1. (a) Rawl kung le belh kung bianabia kha a tawinak in chim. (b) Jesuh nih mah bianabia a sullam kha zeitindah a fianter?

PENNAK he aa tlaimi bianabia pakhat ah Jesuh nih lo pakhat ah lo thlopa nih rawl ci a tuh i cuka ah mi ṭhalopa nih belh ci a tuh ve tiin a chim. Belh kung cu rawl kung nakin an ṭhang deuh, asinain lo thlopa nih a salle kha “rawl kung le belh cu hmunkhat ah rawlṭuan caan tiang ṭhangṭi ko hna seh” tiah a ti hna. Rawlṭuan caan ah belh kung cu khangh an si i rawl kung cu khon an si. Jesuh nih mah bianabia a sullam kha a fianter. (Matthai 13:24-30, 37-43 rel.) Mah bianabia in zeidah kan hngalh khawh? (“Rawl kung le Belh kung” timi kha zoh.)

2. (a) Rawl kung le belh kung bianabia nih zei kong dah a kan hngalhter? (b) Hi capar nih zei kong dah a bik in a fianter lai?

² Mah bianabia i a cangmi thil nih Jesuh nih rawl kung a simi, amah he uktu a ṭuanṭi hngami chiti thuhmi dihlak kha zeitin le zeitik ah dah vawlei mi hna sinin a pumh hna lai ti kha a langhter. Thlaici tuh caan cu AD 33, Pentekos ni in aa thawk. Rawl kung pumh caan cu donghnak caan ah vawleicung ah a nung rihmi chiti thuhmi hna hmanung bik hmelchunhnak khenh an si i van ah an kai tikah a dih lai. (Matt. 24:31; Biat. 7:1-4) Mi pakhat nih tlang cung in khua a zoh tikah a pawngkam vialte kha a hmuh khawh dih. Cu bantukin rawl kung le belh kung bianabia nih kum 2,000 chungah a cang hngami thil kong kha ṭha tein hngalhthiam awkah a kan bawmh. Mah cu thlaici tuh caan, a ṭhan caan le rawlṭuan caan kong an si. Hi capar nih rawlṭuan caan kha a bik in a fianter lai. *

3. (a) Kumzabu pakhatnak hnuah zeidah a rak cang? (b) Matthai 13:28 i aa ṭial bantukin ahote nih dah zei bia dah an hal? (A donghnak i fianternak kha zoh.)

³ AD 100 hrawng ah ‘belh cu an hung lang.’ Mah  cu a hmaan lomi Khrihfa pawl an si. (Matt. 13:26) AD 300 hrawng a phanh tikah chiti thuhmi nakin “belh” cu an tamdeuh. Bianabia chungah khan sal hna nih an bawipa kha belh cu kan va bawt lai maw tiah an hal. * (Matt. 13:28) An bawipa nih zeitindah a leh hna?

4. (a) Jesuh bialehnak nih zeidah a langhter? (b) Zeitik ah dah “rawl kung” cu hngalh khawh an si?

⁴ An Bawipa, Jesuh nih “rawl kung le belh cu hmunkhat ah rawlṭuan caan tiang ṭhangṭi ko hna seh” tiah a leh hna. Mah nih kumzabu pakhatnak in atu tiang “rawl kung” a simi chiti thuhmi hna cu an um zungzal ti kha a langhter. Jesuh nih a zultu pawl kha hiti zong in a ti hna: “Nan sinah a zungzal in, caan dongh tiangin ka um lai.” (Matt. 28:20) Cucaah Jesuh nih chiti thuhmi hna kha caan dongh tiangin a zohkhenh zungzal hna lai. Asinain belh kung a simi a hmaan lomi Khrihfa hna cu rawl kung nakin an ṭhan deuh caah mah caan chungah rawl kung ah aa telmi hna kha fiang tein kan hngal hna lo. Rawlṭuan caan a phanh hlan kum 40 hrawng ah “rawl kung” cu hngalh khawh an si ṭhan. Zeitin in dah?

