“Nyajpäätyëts mët miitsëty tuˈuk tuˈugë xëë”
“¡Ixtë!, nyajpäätyëts mët miitsëty tuˈuk tuˈugë xëë axtë ko jyëjpkëxëdë tyäˈädë jukyˈäjtën.” (MAT. 28:20, Traducción del Nuevo Mundo [TNM])
1. 1) Nimaytyäˈäk ja ijxpajtën diˈib mä ja triigë mëdë axëkˈujts. 2) ¿Wiˈixë Jesus tnimaytyaky tidën yˈandijpy?
KO Jesus tmaytyaky ja Diosë yˈAnaˈamën, ta ojts tˈijxkijpxyë mët tuˈugë naxtuumbë diˈib ojts tniˈipy ja oybyë triigë ets tuˈugë mëtsip diˈib ojts ttukniibë mëdë axëkˈujts. Ja axëkˈujts ojts twinˈyoonaxy ja triigë, per ta ja naxtuumbë tˈanmääy ja tyuumbëtëjk: “Nik mastuˈuttë. Waˈan dyony tiˈigyë axtë koonëm myukët ja triigë”. Mä myuky ja pëjtaˈaky, ja triigë yëˈë diˈib mujkp ets ja axëkˈujts yëˈë diˈib yajnoˈkp. ¿Wiˈix nyikejy tukëˈëyë tyäˈädë? Jesus nyimaytyak (käjpxë Matewʉ 13:24-30, 37-43). Min nˈokˈijxëm ti yˈandijpyë tyäˈädë ijxpajtën (ix mä jyënaˈany “Ja triigë ets ja axëkˈujts”).
2. 1) ¿Ti myaytyäˈägaampy tijaty tuun jäjtë mä ja naxtuumbë kyam? 2) ¿Ti nˈixäˈänëm mä tyäˈädë artikulo?
2 Tijaty tuun jäjtë mä ja naxtuumbë kyam, yëˈë myaytyäˈägaampy näˈä ets wiˈixë Jesus dyajtuˈukmukäˈäny mä naxwinyëdë jäˈäy pënaty anaˈamandëp mët yëˈë, diˈib näjxtëp extëm ja triigë. Ja nip kojk ja tsyondaky mä Pentekostes mä jëmëjt 33. Ets ja myujtäˈäyaˈanyë tyäˈädë pëjtaˈaky ko nyëjkxtët tsäjpotm diˈib të yajwinˈixtë diˈibë nety akjukyˈäjttëp mä tyäˈädë tiempë jyëjpkëxanë (Mat. 24:31; Diˈibʉ Jat. 7:1-4). Duˈun extëm ko nbajtëm mä tuˈugë kopk parë ndukˈijxëtyaˈayëm ja it lugäär, nanduˈun xypyudëjkëmë tyäˈädë ijxpajtën parë nnijäˈäwëm tijaty tuun jäjtëp nuˈun kujk nyaxyë tiempë 2,000 jëmëjt. Per ¿tijatyë net tunan jatanëp mä yajmaytyaˈagyë Diosë yˈAnaˈamën diˈib mbäät nnijäˈäwëm? Ja ijxpajtën tëgëk pëky ja tiempë tmaytyaˈaky, mä yajniˈipy, yony ets mä pyëdëˈëky. Mä tyäˈädë artikulo yëˈë myaytyäˈägaampy mä pyëdëˈëky ja pëjtaˈaky. *
JESUS TKUWÄˈÄNÄˈÄNY
3. 1) ¿Ti tuun jäjtë ko nyajxy ja primer siiglë? 2) ¿Ti yajtëˈëwën yajkujäˈäyë mä Matewʉ 13:28, ets pënaty yajtëëwdë? (Ixë notë 2 diˈib miimp ok.)
