an daku nga kasakitan magtitikang, diri pinaagi hin girra han mga nasud, kondi pinaagi hin pag-atake ha buwa nga relihiyon. Salit, an mga panhitabo han 1914 diri amo an tinikangan han daku nga kasakitan, kondi an ‘tinikangan han mga kasakitan [“pariho ha kaul-ol han panganak han babaye,” ftn.].’ (Mat. 24:8) Ini nga “kaul-ol han panganak,” siring pa, puropariho han nahitabo ha Jerusalem ngan Judea tikang han 33 C.E. tubtob 66 C.E.
6. Ano nga hitabo an magigin tinikangan han daku nga kasakitan?
6 Ano nga hitabo an magigin tinikangan han daku nga kasakitan? Hi Jesus nagtagna: “Kon makita niyo nga natindog ha baraan nga lugar an mangil-ad nga butang nga hinungdan han kabungkagan, sugad han gin-unabi ni propeta Daniel, (sadang gumamit hin pagsabot an magbarasa), an mga aadto ha Judea sadang pumalagiw ngadto ha kabukiran.” (Mat. 24:15, 16) Ha siyahan nga katumanan, an ‘pagtindog ha baraan nga lugar’ nahitabo han 66 C.E. han gin-atake han Romano nga kasundalohan (“an mangil-ad nga butang”) an Jerusalem ngan an templo (usa nga lugar nga baraan para ha mga Judio). Ha mas daku nga katumanan, an ‘pagtindog’ mahitatabo kon aatakehon na han United Nations (an “mangil-ad nga butang” ha aton panahon) an Kakristianohan (nga baraan para ha mga nag-aangkon nga Kristiano) ngan an ngatanan iba pa nga bahin han Babilonya nga Gamhanan. Ito nga pag-atake igintagna liwat ha Pahayag 17:16-18. Ito nga hitabo an magigin tinikangan han daku nga kasakitan.
7. (a) Paonan-o may mga natalwas ha siyahan nga siglo? (b) Ano an mahitatabo ha tidaraon?
7 Hi Jesus nagtagna liwat: “Pahahaliputon ito nga mga adlaw.” Ha siyahan nga katumanan, nahitabo ini han 66 C.E. han ‘ginpahalipot’ han Romano nga kasundalohan an ira pag-atake. Katapos, an dinihogan nga mga Kristiano ha Jerusalem ngan Judea pinalagiw basi ‘matalwas’ hira. (Basaha an Mateo 24:22; Mal. 3:17) Salit ano an mahitatabo durante han tiarabot nga daku nga kasakitan? “Pahahaliputon” ni Jehova an pag-atake han United Nations ha buwa nga relihiyon, ngan diri niya tutugotan nga mabungkag an tinuod nga relihiyon kaupod han buwa nga relihiyon. Maggagarantiya ini nga matatalwas an katawohan han Dios.
8. (a) Ano an mahitatabo katapos han siyahan nga bahin han daku nga kasakitan? (b) Posible nga ha ano nga panahon makakarawat han ultimo nga kaapi han 144,000 an iya balos ha langit? (Kitaa an endnote.)
8 Ano an mahitatabo katapos han siyahan nga bahin han daku nga kasakitan? Iginpapakita han mga pulong ni Jesus nga magkakaada peryodo han panahon nga magpapadayon tubtob ha pagtikang han Armagedon. Ano an mahitatabo durante hito nga panahon? An baton mababasa ha Esekiel 38:14-16 ngan Mateo 24:29-31. (Basaha.) * Katapos hito, makikita naton an Armagedon, an ultimo nga bahin han daku nga kasakitan, nga puropariho ha kabungkagan han Jerusalem han 70 C.E. (Mal. 4:1) Tungod han girra han Armagedon, iton tiarabot nga daku nga kasakitan magigin naiiba gud—usa nga panhitabo nga “waray pa mahitabo tikang ha tinikangan han kalibotan.” (Mat. 24:21) Katapos hito, magtitikang an Usa ka Yukot ka Tuig nga Pagmando ni Kristo.
9. Ano an epekto ha katawohan ni Jehova han tagna ni Jesus mahitungod han daku nga kasakitan?
9 Ini nga tagna mahitungod han daku nga kasakitan nagpaparig-on ha aton. Kay ano? Kay nagpapasarig ini ha aton nga anoman nga kakurian an aton maeksperyensyahan ha daku nga kasakitan, an katawohan ni Jehova sugad nga grupo matatalwas. (Pah. 7:9, 14) Labaw ha ngatanan, nalilipay kita kay ha Armagedon, hi Jehova magbibindikar han iya pagkasoberano ngan magbabaraan han iya baraan nga ngaran.—Sal. 83:18; Esek. 38:23.
