1. (a) Ngonga eyele lyiilya nomau. (b) Jesus okwa li a yelitha ngiini eityo lyalyo?

LIMWE lyomomayele gaJesus gUukwaniilwa, otali popi kombinga yomunepya ngoka a kunu ombuto ombwanawa yiilya nokombinga yomutondi ngoka a kunu omau mokati kombuto ndjoka. Omau oga koko ge vule iilya, ihe omunepya okwa lombwele aapiya ye ye ge ‘ethe ga koke mumwe niilya sigo esiku lyeteyo.’ Pethimbo lyeteyo, omau oga hanagulwa po, niilya oya gongelwa. Jesus okwa li a yelitha eyele ndyoka ye mwene. (Lesha Mateus 13:24-30, 37-43.) Eyele ndika otali holola shike mbela? (Tala oshimpungu “Iilya nOmau.”)

2. (a) Iiningwanima mbyoka ya ningwa mepya lyomunepya otayi thaneke shike? (b) Otatu ka kundathana oshitopolwa shini sheyele lyomunepya?

² Iiningwanima yomepya lyomunepya ngoka, otayi thaneke kutya ongiini nuunake Jesus a li ta ka gongela ongundu yiilya, ano Aakriste aagwayekwa mboka taya zi kombanda yevi ya ka pangele pamwe naye mUukwaniilwa we. Okukuna okwa li kwa tameke pOpentekoste 33 E.N. Okugongelwa otaku ka hula uuna aagwayekwa mboka taya ka kala ye li momwenyo sigo opehulilo lyonkalelo ndjika yiinima ya ndhindhilikwa lwahugunina opo nduno taya falwa megulu. (Mat. 24:31; Eh. 7:1-4) Ngaashi owala omuntu ha kala e wete ashihe shoka shi li momudhingoloko gwe uuna e li kondundu, sha faathana, eyele ndika otali tu tseyithile iinima mbyoka ya li tayi ka ningwa momukokomoko gwomimvo 2 000 lwaampo. Pauvoko lyetu, ehumokomeho lini twa ndhindhilika lya pambathana nUukwaniilwa? Eyele otali hokolola kombinga yethimbo lyokukuna, lyokukoka, nolyokuteya. Oshitopolwa shika otashi ka ukitha eitulomo unene tuu kethimbo lyeteyo. *

3. (a) Onkalo yini ya li ya holoka konima yethelemumvo lyotango? (b) Epulo lini lya li lya pulwa muMateus 13:28, nokulye? (Tala wo iitsa yopehulilo lyoshitopolwa.)

³ Lwopetameko lyethelemumvo etiyali E.N., “omau oga  holoka” sho Aakriste yiifundja ya kala yi iwetikile mepya ndyoka li li uuyuni. (Mat. 13:26) Nolwomethelemumvo etine, Aakriste mboka ya fa omau oya li yi indjipala noonkondo ye vule Aakriste aagwayekwa. Dhimbulukwa kutya meyele moka, aapiya oya li ya pula epitikilo komuwa gwawo ya vudhe mo omau. * (Mat. 13:28) Omuwa gwawo okwa li e ya yamukula ngiini?

4. (a) Eyamukulo lyOmuwa, Jesus, olya li lya holola shike? (b) Aakriste mboka ya fa iilya oya li ya tameke okukala yi iwetikile uunake?

⁴ Sho Jesus a popi kombinga yiilya nomau, okwa ti: “Etheni, ga koke mumwe niilya sigo esiku lyeteyo.” Elombwelo ndika otali holola kutya okuza methelemumvo lyotango sigo okunena, kombanda yevi okwa kala aluhe ku na Aakriste aagwayekwa yontumba mboka ya fa iilya. Okuthika pehulithodhiladhilo ndyoka okwa kolekwa kwaashoka Jesus a li a lombwele aalongwa ye a ti: ‘Otandi kala pamwe nane omasiku agehe sigo ehulilo lyuuyuni.’ (Mateus 28:20) Onkee ano, Aakriste aagwayekwa oya li taya ka kala ya gamenwa kuJesus omasiku agehe sigo opethimbo lyehulilo. Molwaashoka oya li ya vulika kAakriste mboka ya fa omau, katu shi lela kutya oolye ya li mongundu yiilya momukokomoko gwethimbo alihe ndyoka ele. Ihe oomvula omilongo manga eteyo inaali tameka, ongundu yiilya oya kala yi iwetikile. Shoka osha li she ende ngiini?

