1. (a) Witi bona ava dikadia edia parabole mani oi gwauraia. (b) Edena dala ai Iesu ese unai parabole ena anina ia hahedinaraia?

 BASILEIA ena parabole ta lalonai Iesu ia gwau, biru tauna ta ese ena uma dekenai witi ena uhe namodia ia hadoa, to ena inai tauna ese uhe namodia huanai ava dikadia ia hadoa. Ava dikadia be idia tubu bada herea bona witi idia koua, to uma biaguna be ena hesiai taudia ia oda henia ia gwau, “namona be ruaosi idia tubu hebou ela bona gogoa negana.” Unai negai ava dikadia do idia gabua bona witi do idia haboua. Iesu ese parabole ena anina ia hahedinaraia. (Mataio 13:24-30, 37-43 duahia.) Unai parabole ena anina be dahaka? (“Witi Bona Ava Dikadia” ena maua itaia.)

2. (a) Biru tauna ena parabole lalonai idia vara gaudia ese dahaka idia laulaulaia? (b) Inai stadi lalonai dahaka do ita herevalaia?

² Unai parabole lalonai idia vara gaudia ese idia hahedinaraia, edena dala ai bona edena nega ai Iesu ese taunimanima edia huana amo witi oreana do ia haboua. Witi oreana be Iesu ida ena Basileia lalonai do idia lohia horoa Keristani taudia. Pentekoste 33 C.E. ai, Iesu ese hadoa gaukarana ia hamatamaia. Tanobada ena dokonai, idia do noho horoa taudia be edia maka idia abia, bena guba dekenai idia daekau neganai, haboua gaukarana do ia doko. (Mat. 24:31; Apok. 7:1-4) Tau ta be ororo ataiai ia gini bona gabu ibounai ia itaia hegeregerena, inai parabole ese ita ia durua lagani 2,000 lalodiai idia vara gaudia ita lalopararalaia totona. Vadaeni, inai parabole ita stadilaia neganai, dahaka gaudia ita lalopararalaia? Unai parabole ese hadohado gaukarana, uhe idia tubu, bona gogoa gaukarana ia herevalaia. Inai stadi ai ita ese gogoa gaukarana sibona do ita herevalaia.—Maua ai futnout 1 itaia. a

3. (a) Lagani 100 C.E. ia matamaia murinai, dahaka idia vara? (b) Mataio 13:28 ai dahaka henanadai ia vara, bona daidia ese unai henanadai idia gwauraia? (Mani futnout mauana itaia.)

³ Lagani 100 C.E. ia matamaia murinai, “ava dikadia”  o Keristani koikoidia be tanobada ena kahana momo ai idia hedinarai. (Mat. 13:26) Lagani 300 C.E. ai, ava dikadia bamona Keristani taudia ese horoa Keristani taudia edia namba idia hanaia. Ita laloatao, parabole lalonai hesiai taudia be uma biaguna idia noia ava dikadia idia kokia totona. (Maua ai futnout 2 itaia.) b (Mat. 13:28) To, uma biaguna ena haere be dahaka?

4. (a) Iesu, uma Biaguna ena haere ese dahaka ia hahedinaraia? (b) Edena negai witi bamona Keristani taudia edia toana ia hedinarai?

⁴ Iesu ese witi bona ava dikadia ia herevalaia neganai, ia gwau: “Namona be ruaosi idia tubu hebou ela bona gogoa negana.” Unai oda herevana ese ia hahedinaraia unai nega amo ema bona hari, witi bamona horoa Keristani taudia haida be tanobada ai idia do noho. Iesu ese gabeai ena hahediba taudia dekenai ia gwauraia herevana ese unai ia hamomokania. Ia gwau: “Lau be dina iboudiai umui ida do lau noho ela bona inai nega oromana ena dokona.” (Mat. 28:20) Unai ena anina be Iesu ese horoa Keristani taudia do ia gimaia ela bona tanobada dokona. To, “ava dikadia” be momo herea dainai ita diba lasi daidia be “witi” oreana taudia. To, gogoa gaukarana ia do matamaia lasi neganai, witi oreana taudia edia toana ia hedinarai. Edena dala ai unai ia vara?

