1. a) Lidan fiú dimurei abahüdagua huméi hénpulu luáguti híduru wuribati labadinagua türigu. b) Ida liña lafuranguagüdüni Hesusu ka lan mini lubéi?

LIDAN aban lídangiñe hénpulu le labahüdagubei Hesusu libügürü Larúeihan Bungiu, adimurehati luagu aban wügüri le ábunagubei lila türigu le buiti, luma luagu aban ágani le ábunagubei híduru wuribati labadinagua. Aba laweinamudun híduru wuribati saragu darí lun lásügüraguni türigu, gama lumoun, aba lariñagun wügüri le ábunagubei türigu houn lumusuniña: “Ígiragubei huméi lun laweinamudun úara darime lidaani alubahani”. Lidan lidaani alubahani, aba lóundarawaguniwa türigu gudawa ligía híduru wuribati. Ka mini lubéi katei le? Afuranguagüda lumuti Hesusu (aliiha huméi Matéu 13:24-30, 37-43). Akutiha waméi ka lan larufudubei hénpulu le (ariha huméi rekuáduru “Híduru wuribati labadinagua türigu”).

2. a) Ka larufudubei sügǘ le anügübei fulasu licharirugu ábunaguti? b) Kaba fánreinti lídangiñe hénpulu le wakutiha?

² Arufuda lumuti le asuseredubei licharirugu ábunaguti, ida luba lan ani ídaba lan lóundaraguaña Hesusu gürigia ha ítarabaña kei türigu, kristiánugu anuadirúaaña ha lúnbaña hagumadihan luma lidan Larúeihan. Gumeseti ábunaguni le lidan Pentekosutesi lidan irumu 33. Lídounme lagumuchun ubóu, danme le resibi hamaali kristiánugu anuadirúaaña hame añahaguabaña ubouagu lagumuhóun seyu ani barüwa hagíame sielun, ligíaba lagumuchun lóundarawagun türigu (Mat. 24:31; Aruf. 7:1-4). Ítara kei ru lan aban fulasu íñuti luagu aban wübü chansi lun larihini gürigia sun le geyegubei lau buidu, adügati giñe hénpulu le lun buídutima lan gunfuranda wamani sügǘ le lunbei lanügün fulasu kéiburi lidan bián milu irumu. Ítarati, ka burí sügǘ luáguti Larúeihan Bungiu gayarabei gunfuranda wamani? Ayanuhati hénpulu le labahüdagubei Hesusu luagu lidaani ábunaguni, laweiridun nadü luma alubahani. Luágutimaba lidaani alubahani layanuha arütíkulu le. *

3. a) Ka katei asuseredubei lárigiñe furumiñeti sígulu? b) Ka álügüdahani wadarirubei lidan Matéu 13:28, ani kátaña adügübalin? (Ariha huméi abürüdǘni.)

³ Lidan lagumeseha sígulu biama, ligía “lachülaagun híduru  wuribati”, dan le hachülaagunbei kristiánugu mama inarünitiña ubouagun (Mat. 13:26). Lúmounbei sígulu gádürü, gíbeguatimahaña meha kristiánugu ha ítarabaña kei híduru wuribati sügǘ hau kristiánugu anuadirúaaña. Haritagua waméi amuriaha hamá lumusuniña iyubudiri üma luma lun háhulahani híduru wuribati (Mat. 13:28). * Ida liña lóunabun iyubudiri?

4. a) Ka larufudubei lóunabagüle Iyubudiri, Hesusu? b) Lúmagiñe ídabuga furangutima lan harihíniwa kátaña lan kristiánugu ítarabaña kei türigu?

⁴ Dan le ladimurehaña lubéi Hesusu libügürü türigu luma híduru wuribati ariñagati: “Ígiragubei huméi lun laweinamudun úara darime lidaani alubahani”. Arufudati gumadi le añaheingubeiñanu lan kristiánugu anuadirúaaña, ha ítarabaña kei türigu ubouagu lúmagiñe furumiñeti sígulu darí guentó. Chóurugüda lumuti Hesusu luagu ítara liña lan, lau le lariñagubei houn lani disipulugu dan lárigiñe: “Anahein [...] huma sagü weyu darime lagumuchun ubóu” (Mat. 28:20). Mini lan lira, luagu lóunigirubei lan buga Hesusu hamadagua kristiánugu anuadirúaaña luma Bungiu sagü weyu darime lagumuchun ubóu. Gama lumoun, kei aba lubéi hagibedagun kristiánugu ha ítarabaña kei híduru wuribati sügǘ hau kristiánugu ha ítarabaña kei türigu, sügüti saragu dan sin lasubudirúniwa lau ichouruni kátaña lan meha kristiánugu ha ítarabaña kei türigu. Gama lumoun, fiú dan lárigiñe lagumeserun lidaani alubahani, aba lafurangudun kátaña lan kristiánugu ítarabaña kei türigu. Ida liña lasuseredun le?

