1. (a) Jimbulula o kifika kia jimbutu jambote ni jimbundu ja iangu. (b) Kiebhi kia jimbulula Jezú o kilomboluelu kia kifika?

SAÍ kifika kia bhange Jezú kia lungu ni Utuminu, ki tanga kidimakaji u kuna jimbutu jambote, anga o nguma iê uíza u kuna-mu jimbundu ja iangu. O jimbundu ja iangu ja beta-kota o ku kula o jimbutu jambote ndenge, maji o kidimakaji uambela o abhik’ê, ‘ehelenu-ju, jene joso ji kudile bhuamoxi katé kia-nda kuila o idima iabhi.’ Mu kithangana kia ku bhongolola o jimbundu ja iangu a ji oha, o jimbutu jambote a ji bhaka. Jezú ua jimbulula o kifika kiki. (Tanga Matesu 13:24-30, 37-43.) Ihi i tu londekesa o kifika kiki? (Tala kioso ki kula  “o Jimbutu Jambote ni Jimbundu ja Iangu.”)

2. (a) Ihi ilondekesa o izulukutu ia bhiti mu díbhia dia kidimakaji? (b) Mbandu iebhi ia kifika i tua-nda di longa?

² O izulukutu i bhita mu kifika kia díbhia dia kifika, kilondekesa kiebhi ni thembu kuxi kieji tungula kibuka bhu kaxi ka mundu, phala ku kala o kibuka kia jimbutu jambote—o Jikidistá a a undu eji tumina nê kumoxi ku Utuminu uê. A mateka ku kuna ku muvu ua 33 mu Pendekoxi ua K.K. O ku bhongolola kua-nda bhua kioso kia-nda ta o kidimbu ku Jikidistá a a undu, a-nda kala hanji ku muenhu ku dizubhilu dia mundu, mu kusuka-ku, a-nda ku ambata ku diulu. (Mat. 24:31; Dij. 7:1-4) Kála o muthu uala ku thandu dia mulundu u tena ku mona ioso ia kondoloka o mulundu, o kifika kiki ué ki tu kuatekesa kuijiia o izulukutu ieji bhita mu 2.000 ja mivu. Mbote iahi i tu katula mu kuijiia kiambote o izulukutu ia lungu ni Utuminu? O kifika ki tanga kithangana kia ku kuna, kia ku kula, ni ku bhongolola. O milongi íii ia-nda zuela bhenge-bhenge ia lungu ni ku bhongolola. *

3. (a) Ukexilu uahi ua moneka kioso kia bhiti o hama ia dianga? (b) Kála ki tanga o divulu dia Matesu 13:28, kibhuidisu kiebhi kia moneka, ni nanhi uebhula? (Tala ué ku luiji.)

³ Ku dimatekenu dia hama ia kaiadi K.K., ‘o jimbundu ja iangu ja moneka’ kioso o Jikidistá ja makutu ja moneka  mu díbhia dia mundu. (Mat. 13:26) Ku hama ia kauana o Jikidistá a sokesa ni jimbundu ja iangu a bhitakana o Jikidistá a a undu. Lembalala kuila mu kifika, o abhika a bhingile kua ngana iâ phala kuvuza o jimbundu ja iangu. * (Mat. 13:28) Kiebhi kia tambuijila o mesene?

4. (a) Ihi ilondekesa o kitambuijilu kia Mesene, Jezú? (b) Thembu kuxi kia mateka ku moneka dingi o Jikidistá a a sokesa ni jimbutu jambote?

