1. (a) Faire enn resumé lor parabole di-blé ek mauvais l’herbe. (b) Ki l’explication Jésus ti donné?

 DAN enn parabole ki Jésus ti donné lor Royaume Bondié, li decrire enn planteur ki seme bann bon lagrin di-blé ek enn lennmi ki seme bann mauvais l’herbe parmi sa bann bon lagrin-la. Sa bann mauvais l’herbe-la couvert bann di-blé, mais planteur-la dire so bann esclave “laisse toulé-deux pousse ensam ziska recolte.” Pendant lepok recolte, pou detruire sa bann mauvais l’herbe-la ek pou ramasse di-blé. C’est Jésus li-mem ki ti explik sa parabole-la. (Lire Matthieu 13:24-30, 37-43.) Ki sa parabole-la montré? (Guette l’encadré “Di-blé ek Mauvais l’Herbe.”)

2. (a) Ki bann l’evenement ki arrivé dan karo sa planteur-la representé? (b) Ki partie dan sa parabole-la nou pou examiné?

² Bann l’evenement ki arrivé dan karo sa planteur-la montré couma ek kan Jésus ti pou rassemblé parmi l’humanité, tou seki represente di-blé, setadir bann Chretien oint ki pou regne avek li dan so Royaume. Ti commence seme bann lagrin di-blé jour la Pentecôte l’an 33 Nou Lepok. Rassemblement tou bann Chretien oint pou fini kan bann oint ki ankor lor later pendant lafin sa systeme-la pou scellé dan enn fason definitif ek lerla zot pou al dan le ciel. (Mat. 24:31; Rév. 7:1-4) Pareil couma enn dimoune ki la-haut lor enn montagne trouve tou seki autour li, alors sa parabole-la aide nou pou comprend pli bien bann l’evenement ki ti pou arrivé pendant enn periode apepré 2,000 an. Couma sa parabole-la faire nou comprend bann l’evenement ki arrivé en rapport avek Royaume Bondié? Sa parabole-la decrire enn lepok kot seme bann lagrin, bann lagrin-la poussé, ek recolté zot. Sa lartik-la pou mette l’accent surtout lor lepok recolte. a

3. (a) Ki ti arrivé apré premier siecle? (b) Dapré Matthieu 13:28, ki question ti posé, ek kisannla ti pose sa question-la? (Guette note aussi.)

³ Au commencement deuxieme siecle Nou Lepok,  “bann mauvais l’herbe . . . ti parette” kan ti commence ena bann soi-disant Chretien dan le monde. (Mat. 13:26) Vers quatrieme siecle, bann Chretien ki comparé ar mauvais l’herbe ti pli beaucoup ki bann Chretien oint. Rappel ki dan sa parabole-la, bann esclave ti demann zot maitre permission pou deracine bann mauvais l’herbe. b (Mat. 13:28) Ki maitre-la ti dire zot?

4. (a) Reponse ki le Maitre Jésus ti donné, montré ki kitsoz? (b) Kan eski ti commence reconette bann Chretien ki comparé ar di-blé?

⁴ Concernant di-blé ek mauvais l’herbe, Jésus ti dire: “Laisse toulé-deux pousse ensam ziska recolte.” Sa l’ordre-la montré ki depuis premier siecle ziska nou lepok, finn touletan ena bann Chretien oint ki comparé ar di-blé lor later. Jésus ti confirme sa par seki li ti dire so bann disciple plitar: “Mo avek zot toulé-jour ziska lafin sa systeme-la.” (Mat. 28:20) Alors, Jésus ti pou protege bann Chretien oint toulé-jour ziska lepok lafin. Selman, parski bann Chretien ki comparé ar bann mauvais l’herbe ti couvert sa bann Chretien oint-la, nou pa koné exactement kisannla ki ti comparé ar di-blé pendant sa longue periode le temps-la. Mais, plusieurs dizaine l’année avant ki recolte commencé, ti kapav commence reconette kisannla ki di-blé. Couma?

