‘Konnen ki mwan mon avek zot toulezour’

“Konnen ki mwan mon avek zot toulezour, ziska lafen.”​—MAT. 28:20.

ROD LAREPONS SA BANN KESTYON:

Akoz nou kapab tonm lo sa konklizyon ki depi premye syek N.L. ziska ozordi, i’n touzour annan Kretyen swazir lo later?

Konmansman 1914, ki lenspeksyon Zezi in fer?

Ki levennman Zezi ti koz lo la dan son parabol lo dible ek move zerb ki pou arive a lavenir?

1. (a) Fer en rezimen sa parabol lo dible ek move zerb. (b) Ki mannyer Zezi ti eksplik son sinifikasyon?

DAN enn bann parabol Zezi konsernan Rwayonm Bondye, Zezi i koz lo en fermye ki senm bann bon lagrenn dible ensi ki en lennmi ki vin senm move zerb parmi sa bann bon lagrenn. Move zerb i pous plis ki dible, me sa fermye i donn lord son bann serviter pour “les zot pous ansanm ziska rekolt.” Pandan sezon rekolt, move zerb i ganny detrir e dible i ganny anmase. Zezi ti eksplik sa parabol li menm. (Lir Matye 13:24-30, 37-43.) Ki sa parabol pe montre? (Vwar latab “Dible ek move zerb.”)

2. (a) Ki sa bann levennman ki ti pe arive dan plantasyon sa fermye i montre? (b) Ki parti sa parabol nou pou egzaminen?

² Bann levennman ki ti pe arive dan plantasyon sa fermye i montre ki mannyer e kan ki Zezi pou rasanble dible senbolik lo later, andotmo, bann Kretyen swazir ki pou diriz ansanm avek li dan son Rwayonm. Lagrenn ti konmans ganny senmen zour Lapannkot lannen 33 N.L. Larekolt pou terminen kan bann Kretyen swazir ki ankor vivan a lafen sa sistenm pou fini ganny sele e apre sa al dan lesyel. (Mat. 24:31; Rev. 7:1-4) Zis parey en landrwa o lo en montanny i kapab ed en dimoun vwar byen partou, sa parabol i donn nou en pli bon apersi lo bann devlopman ki pou arive pandan en peryod apepre 2,000 an. Ki devlopman ki relye avek Rwayonm nou’n arive konpran? Sa parabol i koz lo senm lagrenn, ler i pouse ek rekolt. Sa lartik pou koz plis lo letan rekolt. *

ANBA BON SIRVEYANS ZEZI

3. (a) Ki ti arive apre premye syek? (b) Dapre Matye 13:28, ki kestyon ki ganny souleve e lekel ki demann sa kestyon? (Vwar lezot not.)

³ Konmansman dezyenm syek N.L., ‘move zerb osi ti pouse,’ kan bann swadizan Kretyen ti konmans aparet dan lemonn. (Mat. 13:26) Ver katriyenm syek, i ti annan plis swadizan Kretyen konpare avek bann Kretyen swazir. Rapel byen ki dan sa parabol, bann serviter ti demann zot  met permisyon pour aras move zerb. * (Mat. 13:28) Ki zot met ti dir?

4. (a) Ki nou aprann atraver larepons Zezi, sa Met? (b) Kan ki bann dible senbolik ti konmans ganny rekonnet?

⁴ Ler i ti pe koz lo dible ek move zerb, Zezi ti dir: “Les zot pous ansanm ziska rekolt.” Sa lord i montre ki depi premye syek ziska nou letan, i’n touzour annan bann dible senbolik lo later. Nou trouv sa dan sa parol ki Zezi ti dir son bann disip plitar: “Mon avek zot toulezour, ziska lafen.” (Mat. 28:20, nou ki’n met an italik.) Alor, Zezi ti pou kontinyen protez bann Kretyen swazir tou le zour, ziska letan lafen. Me, vi ki bann move zerb senbolik ti pous plis ki zot, nou pa asire lekel ki ti form parti sa dible senbolik pandan sa gran peryod letan ziska letan lafen. Toudmenm, plizyer deseni avan ki sezon rekolt ti konmanse, i ti pli fasil pour rekonnet bann ki form sa dible senbolik. Dan ki fason?

