1. (a) Fakamaama e fakataiaga he tau saito mo e tau titania. (e) Fakamaama fēfē e Iesu e kakano he fakataiaga?

 TAHA he tau fakataiaga ha Iesu hagaao ke he Kautu ne fakamaama e tagata gahua fonua ne gana e tau saito ti gana foki he fī e tau titania he fonua taha ia. Ne kamata e tau titania ke tupu ki luga he tau saito, ka e tala age e tagata gahua fonua ke he tau fekafekau haana ke “toka ai ke tupuua ai pihia, ato hoko ke he heleheleaga.” He heleheleaga, ko e tau titania kua moumou ka e fakaputu ai e tau saito. Ne fakamaama e Iesu e kakano he fakataiaga. (Totou Mataio 13:24-30, 37-43.) Ko e heigoa he fakataiaga nei kua fakaako ki a tautolu? (Kikite e fakafonua “Ko e Tau Saito mo e Tau Titania.”)

2. (a) Ko e heigoa e tau mena tutupu kua fakamaama he fakataiaga he tau saito mo e tau titania? (e) Ko e heigoa e vala he fakataiaga ka fakatutala he vala tala nei?

² Ko e tau mena tutupu he fakataiaga nei ne fakakite e puhala mo e magaaho ka fakapotopoto e Iesu mai he tau tagata e matakau katoa he tau Kerisiano fakauku ka pule mo ia ke he Kautu haana. Ko e matakau, ko lautolu haia he vahega saito ne hukui he tau saito. Ne kamata a Iesu ke gana e tega nei he Penetekoso he tau 33. Ko e fakapotopoto maiaga he vahega saito to fakakatoatoa ai ka moua e lautolu kua momoui he lalolagi he fakaotiaga he fakatokaaga nei e fakamailoga fakahiku ha lautolu ti o hake ke he lagi. (Mata. 24:31; Fakakite. 7:1-4) Ka haia e tagata ne onoono atu he mouga, maeke a ia ke kitia e tau mena oti ne viko takai ia ia. He puhala taha, ko e fakataiaga he tau saito mo e tau titania kua lagomatai a tautolu ke maama mitaki e tau mena ka tutupu he magahala he kavi ke he 2,000 tau. Ko e tau mena tutupu ko e magaaho ne gana e tau tega akau, tutupu he tau tega akau, mo e helehele he tau saito. To matapatu e fakatutala he vala tala nei ke he magaaho he heleheleaga. a

3. (a) Ko e heigoa ne tupu he mole e senetenari fakamua? (e) He fakamau he Mataio 13:28, ko e heigoa e hūhū ne hūhū, ti hūhū e hai? (Kikite foki e tala he matahiku.)

³ Kavi ke he tau 100, kua “kitia ai e tau titania.” Ko lautolu nei ko e tau Kerisiano fakavai. (Mata. 13:26) Kavi ke he tau 300, ne loga atu e “tau titania” ke he tau Kerisiano fakauku. He fakataiaga, ne ole e tau fekafekau ke he iki ko e maeke nakai a lautolu ke huo e tau titania he fonua. b (Mata. 13:28) Ko e heigoa ne talahau he iki?

4. (a) Ko e heigoa ne fakakite he tali ha Iesu? (e) Magaaho fe ne maeke ke kitia e “tau saito”?

⁴ Ko e Iki ko Iesu, ne pehē hagaao ke he tau saito mo e tau titania: “Toka ai ke tupuua ai pihia, ato hoko ke he heleheleaga.” Kua talahau he poakiaga nei ki a tautolu mai he senetenari fakamua ato hoko mai ke he vahā nei, kua fai tagata tumau ne eke mo “tau saito,” ko e tau Kerisiano fakauku. Ne tala age foki a Iesu ke he tau tutaki haana: “To fakalataha au mo mutolu ke he tau aho oti, ato hoko ni ke he fakaotiaga he lalolagi.” (Mata. 28:20) To puipui e Iesu e tau Kerisiano fakauku he tau aho oti ato hoko ke he magaaho he fakaotiaga. Ka e tali mai he tau titania, po ke tau Kerisiano fakavai ne tupu ki luga he tau saito, ne nakai iloa tonu e tautolu ko hai he vala he vahega saito he tau tau oti ia. Ka e kavi ke he 40 e tau ato hoko e heleheleaga, ne liu foki kitia e “tau saito.” Hoko fēfē e mena ia?