5. Malakhi chimchungbia cu kumzabu pakhatnak ah zeitindah a rak tlin?

⁵ Jesuh nih rawl kung le belh kung bianabia a chim hlanpi ah Jehovah nih Malakhi kha mah thil sining he aa lomi kong a chimter. (Malakhi 3:1-4 rel.) ‘Lam a sialtu lamkal’ cu Tipil petu Johan kha a si. (Matt. 11:10, 11) AD 29 i Johan a rat tikah Israel miphun biaceih caan cu a nai cang. Jesuh cu Malakhi nih a rak chimchungmi lam a sialtu a pahnihnak a si.  Jesuh nih Jerusalem biakinn kha voihnih a thenh. A voikhatnak cu phungchim rian a rak thawklei ah a si i a voihnihnak cu phungchim rian a dihlei ah a si. (Matt. 21:12, 13; Johan 2:14-17) Cucaah mah biakinn thenhnak cu AD 29 in 33 tiang a si.

6. (a) Malakhi chimchungbia i a ngan deuhmi tlinnak cu zeidah a si? (b) Thlaraulei biakinn kha Jesuh nih zeitik ah dah a check? (A donghnak i fianternak kha zoh.)

⁶ Malakhi chimchungbia i a ngan deuhmi tlinnak cu zeidah a si? 1914 hlanpi ah C.T. Russell le amah he rian a ṭuanṭimi unaupa pawl cu Tipil petu Johan ṭuanmi rian bantuk kha an ṭuan. Annih nih Baibal cawnpiakmi taktak kha an hlathlai. Tahchunhnak ah, Khrih tlanhnak man kong biatak kha mi an cawnpiak hna, hell mei a um lo kha an langhter i Jentail mi hna an caan a dih lainak kong kha an thanh. Asinain mah lio caan ah Khrih zultu kan si aa timi biaknak dang tampi an um. Mah lakah ahote dah rawl kung cu an si? Mah kha hngalh awkah Jesuh nih 1914 ah thlaraulei biakinn kha a check. Mah biakinn checknak le thenhnak cu 1914 in 1919 thawklei tiang a si. *

7. Jesuh nih 1914 ah a check tikah zeidah a hmuh?

⁷ Jesuh nih zeitik ah dah a check i zeidah a hmuh? Kum 30 leng thawngṭha karhternak ah an tangka le an thazaang a hmangmi a lung a thomi Baibal Siangngakchia phu hmete kha a hmuh hna. * Jesuh le vancungmi hna nih mah rawl kung tlawmte cu belh nih an ṭhan a donh lomi le fek tein an ummi kha an hmuh tikah an i lawm tuk lai. Asinain “Levi mi” a simi chiti thuhmi hna cu thenh an hau. (Mal. 3:2, 3; 1 Pit. 4:17) Zeicah?

8. 1914 hnuah zei thil dah a cang?

 ⁸ 1914 a dih lai ah Baibal Siangngakchia cheukhat cu van ah an kai lo caah an lung a dong. 1915 le 1916 chungah bu lengmi nih an ralchanh hna caah phungchim rian kha an dinhdorh thluahmah. 1916, October thla ah Unaupa Russell cu a thi, mah tikah bu chungmi hna nih hruaitu pawl kha an doh hna. Unaupa Rutherford kha hruaitu ah an thim tikah Vennak Innsang Baibal le Cazual Bu i director pasarih lak in pali nih an doh. Unau pawl karlak ah ṭhencheuter ding in an i zuam nain 1917, August thla ah anmah tu Bethel in an chuak. Mah cu bupi thenhnak lamkhat a si. Baibal Siangngakchia cheukhat cu mi an ṭih caah Pathian rian an ṭuan ti lo. Asinain tamdeuh cu Jesuh thenhnak kha an cohlan i a herhmi thlennak kha an tuah. Cucaah annih cu Jesuh nih rawl kung a simi a hmaanmi Khrihfa in a hmuh hna. Asinain Khrihfabu chung i a deu pawl le Khrihfaram vialte kha cu a hlawt hna. (Mal. 3:5; 2 Tim. 2:19) Mah hnuah zei thil dah a cang? Mah kha hngalh awkah rawl kung le belh kung bianabia kha i ruah ṭhan hna u sih.

9, 10. (a) Atu ah zei kong dah kan i ruah lai? (b) Rawlṭuan caan chungah zeidah a cang hmasa bik?

⁹ Jesuh nih “rawlṭuan caan hi, chan dongh caan a si” tiah a ti. (Matt. 13:39) Mah caan cu 1914 in aa thawk. Rawlṭuan caan chungah a cang hngami Jesuh chimmi thil sining panga kong kha atu kan i ruah lai.