5. Edena dala ai Malaki ena peroveta herevana be aposetolo edia negai ia guguru?

⁵ Lagani haida gunanai, Iesu ese witi bona ava dikadia edia parabole ia do gwauraia lasi neganai, Iehova ese peroveta tauna Malaki ia hasiahua Iesu ena parabole ai do idia vara gaudia ia perovetalaia totona. (Malaki 3:1-4 duahia.) Ioane Bapatiso be unai “hereva gwauraia tauna,” bona ia ese ‘dala ia hegaegaelaia.’ (Mat.  11:10, 11) Lagani 29 C.E. ai, Iesu ia hedinarai murinai, Israela ena hahemaoro negana be ia kahirakahira vadaeni. Iesu be Malaki ese ia perovetalaia hereva gwauraia tauna iharuana. Ia ese nega rua Ierusalema ena dubu ia hagoevaia: Ginigunana be ena haroro gaukara ia hamatamaia neganai, bona iharuana be ena haroro gaukara ena dokonai. (Mat. 21:12, 13; Ioa. 2:14-17) Unai dainai ita gwau diba, Iesu ese ena hagoevaia gaukarana be lagani haida lalonai ia karaia.

6. (a) Edena negai Malaki ena peroveta herevana be nega iharuana ia guguru? (b) Edena negai Iesu ese Iehova ena dubu helaga ia sekea? (Mani futnout mauana itaia.)

⁶ Edena negai Malaki ena peroveta herevana be nega iharuana ia guguru? Lagani 1914 be do lasi neganai, C. T. Russell bona ena bamodia be Ioane Bapatiso ena gaukara bamona idia karaia. Idia ese Baibel ena hereva momokanidia idia hadibaia lou. Bible Student taudia ese idia hahedinaraia gaudia haida be inai: Keriso ena mauri davalaia boubouna ena anina korikorina, hel lahina ena hahediba herevana be koikoi, bona Idau Bese Edia Nega be kahirakahira do ia ore. To, tomadiho oreadia momo danu idia gwau idia be Keriso idia badinaia. Unai dainai henanadai badana ta ia vara: Idia ibounai amo daidia be witi bamona taudia? Unai henanadai haerelaia totona, Iesu be lagani 1914 ai Iehova ena dubu helaga ia sekea matamaia. Unai sekea bona hagoevaia gaukarana be lagani haida lalonai ia karaia—lagani 1914 amo ela bona lagani 1919 ena matamana kahana.—Maua ai futnout 3 itaia. c

7. Lagani 1914 ai, Iesu ena sekea gaukarana ia hamatamaia neganai, dahaka ia davaria?

⁷ Iesu ena sekea gaukarana ia hamatamaia neganai, dahaka ia davaria? Lagani 30 mai  kahana lalonai Bible Student taudia be edia moni bona goada idia gaukaralaia haroro gaukara idia karaia goadagoada totona. (Maua ai futnout 4 itaia.) d Iesu bona aneru idia moale badina idia davaria ena be Bible Student taudia be momo lasi, to idia gini goada dainai Satani ena ava dikadia bamona taudia ese idia koua lasi! To gau ta ia vara dainai, Iesu ese “hahelagaia taudia do ia hagoevaia” be namo. (Mal. 3:2, 3; 1 Pet. 4:17) Dahaka ia vara?

8. Lagani 1914 murinai dahaka ia vara?

⁸ Lagani 1914 dokona ai, Bible Student taudia haida idia lalohisihisi badina guba dekenai idia lao lasi. Lagani 1915 bona 1916 lalodiai, dagedage taudia ese haroro gaukara idia koua toho. Bona October 1916 ai Tadikaka Russell ia mase murinai, orea lalonai heiriheiri ia vara. Watch Tower Bible and Tract Society ena dairekta seven amo, foa idia ura lasi Tadikaka Rutherford ese orea do ia gunalaia dainai, tadikaka edia lalotamona karana idia hadikaia toho. To, August 1917 ai Betele idia rakatania. Iesu ese orea ia hagoevaia unai! Danu, Bible Student taudia haida be taunimanima dekenai idia gari. To, momo be Iesu ena hagoevaia gaukarana idia abia dae bona edia kara idia haidaua. Unai dainai, Iesu ia gwau idia be witi bamona Keristani momokani taudia. To, Keristani koikoidia bona Kerisendom dubudia idia badinaia taudia ibounai be Iesu ese ia dadaraia. (Mal. 3:5; 2 Tim. 2:19) Gabeai dahaka ia vara? Unai ita diba totona, mani witi bona ava dikadia ena parabole ita laloa lou.

9, 10. (a) Hari dahaka do ita herevalaia? (b) Do ia vara gauna namba 1 be dahaka?