⁴ Mu kuzuela ia lungu ni jimbutu jambote ni jimbundu ja iangu, Jezú uambe: ‘Ehelenu-ju, jene joso ji kudile bhuamoxi katé kia-nda kuila o idima iabhi.’ O kitumu kiki kilondekesa kuila tundé ku hama ia dianga katé lelu, mu ixi kuene Jikidistá a a undu a sokesa ni jimbutu jambote. Tu banza kiki, mukonda dia izuelu ia Jezú ku maxibulu mê: “Eme-muène ngà kala ni enu izuua ioso, katé ku dizubhilu dia mundu.” (Mat. 28:20) O Jikidistá a a undu eji ku a langa izuua ioso katé ku dizubhilu dia mundu. Mukonda ene ka kulu kiavulu kála o Jikidistá a sokela ni jimbundu ja iangu ki tuijiia kiambote se nanhi a sokele ni jimbutu jambote mu kithangana kia ku kula. Mu kiki, mivu ande dia ku mateka o ku bhongolola o kibuka kia jimbutu jambote ja betele-kota mu ku moneka. Kiebhi kia bhiti o kizulukutu kiki?

5. Kiebhi kia di kumbidila o kikanenu kia polofeta Malakiia ku hama ia dianga?

⁵ Hama ia mivu ande dia Jezú ku bhanga o kifika kia jimbutu jambote ni jimbundu ja iangu, Jihova ua bhana ku tena kua polofeta Malakiia ku kanena izulukutu ilondekesa o kifika kia Jezú.(Tanga Malakiia 3:1-4.) Nzuá dia batizu muene uexile ‘o mukunji ua iudikile o njila.’ (Mat. 11:10, 11) Kioso kiéza ku muvu ua 29 K.K., o kithangana kia ku  fundisa o kifuxi kia Izalaiele kia zukamene. Jezú uexile o mukunji ua kaiadi. Muéne ua zelesa o tembulu mu Jeluzaleme mu veji jiiadi—kia dianga ku dimatekenu dia ukunji uê, kaiadi ku disukilu dia ukunji uê. (Mat. 21:12, 13; Nzuá 2:14-17) Mu kiki, o kikalakalu kia Jezú kia ku zelesa kia bhingile kithangana.

6. (a) Kiebhi o kikanenu kia polofeta Malakiia kia beta-kota kia di kumbidila (b) Mu kithangana kuxi kiéza Jezú mu kuongola o tembulu? (Tala ué ku luiji.)

⁶ Kiebhi kia beta-kota ku di kumbidila o kikanenu kia polofeta Malakiia? Ku mivu ande dia muvu ua 1914, o phange C. T. Russell, ni jiphange ja mukuá a bhange o kikalakalu kála kia bhangele Nzuá dia Batizu. O kikalakalu kia lungile ni kulondekesa o kidi kia Bibidia. O Adilongi a Bibidia a longo ku athu ihi i lombolola o sata ia kukula kua Kristu, a londekesa o makutu ene mu longa o athu a lungu ni infernu, a boko o dizubhilu dia Jithembu ia Ifuxi ki Iejidile Nzambi. Né kiki kua kexile hanji jingeleja javulu ja kexile mu zuela kuila exile akaiedi a Kristu. Mu kiki tua tokala ku tambuijila o kibhuidisu kiki: Nanhi exile o jimbutu jambote bhu kaxi ka ibuka ienioió? Phala ku batula o maka, Jezú ua mateka kuongola o tembulu ku muvu ua 1914. O kikalakalu kia kuongola ni ku zelesa, kua bhingi kithangana kiavulu—tundé ku muvu ua 1914 katé ku dimatekenu dia muvu ua 1919. *

7. Kioso kia mateka Jezú kuongola ku muvu ua 1914, ihi ia sange?

⁷ Kioso kia mateka Jezú kuongola, ihi ia sange? Kibuka kiofele kia Adilongi a Bibidia, a suína a bhana o jimbongo jâ phala ku boka o njimbu mu 30 a mivu. * Kiki kisangusangu kia dikota phala Jezú ni ji-anju, mu ku sanga o kibuka kiofele, maji kia suínine, ka jimi ku  mbutu ia Satanaji! Né kiki, kua bhingile hanji ku “zelesa o muiji ua Levi,” o Jikidistá a a undu. (Mal. 3:2, 3; 1 Phe. 4:17) Mukonda diahi?