3 Ko tsyondakyë siiglë 2, ta “kyëxeˈky [...] ja axëëkpë ujts”, tyäˈädë yëˈë yˈandijpy pënaty nayajnäjxëdëp ko tpanëjkxtë Kristë (Mat. 13:26). Ets mä siiglë 4, pënaty näjxtë extëmë axëkˈujts niˈigyë ojts myayëndë ets kyaj dyuˈunëty ja diˈib nëjkxtëp tsäjpotm. Nˈokjamyajtsëm ko mä ja ijxpajtën, ja tuumbëtëjk ojts tˈamdowdë permisë ja wyintsën parë twijxëˈëktët ja axëkˈujts (Mat. 13:28). * ¿Wiˈix yˈatsooy ja wintsën?
4. 1) ¿Wiˈix yˈatsooyë Jesus, ja Wintsën? 2) ¿Näˈä nyigëxëˈktë pënaty näjxtëp extëmë triigë?
4 Ko Jesus tmaytyakyë axëkˈujts, ta jyënany: “Nik mastuˈuttë. Waˈan dyony tiˈigyë axtë koonëm myukët ja triigë”. Tyäˈädë yëˈë xytyukˈijxëm ko desde mä primer siiglë axtë tyambäät, taaˈäjtpë Dios mëduumbë diˈib nëjkxtëp tsäjpotm, diˈib duˈun extëmë triigë. Tyäˈädë ja tyëyˈäjtëndëkë extëmë Jesus tˈanmääy ok ja yˈëxpëjkpëty: “Nyajpäätyëts mët miitsëty tuˈuk tuˈugë xëë axtë ko jyëjpkëxëdë tyäˈädë jukyˈäjtën” (Mat. 28:20, TNM). Pääty, pënaty nëjkxtëp tsäjpotm, yëˈë Jesus kuentˈäjtëdëp tuˈuk tuˈugë xëë axtë ko myinëdë kutëgoˈoyën. Per kom niˈigyë ojts myayëdë pënaty jënandëp ko tpanëjkxtë Kristë diˈib duˈun extëmë axëkˈujts, pääty, nuˈun ja tiempë nyajxy kyaj yajxon yajnijäˈäwë pënatyën näjxtë extëm ja triigë. Per ko nety kanäk jëmëjt yˈaktëgoyˈaty parë ja pëjtaˈaky myujktsondäˈägët, ta nyigëxëˈky pënatyën näjxtëp extëm ja triigë. ¿Wiˈix tyuun jyäjtë?
TUˈUGË KUGAJPXY DYAˈˈAWÄˈÄTSYË TUˈU
5. ¿Wiˈix yˈadëëy mä primer siiglë diˈib ojts yajnaskäjpxë mä Malaquías?
5 Kanäk siiglë nety tyëgoyˈaty parë Jesus tmaytyäˈägëdë tyäˈädë ijxpajn mä ja triigë etsë axëkˈujts, ko Jyobaa twinmäˈänymyooyë kugajpxy Malaquías parë tnaskäjpxët tijatyë nety tunan jatanëp mä ja ijxpajtën diˈibë Jesus pyëjtak (käjpxë Malaquías 3:1, 3). * Juan Yajnëbajtpë yëˈë diˈib yaˈˈawats ja nëˈë tuˈu (Mat. 11:10, 11). Ko yëˈë myiiny mä ja jëmëjt 29 të nety wyingony ja tiempë parë yajpayoˈoyët ja Israel gäjpn. Jesus yëˈë diˈib tuun myëmajtskpë kugajpxy, “ja diˈib yajnäjxypy ja kajpxyˈatypyë”. Yëˈë majtskˈok ojts dyajwäˈätsy ja templë diˈib Jerusalén, tëgok, ko dyajtsondaky ja tyuunk mä yˈëwaˈkxy kyäjpxwaˈkxy ets jatëgok ko ojts dyajkugëjxënë ja tyuunk (Mat. 21:12, 13; Fwank 2:14-17). Pääty, tuk tiempë ttukˈyoˈoy mä ojts tˈixy ets dyajwatsy.
6. 1) ¿Wiˈix yˈadëëy mëjwiin kajaa diˈib ojts yajnaskäjpxë mä Malaquías? 2) ¿Nuˈun ja tiempë ttukˈyoˈoy mä Jesus tˈijxy ja templë diˈib kyaj jäˈäy të tkojy? (Ixë notë 3.)