5. Fakamooli fēfē e perofetaaga ha Malaki he senetenari fakamua?

⁵ Leva lahi ato foaki e Iesu e fakataiaga he tau saito mo e tau titania, ne omoomoi e Iehova a Malaki ke talahau tuai falu he tau mena tutupu pihia. (Totou Malaki 3:1-4.) Ko Ioane ko e Papatiso e ‘fekafekau ne hafagi e hala.’ (Mata. 11:10, 11) Ko e motu ha Isaraela to fakafili mafiti he mole e hoko mai ha Ioane  he tau 29. Ko Iesu e ogo ke uaaki ne talahau he perofetaaga ha Malaki. Ne lagaua e fakameā e ia e faituga i Ierusalema. Ko e magaaho fakamua ke he kamataaga he fekafekauaga haana, mo e ke uaaki ke he matahiku he fekafekauaga haana. (Mata. 21:12, 13; Ioane 2:14-17) Ti ko e fakameā he faituga ia ne fai magaaho ne hoko ai.

6. (a) Ko e heigoa e fakamooliaga lahi mahaki he perofetaaga ha Malaki? (e) He magaaho fe ne tivi e Iesu e faituga fakaagaaga? (Kikite foki e tala he matahiku.)

⁶ Ko e heigoa e fakamooliaga lahi mahaki he perofetaaga ha Malaki? He loga e tau ato hoko e 1914, ko C. T. Russell mo e tau matakainaga ne gahua mo ia ne taute e gahua tuga ha Ioane ko e Papatiso. Ne fakaako e lautolu e Tohi Tapu ke maama e mena ne fakaako mooli i ai. Ma e fakatai, ne fakaako ai e kakano mooli he poa lukutoto he Keriso, he fakakite ko e mena nakai fai afi tote, ti fakailoa e magaaho ka fakaoti e tau Vahā he Tau Motu Kehe. Loga atu foki e tau matakau lotu ne talahau kua eke mo tau tutaki he Keriso. Ka ko hai he tau matakau nei ko e tau saito? Ke tali e hūhū ia, ne kamata a Iesu ke tivi e faituga fakaagaaga he 1914. Ne gahua a Iesu ke tivi mo e fakameā e faituga ia ne matutaki ai mai he 1914 ke oti he mataulu he vala he 1919. c

7. Ko e heigoa ne moua e Iesu he kamata e tivi haana he 1914?

⁷ He kamata e tivi ha Iesu, ko e heigoa ne moua e ia? Ko e matakau tote ne fakamakutu he tau Tagata Fakaako Tohi Tapu ne fakaaoga e tau malolō mo e tau tupe ha lautolu ke fakapuloa e tala mitaki ke he molea e 30 e tau. d Ko Iesu mo e tau agelu ne liga fiafia lahi ke kitia kua tokogahoa ne fai vala he vahega saito ne tumau e malolō ti nakai apitia he tau titania. Ka ko e  “fanau a Levi,” ko lautolu ne fakauku, kua lata ke fakameā. (Mala. 3:2, 3; 1 Pete. 4:17) Ko e ha?

