1. (a) Ni nfumu ki erikukwata aha buro hamwe n’enkyenzi? (b) Yesu akashoboorora ata amakuru g’enfumu egyo?

EMWE aha nfumu za Yesu ezirikukwata aha Bukama, neegamba aha mubibi owaabibire oburo, reero omuzigu akaija akabibamu enkyenzi. Enkyenzi zikamera omu buro, kwonka omubibi akaragiira abahuuku be ati: “Murekye bikure byombi, bihikye omu igyesha.” Yesu akashoboorora ngu omu igyesha, enkyenzi zikaba niziija kucwekyerezibwa reero oburo buhunikwe. (Shoma Matayo 13:24-30, 37-43.) Enfumu egi neetuhwera kwetegyereza ki? (Reeba caati eine omutwe  “Oburo Hamwe n’Enkyezi.”)

2. (a) Ebirikugambwaho omu nfumu y’omubibi nibyoreka ki? (b) Omu nfumu egi, niki eki turaateho omutima?

² Enfumu erikukwata aha musiri gw’omubibi neeyoreka oku Yesu araarundaane abo abaraategyeke nawe omu Bukama bwe n’obu araabarundaane. Okubiba okwo kukatandika aha Pentekoote omu gwa 33. Okurundaana nikwija kuhendera, abashukirweho amajuta abaraabe bakihuriire aha mperu ku baraateebweho akamanyiso ak’aha muheru reero bakatwarwa omu iguru. (Mat. 24:31; Kush. 7:1-4) Nk’oku orushozi rurikuhwera omuntu kureeba gye ebimwetooroire, nikwo n’enfumu egi erikutuhwera kwetegyereza gye ebyabaire nibiija kubaho omu myaka 2000. Kurugiirira aha biri omu nfumu egyo, ni bintu ki ebiine akakwate n’Obukama ebi turikureeba nibibaho? Enfumu egyo neegamba aha bwire bw’okubiba, obw’okukura n’obw’okugyesha. Omu kicweka eki nituza kuta omutima aha bwire bw’okugyesha. *

3. (a) Ni mbeera ki ezaabaireho bwanyima y’ekyasha ky’okubanza? (b) Kurugiirira ahari Matayo 13:28, hakabuuzibwa kibuuzo ki, kandi ni baahi abaakibuurize? (Reeba eby’aha muheru.)

³ Aha kutandika kw’ekyasha kya kabiri, ‘enkyenzi zikareebeka’ obu abo abarikwetwara nk’Abakristaayo baatandika kumanywa. (Mat. 13:26) Kuza kuhika omu kyasha kya kana, bakaba bari baingi kukira Abakristaayo  abashukirweho amajuta. Kwonka omu nfumu egyo twareeba ngu abahuuku bakabuuza mukama waabo kubaikiriza kukuura enkyenzi. * (Mat. 13:28) Mbwenu shi mukama waabo akabagarukamu ata?

4. (a) Eky’okugarukamu kya Yesu Mukama w’abahuuku, nikyoreka ki? (b) Abakristaayo abashukirweho amajuta bakamanywa ryari?

⁴ Yesu arikugamba aha buro n’enkyenzi, akagira ati: “Murekye bikure byombi, bihikye omu igyesha.” Ebi nibyoreka ngu kuruga omu kyasha ky’okubanza kuhitsya na hati, omu nsi hatwire harimu Abakristaayo abashukirweho amajuta. Eki nitubaasa kukihamya kurugiirira aha bigambo bya Yesu ebi yaagambiire abeegi be arikugira ati: “Ndi hamwe naimwe ebiro byona okuhitsya obu ensi egi erihwaho.” (Mat. 28:20) N’ahabw’ekyo, Yesu akaarinzire Abakristaayo abashukirweho amajuta ebiro byona kuhitsya aha mperu. Kwonka ahabw’okugira ngu bakaba bajwangire hamwe n’abo abarikwetwara nk’Abakristaayo, obwire obwo bwona tukaba tutarikubaasa kumanya abari nk’oburo. Kwonka abashukirweho amajuta bakareebeka butunu, harikuburayo emyaka mingi okugyesha kukatandika. Mu muringo ki?

