1. (a) Hlalosa ka boripana seswantšho sa korong le mefoka. (b) Jesu o ile a hlalosa bjang seo se bolelwago ke seswantšho seo?

SE SENGWE sa diswantšho tša Jesu tša Mmušo se bolela ka molemi yo a bjalago peu e botse ya korong gomme gwa tla lenaba leo le bjalago peu ya mefoka gare ga peu yeo e botse. Mefoka yeo e gola ka bontši go feta korong, eupša molemi o laela bahlanka ba gagwe gore ba “di [lese] di gole gotee go fihla punong.” Nakong ya puno, mefoka e a tumolwa gomme korong e a kgoboketšwa. Jesu ka boyena o hlalositše seswantšho seo. (Bala Mateo 13:24-30, 37-43.) Ke’ng seo se utollwago ke papišo ye? (Bona tšhate e rego: “Korong le Mefoka.”)

2. (a) Ke eng seo se swantšhetšwago ke ditiragalo tšeo di diregago tšhemong ya molemi? (b) Re tlo hlahloba karolo efe ya papišo ye?

² Ditiragalo tšeo di diregago tšhemong ya molemi yoo di bontšha nako yeo Jesu a tlago go kgoboketša sehlopha ka moka sa bao ba emelago korong, e lego Bakriste ba tloditšwego bao ba tlago go buša le yena Mmušong wa gagwe; e bile di bontšha kamoo a tlago go dira seo ka gona. Go bjala moo go thomile ka Pentekoste ya 33 C.E. Go kgoboketšwa moo go tla fetšwa ge batlotšwa bao ba tla bego ba phela mafelelong a tshepedišo ye ba swaiwa la mafelelo gomme ba rotošetšwa legodimong. (Mat. 24:31; Kut. 7:1-4) Go etša ge motho a eme godimo ga thaba moo a ka bonago botse bja naga, papišo ye e re bontšha gabotse ditiragalo tšeo di bego di tla direga ka nako ya nywaga e ka bago 2 000. Go ya kamoo re bonago ka gona, ke ditiragalo dife tša mabapi le Mmušo tšeo re di lemogago? Papišo ye e hlalosa nako ya go bjala, ya go gola le ya go buna. Sehlogo se se tla bolela kudu ka nako ya puno. *

3. (a) Ke boemo bofe bjoo bo ilego bja tšwelela ka morago ga lekgolo la pele la nywaga? (b) Go ya ka Mateo 13:28, ke potšišo efe yeo e ilego ya rotoga, gomme e ile ya rotošwa ke bomang? (Bona le tlhaloso.)

³ Mathomong a lekgolo la bobedi la nywaga C.E., ‘mefoka  e ile ya tšwelela’ ge Bakriste ba mankekišane ba thoma go bonagala tšhemong ya lefase. (Mat. 13:26) Lekgolong la bone la nywaga, Bakriste bao ba swanago le mefoka e be e le ba bantši kudu go feta Bakriste ba tloditšwego. Gopola gore papišong yeo, bahlanka ba ile ba kgopela mong wa bona tumelelo ya go tumola mefoka. * (Mat. 13:28) Mong wa bona o ile a ba araba bjang?

4. (a) Ke eng seo se utollwago ke karabo ya Mong wa tšhemo, Jesu? (b) Bakriste ba swanago le korong ba ile ba thoma go bonagala neng?

⁴ Ge Jesu a be a bolela ka korong le mefoka, o itše: “Di leseng di gole gotee go fihla punong.” Taelo ye e bontšha gore go tloga lekgolong la pele la nywaga go ba go fihla lehono, mo lefaseng go be go dutše go na le Bakriste ba tloditšwego ba swanago le korong. Kwešišo yeo e tiišetšwa ke seo Jesu ka morago a se boditšego barutiwa ba gagwe ge a re: “Ke na le lena matšatši ka moka go fihla bofelong bja tshepedišo ya dilo.” (Mat. 28:20) Ka gona Bakriste ba tloditšwego ba be ba tla šireletšwa ke Jesu matšatši ka moka go ba go fihla mehleng ya bofelo. Lega go le bjalo, ka ge ba be ba fetwa ke Bakriste ba swanago le mefoka, ga re kgonthišege gabotse gore ke bomang bao e bego e le ba sehlopha seo se emelwago ke korong nakong yeo ka moka e telele. Eupša nywagasome e mmalwa pele ga go thoma ga puno, sehlopha sa bao ba emelago korong se ile sa thoma go bonagala. Seo se ile sa direga bjang?