5. Ehunganeko lyaMaleaki olya li lya gwanithwa ngiini methelemumvo lyotango?

⁵ Omathelemumvo manga Jesus inaa popya eyele lyiilya nomau, Jehova okwa li a nwetha mo omupolofeti Maleaki a hunganeke iiningwanima tayi tsu kumwe neyele lyaJesus. (Lesha Maleaki 3:1-4.) Johannes Omuninginithi oye a li ‘omutumwa ngoka a li o opaleke ondjila.’ (Mat. 11:10, 11) Sho Johannes e ya mo 29 E.N., ethimbo lyepangulo lyoshigwana shaIsraeli olya li lya hedha popepi. Jesus oye a li omutumwa omutiyali. Okwa  opaleke lwaali otempeli muJerusalem, lwotango opetameko lyuukalele we nolutiyali olwopehulilo lyuukalele we. (Mat. 21:12, 13; Joh. 2:14-17) Onkee ano, iilonga yaJesus yokwoopaleka oya li tayi ka kutha ethimbo ele.

6. (a) Egwanitho enene lyehunganeko lyaMaleaki olini? (b) Opethimbo lini Jesus a li a konakona otempeli yopambepo? (Tala wo iitsa yopehulilo lyoshitopolwa.)

 ⁶ Egwanitho enene lyehunganeko lyaMaleaki olini? Momukokomoko gwoomvula omilongo ndhoka dha fala sigo omo 1914, C.T. Russell pamwe naayakuli ye oya li ya longo oshilonga sha fa shaJohannes Omuninginithi. Oshilonga shoka sha simana osha li sha kwatela mo okuyelitha ooshili dhOmbiimbeli. Aakonakonimbiimbeli oya li ya longo oshili kombinga yekuliloyambo lyaKristus, ya yaneke pomutenya elongo lyomulilo gwoheli, noyu uvitha ehulilo lyOmathimbo gAapagani ndyoka lya li tali ya. Ihe natango, opwa kala oongundu odhindjidhindji dhomalongelokalunga ndhoka dha li tadhi ti kutya dho aalanduli yaKristus. Onkee ano epulo lya kwata miiti olya li lya pumbwa okuyamukulwa: Oolye yomoongundu ndhoka ya li iilya? Opo epulo ndyoka li yamukulwe, Jesus okwa li a tameke okukonakona otempeli yopambepo mo 1914. Oshilonga shoka shokukonakona nokwoopaleka osha li sha kutha ethimbo, ano okuza mo 1914 sigo olwopetameko lyo 1919. *

7. Sho Jesus a li a tameke iilonga ye yokukonakona mo 1914, okwa mono shike?

⁷ Sho Jesus a li a tameke okukonakona otempeli yopambepo, okwa li a mono shike? Okwa li a mono okangundu kAakonakonimbiimbeli aalaadhi mboka ya li ya longitha oonkondo dhawo nomaliko gawo ya ninge iikonga yokuuvitha moomvula dhi vule po 30. * Jesus naayengeli kaya li tuu ya nyanyukwa sho ya mono kutya iilya mbyoka ya kola nonando iishona, inayi thiminikwa  komau gaSatana! Natango, opwa li pwa holoka ompumbwe ‘yokuyoga aana aamati yaLevi’, mboka ye li aagwayekwa. (Mal. 3:2, 3, OB-1954; 1 Pet. 4:17) Omolwashike mbela?