5. Obunabi bwa Malaki bukahikiirizibwa buta omu kyasha ky’okubanza?

⁵ Emyaka mingi Yesu atakagambire enfumu y’oburo n’enkyenzi, Yehova akahwera nabi we Malaki yaaranga ebiine akakwate n’ebiri omu nfumu ya Yesu. (Shoma Malaki 3:1-4.) Yohaana Omubatizi niwe ‘yaatebeekaniise omuhanda.’ (Mat. 11:10, 11) Obu yaatandika kutebeekanisa omuhanda omu gwa 29, obunaku bw’okucwera eihanga rya Israeli orubanja bukaba buri haihi kuhika. Yesu niwe yaabaire entumwa ya kabiri. Akaboneza hekalu y’omuri Yerusaalemu emirundi ebiri.  Ogw’okubanza n’obu yaatandika obuheereza bwe kandi ogwa kabiri n’obu yaabaire ari haihi kuhendera obuheereza bwe. (Mat. 21:12, 13; Yoh. 2:14-17) N’ahabw’ekyo okuboneza hekalu okwo kukamara obwire.

6. (a) Obunabi bwa Malaki bukahikiirizibwa buta omu bwijwire? (b) Ni ryari obu Yesu yaashwijuma hekalu y’eby’omwoyo? (Reeba eby’aha muheru.)

⁶ Obunabi bwa Malaki bukahikiirizibwa buta omu bwijwire? Omwaka 1914 gutakahikire, C. T. Russell n’Abeegi ba Baibuli bagyenzi be bakakora omurimo nk’ogu Yohaana Omubatizi yaakozire. Omurimo mukuru ogwo, gukaba nigutwariramu okugaruka kuzoora amazima ga Baibuli. Abeegi ba Baibuli bakeegyesa ebihikire ebirikukwata aha kitambo kya Yesu, baayoreka ngu enyegyesa ey’omuriro gutaraara egwire, kandi baabuurira n’aha kuhendera kw’Obwire bw’Abanyamahanga. Kwonka, hakaba hariho amadiini maingi agaabaire nigeetwara kuba nigakuratira Kristo. N’ahabw’ekyo ekibuuzo kikuru eki kikaba kiine kugarukwamu: Mbwenu shi ahari go, ni baahi abaabaire bari nk’oburo? Kubaasa kugarukamu ekibuuzo ekyo, Yesu akatandika kushwijuma hekalu ya Ruhanga ey’omwoyo omuri 1914. Okushwijuma hekalu hamwe n’okugiboneza bikamara obwire, kuruga 1914 kuhika aha kutandika kwa 1919. *

7. Yesu ku yaatandikire okushwijuma kwe omuri 1914, akashangaho ki?

⁷ Yesu ku yaatandikire okushwijuma kwe, akashangaho ki? Akashangaho Abeegi ba Baibuli bakye abaabaire bamazire emyaka erikurenga omuri 30 barikwejumbira kimwe omuri kampeyini y’okubuurira. * Yesu na baamaraika ka baine kuba baashemereirwe ahabw’okushanga abantu bakye abari nk’oburo bataremesiibwe abo abari nk’enkyenzi! Kwonka  nabwo, akashanga kirikwetengyesa ‘kushemeza Abaleevi,’ nibo abashukirweho amajuta. (Mal. 3:2, 3; 1 Pet. 4:17) Ahabw’enki?