SAN-O HUHUKMAN NI JESUS AN MGA TAWO SUGAD NGA MGA KARNERO O MGA KANDING?
10. Ano an aton pagsabot hadto mahitungod ha kon san-o huhukman an mga tawo sugad nga mga karnero o mga kanding?
10 Yana, tagda kon san-o matutuman an usa pa nga bahin han tagna ni Jesus—an parabola mahitungod ha paghukom ha mga karnero ngan mga kanding. (Mat. 25:31-46) Hadto, naghunahuna kita nga an paghukom ha mga tawo sugad nga mga karnero o mga kanding mahitatabo durante han bug-os nga peryodo han kataposan nga mga adlaw nga nagtikang han 1914 padayon. Naghunahuna liwat kita nga adton waray kumarawat han mensahe han Ginhadian ngan namatay antes magtikang an daku nga kasakitan huhukman sugad nga kanding—waray paglaom nga mabanhaw.
11. Kay ano nga an paghukom ha mga tawo sugad nga mga karnero o mga kanding masisiring nga waray magtikang han 1914?
11 Han 1995, nagkaada bag-o nga pagsaysay ha An Barantayan mahitungod han Mateo 25:31. Ito nga bersikulo nasiring: “Pag-abot han Anak han tawo nga may daku nga awtoridad upod an ngatanan nga anghel, malingkod hiya ha iya harangdon nga trono.” Gin-unabi ha An Barantayan nga hi Jesus nagin Hadi ha Ginhadian han Dios han 1914, kondi waray hiya ‘lumingkod ha iya harangdon nga trono’ sugad nga Hukom han “ngatanan nga nasud.” (Mat. 25:32; itanding an Daniel 7:13.) Pero an parabola mahitungod han mga karnero ngan mga kanding naghuhulagway kan Jesus labi na sugad nga Hukom. (Basaha an Mateo 25:31-34, 41, 46.) Tungod kay waray pa gumios hi Jesus sugad nga Hukom han ngatanan nga nasud han 1914, an iya paghukom ha mga tawo sugad nga mga karnero o mga kanding masisiring nga waray magtikang hito nga tuig. * Kon sugad, san-o magtitikang an paghukom ni Jesus?
12. (a) San-o hi Jesus magios ha siyahan nga higayon sugad nga Hukom han ngatanan nga nasud? (b) Ano nga mga panhitabo an iginhuhulagway ha Mateo 24:30, 31 ngan Mateo 25:31-33, 46?
12 An tagna ni Jesus mahitungod ha kataposan nga mga adlaw nagpapakita nga ha siyahan nga higayon magios hiya sugad nga Hukom han ngatanan nga nasud katapos mabungkag an buwa nga relihiyon. Sugad han gin-unabi ha parapo 8, an pipira han mahitatabo hito nga panahon mababasa ha Mateo 24:30, 31. Kon imo uusisahon ito nga mga bersikulo, makikita mo nga nagtagna hi Jesus hin mga panhitabo nga puropariho han iya gin-unabi ha parabola mahitungod ha mga karnero ngan mga kanding. Pananglitan, an Anak han tawo maabot nga may daku nga awtoridad upod an mga anghel; an ngatanan nga tribo ngan mga nasud titirukon; adton ginhukman sugad nga mga karnero ‘mahangad’ kay makarawat hira hin “kinabuhi nga waray kataposan.” * Adton ginhukman sugad nga mga kanding “magpupukpok han ira dughan tungod ha kasubo” kay maaram hira nga sisirotan hira hin “permanente nga kamatayon.”—Mat. 25:31-33, 46.
13. (a) San-o huhukman ni Jesus an mga tawo sugad nga mga karnero o mga kanding? (b) Paonan-o ini nga pagsabot nakakaapekto ha aton pagtagad ha aton ministeryo?