5. Boporofeta bja Maleaki bo ile bja phethagala bjang lekgolong la pele la nywaga?

 ⁵ Nywagakgolo pele ga ge Jesu a bolela seswantšho sa korong le mefoka, Jehofa o ile a budulela moporofeta wa gagwe Maleaki gore a bolele ka ditiragalo tšeo di bonagalago seswantšhong sa Jesu. (Bala Maleaki 3:1-4.) Johane Mokolobetši e be e le ‘motseta yoo a ilego a kgora tsela.’ (Mat. 11:10, 11) Ge a be a e tla ka 29 C.E., nako ya go ahlolwa ga setšhaba sa Isiraele  e be e batametše. Jesu e be e le motseta wa bobedi. O ile a hlwekiša tempele ya Jerusalema gabedi—la mathomo nakong ya ge a thoma bodiredi bja gagwe gomme la bobedi mafelelong a bjona. (Mat. 21:12, 13; Joh. 2:14-17) Ka baka leo, modiro wa Jesu wa go hlwekiša o bile ka nako e itšego.

6. (a) Phethagalo e kgolo ya boporofeta bja Maleaki ke efe? (b) Jesu o ile a hlahloba tempele ya moya nakong efe? (Bona le tlhaloso.)

 ⁶ Phethagalo e kgolo ya boporofeta bjo bja Maleaki ke efe? Nywagasomeng ya pele ga 1914, C. T. Russell le badirišani ba gagwe ba ile ba dira modiro o swanago le wa Johane Mokolobetši. Modiro woo o bohlokwa o be o akaretša go tsošološa ditherešo tša Beibele. Barutwana ba Beibele ba ile ba ruta therešo ka sehlabelo sa Kriste sa topollo, ba pepentšha thuto ya maaka ya mollo wa dihele gomme ba tsebatša gore Mabaka a Bantle a kgauswi le go fela. Eupša go be go sa dutše go na le dihlopha tše mmalwa tša bodumedi tšeo di bego di ipitša balatedi ba Kriste. Ka gona potšišo ye e bohlokwa e be e swanetše go arabja: Ke bomang gare ga dihlopha tšeo bao e bego e le korong? Gore go arabje potšišo yeo, Jesu o ile a thoma go hlahloba tempele ya moya ka 1914. Modiro woo wa go hlahloba le go hlwekiša o ile wa tšea nako e itšego—go tloga ka 1914 go ya karolong ya mathomo ya 1919. *

7. Jesu o ile a hwetša eng ge a be a thoma modiro wa gagwe wa go hlahloba ka 1914?

⁷ Jesu o ile a hwetša eng ge a be a thoma modiro wa gagwe wa go hlahloba? O ile a hwetša sehlopha se senyenyane sa Barutwana ba Beibele ba fišegago bao ba bego ba feditše nywaga ya ka godimo ga e 30 ba diriša matla a bona le mahumo a bona go phetha modiro o mogolo wa boboledi. * Jesu le barongwa ba swanetše go ba ba ile ba thaba gakaakang ge ba hwetša gore makgaba ao a sego kae a korong eupša  e le a tiilego ga se a kgangwa ke mefoka ya Sathane! Lega go le bjalo, go ile gwa nyakega gore go ‘hlwekišwe barwa ba Lefi,’ e lego batlotšwa. (Mal. 3:2, 3; 1 Pet. 4:17) Ke ka baka la’ng seo se be se nyakega?