8. Ni bintu ebyabaireho bwanyima ya 1914?

⁸ Omwaka 1914 guri haihi kuhendera, Abeegi ba Baibuli abamwe bakahurira kubi ahabw’okugira ngu tibaragiire mu iguru nk’oku baabaire nibateekateeka. Omuri 1915 na 1916, okuhiiganisibwa kuruga aheeru y’ekibiina kukatuubya omujinya gwabo gw’okubuurira. Ekibi munonga, bwanyima y’okufa kw’Ow’eishe-emwe Russell omu Kwaikumi 1916, okuhiiganisibwa kukatandika kuruga ahari bamwe omu kibiina. Bana ahari mushanju abaabaire nibeebembera ekibiina kya Watch Tower Bible and Tract Society bakanga ngu Ow’eishe-emwe Rutherford ateebembera ekibiina ekyo. Bakareetaho okwebaganisamu omu b’eishe-emwe, kwonka omu Kwamunaana 1917, bakaruga aha Beseeli. Okwo ka kwabaire kuri okuboneza buzima! Kandi okutiina abantu kukareetera bamwe aha Beegi ba Baibuli kuhwa amaani. Kwonka, bakaikiriza obuhwezi bwa Yesu baakora empindahinduka ezaabaire nizetengyesa. N’ahabw’ekyo, akabahamiza ku bari Abakristaayo ab’amazima, kwonka abo abaabaire nibeetwara nk’Abakristaayo otwariiremu n’abo boona abaabaire bari omu makanisa ga Kristendomu akabeehakana. (Mal. 3:5; 2 Tim. 2:19) Niki ekyabaireho bwanyima y’ekyo? Kubaasa kutunga eky’okugarukamu, ka tugaruke twetegyereze enfumu y’oburo n’enkyenzi.

9, 10. (a) Nituza kushwijuma ki ebirikukwata aha igyesha? (b) Niki ekyabandize kubaho omu bunaku bw’eigyesha?

⁹ Yesu akagira ngu “eigyesha niyo mperu y’obusingye obu.” (Mat. 13:39) Eigyesha eryo rikatandika omuri 1914. Nituza kureeba ebintu bitaano ebi Yesu yaagizire ngu bikaba nibiza kubaho omu bunaku bw’eigyesha.

 ¹⁰ Eky’okubanza, okutoorana enkyenzi. Yesu naagira ati: “Omu igyesha ndyagambira abagyesi nti: Mubanze mutooranemu enkyenzi, muzibohe enganda.” Bwanyima y’omwaka 1914, baamaraika bakatandika ‘kutoorana’ Abakristaayo abari nk’enkyenzi, barikubaiha omuri abo abashukirweho amajuta “nibo baana b’obukama.”​—Mat. 13:30, 38, 41.

11. Niki ekitwire nikitaanisa Abakristaayo ab’amazima ahari abo abarikwetwara nk’Abakristaayo?

¹¹ Omurimo gw’okutoorana ku gwagumiizemu, abo abari nk’enkyenzi n’abo abari nk’oburo bakamanywa gye. (Kush. 18:1, 4) Omuri 1919, kikareebwa gye ngu Babulooni Orukuru rugwire. Okukira munonga, niki ekyabaire nikyoreka ngu Abakristaayo ab’amazima nibataana ahari abo abarikwetwara nk’Abakristaayo? N’omurimo gw’okubuurira. Omu bunaku bw’Abeegi ba Baibuli abo, abaabaire nibeebembera bakooreka ngu ni kikuru buri omwe kwejumba omu kubuurira. Nk’eky’okureeberaho, akatabo To Whom the Work Is Entrusted, akaateirwe omu 1919, kakahiga Abakristaayo abashukirweho amajuta boona kubuurira enju aha nju. Kakagira kati: “Omurimo nigureebeka nka muhango, kwonka n’ogwa Mukama, kandi ahabw’amaani ge nitwija kugukora. Oine omugisha kugwejumbamu.” Bakatwara bata okwetwa okwo? Omuri 1922, Watch Tower ekagira ngu Abeegi ba Baibuli bakeyongyerera kimwe kwejumba omu kubuurira. Kuruga obwo, okubuurira enju aha nju kukaba omuringo mukuru gw’okubuurira ogw’Abakristaayo abo abeesigwa n’okuhitsya na hati.