13 Salit, ano an aton masisiring? An mga tawo ha ngatanan nga nasud huhukman ni Jesus sugad nga mga karnero o mga kanding kon umabot na hiya durante han daku nga kasakitan. Katapos, ha Armagedon, an ultimo nga bahin han daku nga kasakitan, an sugad-kanding nga mga tawo ‘mamamatay’ ha kadayonan. Paonan-o ito nga pagsabot nakakaapekto ha aton pagtagad ha aton ministeryo? Nabulig ito ha aton nga masabtan nga importante gud an aton pagsangyaw nga buruhaton. Samtang diri pa nagtitikang an daku nga kasakitan, may panahon pa an mga tawo nga bag-uhon an ira panhunahuna ngan maglakat ha haligot nga dalan nga “tipakadto ha kinabuhi.” (Mat. 7:13, 14) Oo, an mga tawo bangin magpakita yana hin sugad-karnero o sugad-kanding nga disposisyon. Kondi sadang naton hinumdoman nga an ultimo nga paghukom kon hin-o an mga karnero ngan an mga kanding mahitatabo durante han daku nga kasakitan. Salit importante gud nga padayon nga isangyaw naton an mensahe han Ginhadian ha pinakadamu nga tawo kon posible basi magkaada hira higayon nga karawaton ito.
![[Retrato ha pahina 7]](https://assetsnffrgf-a.akamaihd.net/assets/m/2013530/univ/wpub/2013530_univ_cnt_3_xs.jpg)
Samtang diri pa nagtitikang an daku nga kasakitan, may panahon pa an mga tawo nga bag-uhon an ira panhunahuna (Kitaa an parapo 13)
SAN-O MAABOT HI JESUS?
14, 15. Ano an upat nga teksto nga nagtutudlok ha pag-abot ni Kristo ha tidaraon sugad nga Hukom?
14 Samtang padayon nga gin-uusisa naton an tagna ni Jesus, kinahanglan ba naton bag-uhon an aton pagsabot kon san-o matutuman an iba pa nga importante nga panhitabo? An tagna mismo an nabaton hini. Aton kitaon kon paonan-o.
15 Ha bahin han tagna ni Jesus nga nakarekord ha Mateo 24:29–25:46, nagpokus hiya labi na ha kon ano an mahitatabo hinin kataposan nga mga adlaw ngan durante han maabot nga daku nga kasakitan. Dida hito, walo ka beses nga gin-unabi ni Jesus an iya ‘pag-abot.’ * May kalabotan ha daku nga kasakitan, hiya nagsiring: “Makikita nira an Anak han tawo nga nalusad [“maabot,” Maopay nga Sumat] upod han mga dampog.” “Diri kamo maaram kon ano nga adlaw maabot an iyo Ginoo.” “An Anak han tawo maabot ha oras nga diri niyo ginlalaoman.” Ngan ha parabola ni Jesus mahitungod ha mga karnero ngan mga kanding, hiya nagsiring: ‘An Anak han tawo maabot nga may daku nga awtoridad.’ (Mat. 24:30, 42, 44; 25:31) An tagsa hinin upat nga bersikulo nagtutudlok ha pag-abot ni Kristo ha tidaraon sugad nga Hukom. Diin nga bahin han tagna ni Jesus mababasa an upat pa niya nga pag-unabi han iya pag-abot?
16. Ano an iba pa nga teksto nga nag-uunabi han pag-abot ni Jesus?
16 May kalabotan ha matinumanon ngan maaramon nga uripon, hi Jesus nagsiring: “Malipayon ito nga uripon kon ha pag-abot han iya Agaron ito an iya ginbubuhat!” Ha parabola mahitungod ha mga birhen, hi Jesus nagsiring: “Paglakat nira basi pumalit, inabot an karaslon nga lalaki.” Ha parabola mahitungod ha mga talanton, hi Jesus nagsiring: “Paglabay hin maiha nga panahon, inabot an agaron hito nga mga uripon.” Hito liwat nga parabola, an agaron nagsiring: ‘Pag-abot ko makukuha ko ito.’ (Mat. 24:46; 25:10, 19, 27) Ano nga panahon an gintutudlok hinin upat nga pag-unabi han pag-abot ni Jesus?
17. Ano an aton ginsiring hadto mahitungod ha pag-abot ni Jesus nga gin-unabi ha Mateo 24:46?
17 Hadto, an aton mga publikasyon nagsiring nga inin ultimo nga upat nga teksto nagtutudlok ha pag-abot ni Jesus han 1918. Pananglitan, tagda an ginsiring ni Jesus mahitungod ha “matinumanon ngan maaramon nga uripon.” (Basaha an Mateo 24:45-47.) Nasabtan naton nga an “pag-abot” nga gin-unabi ha bersikulo 46 nangahulogan nga inabot hi Jesus basi usisahon an espirituwal nga kahimtang han mga dinihogan han 1918, ngan iya igintapod ha uripon an ngatanan nga panag-iya han Agaron han 1919. (Mal. 3:1) Kondi, iginpapakita han dugang nga pag-usisa ha tagna ni Jesus nga kinahanglan bag-uhon an aton pagsabot mahitungod ha kon san-o matutuman an pipira nga bahin hito nga tagna. Kay ano?