8. Ke ditiragalo dife tšeo di bilego gona ka morago ga 1914?

⁸ Mafelelong a 1914, Barutwana ba bangwe ba Beibele ba be ba nyamišitšwe ke gore ga se ba ya legodimong. Ngwageng wa 1915 le wa 1916, kganetšo yeo e bego e etšwa ka ntle ga mokgatlo e be e šitišitše modiro wa boboledi. Se sebe le go feta ke gore ka morago ga lehu la Ngwanabo rena Russell ka October 1916, go ile gwa tsoga kganetšo ka gare ga mokgatlo. Balaodi ba bane go ba šupago ba Watch Tower Bible and Tract Society ba ile ba ganetša phetho ya gore Ngwanabo rena Rutherford a etelele pele. Ba ile ba leka go baka dikarogano gare ga bana babo rena, eupša ka August 1917, ba ile ba tloga Bethele. Seo e bile go hlwekišwa e le ka kgonthe! Le gona, Barutwana ba bangwe ba Beibele ba ile ba wela molabeng wa go boifa batho. Eupša bontši bja bona ba ile ba arabela gabotse modirong wa Jesu wa go hlwekiša gomme ba dira diphetogo tšeo di nyakegago. Ka baka leo Jesu o ile a ba ahlola ka gore ke Bakriste ba therešo bao ba emelago korong, eupša o ile a gana Bakriste ka moka ba mankekišane, go akaretša le bohle bao ba bego ba hwetšwa ka dikerekeng tša Bojakane. (Mal. 3:5; 2 Tim. 2:19) Ke eng seo se ilego sa direga ka morago? E le gore re hwetše karabo ya seo, anke re boeleng morago papišong ya korong le mefoka.

9, 10. (a) Ke eng seo re tlago go se hlahloba mabapi le lebaka la puno? (b) Lebakeng la puno, ke selo sefe seo se diregilego pele?

⁹ Jesu o itše: “Puno ke bofelo bja tshepedišo ya dilo.” (Mat. 13:39) Lebaka la puno le thomile ka 1914. Re tla hlahloba ditiragalo tše hlano tšeo Jesu a boletšego gore di tla direga nakong yeo.

¹⁰ Ya pele ke ya go kgobelwa ga mefoka. Jesu o re: “Lebakeng la puno ke tla botša babuni ka re: Kgobelang mefoka pele le e tleme dingata.” Ka morago ga 1914, barongwa ba ile ba thoma go ‘kgobela’ Bakriste bao ba swanago le mefoka ka gore ba ba hlaole gare ga “barwa [ba tloditšwego] ba mmušo.”—Mat. 13:30, 38, 41.

11. Go ba go fihla le lehono le, ke eng seo se hlaolago Bakriste ba therešo go Bakriste ba mankekišane?

¹¹ Ge nako ya go kgobela e dutše e tšwela pele, phapano magareng ga dihlopha tšeo ka bobedi e ile ya thoma go bonagala gabotse. (Kut. 18:1, 4) Ka 1919, go ile gwa ba molaleng gore Babilona o Mogolo o wele. Ke eng seo ka mo go kgethegilego se ilego sa dira gore Bakriste ba therešo ba fapane le ba mankekišane? Ke modiro wa boboledi. Bao ba bego ba eteletše pele gare ga Barutwana ba Beibele ba ile ba thoma go gatelela bohlokwa bja gore yo mongwe le yo mongwe a tšee karolo modirong wa go bolela ka Mmušo. Ka mohlala, pampišana ya To Whom the Work Is Entrusted, yeo e gatišitšwego ka 1919, e ile ya kgothaletša Bakriste ka moka ba tloditšwego gore ba bolele ka ntlo le ntlo. E itše: “Modiro wo o bonagala e le o mogolo kudu, eupša ke modiro wa Morena, gomme re tla o phetha ka matla a gagwe. Wena o na le tokelo ya go tšea karolo go wona.” Bakriste bao ba ile ba arabela bjang? Go tloga ka nako yeo go ya pele, Morokami wa 1922 o begile gore Barutwana ba Beibele ba ile ba oketša modiro wa bona wa boboledi. Go se go ye kae, boboledi bja ntlo le ntlo bo ile bja hlaola Bakriste bao ba botegago—go etša ge go le bjalo le lehono le.