¹⁰ Pakhatnak, belh bawhnak. Jesuh nih hitin a ti: ‘Rawlṭuan caan ah rawl ṭuantu pawl cu belh kha bawt hmasa hna u law mei chung i paih awkah tom hna u tiah ka ti hna lai.’ 1914 hnuah vancungmi hna nih a hmaan lomi Khrihfa a simi belh kha “pennak chung i a ummi” chiti thuhmi hna sinin an ṭhen hnanak thawng in an ‘bawh’ hna.—Matt. 13:30, 38, 41.

11. A hmaanmi Khrihfa hna le a hmaan lomi Khrihfa hna cu a hleiin zeinihdah a danter hna?

¹¹ Belh bawhnak rian an ṭuan thluahmah tikah rawl kung le belh kung an i dannak cu a lang thluahmah ve. (Biat. 18:1, 4) 1919 ah a Liannganmi Babilon cu a tlu cang ti kha a fiang. A hmaanmi Khrihfa hna le a hmaan lomi Khrihfa hna cu a hleiin zeinihdah a danter hna? Phungchim rian nih a danter hna. Khrihfabu chungmi vialte nih Pennak kong chim awk a si ti kha Baibal Siangngakchia hruaitu hna nih an hun hngalh. Tahchunhnak ah, 1919 ah Ahote dah Rian pek An Si timi cauk fate an rak chuah. Mah nih chiti thuhmi Khrihfa vialte kha innkhat hnu innkhat phungchim awkah a forh hna. Mah rian cu ṭuan awkah a si kho lomi a lo nain Bawipa bawmhnak thawng in ṭuan khawh a si ko lai tiah mah cauk nih a fianter. Mah lengah “mah rian ṭuan awkah tinvo sung nan ngei” ti zong in a ti chap. Baibal Siangngakchia hna nih zeitindah an leh? 1922, Vennak Innsang nih phungchim rian kha voidang nakin fak deuh in an ṭuan tiah a ti. Mah rian cu a hmaanmi Khrihfa pawl i an hmelchunh a hung si. Mah cu tuchan zong ah a si ṭhiamṭhiam.

12. Rawl cu zeitik in dah pumh an si?

¹² Pahnihnak, rawl rawnnak. Jesuh nih vancungmi hna kha buk chungah rawl kha rawng u tiah a ti hna. (Matt. 13:30) 1919 thawkin chiti thuhmi hna cu thenh a si cangmi Khrihfabu chungah pumh an si. Donghnak caan ah a nungmi chiti thuhmi hna cu vancung an kai tikah hmanung bik pumh an si lai.—Dan. 7:18, 22, 27.

13. Khrihfaram pawl tel in hlawhhlangnu lungput kha Biathlam 18:7 nih zeitindah a langhter?

 ¹³ Pathumnak, ṭahnak le hacang rialnak. Vancungmi nih belh kha an tom hnuah zei thil dah a cang? Belh pawl chiah an sinak he aa tlaiin Jesuh nih hitin a ti: “Cuka ahcun an ṭap lai i an hacang an rial lai.” (Matt. 13:42) Mah cu atu ah a tling cang maw? A tling rih lo. Khrihfaram cu Biathlam dal 18 ah aa ṭialmi hlawhhlangnu chungah aa telmi a si ve. Khrihfaram nih atu tiang “keimah cu bawiṭhutdan cung i a ṭhumi siangpahrang bawinu ka si. Nuhmei ka si lo, ngaihchiatnak cu ka ing bal lai lo” tiah a ti. (Biat. 18:7) Atu tiang “siangpahrang bawinu” ka si tiah aa ruat i nainganzi hruaitu pawl cungah nawlngeih awkah aa zuam. Belh nih a aiawhmi a hmaan lomi Khrihfa hna cu an ṭap rih lo i atu tiang an i porhlaw. Asinain a rauhhlan ah an sining cu aa thleng cang lai.

14. (a) Zeitik ah dah a hmaan lomi Khrihfa hna cu “an hacang an rial lai”? Zeicah? (b) Matthai 13:42 fianternak thar cu Salm 112:10 bia he zeitindah aa tlak? (A donghnak i fianternak kha zoh.)