6 ¿Näˈä yˈadëëy mëjwiin kajaa diˈib ojts yajnaskäjpxë mä Malaquías? Mä nety yˈaktëgoyˈaty kanäk jëmëjt parë ttukjäˈtët 1914, ta Charles Russell ttuundë tuˈugë tuunk mëdë myëguˈuktëjk extëm ja Juan Yajnëbajtpë. Tyäˈädë tuunk jëjpˈambë, yëˈë parë nety dyajniwäˈätstëdë tëyˈäjtën diˈib yajpatp mä Biiblyë. Ja nety yajtijtë Diˈib yˈëxpëjktëbë Biiblyë, yëˈëjëty ojts ttukniˈˈixëdë jäˈäy wiˈixën nyikejy ko Jesus të xyjuuybyëtsëˈëmëm, ko kyaj jyaˈˈatyë ayoodakn ets näˈä jyëjpkëxäˈäny ja Tiempë diˈibë Dios të tpëjtaˈaky. Per oy duˈun jyanigëxëˈky ja tëyˈäjtën, jaˈäjt kanäägë relijyonk diˈib jënandë ko tpanëjkxtë Kristë. Pääty, tsojkëbë nety yaˈˈatsoojëmbitëdë tyäˈädë yajtëˈëwën: ¿pënë nety naxandëp extëm ja triigë? Parë yaˈˈatsoojëmbitët, ta Jesus tˈijxtsondaky mä jëmëjt 1914 wiˈixë nety yˈity ja templë diˈib kyaj jäˈäy të tkojy. Tyäˈädë tiempë mä tˈijxy ets dyajwatsy, ja tsyondaky 1914 axtë mä tsyondakyë jëmëjt 1919. *
JA TIEMPË MÄ YAˈIJXY ETS WYATSY
7. Ko Jesus myiiny 1914, ¿ti ojts tpääty?
7 Ko Jesus myiiny parë tˈixäˈäny, ¿ti ojts tpääty? Yëˈë tuk grupë jäˈäy Diˈib yˈëxpëjktëbë Biiblyë, diˈibë nety 30 jëmëjt kujk kyäjpxwäˈkxtë, dyajtundë jyot myëjää etsë myeeny syentääbë. * Seguurë ko Jesus agujk jotkujk nyayjäˈäwë mëdë yˈanklësëty ko tpattë tyäˈädë grupë, oyë nety niwaanë, mëkë nety tyanëdë, kyaj ja axëkˈujts ojts nyiyoombatëdë diˈibë Satanás jyaˈäjtypy. Per oy duˈun yajpattë, tsojkëbë nety “wyäˈätsët ja yˈuˈunk yˈënäˈkë Leví” (Mal. 3:2, 3; 1 Peed. 4:17). ¿Tiko?
8. ¿Tijaty tuun jäjtë ko nyajxyë jëmëjt 1914?
8 Ko ojts jyëjpkëjxnë 1914, ta nääk Diˈibë nety yˈëxpëjktëbë Biiblyë axëëk nyayjäˈäwëdë ko kyaj ojts nyëjkxtë tsäjpotm. Ets mä tyuˈuyoˈoy ja jëmëjt 1915 etsë 1916, ta niˈigyë kyujënajky ja tuunk mä yˈëwäˈkx kyäjpxwäˈkxtë ko ojts yajnibëdëˈëktë. Per mas niˈigyë ko ojts yˈoogyë Russell mä jëmëjt 1916, pes jaa mä jyaˈäjtyë jotmay mä Diosë kyäjpn. Nijëxtujkë nety diˈib wooyoˈoytyëp mä Watch Tower Bible and Tract Society, per nimäjtaxk kyaj tkupëjktë parë Rutherford tmënëjkxëdë jëjpˈamˈäjtën. Ta ojts tjayajnaywyäˈkxäˈänëdë nmëguˈukˈäjtëm, per agostë mä jëmëjt 1917, ta pyëtsëëmdë Betel. ¡Duˈunën wyatsy ja Diosë tyëjk! Nan ojts nääk ttsëˈëgëdë naxwinyëdë jäˈäy. Per ja Diˈib yˈëxpëjktëbë Biiblyë ojts tkupëktë ko Jesus myiiny parë dyajwatsy ets nyayajtëgäjtsëdë. Päätyë Jesus ojts dyajnaxy ja Dios mëduumbëty extëmë “triigë”. Per kyaj tkupëjky niˈamukë diˈibë nety nëgoobë nayajnäjxëdëp ko pyanëjkxëdë, duˈun diˈib mä ja naymyujkën ets duˈun diˈib yajpattëp tsäjptëgoty (Mal. 3:5; 2 Tim. 2:19). ¿Ti net ok tuun jäjtë? Parë nnijäˈäwëm, min nˈokˈijxëm jatëgok ja ijxpajtën diˈib mä ja triigë etsë axëkˈujts.