5. Couma prophetie Malaki ti accompli dan premier siecle?

⁵ Plusieurs siecle avant ki Jésus ti koz lor parabole di-blé ek mauvais l’herbe, Jéhovah ti inspire prophete Malaki pou annonce bann l’evenement ki trouve dan sa parabole-la. (Lire Malaki 3:1-4.) Jean le Baptiste ti sa ‘messager ki ti ouvert chemin-la.’ (Mat. 11:10, 11) Kan li ti vini en l’an 29 Nou Lepok, ler jugement pou nation  Israël ti bien pré. Jésus ti deuxieme messager ki mentionné dan Malaki. Li ti purifié temple Jérusalem deux fois​—premier fois, au commencement so ministere ek deuxieme fois, vers lafin so ministere. (Mat. 21:12, 13; Jean 2:14-17) Alors, purification ki Jésus ti faire ti implik enn periode le temps.

6. (a) Ki pli grand l’accomplissement prophetie Malaki finn ena? (b) Pendant ki periode le temps Jésus ti inspecté temple spirituel? (Guette note aussi.)

⁶ Ki pli grand l’accomplissement prophetie Malaki finn ena? Pendant bann dizaine l’année avant 1914, C.T. Russell ek so bann compagnon ki ti proche ar li, ti faire enn travail pareil couma Jean le Baptiste. Sa travail bien important ki zot ti faire-la c’est retabli bann verité ki ena dan la Bible. Bann Etudiant la Bible ti enseigne vrai signification la ranson, ti denonce fausse l’enseignement lor l’enfer difé, ek ti annoncé ki le Temps Bann Nation ti pré pou fini. Selman, ti ena plusieurs groupe religieux ki ti pretann ki zot bann Chretien. Alors, ti bizin reponn enn question bien important: Kisannla parmi sa bann groupe-la ti comparé ar di-blé? Pou reponn sa question-la, Jésus ti commence inspecté temple spirituel en 1914. Sa inspection ek sa purification-la ti duré pendant enn periode le temps​—depuis 1914 ziska commencement l’année 1919. c

7. Kan Jésus ti commence so inspection en 1914, ki li ti trouvé?

⁷ Kan Jésus ti commence so inspection, ki li ti trouvé? Pendant plis ki 30 an, enn ti groupe Etudiant la Bible ki zelé, ti donne zot la force ek zot di-bien pou faire enn grand travail predication. d Surement Jésus ek bann ange ti bien content pou  trouvé ki bann mauvais l’herbe ki Satan ti planté pa ti reussi touffe sa tigit pié di-blé ki ti solide-la! Mais kan-mem, li ti necessaire pou “purifié bann garson Lévi,” setadir bann Chretien oint. (Mal. 3:2, 3; 1 Pierre 4:17) Kifer?

8. Ki ti arrivé apré 1914?

⁸ Vers lafin 1914, certain Etudiant la Bible ti decouragé parski zot pa finn al dan le ciel. En 1915 ek 1916, predication ti ralenti a cause l’opposition ki zot ti gagné avek bann dimoune ki ti en dehors l’organisation. Pli pire ankor, apré lamor Frere Russell en Octobre 1916, zot ti gagne l’opposition avek bann ki ti dan l’organisation-mem. Quatre parmi sept directeur Watch Tower Bible and Tract Society pa ti d’accord ki Frere Rutherford vinn president. Zot ti essaye faire enn division parmi bann frere, mais en Août 1917, zot ti quitte Béthel​—sa ti vrai-mem enn purification! Ek aussi, certain Etudiant la Bible ti cedé parski zot ti peur bann dimoune. Selman, la plupart ti bien reagir ar purification ki Jésus ti faire ek zot ti faire bann changement necessaire. Alors, Jésus ti juge zot couma bann vrai Chretien ki comparé ar di-blé. Mais li ti rejette bann soi-disant Chretien, parmi ti ena tou bann ki ti forme partie dan bann religion la Chretienté. (Mal. 3:5; 2 Tim. 2:19) Ki ti arrivé apré? Pou nou koné, anou retourne ar parabole di-blé ek mauvais l’herbe.

9, 10. (a) Ki nou pou examiné asterla concernant lepok recolte? (b) Ki ti arrivé d’abord dan lepok recolte?

⁹ Jésus ti dire: “Recolte c’est conclusion enn systeme.” (Mat. 13:39) Lepok recolte ti commencé en 1914. Nou pou examine cinq l’evenement ki Jésus ti annoncé pou arrivé dan sa lepok-la.