5. Ida liña lagunfulirun lani Malakíasi profesía lidan furumiñeti sígulu?

⁵ Saragu sígulu lubaragiñe labahüdaguni Hesusu hénpulu luáguti türigu luma híduru wuribati, adügati Heowá lun labürüdün profeta Malakíasi aban profesía lun ladimurehan luaguméme sügǘ burí le uágubei ladimureha Hesusu (aliiha huméi Malakíasi 3:1-4). Huan le abadiseihabei ligía ‘óunagülei le aransehabalin üma’ (Mat. 11:10, 11). Dan le lachülaagunbei lidan irumu 29, yarafaali meha lidaani haguseragüdüniwa ísüraelina. Hesusu libiamanbei  óunagülei, “óunagülei lánina daradu”. Lidan biama ókaasion, arumadaha lumutu Hesusu ténpulu to Herusalénboun lídangiñe liwiye échuni: le furumiñeti, adüga lumuti lidan lagumeseha lani ministeriu, le libiaman, dan le lagumuchunbalin (Mat. 21:12, 13; Huan 2:14-17). Ligíati, durati larihini ida liña lan léibugun katei luma luadigimari lánina arumadahani luagu fiú dan.

6. a) Ídabugatima lagunfulira profesía le lídanbei Malakíasi? b) Ka dan larihei Hesusu ida liña lan léibugun katei lidan aransehani lánina áhuduraguni inarüniti? (Ariha huméi abürüdǘni.)

⁶ Ídabugatima lagunfulira profesía le lídanbei Malakíasi? Lidan burí irumu le lubaragiñebei irumu 1914, adügati Charles Russell úara hama lupanaagu aban wadagimanu libe meha le ladügübei Huan le abadiseihabei. Wéiriti meha lisudinin wadagimanu le, ladüga mosu meha harufudahani inarüni le tídanbei Bíbülia ítara kei meha furumiñe. Afuranguagüda hamuti Aturiahatiña Bíbülia ha kátima lan mini lubéi sákürifisiu le ladügübei Kristu lun ferudunawa lan figóu, arufuda hamuti iyeeni lan arufudahani luáguti máfiougati ani apurichiha hamuti yarafaali lan lagumuchun hadaani ha mámabaña huríu. Gama lumoun, anihein meha saragu relihión le ídanbei hariñaga lílana hawougua kristiánugu hamá. Kaba meha san hádangiñe arufuda ítara haña lan kei türigu? Lun lasubudirúniwa katei le, gumeseti Hesusu arihei ida liña lan léibugun katei lidan áhuduraguni inarüniti lidan irumu 1914. Durati wadagimanu le luagu fiú dan: lúmagiñe irumu 1914 darí lagumeseha irumu 1919. *

7. Ka ladarirubei Hesusu dan le lagumeserunbei arihei ida liña lan léibugun katei lidan irumu 1914?

⁷ Ka ladarirubei Hesusu dan le lagumeserunbei arihei ida liña lan léibugun katei? Dariti aban liraüraü sétanu hani Aturiahatiña Bíbülia ha meha barühañabaña lóugiñe 30 irumu ayusurei here luma harisin lidan aban wadagimanu wéiriti lánina apurichihani. * Ma funa lueirin ugundani le lasandirubei Hesusu luma le hasandirubei ánheligu dan le  harihinbalin mañaradaguagüdün lani híduru wuribati le lábunagubei Satanási lugule burí türigu héreti le, lau sun meha mibe lan! Íbini ítara, mégeitiña meha “fádirigu ha ladügawagun Lewí”, ha kristiánugu anuadirúaaña, harumadahóun (Mal. 3:2, 3; 1 Fe. 4:17). Ka uagu?