¿TI NETY TUNAN JATANËP KO TSYONDÄˈÄGËT JA TIEMPË MÄ MYUKÄˈÄNY JA PËJTAˈAKY?
9, 10. 1) ¿Ti nˈixäˈänëm mä myuky ja pëjtaˈaky? 2) ¿Ti jawyiin tuun jäjtë mä myuky ja pëjtaˈaky?
9 Jesus jyënany: “Ja pëjtaˈaky jaˈa yˈandijpy ko jäˈäy yajpayoˈoytyët” (Mat. 13:39). Tyäˈädë pëjtaˈaky ja myujktsondaky mä jëmëjt 1914. Min nˈokˈijxëm mëgoxk pëky ti tuun jäjtëp mä tyäˈädë tiempë diˈibë Jesus ojts tnaskäjpxë.
10 Tim jawyiin: tyuˈukmuky ja axëkˈujts. Jesus jyënany: “Taanëm ngaxtët es xyajpëdëˈëktët jawyiin ja axëëkpë ujts es xyˈawëëndët atsimyˈam”. Ko nyajxyë jëmëjt 1914, ta ja anklësëty dyajtuˈukmujktsondaktë pënaty nëgoobë nayajnäjxëdëp ko tpanëjkxtë Kristë, diˈib duˈun extëmë axëkˈujts, ets dyajnaywyäˈkxëdë mëdë Dios mëduumbë diˈib nëjkxtëp tsäjpotm (Mat. 13:30, 38, 41).
11. ¿Ti yajnigëxëˈkëdëp axtë tyambäät pënaty jyantsy pyanëjkxtëbë Kristë mët diˈib nëgoobë nayajnäjxëdëp?
11 Ko myujktsondaky ja pëjtaˈaky, ta mas niˈigyë nyigëxëˈkyë tyäˈädë majtskpë grupë (Diˈibʉ Jat. 18:1, 4). Mä jëmëjt 1919, ja nyigëxëˈky ko Mëj Babilonia të nety kyaˈay, tyäˈädë yëˈë yˈandijpy ko yˈawäˈätspëtsëëmdë pënatyë nety jyantsy pyanëjkxtëbë Kristë. Per ¿ti yajnigëxëˈkë ja diˈibë nety jyantsy pyanëjkxtëbë Kristë mët diˈibë nety nëgoobë nyayajnaxëdë? Ko ojts yˈëwäˈkx kyäjpxwäˈkxtë. Pënatyë nety myënëjkxtëbë jëjpˈamˈäjtën mä ja grupë Diˈib yˈëxpëjktëbë Biiblyë, ojts jyënäˈändë ko jëjpˈamë nety ets këˈëm ninëjkxëmë jäˈäy parë nimaytyakëmë Diosë yˈAnaˈamën. Extëm nˈokpëjtakëm, tadë foyetë To Whom the Work Is Entrusted, [Pënaty të yajtuknipëktë tyäˈädë Tuunk] diˈib pëtsëëm mä jëmëjt 1919, ojts tnigajpxy ko niˈamukë pënaty nëjkxtëp tsäjpotm yˈëwäˈkx kyäjpxwäˈkxtët tëjkmdëjkm. Tyäˈädë foyetë duˈun jyënany: “Mëjwiin kajaa yaˈixyë tyäˈädë tuunk, per yëˈë jyaˈäjtypyë nWintsënˈäjtëm ets mbäät nduˈunëm mëdë myëjää, miitsëty mnikëjxmˈäjttëbë tyäˈädë tuunk parë xytyunët”. ¿Wiˈix yˈatsoowdë? Mä rebistë diˈib tyam yaˈixyˈäjtp Diˈib Xytyukˈawäˈänëm diˈib pëtsëëm 1922, jyënany ko desde mä tadë tiempë dyajmëjwindëjkëdë tyuunk mä yˈëwäˈkx kyäjpxwäˈkxtë Diˈib yˈëxpëjktëbë Biiblyë. Ko waanë tiempë nyajxy, ta pënaty jyantsy pyanëjkxtëbë Kristë yajtukˈëxkäjptë ko kyäjpxwäˈkxtë tëjkmdëjkm, duˈun extëm yajtuny axtë tyambäät.