8. Izulukutu iahi ia bhitile kioso kiabhu o muvu ua 1914?

⁸ Mu kusuka-ku muvu ua 1914, saí Adilongi a Bibidia a luualele mukonda ka bandele ku diulu. Ku muvu ua 1915 ni muvu 1916, o kizukutisu kia kexile mu tunda ku athu ka tokalele mu kilunga, kia zozesa o kikalakalu kia kuboka. Kioso kiafu Phange Russell ku mbeji ia Kamusasadi ku muvu ua 1916, kua moneka maka mu kilunga. Mu sambuadi dia jiphange akexile ku pholo ia Sociedade Torre de Vigia de Bíblias e Tratados, kiuana a bhukumukine, mukonda ka mesenene kuila o Phange Rutherford muéne u kala ku pholo mu kilunga. Ene a mesenene ku muanganesa o jiphange, maji ku mbeji ia Kavua ku muvu ua 1917, ene a tundu mu Betele—se phata a zelesa o inzo! Saí Adilongi a Bibidia ué a tundu mu kilunga mukonda akexile ni uôma ua athu. Né muene kiki, ene oso a xikinine kuila Jezú u zelesa o Tembulu, ia a xikina ku lungulula o ibanzelu iâ. Kienhiki Jezú ua xikina kuila o Jikidistá ja kidi, o jimbutu jambote, maji ua ditunu o Jikidistá ja makutu, katé muene ni ió akexile mu jingeleja ja Kidistándade. (Mal. 3:5; 2 Tim. 2:19) Izulukutu iahi ia kaiela? Tu vutuke ku kifika kia jimbutu jambote ni jimbundu ja iangu.

9, 10. (a) Ihi i tua-nda di longa lelu ia lungu ni kithangana kia ku bhongolola? (b) Ihi ia bhiti mu kithangana kia ku bhongolola?

⁹ Jezú uambe: ‘O thembu ia ku bhongolola, o dizubhilu dia mundu.’ (Mat. 13:39) O kithangana kia ku bhongolola kia mateka ku muvu ua 1914. Tua-nda di longa izulukutu itanu ia kanena Jezú ieji bhita mu kithangana kiki.

¹⁰ Kia dianga, o ku bhongolola o jimbundu ja iangu. Jezú uambe: ‘O bhu thembu ia ku bhongolola kiene ki nga k’ambela a bhongolodi kuila, diangenu ku bhongolola o jimbundu ja iangu, mu ji kute ita.’ Kioso kia bhiti o muvu ua 1914, o ji-anju ja mateka ‘ku bhongolola’ o Jikidistá ja difuile ni jimbundu ja iangu, mu ku a katula bhu kaxi ka Jikidistá a a undu, ió ‘a tokala ku utuminu.’—Mat. 13:30, 38, 41.

11. Tundé o izuu’oio katé lelu, ihi iene mu tungula o Jikidistá ja kidi mu Jikidistá ja makutu?

¹¹ Kioso kiai ni ku bhongolola a beta-kota ku tungulula o ibuka iiadi. (Dij. 18:1, 4) Ku muvu ua 1919, athu oso a mono kuila o Babilonha ia Dikota ia luezele. Ihi ia bhangesa kuila o Jikidistá ja makutu a di tungula bhu kaxi ka Jikidistá ja kidi? O sidivisu ia kuboka. O jiphange ja kexile ku pholo dia Adilongi a Bibidia, a monene kuila a tokalele kuia mu tula o njimbu iambote ia Utuminu ku athu. Mu kifika, ku muvu ua 1919 a bhange kamukanda kambele, To Whom the Work Is Entrusted, (A Nanhi a a Dielela o Kikalakalu) ka kexile mu suínisa o Jikidistá joso a a undu, kuia mu boka inzo ni inzo. O kamukanda kambele kiki: “O kikalakalu kiki kia nzungule, maji kia tokala kua Ngana, mu nguzu iê muéne ua-nda ki bhanga. Eie uala ni ujitu ua ku kuatekesa mu kikalakalu kiki.” Kiebhi kia tambuijila o jiphange? Tundé o kithangana kieniókio, O Sociedade Torre de Vigia, iambele kuila, ku muvu ua 1922, o Adilongi a Bibidia a bandekesa o sidivisu iâ ia kuboka. Tundé o kithangana kieniókio o sidivisu ia kuboka mu inzo ni inzo, kiene o kijimbuete kia Jikidistá ja fiiele—kiene kimoxi ué mu izuua ietu.