EN MESAZE I ‘PREPAR SEMEN’

5. Dan ki fason profesi Malaki ti ganny akonplir dan premye syek?

⁵ Plizyer syek avan ki Zezi ti donn sa legzanp lo dible ek move zerb, Zeova ti enspir son profet Malaki pour predir bann levennman ki parabol Zezi i koz lo la. (Lir Malaki 3:1-4. *) Zan Batis ti sa ‘mesaze ki  ti prepar semen.’ (Mat. 11:10, 11) Kan i ti vini lannen 29 N.L., en letan zizman pour nasyon Izrael ti pros. Zezi ti sa dezyenm mesaze. De fwa, i ti pirifye tanp Zerizalenm. Premye ti o konmansman son minister e dezyenm ti ver lafen son minister. (Mat. 21:12, 13; Zan 2:14-17) Alor nou konpran ki pirifikasyon Zezi ti dire pandan en serten peryod letan.

6. (a) Ki pli gran lakonplisman profesi Malaki? (b) Pandan ki peryod letan Zezi ti enspekte tanp spirityel? (Vwar osi lezot not.)

⁶ Ki pli gran lakonplisman profesi Malaki? Diran bann deseni avan 1914, Charles Russell ek son bann asosye ti fer en travay parey pour Zan Batis. Sa travay enportan ti enplik konmans reansenny laverite ki dan Labib. Bann Etidyan Labib ti ansenny vre sinifikasyon ranson Kris, devwal sa mansonz konsernan lanfer dife e anonse ki letan bann nasyon etranze ti pe al terminen. Kantmenm sa, i ti annan en kantite groupman relizye ki ti pe dir ki zot disip Kris. Alor, en kestyon enportan ti merit ganny reponn: Lekel parmi sa bann groupman ki ti reprezant dible? Pour reponn sa kestyon, Zezi ti konmans enspekte tanp spirityel an 1914. Sa lenspeksyon ek pirifikasyon ti ganny fer pandan en serten peryod letan, depi 1914 ziska bann premye mwan 1919. *

LENSPEKSYON EK PIRIFIKASYON

7. Kan Zezi ti konmans son lenspeksyon an 1914, ki i ti vwar?

⁷ Ler Zezi ti konmans son lenspeksyon, ki i ti vwar? I ti vwar en pti group Etidyan Labib devoue ki pour plis ki 30 an ti’n donn zot lafors ek resours pour antreprann en kanpanny predikasyon. * Sirman Zezi ek bann lanz ti vreman kontan pour vwar ki detrwa tiz dible senbolik  byen for pa ti’n ganny toufe avek move zerb Satan, pa i vre? Kantmenm sa, i ti annan sa nesesite pour “pirifye bann garson Levi,” andotmo, bann Kretyen swazir. (Mal. 3:2, 3; 1 Pyer 4:17) Akoz?

8. Ki bann devlopman ki ti arive apre 1914?

⁸ Tar lannen 1914, serten Etidyan Labib ti dekonserte akoz zot pa ti ankor al dan lesyel. Ant 1915 ek 1916, lopozisyon avek bann dimoun ki pa ti dan lorganizasyon ti ralanti sa travay predikasyon. Pli pir ankor, apre lanmor Frer Russell an Oktob 1916, i ti annan bann opozan dan lorganizasyon menm. Kat parmi sa set direkter Watch Tower Bible and Tract Society ti rebel kont desizyon ki ti’n ganny pran pour etablir Frer Rutherford konman responsab lorganizasyon. Zot ti esey senm divizyon parmi bann frer, me an Out 1917, zot ti kit Betel. Pa sa ti en bon pirifikasyon! An plis ki sa, serten Etidyan Labib ti les lafreyer zonm kontrol zot. Me, konman en group, zot ti les Zezi pirifye tanp spirityel e fer bann sanzman neseser. Dan sa fason, Zezi ti ziz zot konman vre dible senbolik, me i ti rezet bann swadizan Kretyen, enkli tou sa bann ki ti dan bann larelizyon Kretyen. (Mal. 3:5; 2 Tim. 2:19) Ki ti arive apre? Pour konnen, annou reegzamin sa parabol lo dible ek move zerb.