12. ¿Desde näˈä tyuˈukmujktsondaky ja triigë?
12 Myëmajtsk: tyuˈukmuky ja triigë. Jesus ojts ttukˈaneˈemy ja yˈanklësëty: “Xypyëjkëˈëktët ja triigë mä ja ndriigë tëjkëts” (Mat. 13:30). Desde 1919 pënaty nëjkxtëp tsäjpotm të tyuˈukmuky mä Diosë kyäjpn diˈib të wyaˈatsy. Pënaty nëjkxtëp tsäjpotm diˈib akjukyˈäjttëp yä Naxwiiny mä kyajëjptëgoynyëmë tyäˈädë jukyˈäjtën, jaanëm tyuˈukmukäˈändë ko nety tˈaxäjëdë ja kyumäˈäyën jam tsäjpotm (Dan. 7:18, 22, 27).
13. ¿Wiˈix jyënaˈanyë Diˈibʉ Jatanʉp 18:7 mä wiˈix tyam jyënaˈany diˈib näjxp extëmë kujenytyoˈoxy, o Mëj Babilonia, ets pënaty naynyigäjpxëdëp ko tpanëjkxtë Kristë?
13 Myëdëgëëk: jyëˈëy yäˈäxtët ets tˈagaˈpmuktë yˈää tyëts. ¿Ti tunan jatanëp ko ja anklësëty tˈatsuumuktët ja axëkˈujts? Ko yajmaytyaˈaky wiˈix yajpäättë pënaty duˈun extëm ja axëkˈujts, ta Jesus jyënany: “Jyëˈëy yäˈäxtët es nyaytyëtskäädëdët mët ja ayoˈon” (Mat. 13:42). ¿Tyamën duˈun tyuny jyatyëty? Kyaj. Pes pënaty naynyigäjpxëdëp ko tpanëjkxtë Kristë, diˈib näjxp extëmë kujenytyoˈoxy o Mëj Babilonia, duˈunyëm jyënäˈändë: “Tyääts nˈuˈunyë extëm tuˈugë reynë. Kyajts ëj nguˈekytyoˈoxyëty, ninäˈäts ngaˈˈayowët” (Diˈibʉ Jat. 18:7). Duˈunë duˈun, pënaty naynyigäjpxëdëp ko tpanëjkxtë Kristë, duˈunyëm nyayjawëdë ko tmëdattë mëjää ets axtë nyaynyigäjpxëdë ko yˈuˈunyëdë “extëm tuˈugë reynë” mä tukëˈëyë gobiernëtëjk. Pënaty tyam näjxtëp extëm ja axëkˈujts, kyaj jyëˈëy yäˈäxtë, niˈigyë nyaymyëjkugäjpxëdë. Per tim tsojk tyëgatsäˈäny.
[Dibujë diˈib mä pajina 19]
14. 1) ¿Näˈä ets tiko tˈagaˈpmukäˈändë yˈää tyëts pënatyë nety të nyaynyigäjpxëdë ko tpanëjkxtë Kristë? 2) ¿Wiˈix tyuˈugyë extëm tyam yajjaygyukë Matewʉ 13:42 mëdë Salmo 112:10? (Ixë notë 5 diˈib miimp ok.)