12. Abo abari nk’oburo bakatandika kurundaanwa ryari?

 ¹² Ekya kabiri, okuhunika oburo. Yesu naaragiira baamaraika be ati: “Oburo mubuhunikye omu bitara byangye.” (Mat. 13:30) Kuruga 1919, abashukirweho amajuta batwire nibarundaanwa omu kibiina Ekikristaayo. Okurundaanwa okw’aha muheru nikwija kubaho aha mperu y’ensi egi, Abakristaayo abashukirweho amajuta abaraabe bakiriho baatunga omugabo gwabo omu iguru.​—Dan. 7:18, 22, 27.

13. Okushuuruurwa 18:7 nihooreka miteekateekyere ki eya maraaya nari Babulooni Orukuru, otwariiremu n’Abakristaayo ab’ebishuba?

  ¹³ Ekya kashatu, okurira hamwe n’okunena enshaya. Niki ekirikwija kubaho, baamaraika ku baraaheze kuboha enkyenzi? Yesu arikugamba ahari abo abari nk’enkyenzi naagira ati: “Omwo nimwo abantu bariririra, bakanena enshaya.” (Mat. 13:42) Eki kiriyo nikibaho hati? Ngaaha. Bamwe aha Bakristaayo b’ebishuba abarikujwekyera maraaya obunaku obu, nibagira bati: “Nshutami nk’omugabekazi; tindi mufaakazi; tindigira maganya na kakye.” (Kush. 18:7) Buzima abo abarikwetwara nk’Abakristaayo nibeereeba ‘nk’abashutami nk’omugabekazi’ ahaiguru y’abeebembezi b’eby’obutegyeki. Obunaku obu, abo abarikujwekyera enkyenzi nibeehimbisa, tibarikurira. Kwonka ekyo kiri haihi kuhinduka.

14. (a) Ni ryari obu abo abarikwetwara nk’Abakristaayo ‘baraanene enshaya,’ kandi ahabw’enki? (b) Enyetegyereza yaitu ensya ey’ebiri omu Matayo 13:42 neehikaana eta n’ebiri omu Zaaburi 112:10? (Reeba eby’aha muheru.)

¹⁴ Omu bunaku bw’okubonabona kwingi, bwanyima y’amadiini g’ebishuba goona kucwekyerezibwa, abo abarikugashagika nibaija kuhunga nibasherura obweshereko kwonka tibarikwija kubutunga. (Luk. 23:30; Kush. 6:15-17) Bwanyima y’okukimanya ngu tibarikubaasa kukira okucwekyerezibwa okwo, nibaija kurira ‘banene n’enshaya’ zaabo ahabw’ekiniga. Nk’oku Yesu yaayorekire omu bunabi bwe oburikukwata aha kubonabona kwingi, omu bunaku obwo obw’omwirima, nibaija ‘kucura.’ *​—Mat. 24:30; Kush. 1:7.

15. Niki ekirikwija kuhika aha nkyenzi, kandi ekyo nikiija kubaho ryari?

 ¹⁵ Ekya kana, okunagwa omu kikoomi ky’omuriro. Niki ekirikwija kuhika aha nkyenzi? Baamaraika nibaija kuzinaga “omu kikoomi ky’omuriro.” (Mat. 13:42) Ekyo nikimanyisa okucwekyererezibwa kimwe. N’ahabw’ekyo, abo abaraabe nibashagika ediini z’ebishuba nibaija kucwekyerezibwa aha muheru gw’okubonabona kwingi, nirwo orugamba rwa Haramagedoni​—Mal. 4:1.

16, 17. (a) Ni kintu ki ekirikuhereeruka eki Yesu yaagambireho omu nfumu ye ekyabaire nikiza kubaho? (b) Ahabw’enki turikubaasa kugira ngu okuhikiirira kwakyo nikuza kubaho omu biro by’omumaisho?