12. Tundé thembu kuxi kia mateka o ku bhongolola o jimbutu jambote?

¹² Kaiadi, ku bhongolola o jimbutu jambote. Jezú ua tumina o ji-anju jê: “O jimbutu jambote-phe mu ji bhongoluela mu kitula kiami.” (Mat. 13:30) Tundé ku muvu ua 1919, o Jikidistá a a undu ene mu ku a bhongoluela mu kilunga kia ubhe kia Jikidistá. Phala  o Jikidistá a a undu a-nda hanji ku muenhu mu izuua isukidila-ku, o kubhongolola kua suku-ku mu kitula, kua-nda bhita kioso kia-nda tambula o kifutu kiâ ku diulu.—Dan. 7:18, 22, 27.

13. Ihi ilondekesa o divulu dia Dijingunuinu 18:7 ia lungu ni ukexilu ua muhatu ua habhu mba Babilonha ia Dikota lelu, ni Kidistándade ué?

¹³ Katatu, kudila ni ku di kokota ku mazu. Kioso kia zubha o ji-anju kubhongolola o jimbundu ja iangu, ihi ia bhiti? Mu kuzuela ia lungu ni kibuka kia jimbutu jambote Jezú uambe: “Muenhomo muene muà kala o kudila ni ku di kokota ku mazu!” (Mat. 13:42) O kuila o izulukutu íii ia mu bhita lelu? Kana. Lelu o Kidistándade ki bhanga mbandu ku muhatu ua habhu uamba kuila: “Eme-muène na mvuale, nga xikama ku ungana! Ki ngala ngi mutûdi, ki ngi moneka dingi dilamba!” (Dij. 18:7) Sé phata lelu o Kidistándade ua dielela kiavulu, ua mu fika kuila “na mvuale,” uala ku thandu dia kibuka kia atuameni a jinguvulu. O ió a sokela ni jimbundu ja iangu a mu di nanza kuila kala ni dilamba. Maji o dilamba diê di diza.

14. (a) Thembu kuxi ni mukonda diahi o Jikidistá ja makutu a-nda ‘di kokota ku mazu?’ (b) Kiebhi o kijimbuluilu kia kifika mu divulu dia Matesu 13:42; kia lungu ni izuelu ia divulu dia Jisálamu 112:10? (Tala ku luiji.)

¹⁴ Mu kizuua kia hadi ia dikota kioso kia-nda zubha ku buika o jingeleja joso ja makutu, o akaiedi iê, a-nda sota kididi kia ku di sueka, maji ka-nda sanga kididi kia kondama. (Luka 23:30; Dij. 6:15-17) Kioso kia-nda mona kuila ka-nda tena ku bhuluka ku dizubhilu, dilamba dia a kuata anga a kala ‘mu di kokota ku mazu’ ni njinda. Kala kia kanene Jezú mu kikanenu kia lungu ni kizuua kia hadi ia dikota, mu kithangana kieniókio kia kitombe, ene a “kala mu dila.” *—Mat. 24:30; Dij. 1:7.

15. Ihi ia-nda bhita ni jimbundu ja iangu, o izulukutu íii ia-nda bhita thembu kuxi?

¹⁵ Kauana, a kà i texi mu kitúbhia. Ihi ia-nda bhita ni ita ia jimbundu ja iangu? O ji-anju a-nda ‘i texi mu kitúbhia.’ (Mat. 13:42) Kiki kilombolola kibuika. Mu kiki, o akaiedi a jingeleja ja makutu a-nda ku a buika mu disukilu dia kizuua kia hadi ia dikota, mu Alumajedone.—Mal. 4:1.