8. Ehumokomeho lini lya li lya ningwa konima yo 1914?

⁸ Lwopehulilo lyo 1914, Aakonakonimbiimbeli yamwe oya li ya teka omukumo molwaashoka inaaya ya megulu. Momukokomoko gwo 1915 no 1916, iilonga yokuuvitha oya li ya shuna pevi omolwomapataneko ngoka ga li tage ya zile pondje yehangano. Shoka sha li oshiwinayi unene, omapataneko oga li ga zi meni lyehangano konima yeso lyomumwatate Russell muKotoba mo 1916. Yane yomaawiliki yaheyali yo-Watch Tower Bible and Tract Society oya li ya tukulile oshipotha etokolo ndyoka kutya omumwatate Rutherford oye na kwatele komeho. Oya li ya kambadhala okweeta etopoko mokati kaamwatate, ihe muAuguste mo 1917, oya li ya thigi po oBetel, shoka kasha li tuu eyopaleko! Yamwe yomAakonakonimbiimbeli oya li wo ya yi omolwuumbanda wokutila aantu. Nonando oongawo, oyendji oya li ya taamba ko nehalo ewanawa oshilonga shaJesus shokwoopaleka, e ta ya ningi omalunduluko ngoka ga li ga pumbiwa. Okuza mpoka, Jesus okwe ya taamba ko ye li Aakriste yashili ye li iilya, ihe okwe ekelehi Aakriste yiifundja ayehe, mwa kwatelwa ayehe mboka ye li moongeleka dhomalongelokalunga giifundja gopaKriste. (Mal. 3:5; 2 Tim. 2:19) Oshike sha li sha ningwa po konima yaashoka? Opo tu mone eyamukulo, natu ka kundathaneni ishewe eyele lyiilya nomau.

9, 10. (a) Ngashingeyi otatu ka kundathana shike kombinga yethimbo lyeteyo? (b) Oshike sha li sha ningwa tango pethimbo lyeteyo?

⁹ Jesus okwa ti: “Eteyo olyo ehulilo lyuuyuni.” (Mat. 13:39) Eteyo ndyoka olya tamekele mo 1914. Otatu ka kundathana kombinga yomahumokomeho ngoka Jesus a li a hunganeke kutya otaga ka ningwa pethimbo ndyoka.

¹⁰ Lyotango, okugongela omau. Jesus okwa ti: “Mesiku lyeteyo otandi lombwele aateyi: Gongeleni tango omau, ne mu mange iihampi.” Konima yo 1914, aayengeli oya li ya tameke ‘okugongela’ Aakriste mboka ya fa omau sho ye ya yoolola ko kaagwayekwa mboka ye li ‘aana yuukwaniilwa.’ — Mat. 13:30, 38, 41.

11. Sigo okunena, oshike sha yoolola ko Aakriste yashili kwaamboka yiifundja?

¹¹ Sho iilonga yokugongela tayi humu komeho, opwa kala eyooloko enene pokati koongundu mbali. (Eh. 18:1, 4) Sho kwa ka thikwa mo 1919, osha li sha yela mo kutya Babiloni Oshinene okwa teka po. Oshike unene tuu sha yoolola ko Aakriste yashili kwaamboka yiifundja? Iilonga yokuuvitha. Mboka ya li ta ya kwatele komeho mokati kAakonakonimbiimbeli oya li ya tameke okutsa omuthindo kutya osha simana opo kehe gumwe a kuthe ombinga miilonga yokuuvitha Uukwaniilwa. Pashiholelwa, okafo To Whom the Work Is Entrusted, (Kwaamboka yi inekelelwa oshilonga), ka li ka nyanyangidhwa mo 1919, oka li ka ladhipike Aakriste aagwayekwa ayehe yu uvithe egumbo negumbo. Oka ti: “Oshilonga otashi monika oshinene noonkondo, ihe oshOmuwa, notatu ke shi longa koonkondo dhe. Omu na uuthembahenda wokukutha ombinga musho.” Aakonakonimbiimbeli oya li yi inyenge ngiini? Oshungolangelo yomo 1922 oya ti kutya okuza kesiku ndyoka, Aakonakonimbiimbeli oya li ya tamununa mo iilonga yawo yokuuvitha. Omathimbo hamale, okuuvitha egumbo negumbo okwa li kwa ningi endhindhiliko lyAakriste mboka aadhiginini ngaashi shi li sigo okunena.