¹⁴ A hmaan lomi biaknak hrawh a si hnuah an bu chungmi hna cu huhphenhnak hmuh awkah thuhnak hmun an kawl lai. Asinain an hmu lai lo. (Luka 23:30; Biat. 6:15-17) Hrawhnak in kan luat kho lai lo ti an hngalh tikah an thin a hun tuk caah an ṭap lai i an hacang an rial lai. Jesuh nih harnak nganpi kong he aa tlaiin a chimchungmi bantukin mah caan a phanh tikah annih cu “an ṭap lai.” * —Matt. 24:30; Biat. 1:7.

15. Belh cu zeitindah tuah an si lai? Zeitik ah dah?

¹⁵ Palinak, meiphu chungah paihnak. Belh tom cu zeitindah tuah an si lai? Vancungmi hna nih “meiphu chungah an paih hna lai.” (Matt. 13:42) Mah cu zungzal in hrawh an si lai tinak a si. Cucaah a hmaan lomi biaknak chungah a ummi vialte cu harnak nganpi i a donghnak a simi, Armageddon ah hrawh an si lai.—Mal. 4:1.

16, 17. (a) Jesuh chimchungbia i a donghnak cu zeidah a si? (b) Mah cu hmailei ah a si lai ti kha zeitindah kan hngalh khawh?

¹⁶ Panganak, ceunak. Jesuh chimchungbia a donghnak ah hitin kan hmuh: “Mah caan ah Pathian mi hna cu an Pa Pennak chungah ni bangin an ceu lai.” (Matt. 13:43, NW) Zeitik ah le khoika ah dah an ceu lai? Mah cu hmailei ah a si te lai. Cun vawlei ah si loin van ah a si lai. * Cutin kan ti khawhnak a ruang pahnih kha atu kan i ruah lai.

¹⁷ Pakhatnak, mah cu zeitik ah dah a  si lai? Jesuh nih ‘mah caan ah Pathian mi hna cu an ceu lai’ tiah a ti. ‘Mah caan ah’ timi cu a hmasa deuh ah a chimmi belh pawl ‘meiphu chungah paih’ an si caan he aa pehtlai lai ti cu a fiang ko. Mah cu harnak nganpi a donghnak lei ah a si lai. Cucaah chiti thuhmi hna cu mah caan ah “ni bangin an ceu” ve lai. Pahnihnak, khoika ah dah a si lai? Jesuh nih Pathian mi hna cu “Pennak chungah” an ceu lai tiah a ti. Mah cu zei sullam dah a si? Vawlei ah a taang rihmi zumhfekmi chiti thuhmi hna cu hmanung bik hmelchunhnak khenh an si lai. Mah hnuah, Jesuh nih a chimchung bantukin van ah pumh an si lai. (Matt. 24:31) Cuka ah “an Pa Pennak chungah” an ceu lai. Annih cu “Tufa nupi ṭhit caan” ah aa nuammi Jesuh a nupi ding ah an i tel ve lai. Mah cu Armageddon raltuknak a dih hnu tlawmpal ah a si lai.—Biat. 19:6-9.

18, 19. Jesuh chimmi rawl kung le belh kung bianabia in zeitindah ṭhatnak kan hmuh?

¹⁸ Mah bianabia in zeitindah ṭhatnak kan hmuh? Lam thum in kan hmuh. Pakhatnak ah, Jehovah nih mi ṭhalo pawl kha zeicah a hrawh rih hna lo ti kha a kan hngalhter. Rawl kung a simi, zumhfekmi hna kha “zaangfahmi” um si awkah a hrawh rih hna lomi a si. * (Rom 9:22-24) Pahnihnak ah, kan zumhnak kha a fehter chin. Donghnak a naih chin bantukin kan ral pawl zong nih fak chinchin in a kan doh ve lai. Asinain a kan “tei lai lo.” (Jeremiah 1:19 rel.) Jehovah nih rawl a simi hna kha kum tampi chung a kilven hna. Vancung kan Pa cu Jesuh le vancungmi hna he “a zungzal in” caan dongh tiang kan sinah an um lai.—Matt. 28:20.

¹⁹ Pathumnak ah, mah bianabia nih rawl cu ahote dah an si ti kha a kan hngalhter. Mah kong hngalh cu zeicah a biapit tuk? Jesuh nih donghnak caan he aa tlaiin a rak chimchung lioah “aho cu dah zumh awk a tlakmi le a fimmi sal cu a si?” tiah a rak hal hna. Mah kha phit khawh awkah rawl cu ahote dah an si ti kha kan hngalh a hau. (Matt. 24:45) Mah a phi kha a changtu capar pahnih nih a kan hngalhter lai.