14 Ko nety të kyutëgooytyaˈay tukëˈëyë ja relijyonk diˈib kyaj tyëyˈäjtënëty mä ja mëk ayoˈon, ta net ja jyaˈayëty tˈëxtäˈäyäˈändë pën kuwäˈänëdëp, per kyaj tpäädäˈändë ja lugäär mä nyayuˈutsëdët (Luk. 23:30; Diˈibʉ Jat. 6:15-17). Ko tpëktëdë kuentë ko kyaj mbäät tkugaˈaktë kutëgoˈoyën, ta jyëˈëyäˈän yäˈäxäˈändë mët ko kyaj tnijawëyäˈändë ti tyundëp ets mëdë awäˈänˈat tˈagaˈpmukäˈändë yˈää tyëts. Duˈun extëmë Jesus ojts tnaskäjpxë, ja “jäˈäyëty jyëˈëy yäˈäxtët” mä tadë tiempë (Mat. 24:30; Diˈibʉ Jat. 1:7). *
15. ¿Wiˈix jyatäˈäny ja axëkˈujts, ets näˈä duˈun jyatäˈäny?
15 Myëmäjtaxkpë: yajpëjtäˈäktë mä ja jëën ornë. ¿Wiˈix jyatäˈäny ja axëkˈujts diˈib të yaˈˈawëˈënmuky? “Yajpëjtäˈägäˈändë mä ja jëën jornë” ets yëˈë duˈun tunanëdëbë anklësëty (Mat. 13:42). Tyäˈädë yëˈë yˈandijpy ko niˈamukë kyutëgoyäˈändë. Pääty, pënatyë nety të ttukˈitëdë relijyonk diˈib kyaj tyëyˈäjtënëty, nëjkxëp kyutëgoytyë mä Armajedon ko nety jyëjpkëxy ja mëk ayoˈon (Mal. 4:1).
16, 17. 1) ¿Ti diˈib ok aktunan akjatanëp diˈibë Jesus ojts tnigajpxy mä ja ijxpajtën? 2) ¿Tiko njënäˈänëm ko apenënëm yˈadëwäˈäny?
16 Myëmëgoxkpë: Pënaty jukyˈäjttëp extëmë Dios ttseky tyëˈkxäˈän jyäjjäˈändë. Jesus duˈun ojts yˈakjënäˈäny: “Es net diˈibaty jikyˈäjttëp extëmë Dios ttseky, dëˈën nëjx jyäj tyëˈxtë extëm ja xëë mä yëˈë Dios Teetyë kyutujkën” (Mat. 13:43). ¿Näˈä ets mä duˈun tyunäˈäny jyatäˈänyëty? Diˈibë Jesus ojts tnaskäjpxë apenënëm tyunäˈäny jyatäˈänyëty. Ets jam yˈadëwäˈäny tsäjpotm, kyaj yääjëty Naxwiiny. * Min nˈokˈijxëm majtsk pëky tiko duˈun njënäˈänëm.
17 Tim jawyiin ko dyajtëy näˈä. Jesus jyënany: “Es net diˈibaty jikyˈäjttëp extëmë Dios ttseky,dëˈën nëjx jyäj tyëˈxtë extëm ja xëë”. Ko jyënaˈany “es net”, yëˈë yˈandijpy ti netyë Jesus të tnigajpxy ko jyënany “yajpëjtäˈägäˈändë mä ja jëën jornë” diˈibë nety duˈun extëm ja axëkˈujts. Tyäˈädë ja duˈun tyunäˈäny jyatäˈänyëty ko nety jyëjpkëjxnë ja mëk ayoˈon. Pääty, jaanëm tyëˈkxäˈän jyäjjäˈändë mä ja tiempë myiny kyëdaˈaky pënaty nëjkxtëp tsäjpotm. Ets diˈib myëmajtsk yajtëëw mä, Jesus jyënany ko tyëˈkxäˈän jyäjjäˈändë mä ja “Dios Teetyë kyutujkën”. ¿Ti tyäˈädë yˈandijpy? Ko niˈamukë pënaty akjukyˈäjttëp yä Naxwiiny diˈib nëjkxtëp tsäjpotm të nety yajwinˈijxtääynyëdë ko nety të nyaxy tuk pëky ja mëk ayoˈon. Ta net extëm ojts tnaskäjpxë Jesus, tyuˈukmukäˈändë jam tsäjpotm (Mat. 24:31). Jamën mä tyëˈkxäˈän jyäjjäˈändë mä ja “Dios Teetyë kyutujkën”, ets ko netyë Armajedon të nyaxy, ta net yajpäädäˈändë extëm ja pëjkpë mä ja “Borreeguˈunk pyëkäˈäny” (Diˈibʉ Jat. 19:6-9).