12. Ongundu yiilya oya li ya tameke okugongelwa uunake?

¹² Etiyali, okugongela iilya. Jesus okwa lombwele aayengeli ye a ti: ‘Indeni mu ka gongele iilya miigandhi yandje.’ (Mat. 13:30, yelekanitha NW.) Okuza mo 1919, aagwayekwa oya kala nokugongelwa megongalo lyopaKriste ndyoka lya totululwa. KAakriste aagwayekwa mboka taya kala nomwenyo pehulilo lyonkalelo ndjika yiinima, okugongelwa kwahugunina otaku ka ningwa  uuna ya pewa ondjambi yawo megulu. — Dan. 7:18, 22, 27.

13. Ehololo 18:7 otali holola shike kombinga yiikala yohonda, nenge tu tye yaBabiloni Oshinene kunena, mwa kwatelwa Omalongelokalunga giifundja gopaKriste?

¹³ Etitatu, elilagano neikokoto. Konima sho aayengeli ya manga omau miihampi, oshike sha ningwa po? Jesus okwa popi kombinga yonkalo yongundu yomau a ti: ‘Moka otamu ka kala elilagano neikokoto lyomayego.’ (Mat. 13:42) Mbela shoka otashi ningwa ngashingeyi? Aawe. Kunena, Omalongelokalunga giifundja gopaKriste, ngoka ge li oshitopolwa shohonda, otagi ilombwele taga ti: “Otandi kuutumba mpaka, omukwaniilwa omukuluntu. Kandi shi omuselekadhi noitandi ka adhika nando koluhodhi!” (Eh. 18:7) Eeno, Omalongelokalunga giifundja gopaKriste ogu uvite ogo taga ti pii, nokuli gi itala ko ‘ga kuutumba ongomukwaniilwakiintu’ kombanda yongundu yaawiliki yopapolotika. Mongashingeyi, mboka ya fa omau otayi itadha ihe itaya lilagana. Ihe shoka oshi li pokulunduluka.

14. (a) Uunake nomolwashike Aakriste yiifundja taye ki ‘ikokota komayego’? (b) Ongiini euvoko lyetu epe lyaMateus 13:42 tali tsu kumwe nedhiladhilo ndyoka lyi li mEpisalomi 112:10? (Tala iitsa yopehulilo lyoshitopolwa.)

¹⁴ Konima yehanagulo lyomalongelokalunga agehe giifundja pethimbo lyuudhigu uunene, aalanduli yawo aakulu otaya ka konga uuholameno, ihe itaya ka mona ehala lyoku ya gamena. (Luk. 23:30; Eh. 6:15-17) Nuuna ya dhimbulula kutya kaye na mpoka taya vulu okufadhukila po ehanagulo, otaya ka lilagana ‘nokwiikokota komayego’ kondjahi. Ngaashi Jesus a hunganeke mehunganeko lye kombinga yuudhigu uunene, pethimbo ndyoka lyoshipyu, “otaa ka lilagana.” *— Mat. 24:30; Eh. 1:7.

15. Oshike tashi ka ningilwa omau, nuunake shoka tashi ka ningwa?

¹⁵ Etine, okuumbilwa meziko lya hanya. Oshike tashi ka ningilwa iihampi yomau? Aayengeli ‘otaye ke yi umbila meziko lya hanya.’ (Mat. 13:42) Ndyoka olyo ehanagulo lyaaluhe. Okuza mpoka, iilyo mbyoka iikulu yomalongelokalunga giifundja otayi ka hanagulwa po poshitopolwa shahugunina shuudhigu uunene, ano puArmagedon. — Mal. 4:1.

16, 17. (a) Oshiningwanima shahugunina shini Jesus a tumbula meyele lye? (b) Omolwashike twa thiki pehulithodhiladhilo kutya ehunganeko ndyoka otali ka gwanithwa monakuyiwa?