12. Sehlopha seo se emelwago ke korong se kgobetšwe go tloga neng?

¹² Ya bobedi ke ya go kgobelwa ga korong. Jesu o laela barongwa ba gagwe gore: “Le kgobele korong ka ntlong ya ka ya polokelo.” (Mat. 13:30) Go tloga ka 1919, batlotšwa ba be ba kgobelwa ka phuthegong e tsošološitšwego ya Bokriste. Bakriste le ge e le bafe ba tloditšwego bao ba tlago go ba ba phela mafelelong a tshepedišo ye ya dilo, ke bona ba mafelelo bao ba tlago go hwetša moputso wa legodimong.—Dan. 7:18, 22, 27.

13. Kutollo 18:7 e utolla eng ka boemo bja kgopolo bja gona bjale bja mogweba-ka-mmele, goba Babilona o Mogolo, go akaretša le Bojakane?

 ¹³ Ya boraro ke ya dillo le ditsikitlano tša meno. Ke eng seo se diregago ka morago ga gore barongwa ba tleme mefoka? Ge Jesu a bolela ka boemo bja sehlopha seo se emelwago ke mefoka, o re: “Moo ke mo go tlago go ba le dillo le ditsikitlano tša meno.” (Mat. 13:42) Na seo se direga gona bjale? Aowa. Lehono, Bojakane ka ge e le karolo ya mogweba-ka-mmele, bo sa dutše bo ipotša gore: “Ke dutše bjalo ka kgošigadi, ga ke mohlologadi gomme nka se ke ka bona tlhokofalo.” (Kut. 18:7) Ruri Bojakane bo ipona bo laola, gaešita le go ipona bo “dutše bjalo ka kgošigadi” godimo ga sehlopha sa baetapele ba dipolitiki. Ga bjale, bao ba emelwago ke mefoka ba a ikgantšha, ga ba lle. Eupša seo se kgauswi kudu le go fetoga.

14. (a) Bakriste ba mankekišane ba tla ‘tsikitlanya neng meno a bona,’ gona ka baka la’ng? (b) Kwešišo ya rena e lokišitšwego ya Mateo 13:42 e sepedišana bjang le kgopolo yeo e boletšwego go Psalme 112:10? (Bona tlhaloso)

¹⁴ Masetlapelong a magolo, ka morago ga ge bodumedi ka moka bja maaka bjo bo rulagantšwego bo fedišitšwe, bao ba bego ba bo latela ba tla nyaka moo ba ka tšhabelago gona eupša ba ka se hwetše lefelo leo ba ka ikutago go lona. (Luka 23:30; Kut. 6:15-17) Ke moka, ka go lemoga gore ga go moo ba ka tšhabelago phedišo ya bona, ba tla lla ba le tlalelong gomme ba ‘tsikitlanya meno a bona’ ba galefile. Go etša ge Jesu a bolela boporofeteng bja gagwe bja mabapi le masetlapelo a magolo, ka yona nako yeo ke gona ba tlago go “itshetla dihuba ba lla.” *—Mat. 24:30; Kut. 1:7.

15. Go tla direga eng ka mefoka, gomme tiragalo yeo e tla direga neng?

¹⁵ Ya bone ke ya go lahlelwa ga mefoka sebešong sa mollo. Go tla direga eng ka dingata tša mefoka? Barongwa “ba [tla di] lahlela sebešong sa mollo.” (Mat. 13:42) Seo se bolela phedišo e feletšego. Ka baka leo, bao e bego e le balatedi ba mekgatlo ya bodumedi bja maaka ba tla fedišwa karolong ya mafelelo ya masetlapelo a magolo, e lego ka Haramagedone.—Mal. 4:1.

16, 17. (a) Ke tiragalo efe ya mafelelo yeo Jesu a bolelago ka yona seswantšhong sa gagwe? (b) Ke ka baka la’ng re fihlelela phetho ya gore tiragalo yeo e tla phethagala nakong e tlago?