18. Ha pag-usisa han bug-os nga tagna ni Jesus, ano an aton nasasabtan mahitungod han iya pag-abot?
18 Ha mga bersikulo antes han Mateo 24:46, an pulong nga ‘pag-abot’ pirme nagtutudlok ha panahon nga maabot hi Jesus basi magpahayag ngan magpadapat hin paghukom durante han daku nga kasakitan. (Mat. 24:30, 42, 44) Dugang pa, sugad han aton ginhisgotan ha parapo 12, an “pag-abot” ni Jesus nga gin-unabi ha Mateo 25:31 nagtutudlok liwat hito nga panahon han paghukom ha tidaraon. Salit makatadunganon an pagsiring nga an pag-abot ni Jesus basi itapod ha matinumanon nga uripon an ngatanan niya nga panag-iya, nga gin-unabi ha Mateo 24:46, 47, nagtutudlok liwat ha iya pag-abot ha tidaraon, durante han daku nga kasakitan. * Oo, an pag-usisa han bug-os nga tagna ni Jesus nagpapatin-aw nga an tagsa hinin walo nga pag-unabi han iya pag-abot nagtutudlok ha panahon han paghukom ha tidaraon durante han daku nga kasakitan.
19. Ano nga mga pagbag-o ha aton pagsabot an aton ginhisgotan, ngan ano nga mga pakiana an babatunon ha sunod nga mga artikulo?
19 Sugad nga repaso, ano an aton hinbaroan? Ha tinikangan hini nga artikulo, iginbangon naton an tulo nga pakiana mahitungod ha kon san-o matutuman an pipira nga panhitabo. Siyahan, ginhisgotan naton nga an daku nga kasakitan waray magtikang han 1914 kondi magtitikang kon atakehon na han United Nations an Babilonya nga Gamhanan. Ikaduha, gin-usisa naton kon kay ano nga an paghukom ni Jesus ha mga tawo sugad nga mga karnero o mga kanding waray magtikang han 1914 kondi mahitatabo durante han daku nga kasakitan. Ikatulo, gin-usisa naton kon kay ano nga an pag-abot ni Jesus basi itapod ha matinumanon nga uripon an ngatanan niya nga panag-iya waray mahitabo han 1919 kondi mahitatabo durante han daku nga kasakitan. Salit iton tulo nga pakiana nagtutudlok ha usa la nga peryodo han panahon ha tidaraon—an daku nga kasakitan. Paonan-o inin bag-o nga pagsaysay dugang nga nakakaapekto ha aton pagsabot ha ilustrasyon mahitungod han matinumanon nga uripon? Paonan-o liwat ini nakakaapekto ha aton pagsabot ha iba pa nga parabola, o ilustrasyon, ni Jesus nga natutuman hinin panahon han kataposan? Inin importante nga mga pakiana hihisgotan ha sunod nga mga artikulo.
^ par. 4 Parapo 4: Para ha dugang nga impormasyon, kitaa an Pebrero 15, 1994, pahina 8-21 ngan Mayo 1, 1999, pahina 8-20 nga An Barantayan.
^ par. 8 Parapo 8: Usa han mga panhitabo nga gin-unabi hito nga mga bersikulo amo an ‘pagtirok han mga pinili.’ (Mat. 24:31) Salit posible nga an ngatanan nga dinihogan nga aanhi pa ha tuna katapos han siyahan nga bahin han daku nga kasakitan babanhawon ngadto ha langit antes magtikang an girra han Armagedon. Ini an bag-o nga pagsaysay nga kasaliwan ha ginhisgotan ha “Questions From Readers” ha The Watchtower, Agosto 15, 1990, pahina 30.
^ par. 11 Parapo 11: Kitaa an Oktubre 15, 1995 nga An Barantayan, pahina 14-24.
^ par. 12 Parapo 12: Kitaa an kapariho nga asoy ha Lucas 21:28.
^ par. 15 Parapo 15: An mga pulong nga ‘paglusad’ ngan ‘pag-abot’ mga hubad han iba-iba nga porma han usa la nga Griego nga berbo nga er′kho·mai.
^ par. 18 Parapo 18: Sugad han gin-unabi, an Griego nga pulong nga iginhubad nga “pag-abot” ha Mateo 24:46 usa nga porma han Griego nga berbo nga iginhubad nga “nalusad” ngan “maabot” ha Mateo 24:30, 42, 44.