KI I ARIVE APRE KONMANSMAN SEZON REKOLT?

9, 10. (a) Ki nou pou egzaminen aprezan konsernan sezon rekolt? (b) Ki ti premyerman arive pandan sezon rekolt?

⁹ Zezi ti dir: “Larekolt i konklizyon en sistenm.” (Mat. 13:39, NW) Sa sezon rekolt ti konmans an 1914. Aprezan, nou pou vwar senk devlopman ki Zezi ti predir pou arive pandan sa letan.

¹⁰ Premyerman, move zerb i ganny arase. Zezi ti dir ki pandan sezon rekolt i pou “dir avek bann ki fer rekolt; avan tou aras bann move zerb, [e] anmare.” Apre 1914, bann lanz ti konmans “aras” bann move zerb senbolik par separ sa bann swadizan Kretyen avek “bann garson Rwayonm,” andotmo, bann Kretyen swazir.​—Mat. 13:30, 38, NW, 41.

11. Ziska ozordi, kwa ki fer bann vre Kretyen diferan avek bann swadizan Kretyen?

¹¹ Anmezir ki sa travay pour aras move zerb ti kontinyen, diferans ant sa de group ti vin pli kler. (Rev. 18:1, 4) Ver 1919, i ti vin pli evidan ki Gran Babilonn ti’n tonbe. Ki pli gran diferans i annan ant bann vre Kretyen ek bann swadizan Kretyen? Predikasyon. Bann ki ti responsab parmi bann Etidyan Labib ti konmans met lanfaz lo lenportans pour personnelman partisip dan predikasyon. Par egzanp, en pti liv ki ti annan pour tit To Whom the Work Is Entrusted, ki ti ganny pibliye an 1919, ti ankouraz tou Kretyen swazir pour pres kaz an kaz. I ti dir: “I paret en gro travay, me i pour Senyer e avek son lafors, nou pou fer li. Ou annan sa privilez pour partisip ladan.” Ki mannyer dimoun ti reazir? The Watch Tower 1922 ti dir ki depi sa letan, bann Etidyan Labib ti ogmant zot partisipasyon dan sa aktivite. Pa bokou letan apre, predikasyon kaz an kaz ti vin en mark ki ti idantifye sa bann Kretyen fidel, parey i ankor le ka ozordi.

12. Depi kan ki dible senbolik in ganny rasanble?

¹² Dezyenmman, rasanble dible. Zezi ti donn bann lanz sa lord: “Rekolte dible e met dan mon stor.” (Mat. 13:30) Depi 1919, bann Kretyen swazir in ganny rasanble e met dan kongregasyon Kretyen ki’n ganny reetablir. Bann Kretyen swazir ki pou ankor vivan zour lafen sa move lemonn pou finalman ganny rasanble kan zot pou ganny zot rekonpans dan lesyel.​—Dan. 7:18, 22, 27.

13. Ki Revelasyon 18:7 i revele konsernan latitid sa prostitye, oubyen Gran Babilonn, enkli bann larelizyon Kretyen la konmela?