 ¹⁶ Ekya kataano, okwengyengyeta. Yesu akahendera obunabi bwe arikugira ati: “Obwo abahikiriire baryayengyengyeta nk’eizooba omu bukama bwa Ishebo.” (Mat. 13:43) Ekyo nikiija kubaho ryari kandi nkahi? Okuhikiirira kw’ebigambo ebyo nikwija kubaho omu biro by’omumaisho. Yesu akagamba aha kintu ekyabaire nikiza kubaho omu biro by’omumaisho omu iguru, beitu kitari ekirikubaho hati omu nsi. * Yetegyereze enshonga ibiri ahabw’enki kiri kityo.

¹⁷ Enshonga y’okubanza, obu kyabaire nikiza kubaho. Yesu akagira ati: “Obwo abahikiriire baryayengyengyeta.” Ekigambo “obwo”  nikikwata aha kintu eki Yesu yaabaire yaaheza kugambaho, ‘okunaga enkyenzi omu kikoomi ky’omuriro.’ Ekyo nikiija kubaho aha muheru gw’okubonabona kwingi. N’ahabw’ekyo, ‘okwengyengyeta’ okw’abashukirweho amajuta nakwo kwine kubaho omu biro by’omumaisho. Enshonga ya kabiri, ahu kyabaire nikiza kuba. Yesu akagira ngu abahikiriire ‘baryayengyengyeta omu bukama.’ Ekyo nikimanyisa ki? Abashukirweho amajuta abeesigwa abaraabe bakiri omu nsi bwanyima y’ekicweka ky’okubanza eky’okubonabona kwingi, nibaija kuba baaherize kuteebwaho akamanyiso ak’aha muheru. Reero nk’oku kirikworekwa omu bunabi bwa Yesu oburikukwata aha kubonabona kwingi, nibaija kurundaanwa batwarwe omu iguru. (Mat. 24:31) Baaba bari okwo, nibaija kwengyengyeta “omu bukama bwa Ishebo,” kandi ahonaaho Haramagedoni yaaheza kuhwa, nibaija kushemererwa hamwe nk’omugore wa Yesu omu “bugyenyi bw’Omwana gw’entaama.”​—Kush. 19:6-9.

18, 19. Okwetegyereza enfumu ya Yesu erikukwata aha buro n’enkyenzi nikukugasira mu miringo ki?

¹⁸ Noogasirwa ota omu muringo murungi ogu enfumu egi erikushoboororamu enshonga? Yetegyereze emiringo eshatu. Ogw’okubanza, nikituhwera kwongyera kwetegyereza. Enfumu egyo neeyoreka enshonga nkuru ahabw’enki Yehova akirekireho okubonabona. ‘Akagumisiririza . . . enyabya ez’ekiniga,” kubaasa kutebeekanisa ‘enyabya ez’okusaasirwa’ nibo abo abari nk’oburo. * (Rom. 9:22-24) Ogwa kabiri, nikituhwera kwongyera kwesigira kimwe Yehova. Nk’oku emperu araagyende neirira haihi, nikwo n’abazigu baitu baraayeyongyere kuturwanisa, “kwonka tibarikubaasa” kutusingura. (Shoma Yeremia 1:19.) Nk’oku Tataitwe ow’omu iguru Yehova atwire naarinda abo abari nk’oburo, naitwe arikukoresa Yesu na baamaraika naija kuguma naitwe “ebiro byona” ebirikwija.​—Mat. 28:20.

¹⁹ Ogwa kashatu, enfumu egi neetuhwera kumanya abo abari nk’oburo. Ahabw’enki ekyo kiri kikuru? Okumanya Abakristaayo abari nk’oburo nikituhwera kutunga eky’okugarukamu ky’ekibuuzo eki Yesu yaabuurize, ekiri omu bunabi bwe oburikukwata aha biro by’emperu. Akabuuza ati: “Ni mwambari ki ow’okwesigwa kandi ow’obwengye?” (Mat. 24:45) Ebicweka bibiri ebirikukurataho nibiija kutuhwera kutunga eky’okugarukamu ky’ekibuuzo ekyo.