8. Ko e heigoa ne tupu he mole e 1914?

⁸ Tata ke he matahiku he 1914, ne loto lolelole e falu he tau Tagata Fakaako Tohi Tapu ha kua nakai o hake a lautolu ke he lagi. He 1915 mo e 1916, ko e totokoaga he tau tagata i fafo he fakatokatokaaga ne fakamanou e gahua fakamatala. Mole e mate he Matakainaga ko Russell ia Oketopa 1916, ko e tau tagata i loto he fakatokatokaaga ne kamata ke totoko a lautolu ne takitaki. Tokofā he tau takitaki tokofitu he Watch Tower Bible and Tract Society ne totoko he mogo ne fifili e Matakainaga ko Rutherford ke takitaki. Ne lali a lautolu ke fakatupu e feveheveheaki, ka e ia Aokuso 1917, ne toka e lautolu e Peteli. Ko e taha puhala anei ne fakameā e fakatokatokaaga. Ha ko e matakutaku tagata foki, falu he tau Tagata Fakaako Tohi Tapu ne oti e fekafekau ke he Atua. Ka e tokologa he tau Tagata Faaako Tohi Tapu ne makai ke taute e tau hikiaga ke meā ki mua he Atua. Ti fakafili e Iesu a lautolu ko e tau Kerisiano mooli he tau saito. Ne tiaki e ia e tau Kerisiano fakavai oti he fakapotopotoaga mo lautolu he tau tapu he Kerisitenitome. (Mala. 3:5; 2 Timo. 2:19) Ko e heigoa ne tupu mogoia? Ke iloa, to liu a tautolu ke fakatutala ke he fakataiaga he tau saito mo e tau titania.

9, 10. (a) Ko e heigoa ha tautolu ka fakatutala mogonei? (e) Ko e heigoa ne tupu fakamua he magaaho heleheleaga?

⁹ Pehē a Iesu: “Ko e heleheleaga, ko e fakaotiaga haia he lalolagi.” (Mata. 13:39) Ko e magaaho ia he heleheleaga ne kamata he 1914. To fakatutala a tautolu mogonei ke he lima e mena tutupu ne talahau e Iesu to tutupu he magahala he magaaho helehele.

¹⁰ Fakamua, fakaputu e tau titania. Pehē a Iesu: “Ka hoko atu ke he vaha ke helehele ai, to tala age ai e au kia lautolu ka helehele, Kia huo mai fakamua e mutolu e tau titania, mo e fuhi e mutolu ke he tau fuhi.” He mole e 1914, ne kamata e tau agelu ke “fuhi” e tau titania, po ke tau Kerisiano fakavai, he vevehe a lautolu mai he “fanau [fakauku] he kautu.”​​—Mata. 13:30, 38, 41.

11. Ko e heigoa e gahua pauaki ati kehe e tau Kerisiano mooli mai he tau Kerisiano fakavai?

¹¹ He holo ki mua e gahua fuhi po ke fakapotopoto, ne mukamuka lahi ke kitia e kehekehe he tau saito mo e tau titania. (Fakakite. 18:1, 4) He 1919, ne maaliali kua veli a Papelonia Lahi. Ko e heigoa pauaki ati kehe e tau Kerisiano mooli mai he tau Kerisiano fakavai? Ko e gahua fakamatala. Ko lautolu ne takitaki he tau Tagata Fakaako Tohi Tapu ne kamata ke fakamaaliali ko lautolu oti he fakapotopotoaga kua lata ke fakamatala hagaao ke he Kautu. Ma e fakatai, ko e tohi tote ne higoa To Whom the Work Is Entrusted ne taute fakailoa he 1919. Ne tomatoma ai ke he tau Kerisiano fakauku oti ke fakamatala mai he taha fale ke he taha fale. Ne fakamaama ai foki pete ne liga nakai maeke ke taute e tau gahua oti, to foaki he Iki ke he tau tagata e malolō ke taute ai. Ti pehē e tohi tote: “Moua e koe e lilifu ke fai vala i ai.” Ko e heigoa ne taute he tau Tagata Fakaako Tohi Tapu? Ko e Watch Tower he 1922 ne pehē kua lahi mahaki e malolō ha lautolu mogonei ke he ha lautolu a gahua fakamatala. Nakai leva ko e gahua ne talahaua lahi e tau Kerisiano fakamooli ki ai, ti pihia agaia.