¹⁶ Ya bohlano ke ya go taga ga baloki. Jesu o phetha boporofeta bja gagwe ka go bolela gore: “Ka nako yeo baloki ba tla taga bjalo ka letšatši Mmušong wa Tatago bona.” (Mat. 13:43) Seo se tla direga neng le gona kae? Go phethagala ga mantšu ao ke ga nakong e tlago. Jesu o be a sa bolele ka tiragalo yeo e bego e direga lefaseng ka nako yeo, eupša o be a bolela ka tiragalo ya nakong e tlago yeo e bego e tla ba kua legodimong. * Ela hloko mabaka a mabedi ao a dirago gore re fihlelele phetho ye.

¹⁷ Lebaka la pele le kwešišega gabotse ge re araba potšišo ya gore tiragalo yeo e tla direga “neng.” Jesu o itše: “Ka nako yeo baloki ba tla  taga.” Go molaleng gore polelwana e rego “ka nako yeo” e šupa go tiragalo yeo Jesu a bego a sa tšwa go bolela ka yona, e lego ‘ya go lahlelwa ga mefoka sebešong sa mollo.’ Seo se direga karolong ya mafelelo ya masetlapelo a magolo. Ka gona, tiragalo ya go “taga” ga batlotšwa le yona e swanetše go direga nakong e tlago. Lebaka la bobedi le kwešišega gabotse ge re araba potšišo ya gore e tla direga “kae.” Jesu o boletše gore baloki ba tla ‘taga Mmušong.’ Seo se bolela’ng? Batlotšwa ka moka ba botegago bao ba tla bago ba sa le mo lefaseng ka morago ga ge karolo ya mathomo ya masetlapelo a magolo e fetile ba tla be ba šetše ba swailwe la mafelelo. Ke moka, go etša ge seo se bontšhwa ke boporofeta bja Jesu bja mabapi le masetlapelo a magolo, ba tla kgoboketšwa legodimong. (Mat. 24:31) Ge ba le moo ba tla taga “Mmušong wa Tatago bona,” gomme nakwana ka morago ga ntwa ya Haramagedone, ba tla ba monyadiwa yo a thabilego wa Jesu ‘lenyalong la Kwana.’—Kut. 19:6-9.

18, 19. Go kwešiša ga rena papišo ya Jesu ya korong le mefoka go re hola ka ditsela dife re le motho ka o tee ka o tee?

¹⁸ Re holega bjang re le motho ka o tee ka o tee tseleng yeo papišo ye e bonagalago gabotse ka yona? Ela hloko ditsela tše tharo tšeo re holegago ka tšona. Ya pele, seo se dira gore kwešišo ya rena e nwelele. Papišo ye e utolla lebaka le bohlokwa la go dumelela ga Jehofa bokgopo. O be a “kgotleletše . . . dibjana tša kgalefo” gore a lokišetše ‘dibjana tša kgaugelo,’ e lego sehlopha seo se emelwago ke korong. * (Baroma 9:22-24) Ya bobedi, e matlafatša kholofelo ya rena. Ge bofelo bo dutše bo batamela, manaba a rena a tla lwa le rena le go feta, ‘eupša a ka se fenye.’ (Bala Jeremia 1:19.) Go fo swana le ge go theoša le nywaga Jehofa a ile a šireletša sehlopha seo se emelwago ke korong, Tatago rena wa legodimong o tla ba le rena ‘matšatšing ka moka’ a sa tlago a diriša Jesu le barongwa.—Mat. 28:20.

¹⁹ Ya boraro, papišo ye e re thuša go tseba sehlopha seo se emelwago ke korong. Ke ka baka la’ng seo e le sa bohlokwahlokwa? Go tseba ga rena Bakriste bao ba emelwago ke korong ke gabohlokwa gore re hwetše karabo yeo Jesu a e botšišitšego boporofeteng bja gagwe bjo bo tseneletšego bja mabapi le mehla ya bofelo. O botšišitše gore: “Ke mang yo ruri e lego mohlanka yo a botegago le wa temogo?” (Mat. 24:45) Dihlogo tše pedi tše di latelago di tla re nea karabo e kgotsofatšago ya potšišo yeo.