¿WIˈIX NDUKˈOYˈÄJTËM?
18, 19. ¿Wiˈix këˈëm ndukˈoyˈäjtëm ko njaygyujkëm ja ijxpajtën diˈibë Jesus pyëjtak mä ja triigë ets ja axëkˈujts?
18 ¿Wiˈix këˈëm ndukˈoyˈäjtëm ko net të nnijäˈäwëmë tyäˈädë ijxpajtën? Min nˈokˈijxëm tëgëk pëky. Tim jawyiin, yajkëktëjkëbë jaygyujkën. Ets xytyukˈijxëm tiko Jyobaa tnasˈixë axëkˈäjtën. Yëˈë myëmaˈkxtujkypyë jäˈäy diˈib të ttuknibëjtäägë dyajkutëgoyaˈany parë dyajpëtsëmy diˈib pyaˈˈayowaampy diˈib duˈun extëmë triigë (Rom. 9:22-24). * Myëmajtsk pëky, niˈigyë dyajkëktëkë ja mëbëjkën. Kom niˈigyë wyingoonˈadëˈëtsy ja kutëgoˈoyën, pääty niˈigyë tsyiptunäˈändë ja nmëtsipˈäjtëm, “per kyaj myadäˈägäˈändë” (käjpxë Jeremías 1:19). * Duˈun extëmë Jyobaa tkuwäˈänyë jäˈäyëty diˈib duˈun extëmë triigë nuˈun kujkë xëë tiempë nyaxy, nanduˈunë Jyobaa mët yëˈëgyëjxmë Jesus etsë yˈanklësëty yajpäädäˈändë mët ëtsäjtëm “tuˈuk tuˈugë xëë” axtë ko jyäˈtët (Mat. 28:20).
19 Ets myëdëgëk pëky, xypyudëjkëm ja ijxpajtën parë njaygyujkëm pënën duˈun näjxp extëm ja triigë. ¿Tiko jyëjpˈamëty? Yëˈko pën nnijäˈäwëm pënën ja Dios mëduumbëty diˈib näjxtëp extëm ja triigë, net mbäät njaygyujkëm pënën ja tuumbë “diˈibë kuwijy es tyiimpy ti wyintsën tsyejpy” diˈibë Jesus myaytyak ko tijaty ojts tnaskäjpxë mä ja tiempë jyëjpkëxanë (Mat. 24:45). Mä ja artikulo diˈib ak miimp majtsk yaˈˈatsoojëmbitäˈäny.
^ parr. 2 Malaquías 3:1, 3: “¡Ixtë!, ngexyëtsë ngugajpxy, ets yëˈë diˈib ja nëˈë tuˈu yaˈˈawäˈätsaampy nwinduuyëts. Ets tsojkˈam myinäˈäny mä ja tyemplë ja Wintsënë tëyˈäjtënbë, ja diˈib miitsëty mˈëxtääytyëp, ets ja diˈib yajnäjxypy ja kajpxyˈatypyë diˈib mdukxondaktëp. ¡Ixtë! Minäämbë duˈun, të jyënaˈanyë Jyobaa diˈib myëdäjtypyë tsyiptuumbëty. Ets ta nyaxwaatsäˈäny extëm diˈib yajwatsypyë platë ets dyajwäˈätsäˈänyë Leví yˈuˈunk yˈënäˈk; ets duˈun dyajwäˈätsäˈändë extëmë oorë ets extëmë platë ets yëˈëjëty duˈunë Jyobaa yˈixäˈänëdë, jäˈäyëty diˈib yäjktëp tuˈugë wintsëˈkënë tëyˈäjtën mëëtpë”.