12. Tali mai he magaaho fe kua fakaputu e tau saito?

¹² Uaaki, ko e fakaputu e tau saito. Ne poaki e Iesu ke he tau agelu haana ke kamata e fakaputu e tau saito ke he fale saito. (Mata. 13:30) Tali mai he 1919, ko lautolu ne fakauku ne fakapotopoto ke he fakapotopotoaga Kerisiano meā. Ka e kua e tau Kerisiano fakauku ia hane momoui he fakaotiaga he lalolagi nei? Ko e fakapotopotoaga fakahiku ha lautolu ka hoko he magaaho ka o hake a lautolu ke he lagi.​​—Tani. 7:18, 22, 27.

13. Ko e heigoa ne fakaako e tautolu mai he Fakakiteaga 18:7 hagaao ke he aga he fifine fakataka ko Papelonia Lahi, mo e putoia a Kerisitenitome?

 ¹³ Toluaki, ko e tagi aue mo e konoi. He mole e fuhi he tau agelu e tau titania, ko e heigoa ne tupu? He tutala hagaao ke he tuaga he “tau titania,” ne pehē a Iesu: “Ha ha i ai e tagi aue mo e konoi he tau nifo.” (Mata. 13:42) Tupu kia e mena ia mogo tonu nei? Nakai. Ko Kerisitenitome ko e vala he fifine fakataka ne fakamaama he Fakakiteaga veveheaga 18. He vahā nei foki, ne pehē a Kerisitenitome hagaao ki a ia: “Kua nofo nai au ko e patuiki fifine nakai ko e takape au, ti nakai iloa e au ha fakatutuku.” (Fakakite. 18:7) Kua logona hifo agaia a ia kua pule ti lali foki ke eke mo “patuiki fifine” mo e pule ke he tau takitaki fakapolitika. Ti ko e tau Kerisiano fakavai ne hukui he tau titania kua fakatokoluga agaia he vahā nei. Nakaila kamata a lautolu ke tagi aue. Ka e to hiki mafiti e mena ia.

14. (a) Magaaho fe he tau Kerisiano fakavai ka ‘konoi ha lautolu a tau nifo’? Ko e ha? (e) Maeke fēfē ha tautolu a fakamaamaaga foou he Mataio 13:42 ke tatai mo e talahauaga ia Salamo 112:10? (Kikite tala he matahiku.)

¹⁴ He mole e moumou he lotu fakavai, ko lautolu kua fa muitua ke he tau lotu ia to fehola kehe i ai. Ka e to nakai maeke a lautolu ke moua e maluaga ke fakamumuli ai. (Luka 23:30; Fakakite. 6:15-17) He mailoga e lautolu kua nakai hao a lautolu, to tagi aue a lautolu ke he tuaga ha lautolu mo e to konoi e tau nifo ha lautolu ha kua ita lahi a lautolu. He kitia e perofetaaga ha Iesu ke he matematekelea lahi, ko lautolu he mogoia to “tagi tatuki foki e tau faoa oti.” e​​—Mata. 24:30; Fakakite. 1:7.

15. Ko e heigoa ka tupu ke he tau titania? Magaaho fe ka tupu e mena nei?

¹⁵ Fāaki, ko e tolo ke he gutuumu. Ko e heigoa ka tupu ke he tau fuhi titania? Ko e tau agelu ka “liti a lautolu ki loto he gutuumu kaka.” (Mata. 13:42) Kakano e mena nei to moumou tukulagi a lautolu. Ti ko lautolu kua fakalataha ke he fakaakoaga he tau fakatokatokaaga ia he lotu fakavai ka moumou he magahala he vala fakahiku he matematekelea lahi i Amaketo.​​—Mala. 4:1.

16, 17. (a) Ko e heigoa e mena tupu fakahiku ne talahau tuai e Iesu he fakataiaga haana? (e) Iloa fēfē e tautolu to hoko e mena nei he vahā anoiha?