⁹ Iesu ia gwau: “Gogoa negana be nega oromana ena dokona.” (Mat. 13:39) Gogoa negana be lagani 1914 ai ia matamaia. Iesu ese ia perovetalaia gogoa negana ai do idia vara gaudia faiv mani ita herevalaia.

¹⁰ Do ia vara gauna namba 1 be, ava dikadia do idia kokia. Iesu ia gwau: “Gogoa negana ai aniani gogoa taudia do lau hamaoroa, ava dikadia umui kokia guna bona umui kwatua hebou.” Lagani 1914 murinai, aneru ese ava dikadia o Keristani koikoidia idia “gogoa” matamaia, bona “Basileia ena natudia” o horoa taudia amo idia hapararaia.—Mat. 13:30, 41.

11. Keristani momokanidia be edena dala ai Keristani koikoidia amo idia idau?

¹¹ Gogoa gaukarana ia heau noho lalonai, witi bona ava dikadia bamona taudia edia toana ia hedinarai goevagoeva. (Apok. 18:1, 4) Lagani 1919 ai, gau haida ese idia hahedinaraia Babulonia Badana be ia moru vadaeni. Keristani momokanidia be edena dala ai Keristani koikoidia amo idia idau? Edia haroro gaukara amo. Bible Student oreana idia gunalaia tadikakadia idia gwau, idia ta ta ese Basileia harorolaia gaukarana idia karaia be gau badana. Hegeregere, lagani 1919 ai idia halasia buklet ta ladana, To Whom the Work Is Entrusted ese horoa Keristani taudia ibounai ia hadibaia ruma-ta-ruma-ta haroro gaukarana do idia karaia. Ia gwau: “Unai be gaukara bada hereana, to ia be Lohiabada ena gaukara, bona iena goada amo do ita karaia. Unai gaukara umui karaia be hahenamo badana.” Dahaka idia karaia? Lagani 1922 ai, The Watch Tower ia gwau, unai murinai Bible Student taudia be haroro gaukara idia habadaia. Unai nega amo ema bona hari, unai gaukara be Keristani momokanidia edia maka badana.

12. Witi oreana taudia be edena negai idia haboua matamaia?

¹² Do ia vara gauna namba 2 be, witi do idia haboua. Iesu ese ena aneru ia oda henidia ia gwau: “Egu haboua rumana dekenai witi do umui haboua.” (Mat. 13:30) Lagani 1919 amo, horoa taudia be ia goeva vadaeni Keristani kongrigeisen lalonai idia haboua. Inai tanobada ena dokona ai idia do noho horoa taudia be guba ai edia ahuna idia abia neganai, witi haboua gaukarana do ia doko.—Dan. 7:18, 22, 27.

13. Apokalupo 18:7 ese ariara hahinena o Babulonia Badana, Kerisendom danu be edena bamona ia herevalaia?

 ¹³ Do ia vara gauna namba 3 be, idia taitai bona isena do idia koria. Aneru ese ava dikadia idia kwatua murinai, dahaka do ia vara? Iesu be ava dikadia ia herevalaia neganai, ia gwau: “Unuseniai do idia taitai bona edia isena do idia koria.” (Mat. 13:42) Unai be hari ia vara noho, a? Lasi. Hari, Kerisendom, ariara hahinena ena kahana ta, be inai bamona ia gwau: “Lau be terona latanai ia helai kwini, bona lau be vabu lasi, bona lau be do lau taitai lasi.” (Apok. 18:7) Momokani, Kerisendom ia laloa ia be mai ena siahu bona politikol taudia edia ataiai ia be ‘kwini bamona ia helai.’ Hari, ava dikadia bamona taudia be idia taitai lasi to idia hekokoroku noho. To kahirakahira unai do ia idau.

14. (a) Edena negai bona dahaka dainai Keristani koikoidia ese ‘edia isena do idia koria’? (b) Edena dala ai Mataio 13:42 ai ita abia diba matamatana be Salamo 112:10 ena hereva ida ia hegeregere? (Futnout mauana itaia.)

¹⁴ Hisihisi badana ai, tomadiho koikoidia ibounai idia ore murinai, guna unai dubu idia lao taudia be heau mauri gabuna do idia tahua, to do idia davaria lasi. (Luka 23:30; Apok. 6:15-17) Vadaeni, idia laloparara idia heau mauri diba lasi dainai, idia taitai bona mai badu ida ‘edia isena do idia koria.’ Iesu ia peroveta hegeregerena, unai dibura negana ai idia be “mai taitai danu edia kemena do idia botaia.” (Maua ai futnout 5 itaia.) e—Mat. 24:30; Apok. 1:7.