8. Ka burí katei asuseredubei lárigiñe irumu 1914?

⁸ Lidoun lagumuchun irumu 1914, aba heferidiruni fiú Aturiahatiña Bíbülia haguraasun ladüga midin hamá sielun. Lidan irumu 1915 luma irumu 1916, adügati kóntüra hamá gürigia ha mámabaña tílana lóundarun Heowá lun lalouguadun apurichihani. Ani lanwoun lira, aba ñein lan lanarime burí múarani haganagua tílana lóundarun Heowá lárigiñebei lounwen íbiri Russell lidan diisi-hati irumu 1916. Ebedaaguatiña gádürü hádangiñe sedü íbirigu ha tídanbaña Watch Tower Bible and Tract Society dan le desidírua lubéi íbiriba lan Rutherford anügei ubaraü. Hóuchatiña hafanreinraguniña íbirigu, gama lumoun lidan widü-hati irumu 1917, aba háfuridun Betelirugugiñe... ma lueirin arumadahani! Ítarameme, añahein meha giñe arufudutiña anufudei hawéi gürigia. Gama lumoun, buiti hóunabun hiibe-agei Aturiahatiña Bíbülia lun wadagimanu lánina arumadahani le ladügübei Hesusu, lugundun desidírütiña hadügüni asansiruni le meha mégeiwabei. Ligíati larihinbaliña kei kristiánugu inarünitiña ha ítarabaña kei türigu. Gama lumoun, máhati meha Hesusu houn sun kristiánugu mama inarünitiña: dandu ha lídanbaña damuriguaü kei ha tíndanbaña burí ligilisi to ídanboun hariñaga hawougua kristiánugu hamá (Mal. 3:5; 2 Tim. 2:19). Kati asuseredubei lárigiñe lira? Lun wasubudiruni óunabagülei sigí wamá akutihei hénpulu luáguti türigu luma híduru wuribati.

9, 10. a) Kaba wakutiha libügürü lidaani alubahani? b) Ka katei asuseredubei furumiñe lidan lidaani alubahani?

⁹ Ariñagati Hesusu: “Alubahani, ligía lagumuchunbei ubóu” (Mat. 13:39). Gumeseti lidaani alubahani le lidan irumu 1914. Akutiha waméi katei burí le lunbei lasuseredun lidoun dan le según lariñaguni Hesusu lidan profesía.

¹⁰ Furumiñe: láhulahoun híduru wuribati. Ariñagati Hesusu: “[Lidan] lidaani alubahani; ábame nariñagun houn nadagimeintiña lun háhulahani híduru wuribati furumiñe, ábame hagüraguni”. Lárigiñe irumu 1914, aba hagumeserun ánheligu ‘áhulahaña’ kristiánugu ha mámabaña inarünitiña, ha ítarabaña kei híduru wuribati, aba hafanreinraguniña hawéi gürigia ha “lílana larúeihan Bungiu”, ha kristiánugu anuadirúaaña (Mat. 13:30, 38, 41).

11. Darí lumoun dan le, kátima adügübei lun hasubudirúniwa kátaña lan kristiánugu inarünitiña hamoun ha mámabaña inarünitiña?

¹¹ Eibu lanwanserun wadagimanu lánina lóundarawagun híduru wuribati, ábatima furangu lan larihíniwa kátaña lan kristiánugu inarünitiña hamoun ha mámabaña inarünitiña (Aruf. 18:1, 4). Lidan irumu 1919, aba furangu lan larihín ábürühaaru lan Babilónia to Wéiriboun, ladüga furihaña lan buga kristiánugu inarünitiña tídangiñe. Kátimati adügübei lun hasubudirúniwa kátaña lan kristiánugu inarünibaña hamoun ha mámabaña inarünitiña? Wadagimanu lánina apurichihani. Aba hagumeserun gürigia ha anügübalin ubaraü haganagua Aturiahatiña Bíbülia arufudei lisudinin láfuridun kada gürigia apurichihei Larúeihan Bungiu. Aban hénpulu, tidan garüdia to gíriboun To Whom the Work Is Entrusted (Ka un lichugúa wadagimanu le?), to meha adügǘboun lidan irumu 1919, amisurahóuatiña sun kristiánugu anuadirúaaña lun hapurichihan muna tuagun muna. Ariñagatu ítara: “Genegeti wéiriya lan wadagimanu le, gama lumoun Aburemei laburemebei, lau lídehan gayarabei wagunfuliruni. Gachansintün lun hídehan lidan”. Ida liña hóunabun íbirigu lun amisurahani le? Según lariñawagún lidan irumu 1922, tidan garüdia to subudiwaboun uguñe weyu kei The Watchtower, aba haganwoundagüdüni Aturiahatiña Bíbülia wadagimanu lánina apurichihani. Murusun dan lárigiñe, aba hasubudirúniwa kristiánugu úaraguatiña hagía ladüga apurichiha hamá muna tuagun muna..., ani ligiamémegili asusereda uguñe weyu!