  ¹³ Trwazyenmman, plere ek grensman ledan. Ki i arive apre ki bann lanz i anmar move zerb? Kan i ti pe koz lo kondisyon bann move zerb senbolik, Zezi ti dir ki laba “kot pou annan plere e grensman ledan.” (Mat. 13:42) Eski sanmenm ki pe arive konmela? Non. Ozordi, bann larelizyon Kretyen, ki form parti sa prostitye senbolik i ankor pe dir sa lo son lekor: “Mon pe asize konman en larenn, Mon pa en vev, mon pa pou zanmen konn dey.” (Rev. 18:7) Sirman, bann larelizyon Kretyen i santi ki zot ki pe dirize, zot menm panse ki zot pe “asize konman en larenn” par lao bann dirizan politik. Konmela, bann ki reprezant move zerb pe fer vantar, pa plere. Me, sa i pros pour sanze.

14. (a) Kan e akoz bann swadizan Kretyen pou ‘grens zot ledan’? (b) Ki mannyer nou nouvo konprenezon lo Matye 13:42 i an armoni avek sa ki ganny dir dan Psonm 112:10? (Vwar lezot not.)

¹⁴ Pandan gran ladetres, apre ki tou fo larelizyon in ganny detrir, zot bann ansyen fidel pou taye pour rod proteksyon, me i pou napa okenn par pour zot kasyet. (Lik 23:30; Rev. 6:15-17) Deplis, apre ki zot pou’n realize ki zot pa pou kapab sap destriksyon, dan zot dezespwar, zot pou plere e ‘grens zot ledan’ dan lakoler. Parey Zezi ti predir dan son profesi konsernan gran ladetres, pandan sa moman sonm, zot pou “lamante.” *​—Mat. 24:30; Rev. 1:7.

15. Ki pou arive avek move zerb e kan ki sa pou arive?

¹⁵ Katriyenmman, ganny zete dan fourno dife. Ki pou arive avek bann move zerb ki’n ganny anmare? Bann lanz pou “zet zot dan fourno dife.” (Mat. 13:42) Sa i vedir ki zot pou ganny detrir konpletman. Alor, sa bann ansyen fidel bann fo larelizyon pou ganny detrir diran dernyen faz gran ladetres e sa se pandan Armagedon.​—Mal. 4:1.

16, 17. (a) Ki dernyen levennman Zezi i koz lo la dan son parabol? (b) Akoz nou’n tonm lo sa konklizyon ki sa levennman pou ariv dan lavenir?

¹⁶ Senkyenmman, zot pou briye. Zezi i termin son profesi an dizan: “Sa letan, sa bann ki drwat pou briye parey soley dan Rwayonm zot Papa.” (Mat. 13:43, NW) Kan e kote sa pou arive? Son lakonplisman pou ariv a lavenir. Zezi pa ti pe predir en aktivite ki deza pe arive lo later, me i ti pe koz lo sa ki ti pou arive a lavenir dan lesyel. * Annou egzamin de rezon akoz nou’n tonm lo sa konklizyon.

¹⁷ Premyerman, “kan?” Zezi ti dir: “Sa letan, sa bann ki drwat pou briye.” I evidan ki sa lekspresyon “sa letan” pe refer avek sa levennman ki Zezi ti fek  mansyonnen, andotmo, letan ki ‘move zerb pou ganny zete dan fourno dife.’ Sa levennman pou arive diran dernyen faz gran ladetres. Savedir, a lavenir osi ki bann Kretyen swazir pou “briye.” Dezyenmman, “kote?” Zezi ti dir ki sa bann ki drwat pou ‘briye dan Rwayonm.’ Ki sa i vedir? Tou Kretyen swazir fidel ki ankor lo later apre ki premye faz sa gran ladetres pou’n terminen pou’n deza fini ganny sele. Apre sa, parey Zezi ti endike dan son profesi konsernan gran ladetres, zot pou ganny rasanble dan lesyel. (Mat. 24:31) Laba, zot pou briye “dan Rwayonm zot Papa,” e en pti pe letan apre Armagedon, zot pou partisip dan “maryaz Lanyo” konman son nouvel marye.​—Rev. 19:6-9.