15. Ava dikadia dekenai dahaka do ia vara, bona edena negai unai do ia vara?

¹⁵ Do ia vara gauna namba 4 be, lahi badana lalonai do idia negedia. Idia kwatua ava dikadia dekenai dahaka do ia vara? Aneru ese “lahi badana lalonai do idia negea.” (Mat. 13:42) Anina be do idia ore vaitani! Unai dainai, guna tomadiho koikoi idia lao taudia be hisihisi badana ena dokona, Aramagedono ai do idia ore vaitani.—Mal. 4:1.

16, 17. (a) Iesu ese ena parabole lalonai ia gwauraia gauna ginigabena be dahaka? (b) Dahaka dainai ita abia dae unai peroveta herevana be vaira neganai do ia guguru?

¹⁶ Do ia vara gauna namba 5 be, do idia diaridiari. Iesu ena peroveta herevana ena dokonai ia gwau: “Unai nega ai, kara maoromaoro taudia be edia Tamana ena Basileia lalonai dina bamona do idia diaridiari.” (Mat. 13:43) Edena negai bona edeseniai unai do ia vara? Unai be vaira neganai do ia guguru. Iesu be tanobada ai hari ia vara gauna ta ia herevalaia lasi, to vaira negana ai guba dekenai do ia vara gauna ta ia gwauraia. (Maua ai futnout 6 itaia.) f Hari, unai bamona ita hereva ena badina rua mani ita itaia.

¹⁷ Gau ginigunana be, “edena negai” unai do ia vara? Iesu ia gwau: “Unai nega ai, kara  maoromaoro taudia be . . . do idia diaridiari.” Iesu ese inai hereva, “unai nega ai” ia gwauraia neganai, ia ese ava dikadia be “lahi badana lalonai do idia negea” negana ia herevalaia. Unai be hisihisi badana ena dokonai do ia vara. Unai dainai, horoa taudia ‘do idia diaridiari’ negana be vaira negana ai do ia vara danu. Gau iharuana be, “edeseniai” unai do ia vara? Iesu ia gwau, kara maoromaoro taudia be ‘Basileia lalonai do idia diaridiari.’ Unai ena anina be hisihisi badana ena kahana ginigunana ia ore murinai, tanobada ai idia do noho horoa taudia be edia maka idia abia vadaeni. Bena, peroveta hereva hegeregerena, idia be guba dekenai do idia haboua. (Mat. 24:31) Unuseniai idia be “edia Tamana ena Basileia lalonai” do idia diaridiari, bona Aramagedono tuarina murinai idia be mai moale ida “Mamoe Natuna ena headava” lalonai, Iesu ena adavana bamona do idia lao.—Apok. 19:6-9.

18, 19. Edena dala ai witi bona ava dikadia ena parabole ese ita ia durua?

¹⁸ Edena dala ai Iesu ena parabole ita stadilaia karana ese ita ia durua? Dala toi mani ita laloa. Ginigunana, iseda laloparara ia habadaia. Unai parabole ese Iehova be kara dika ia koua lasi ena badina ia hahedinaraia. Ia ese “ia badu henia urodia . . . dekenai ia boga-auka,” unai amo “ia hebogahisi henia urodia” o witi oreana taudia ia hegaegaelaia. (Maua ai futnout 7 itaia.) g (Roma 9:22-24) Iharuana be, iseda abidadama ia hagoadaia. Dokona ia kahirakahira lalonai, inai taudia ese edia dagedage karadia do idia habadaia, ‘to ita do idia halusia lasi.’ (Ieremia 1:19 duahia.) Idaunega amo Iehova ese witi oreana ia gimaia hegeregerena, hari ia ese Iesu bona aneru do ia gaukaralaia “dina iboudiai” ita ida do idia noho ela bona dokona.—Mat. 28:20.

¹⁹ Ihatoina be, unai parabole ese ita ia durua witi oreana taudia ita diba totona. Dahaka dainai unai be mai anina bada? Witi bamona Keristani taudia ita diba neganai, unai ese ita ia durua Iesu ese ia gwauraia henanadai ta ena haere ita diba totona. Unai henanadai be: “Igui hesiai tauna mai ena kamonai bona mai ena kara maoromaoro . . . be daika?” (Mat. 24:45) Stadi gabedia rua ese unai henanadai do idia haerelaia.