^ parr. 3 Notë 1 (parrafo 2): Parë xyjamyatsët tijaty yajmaytyakp mä tyäˈädë ijxpajtën, käjpxë La Atalaya 15 äämbë marsë 2010, pajina 19 axtë 21, parrafo 1 axtë 9 mä jyënaˈany “Los justos resplandecerán tan brillantemente como el sol”.
^ parr. 5 Notë 2 (parrafo 3): Ja apostëlëty të nety yˈoˈktääynyë ets pënaty nëjkxtëp tsäjpotm diˈib akwëˈëmdëp yä Naxwiiny, kyaj nety yëˈë yaˈixyˈattë extëm ja mëduumbë, yëˈë duˈunë nety nyaxtë extëm ja triigë, pääty njënäˈänëm ko tyäˈädë mëduumbë, yëˈë ja anklësëty. Ets ok, ojtsë Jesus tnigajpxy ko pënaty yajmujktëp ja axëkˈujts, yëˈë ja anklësëty (Mat. 13:39).
^ parr. 6 Notë 3 (parrafo 6): Tyäˈädë yëˈë diˈib yajkäjpxˈoˈoyëp extëm tyam yajjaygyukë. Pes duˈunë nety nwinmäˈäyëm ko Jesus myiiny parë ojts tˈixy ja templë diˈib kyaj jäˈäy të tkojy mä jëmëjt 1918.
^ parr. 7 Notë 4 (parrafo 7): Mä jëmëjt 1910 axtë 1914, ja Diˈib yˈëxpëjktëbë Biiblyë ojts dyajwäˈkxtë naa taxk miyongë liibrë ets 200 miyonk naxyë trataadë etsë foyetë.
^ parr. 14 Notë 5 (parrafo 14): Tyäˈädë yëˈë diˈib yajkäjpxˈoˈoyëp extëm tyam yajjaygyukë Matewʉ 13:42. Të yˈokˈyajnigäjpxpë mä ëxpëjkpajn ko pënaty nayajnäjxëdëp ko tpanëjkxtë Kristë, kanäk jëmëjtën kujk jyëˈëy yäˈäxtë ets tˈagaˈpmuktë yˈää tyëts mët ko tmëkjawëdë ko “ja Diosë myëduumbëty” yajnidëˈkxëdë extëm “ja kaˈoybyë myëduumbëty” (Mat. 13:38). Per oy ko nbëjkëmë kuentë ko jyënaˈany tˈagaˈpmuktë yˈää tyëts nan ja yajmaytyaˈaky ko myinyë kutëgoˈoyën (Sal. 112:10).
^ parr. 16 Notë 6 (parrafo 16): Daniel 12:3 jyënaˈany: “Pënaty myëdäjttëbë jaygyujkën [diˈib nëjkxtëp tsäjpotm] tyëˈkxäˈän jyäjjäˈändë extëm ti tyëˈkxy jyajy kajabäät”. Mientrës yajpäättë yä Naxwiiny “tyëˈkx jyäjtë” ko kyäjpxwäˈkxtë. Perë Matewʉ 13:43 tnigajpxy ko jamën tsäjpotm tyëˈkxäˈän jyäjjäˈändë mä ja Diosë yˈAnaˈamën. Duˈunë nety yajjaygyukë ko tyäˈädë majtskpë tekstë ak yëˈë yˈandijpy ko yˈëwäˈkx kyäjpxwäˈkxtë.
^ parr. 18 Notë 7 (parrafo 18): Ixë liibrë Acerquémonos a Jehová, pajina 288 ets 289.
^ parr. 18 Jeremías 1:19: “Ets seguurë ko mnibëdëˈëgäˈänyëty, per kyaj mëmadäˈägäˈänyëty, yëˈko: Ëjts mët mijts nyajpääty, duˈun jyënaˈanyë Jyobaa, parë nyaˈˈawäˈätspëtsëmäˈäny”.