KI BYENFE NOU GANNYEN

18, 19. Dan ki fason en bon konprenezon lo parabol Zezi konsernan dible ek move zerb i benefisye nou personnelman?

¹⁸ Ki byenfe nou gannyen personnelman avek sa bon konprenezon lo sa parabol? Egzamin trwa byenfe. Premyerman, i ogmant nou konprenezon. Sa parabol i koz lo en rezon enportan akoz Zeova i permet lemal. I’n “siport . . . bann ki merit son lakoler” pour prepar bann ki “i’n montre pitye,” andotmo, dible senbolik. * (Rom. 9:22-24) Dezyenmman, i ranforsi nou konfyans. Anmezir lafen i aprose, nou lennmi pou entansifye zot latak kont nou, “me zot pa pou reisi.” (Lir Zeremi 1:19. *) Zis parey diran tou bann lannen ki’n pase, Zeova in protez dible senbolik, savedir, atraver Zezi ek bann lanz, nou Papa ki dan lesyel pou avek nou “toulezour.”​—Mat. 28:20, nou ki’n met an italik.

¹⁹ Trwazyenmman, sa parabol i ed nou idantifye dible senbolik. Akoz sa i vreman enportan? I enportan pour konnen lekel dible senbolik akoz i ed nou pour trouv larepons pour en kestyon ki Zezi ti souleve dan son profesi ki annan plizyer lakonplisman konsernan bann dernyen zour. I ti demande: “Lekel sa [“lesklav fidel e pridan,” NW]?” (Mat. 24:45) Sa lot de lartik pou donn en larepons satisfezan pour sa kestyon.

[Not anba lo paz]

LEZOT NOT: (I devret ganny lir konman not anba paz dapre son paragraf.)

[Not anba lo paz]

[Kestyon]

[Portre lo paz 9]

[Tablo lo paz 10, 11]

DIBLE EK MOVE ZERB

33 N.L. LAGRENN I KONMANS GANNY SENMEN

SENMER: Zezi

BON LAGRENN I GANNY SENMEN: Bann Kretyen i konmans ganny swazir par lespri sen

PLANTASYON: Limanite

‘En zonm ti senm bon lagrenn dan son plantasyon’ (Mat. 13:24)

LENNMI: Dyab

DIMOUN PE DORMI: Lanmor bann zapot

‘Letan tou dimoun ti pe dormi en lennmi ti senm lagrenn move zerb’ (Mat. 13:25)

DIBLE: Kretyen swazir

MOVE ZERB: Swadizan Kretyen

“Zot pous ansanm ziska rekolt” (Mat. 13:30)

1914 REKOLT I KONMANSE

SERVITER/BANN KI FER REKOLT: Lanz

Bann swadizan Kretyen i ganny separe avek “bann garson Rwayonm”

Move zerb i ganny arase e anmare (Mat. 13:30)

(Vwar paragraf 10, 11)

1919 RASANBLE E MET DAN STOR: Kretyen swazir i ganny rasanble e met dan kongregasyon Kretyen ki’n ganny reetablir

SEZON REKOLT

‘Rekolte dible e met dan stor’ (Mat. 13:30)

(Vwar paragraf 12)

ARMAGEDON

Zour Armagedon, move zerb i ganny zet dan dife

ZOT POU BRIYE

En pti pe letan avan Armagedon, larestan Kretyen swazir fidel pou ganny rasanble dan lesyel

Sa bann ki drwat pou briye dan Rwayonm (Mat. 13:43) (Vwar paragraf 16, 17)

Move zerb i ganny zete dan fourno dife (Mat. 13:42) (Vwar paragraf 15)

[Portre]

[Portre]

[Portre]

[Portre]

[Portre]

[Portre]

[Portre]

[Portre]

[Portre]

[Portre]

[Portre lo paz 13]

Lanmitye larelizyon Kretyen ek dirizan politik pou terminen byento (Vwar  paragraf 13)