16, 17. (a) Kizulukutu kiebhi kia suku-ku kia tange Jezú mu kifika kiê? (b) Mukonda diahi tu zuela kuila o kizulukutu kiki kia-nda di kumbidila ngó ku pholo?

¹⁶ Katanu, a kà di muika kala dikumbi. Jezú u suluka ni kikanenu kiê mu kuzuela kuila: ‘Mu kithangana kieniókio athu aiuka a ka di muika kála dikumbi ku mbanza ia Tata iâ.’ (Mat. 13:43) Thembu kuxi ni kuebhi kua-nda bhita o kizulukutu kiki? O izuelu íii ia-nda di kumbidila ku pholo. Jezú ka zuela kima kia mu bhita mu ixi, maji ua zuela kizulukutu kieji bhita ku diulu. * Xinganeka ima iiadi i bhangesa ku banza kiki.

 ¹⁷ Kia dianga, o kibhuidisu “thembu kuxi.” Jezú uambe: ‘Mu kithangana kieniókio athu aiuka a kà di muika.’ O kizuelu ‘mu kithangana kieniókio’ kia lungu ni kizulukutu kia tangele Jezú kia lungu ni ku ‘texi o jimbundu ja iangu mu kitúbhia.’ O kizulukutu kiki, kia-nda bhita ku disukilu dia kizuua kia hadi ia dikota. Mu kiki o ku “muika,” kua Jikidistá a a undu, kua-nda bhita ngó ku hádia. Kaiadi, o kibhuidisu “kuebhi.” Jezú uambe kuila: O athu aiuka a ‘ka muika ku utuminu.’ Ihi i lombolola? O Jikidistá joso ja fiiele a a undu a-nda kala mu ixi kioso kia-nda bhita o hadi ia dikota, a-nda kala kiá ni kidimbu. Kala kia kanena Jezú, kioso kia-nda bhita o hadi ia dikota ene a-nda ku a ongeka ku diulu. (Mat. 24:31) Kuenhoko ene a-nda muika ‘ku Utuminu ua Tat’â,’ mu ku bhita o ita ia Alumajedone, ene a-nda sanguluka kumoxi ni Jezú mu kithangana “kia ukaza ua Kambudi.”—Dij. 19:6-9.

18, 19. Mbote iahi i tu tena ku katula mu ku tendelesa o kifika kia Jezú kia lungu ni jimbutu jambote ni jimbundu ja iangu?

¹⁸ Mbote iahi i tena ku katula muthu ni muthu mu dietu mu kifika kiki? Xinganeka maukexilu atatu. Kia dianga, ki bandekesa o kuijiia kuetu. O kifika ki tu longa se mukonda diahi Jihova uehela o kuiibha. Muéne “ua xididikila . . . eni’ó a tokalele kiá ku a bhana kaxtiku” phala ku lendukila o ‘Jikidistá a a undu’—o jimbutu jambote. * (Loma 9:22-24) Kaiadi, ki suínisa o kidielelu kietu. Mu ku zukama ku dizubhilu dia mundu, o jinguma jetu ja-nda suína dingi mu ku bhânga n’etu, “maji ka tena ku tu tolola.” (Tanga Jelemiia 1:19.) Kála kia lange Jihova o kibuka kia jimbutu jambote, Tata ietu ia diulu, bhu kaxi ka Jezú ni ka ji-anju muéne ua-nda tu langa “izuua ioso” ia-nda kuíza.—Mat. 28:20.

¹⁹ Katatu, o kifika ki tu kuatekesa ku tungula o kibuka kia jimbutu jambote. Mukonda diahi kima kiambote o kuijiia? O kuijiia se a nanhi o Jikidistá a a sokesa ni jimbutu jambote kima kiambote, phala kuijiia o kitambuijilu kia kibhuidisu kia bhange Jezú mu kikanenu kiê kionene, kia lungu ni izuua isukidila-ku. Muéne uebhula: ‘Nanhi o kimbadi kia fiiele?’ (Mat. 24:45) O milongi iiadi ia-nda kaiela ia-nda tu tambuijila o maka enhá.