¹⁶ Limaaki, ko e kikila lahi. Ne fakahiku e Iesu e perofetaaga haana he pehē: “Ati kikila ai a lautolu kua tututonu tuga ne la ke he kautu he Matua ha lautolu.” (Mata. 13:43) Magaaho fe mo e i fe ka kikila lahi a lautolu? Ko e vala nei he perofetaaga to fakamooli he vahā anoiha. Mo e to fakamooli he lagi, nakai he lalolagi. f To fakatutala a tautolu mogonei ke he ua e kakano ke maama e perofetaaga he puhala nei.

¹⁷ Fakamua, magaaho fe ka tupu e mena nei? Pehē a Iesu: “Ati [po ke, he magaaho  ia] kikila ai a lautolu kua tututonu.” Maaliali ai, ko e talahauaga “ati” ne matutaki ke he mena ne tupu ne fakamaama laia e Iesu, kakano ko e magaaho ka ‘liti ki loto he gutuumu kaka’ e tau titania. To tupu e mena ia he magahala he vala fakahiku he matematekelea lahi. Ti ko lautolu ne fakauku kua lata ke “kikila ai . . . tuga ne la” he magaaho anoiha foki. Uaaki, to tupu i fe e mena nei? Pehē a Iesu ko lautolu ne tututonu to kikila “ke he kautu.” Ko e heigoa e kakano he mena ia? Ko lautolu oti ne fakauku kua fakamooli ne haia agaia he lalolagi he mole e vala fakamua he matematekelea lahi to fitā he moua e lautolu e fakamailoga fakahiku. To fakapotopoto mogoia a lautolu ke he lagi, tuga ne talahau tuai e Iesu. (Mata. 24:31) I luga he lagi to kikila a lautolu “ke he kautu he Matua ha lautolu.” To fai vala a lautolu he kitofaitane fiafia ha Iesu he “taonaga he Punua mamoe.” Hoko e mena nei he nakai leva e mole he tauaga i Amaketo.​​—Fakakite. 19:6-9.

18, 19. He tau puhala fe kua aoga ki a tautolu mai he maama e fakataiaga ha Iesu ke he tau saito mo e tau titania?

¹⁸ Aoga fēfē a tautolu mai he mena ne fakaako e tautolu hagaao ke he fakataiaga nei? Tolu la e puhala. Fakamua, kua lagomatai he fakataiaga a tautolu ke maama e kakano ne nakaila moumou e Iehova e tau tagata kelea. Leva tuai e fakauka a ia ki a lautolu ke tauteute e “tau kapiniu he fakaalofa,” ko lautolu ne tua fakamooli ne hukui he tau saito. g (Roma 9:22-24) Uaaki, kua foaki ki a tautolu e mauokafua lahi. He tata lahi mai e fakaotiaga, to tau fakalahi mai e tau fī ha tautolu. “Ka e nakai kautu a lautolu.” (Totou Ieremia 1:19.) Puipui e Iehova e vahega saito ke he loga e tau tau. Ko e ha tautolu a Matua he lagi, fakalataha mo Iesu mo e tau agelu, to ha ha ai mo tautolu ke he “tau aho oti” ato hoko e fakaotiaga.​​—Mata. 28:20.

¹⁹ Toluaki, ko e fakataiaga kua lagomatai a tautolu ke iloa a lautolu kua hukui he tau saito. Ko e ha ne aoga lahi e mena ia? Ha kua lata a tautolu ke iloa ko hai e tau saito ka manako a tautolu ke iloa e tali ke he taha hūhū foki ne hūhū e Iesu he perofetaaga haana hagaao ke he tau aho fakamui. Ne hūhū a ia: “Ko hai foki e fekafekau fakamoli mo e loto matala?” (Mata. 24:45) Ko e tau vala tala ua ka mui mai to foaki ki a tautolu e tali maaliali ke he hūhū ia.