¹⁶ Etitano, okwaadhima. Jesus okwa hulitha ehunganeko lye a ti: ‘Pethimbo mpoka aayuuki otaa ka adhima ngetango muukwaniilwa waHe.’ (Mat. 13:43, yelekanitha NW.) Shika otashi ka ningilwa peni, nuunake? Oohapu ndhika otadhi ka gwanitha monakuyiwa. Ehunganeko lyaJesus olya hunganeke shoka tashi ka ningwa megulu monakuwiya, ihe haashoka tashi ningwa ngashingeyi kombanda yevi. * Natu tale komatompelo gaali ngoka ge tu ningitha tu thike pehulithodhiladhilo ndika.

¹⁷ Lyotango, epulo kutya “uunake.” Jesus okwa  ti: ‘Pethimbo mpoka aayuuki otaa ka adhima.’ Uutumbulilo ‘pethimbo mpoka’ otawu ulike koshiningwanima shoka Jesus opo owala a adhika e shi popi, ano ‘okuumbila omau meziko lya hanya.’ Shoka tashi ningwa poshitopolwa shahugunina shuudhigu uunene. Onkee ano, ‘okwaadhima’ kwaagwayekwa oku na okuningwa pethimbo ndyoka lyomonakuyiwa wo. Etiyali, epulo kutya “openi.” Jesus okwa ti kutya aayuuki otaya ka ‘adhima muukwaniilwa.’ Shoka osha hala okutya shike? Shoka otashi ti kutya aagwayekwa ayehe aadhiginini mboka ye li natango kombanda yevi ngele oshitopolwa shotango shuudhigu uunene sha hulu otaya ka kala nale ya mona endhindhiliko lyawo lyahugunina. Opo nduno, ngaashi shu ulikwa mehunganeko lyaJesus kombinga yuudhigu uunene, otaya ka gongelwa ya ye megulu. (Mat. 24:31) Moka otaya ka adhima ‘muukwaniilwa waHe,’ nanziya konima yolugodhi lwaArmagedon, otaya ka kala omufuko ‘mohango yOnzigona.’— Eh. 19:6-9.

18, 19. Omomikalo dhini euvoko li na ko nasha neyele lyaJesus lyiilya nomau tali tu etele uuwanawa paumwene?

¹⁸ Uuwanawa wuni hatu mono paumwene meuvoko lyomuule lyeyele ndika? Natu tale komikalo ndatu. Omukalo gwotango, ohali tu kwathele tu mone euvoko lyomuule. Eyele ndyoka otali holola etompelo lya simana kutya omolwashike Jehova e etha uukolokoshi wu kale po. Okwi ‘idhidhimikile iiyuma yondjahi’ opo a longekidhe ‘iiyuma yesilohenda,’ ano ongundu yiilya. * (Rom. 9:22-24, OB-1954) Omukalo omutiyali, ohaku koleke einekelo lyetu. Sho ehulilo tali hedha popepi, aatondi yetu otaye ke tu kondjitha noonkondo, ‘ihe itaye ke tu sinda.’ (Lesha Jeremia 1:19.) Ngaashi owala Jehova a kala nokugamena ongundu yiilya omimvo nomimvo, Tate yetu gwomegulu ota ka kala pamwe natse ta longitha Jesus naayengeli ‘omasiku agehe’ ge li komeho. — Mat. 28:20.

¹⁹ Omukalo omutitatu, eyele ndyoka otali tu kwathele tu dhimbulule mo ongundu yiilya. Omolwashike shoka sha simanenena? Okukala tu shi kutya oolye Aakriste mboka ya fa iilya, osha simanenena opo tu mone eyamukulo kepulo ndyoka Jesus a li a pula mehunganeko lye ndyoka tali gwanithwa methimbo ele kombinga yomasiku gahugunina. Okwa li a pula a ti: ‘Olye ano omupiya omudhiginini nomunandunge?’ (Mat. 24:45, yelekanitha NW.) Iitopolwa mbyoka iyali tayi landula ko otayi ka gandja eyamukulo tali mbilipaleke kepulo ndyoka.