¹⁰ Premierement, ramasse bann mauvais l’herbe. Jésus dire: “Dan lepok recolte mo pou dire bann ki faire recolte: D’abord ramasse bann mauvais l’herbe ek attache zot par paquet.” Apré 1914, bann ange ti commence “ramasse” bann Chretien ki ti comparé ar mauvais l’herbe ek ti separe zot ar bann Chretien oint, “bann garson royaume Bondié.”​—Mat. 13:30, 38, 41.

11. Ziska zordi, ki kitsoz montré difference ki ena entre bann vrai Chretien ek bann soi-disant Chretien?

¹¹ A mesure ki recolte ti pé contigné, ti kapav trouve bien difference ki ti ena entre sa deux groupe-la. (Rév. 18:1, 4) En 1919, li ti clair ki Babylone la Grande ti’nn tombé. Ki kitsoz surtout ti montré difference ki ena entre bann vrai Chretien ek bann soi-disant Chretien? L’activité predication. Bann ki ti prend la tête parmi bann Etudiant la Bible ti commence mette l’accent lor l’importance pou preche personnellement Royaume Bondié. Par exemple, brochure À qui l’oeuvre est confiée (en Anglais), ki ti publié en 1919, ti encourage tou bann Chretien oint pou preche lakaz par lakaz. Sa brochure-la ti dire: “Sa travail-la parette bien grand, mais c’est travail le Seigneur, ek grace a so la force nou pou kapav faire li. Zot ena privilege pou participe ladan.” Couma zot ti reagir? Dapré La Tour de Garde 1922, depuis sa lepok-la, bann Etudiant la Bible ti augmente zot l’activité dan predication. Predication lakaz par lakaz pa ti tardé pou vinn enn signe ki ti identifié sa bann Chretien fidele-la​—zordi aussi pareil.

12. Depuis kan finn commence ramasse bann ki comparé ar di-blé?

¹² Deuxiemement, ramasse di-blé. Jésus donne sa l’ordre-la so bann ange: “Ramasse di-blé dan mo grenier.” (Mat. 13:30) Depuis 1919, finn commence rassemblé bann Chretien oint dan congregation Chretien ki’nn retabli. Pou bann Chretien oint ki pou ankor vivant kan lafin sa systeme-la arrivé, pou ena enn rassemblement final kan zot pou gagne zot recompense dan le ciel.​—Dan. 7:18, 22, 27.

13. Couma Révélation 18:7 decrire l’attitude ki sa prostitué-la, setadir Babylone la Grande ena zordi, parmi ena aussi la Chretienté?

 ¹³ Troisiemement, ploré ek grince lé-dent. Apré ki bann ange fini attache bann mauvais l’herbe par paquet, ki arrivé? Concernant condition bann ki comparé ar mauvais l’herbe, Jésus dire: “La-mem kot zot pou ploré ek zot pou grince lé-dent.” (Mat. 13:42) Eski sa pé arrivé asterla? Non. Zordi, la Chretienté, enn partie dan sa prostitué-la, ankor pé dire: “Mo pé assize couma enn la reine, ek mo pa enn veuve, ek jamais mo pa pou en deuil.” (Rév. 18:7) Oui, la Chretienté pensé ki li ena enn grand position, li mem pretann ki li “pé assize couma enn la reine” lor tou bann dirigeant politik. Dan nou lepok, bann ki represente bann mauvais l’herbe, pé faire vantard, zot pa pé ploré. Mais bientot sa pou changé.

14. (a) Kan ek kifer bann soi-disant Chretien ‘pou grince zot lé-dent’? (b) Couma nouveau fason ki nou comprend Matthieu 13:42 li en accord avek pensée ki trouve dan Psaume 112:10? (Guette note.)

¹⁴ Pendant la grande tribulation, apré ki tou bann fausse religion ki’nn bien etabli pou detruire, bann ki ti forme partie dan sa bann religion-la, pou rod protection mais zot pa pou trouve okenn place pou cachiette. (Luc 23:30; Rév. 6:15-17) Lerla, kan zot pou realisé ki zot pa pou kapav sapé, zot pou ploré tellement zot pou desesperé ek zot pou ‘grince zot lé-dent’ avek colere. Pareil couma Jésus annoncé dan so prophetie lor la grande tribulation, dan sa moment terrible-la, zot “pou tape zot l’estomac ar chagrin.” e​—Mat. 24:30; Rév. 1:7.