12. Lúmagiñe ídabuga lóundarawagua türigu?

¹² Libiaman: lareidúniwa türigu. Ru lumuti Hesusu gumadi le houn ánheligu: “Ábame hareiduni türigu tidoun lagei” (Mat. 13:30). Lúmagiñe irumu 1919, aba hóundarawagun kristiánugu anuadirúaaña lidan damuriguaü kristiánu le arumadahóuaalibei. Lagumuchuba hóundarawagun  kristiánugu anuadirúaaña hame erederutiña wínwanñu ubouagu lídounme lagumuchun ubóu danme heresibiruni hafayeiruaha sielu (Dan. 7:18, 22, 27).

13. Ka lariñagubei Arufudúni 18:7 luagu igaburi le tarufudubei horu, o Babilónia to Wéiriboun, íbini ha ariñagubaña hawougua kristiánugu hamá?

¹³ Lǘrüwan: ayahuni luma lakünrinhan ari. Lárigiñe hagüraguni ánheligu híduru wuribati, kaba asusereda? Ariñagati Hesusu dan layanuhanbei hawagu kristiánugu ha ítarabaña kei híduru wuribati: “Ábame hayahuahan ñein, ábame lakünrinhan hari” (Mat. 13:42). Lasusereduña san le guentó? Uá. Añahagua lílana relihión ha ariñagubaña hawougua kristiánugu hamá —ha ábanbaña fánreinti tídangiñe horu, Babilónia to Wéiriboun— ariñaga: “Ñun niña ya kei aban urúei; mama nuguya aban hiñaru hilaali túmari, masufurirúnbadina giñe” (Aruf. 18:7). Ítara liña, ha ariñagubaña hawougua kristiánugu hamá sandiguamémegiña houngua hagía lan láubaña ubafu. Le linarün katei, apantahatiña luagu ‘ñun haña lan kei aban urúei’ hagibuagu alidihatiña lidan polítika. Uguñe weyu, hapantahaña gürigia ha ítarabaña kei híduru wuribati, mama hayahuña. Gama lumoun, málühali katei le asansira.

14. a) Ídaba ani kaba uagu ‘lakünrinha hari’ binadu lílana relihión burí mama inarüniti? b) Ida liña úaragua lan iseri ligaburi gunfuranda wamani le lariñagubei Matéu 13:42 luma le ariñawagúbei lidan Sálumu 112:10? (Ariha huméi abürüdǘni.)

¹⁴ Lárigiñeme günringuawaali lan sun relihión mama inarüniti lídanme saragu asufuriruni, háluahabame binadu lílana halíaba lan hadarira aramudaguagülei, gama lumoun madaribaña ni aban fulasu chóuruti lun haramudagun (Luk. 23:30; Aruf. 6:15-17). Ligíabati híchugun fe luagu siñabei lan hanurahan luéi hagünrinchawagún, siñaguame houngua ayahuaha, ábame lakünrinhan hari le hagañi. Ítara kei lariñaguni Hesusu lidan lani profesía, “hasakürihaba” lidan lanarime dan ligía ladüga úaalime emenigini houn (Mat. 24:30; Aruf. 1:7). *

15. Kaba asusereda lun híduru wuribati, ani ídaba lasusereda?

¹⁵ Ligadürün: lagurún lidoun régigi. Kaba asusereda lun híduru wuribati le agürawagúbei? Hágurubei ánheligu “lidoun régigi le laubei watu gemeti” (Mat. 13:42, TNM). Mini lan lira, lagumuchúba lan lau sunsuinagubei. Ligíati, hagünrinchawaguba sunme binadu lílana relihión mama inarüniti lidan Arümahedón le lagumuhóun fánreinti lánina saragu asufuriruni (Mal. 4:1).

16, 17. a) Según lariñaguni Hesusu lidan lani hénpulu, ka lagumuhóun katei lunbei lasuseredun? b) Ida liña wasubudiruni magunfulirungili lan katei le?