15. Ki pou arrive bann mauvais l’herbe, ek kan sa l’evenement-la pou arrivé?

¹⁵ Quatriemement, jette zot dan four difé. Ki pou arrive sa bann paquet mauvais l’herbe-la? Bann ange “pou jette zot dan four difé.” (Mat. 13:42) Sa vedir ki zot pou detruire net. Alors, sa bann ki ti forme partie dan bann fausse religion-la, pou detruire pendant dernier partie la grande tribulation, kan pou ena Har-Maguédôn.​—Mal. 4:1.

16, 17. (a) Ki dernier l’evenement Jésus mentionné dan so parabole? (b) Kifer nou dire ki sa l’evenement-la pou realisé dan lavenir?

¹⁶ Cinquiemement, brillé bien fort. A lafin so prophetie Jésus dire: “Dan sa lepok-la, bann juste pou brillé bien fort pareil couma soleil, dan royaume zot Papa.” (Mat. 13:43) Kan ek ki coté sa pou arrivé? C’est dan lavenir ki sa bann parole-la pou realisé. Jésus ti annonce enn l’evenement ki pou arrivé dan le ciel, pa enn l’evenement ki pé arrivé asterla lor later. f Anou examine deux raison kifer nou dire sa.

¹⁷ Premierement, dapré Jésus “kan” sa pou arrivé? Jésus ti dire: “Dan sa lepok-la, bann juste pou brillé.” Pena doute ki  l’expression “dan sa lepok-la” faire reference ar l’evenement ki Jésus ti fek mentionné, setadir kan pou ‘jette bann mauvais l’herbe dan four difé.’ Sa pou arrivé dan dernier partie la grande tribulation. Sa vedir ki c’est aussi dan lavenir ki bann Chretien oint pou “brillé bien fort.” Deuxiemement, “ki coté” sa pou arrivé? Jésus ti dire ki bann juste pou ‘brillé dan le royaume.’ Ki sa vedir? Tou bann Chretien oint ki fidele ek ki ankor lor later apré ki premier partie la grande tribulation inn passé, pou’nn fini scellé dan enn fason definitif. Lerla, pareil couma Jésus ti montré dan so prophetie lor la grande tribulation, zot pou rassemblé dan le ciel. (Mat. 24:31) Laba, zot pou brillé “dan royaume zot Papa,” ek enn tipé apré la guerre Har-Maguédôn, zot pou ena la joie pou participe dan “mariage l’Agneau” en tant ki nouvelle marié.​—Rév. 19:6-9.

18, 19. Dan ki fason nou gagne personnellement bann bienfait kan nou comprend parabole Jésus lor di-blé ek mauvais l’herbe?

¹⁸ Ki bienfait nou gagné personnellement ar seki nou’nn aprann lor sa parabole-la? Anou guette trois bienfait. Premierement, sa faire nou comprend pli bien certain kitsoz. Sa parabole-la donne enn raison important kifer Jéhovah permette mechanceté. Li “tolere bann recipient ki merite so colere” pou Li prepare “bann recipient ki merite so misericorde”​—bann Chretien ki comparé ar di-blé. g (Rom. 9:22-24) Deuxiemement, sa fortifié nou confiance. A mesure ki lafin pé kosté, nou bann lennmi pou plis combatte kont nou, “mais zot pa pou pli fort” ki nou. (Lire Jérémie 1:19.) Pareil couma Jéhovah finn protege bann Chretien ki comparé ar di-blé a travers bann siecle, alors nou Papa ki dan le ciel, par l’intermediaire Jésus ek bann ange, pou avek nou “toulé-jour.”​—Mat. 28:20.

¹⁹ Troisiemement, sa parabole-la faire nou koné kisannla bann Chretien ki comparé ar di-blé. Kifer li bien important nou konn sa? Parski kan nou koné kisannla sa bann Chretien-la, sa pou aide nou pou trouve reponse enn question ki Jésus ti posé dan so prophetie concernant bann dernier jour. Li ti demandé: “Kisannla ki vrai-mem l’esclave fidele et avisé?” (Mat. 24:45) Deux prochain lartik pou reponn sa question-la.