¹⁶ Liseingün: hámiriduba ha adügübalin le lubeibei Bungiu. Dan meha le sunmémeeli líchuguni Hesusu lani profesía, aba lariñagun: “Hámeti adügübalin le lubeibei Bungiu [‘lídanme dan ligía’, TNM], ábame hámiridun kei weyu lidan larúeihan Wáguchi Bungiu” (Mat. 13:43). Ídaba ani halíaba lasusereda katei le? Awanhagua agurabahei lagunfulirun le lariñagubei Hesusu lidan profesía le. Siéluba lagunfulira ámuñegü, mama ubouagu. * Akutiha wamá bián lébuna wasaminaruni le.

¹⁷ Lidan furumiñeti lúgaaru, akutiha waméi ídaba lan lagunfulira le lariñagubei Hesusu. Ariñagati: “Hámeti adügübalin le lubeibei Bungiu [“lídanme  dan ligía”, TNM], ábame hámiridun”. Dan le lariñagunbei Hesusu “lídanme dan ligía”, menefánti ladimurehaña lan luagu sügǘ le uágubei sun liña lan meha ladimurehan, ladimurehaña meha luagu ‘lagurún híduru wuribati lidoun régigi le laubei watu gemeti’. Lasusereduba le lídanme lagumuhóun fánreinti lánina saragu asufuriruni. Ligíati, háfuga lídanba lan giñe dan ligía ‘hámiriha’ kristiánugu anuadirúaaña. Lidan libiaman lúgaaru, ariha waméi halíaba lan lasusereda katei le. Ariñaga lumuti Hesusu furangu ‘hámirihaba lan richaguatiña lidan larúeihan [Lúguchi]’. Ka mini lubéi lira? Resibi hamaali lanme sun kristiánugu anuadirúaaña úaraguatiña hame añahaguabaña ubouagu lárigiñeme furumiñeti fánreinti lánina saragu asufuriruni lagumuhóun seyu. Ligíaalimeti hóundarawagun sielu, ítara kei lariñaguni Hesusu lidan lani profesía libügürü saragu asufuriruni (Mat. 24:31). Ñeinba hámiriha lidan “larúeihan [Lúguchi]”, murusunmeti dan lárigiñe wuribu le gíribei Arümahedón, siéluhañame lun hefeduhani “lamarieidun Mudún” ani hádangiñebaña ha ítarabaña keisi ladari Hesusu to gúndaaboun (Aruf. 19:6-9).

18, 19. Ka buiti lasagarubei kada aban wádangiñe lídangiñe gunfuranda wamani hénpulu luáguti türigu luma híduru wuribati?

¹⁸ Ka buiti lasagarubei kada aban wádangiñe lídangiñe furangutima lan gunfuranda wamani hénpulu le? Ariha wamá ǘrüwa manera. Furumiñe, ábatima laganwoundun wasubudin. Afuranguagüda lumuti hénpulu le ka lan lébunabei lígirun Heowá lun ñein lan wuribani. Ígirati “gürigia ha gadünabaña hagünrinchawagun [lau lueirin ligañi]” lun gayara lan lóundaraguniña “[gürigia ha] unbei gudemehabu lan”, ha ítarabaña kei türigu (Rom. 9:22-24). * Libiaman, derebugugüda lumuti wafiñen. Éibume ayarafadeina lan lagumuchagüle ubóu, aganwoundeina luba giñe hawuribuhan wáganiñu wama, “gama lumoun magañeirun habadi[wa]” (aliiha huméi Heremíasi 1:19). Ítara kei óunigira lániña Heowá kristiánugu ha ítarabaña kei türigu luagu saragu sígulu, wámabei giñe Wáguchi le siélubei “sagü weyu” le lunbei liabin, ani lun lira layusurubei Hesusu hama lani ánheligu (Mat. 28:20).

¹⁹ Lǘrüwan, íderagua lumutiwa hénpulu le asubudiraña kátaña lan gürigia ítarabaña kei türigu. Ka uagu weiri lubéi lisudinin katei le? Lugundun, ánhawagubeirügü asubudirei kátaña lan kristiánugu ha ítarabaña kei türigu, ligíarügübei gayara lan wóunabuni álügüdahani le ladügübei Hesusu lidan profesía migifeti le líchugubei libügürü lagumuhóun dan: “Káteitima san músubei úaraguati ani gunfuranda ligía?” (Mat. 24:45, TNM). Ruti bián arütíkulu le asigirubei óunabagülei buiti lun álügüdahani le.