1. (a) Ka msodii a okesiu el kirel a ungil me a mekngit el dellomel. (b) Ngmilekerang a Jesus er a lomeketakl er a belkul?

 A TA er a okesiu er a Jesus el kirel a Renged a milsaod el kirel a chad er a sers el omriid a tane er a ungil el dellomel er a sersel, e a cheraro a mei el mriid a mekngit el dellomel er a delongelel. Me aika el mekngit el dellomel a mukeroul el mo chuucheb a ungil el dellomel, engdi a chad er a sers a dmu er a remesiungel el kmo: “Bechei me di le dak el merael el mo meklou el mor sel belsechel ngiuul.” Me sel temel a omeridm e te sueseb a mekngit el dellomel e chemudel a ungil el dellomel. Me a Jesus a ulemeketakl er a belkul tia el okesiu. (Monguiu er a Mateus 13:24-30, 37-43.) Me ngera kede suubii er tia el okesiu? (Momes er a baks el  “A Ungil me a Mekngit el Dellomel.”)

2. (a) A tekoi el meketmokl er a sers ngomekesiu er a ngerang? (b) Kede mo mesaod er a ngerang er tia el okesiu?

² A tekoi el meketmokl er a chelsel a sers a omekesiu er sel rolel me a temel a Jesus a bo longudel er a rechad el tir a ua ungil el dellomel, e tirkang a tirke el ngellitel el Kristiano el tir a mo mengedereder er a Renged el obengkel. Tia el omriid el tane a ulemuchel er a Pentekost er a rak er a 33. Me tia el omengudel a mo mecherrungel er sel taem el tirke el ngellitel el dirk chad er a ulebengelel tia el beluulechad er a Satan a mo nguu a ulebongel el olangch er tir e mengai el mo er a eanged. (Mt. 24:31; Och. 7:1-4) Me ngdi ua chad el dechor er a bebul a rois el sebechel el bleketakl a osengel el omes a tekoi el meliuekl er ngii, me nguaisei tia el okesiu a meskid a klou el omesodel aike el tekoi el duubech er a chelsel a bekord el 2,000 el rak. Me chelechang e ngera el tekoi el kirel a Renged a sebeched el omtab? A okesiu a mesaod el kirel a temel a omriid el tane, okurulel, me a temel a omeridm. E tia el suobel a di mo mesaod er a temel a omeridm. *

3. (a) Ngera el tekoi a dilubech er a uriul er a rak er a 100? (b) A doltirakl er a Mateus 13:28, e ngera el ker a dilubech, e techang a uleker er ngii? (Momes er a bebil el omesodel.)

³ A uriul er a rak er a 100 e ngmlo “bleketakl a ikal mekngit  el dellomel” er a be leduum a reklsuul el Kristiano. (Mt. 13:​26) Me a uriul er a rak er a 300 e tirka el klsuul el Kristiano a kuk mla mo betok er a rengellitel el Kristiano. Ngar sel okesiu e tirke el mesiou a ullengit er a mastang me bo lomadel a mekngit el dellomel el mengoit. * (Mt. 13:28) Me ngerang dilung a mastang?

4. (a) Ngera el tekoi a ulebeketakl er a nger er a Mastang el Jesus? (b) Ngoingerang e ngmlo beot er kid el dongcheterir a rengellitel el Kristiano?

⁴ A Jesus er a losaod el kirel a ungil me a mekngit el dellomel e ngdilu el kmo: “Bechei me di le dak el merael el mo meklou el mor sel belsechel ngiuul.” Me tia el tekingel a meketeklii el kmo ngulemuchel er a taem er a rechapostol el me lmuut er chelechang e te mla er ngii a rebebil el ngellitel el Kristiano el ngar tia el chutem. E tia el tekoi a liluut el moterekokl er a uriul er a ledu er a redisaiplo er ngii a Jesus el kmo: “E ngak a mo obengkemiu el di blechoel el mo lmuut er a ulebongel er a beluulchad.” (Mt. 28:20) Me a leuaisei, e a rengellitel a melemolem el ngar cheungel a ulekerreuil a Jesus el mo lmuut er a taem er a ulebongel. Engdi seikid el taem el mei e a mekngit el dellomel el tir a klsuul el Kristiano a mlukeroul el mo betok a uchul me ngmeringel er kid el mo medengei el kmo te rua techang a mle ngellitel el Kristiano er seikid el taem. Me nguaisei, engdi bekord el 30 el rak er a uchei er a lomuchel a temel a omeridm, e tirke el ngellitel el Kristiano el ua ungil el dellomel a mlo beot er kid el dongcheterir. Ngmilekerang e mo uaisei?

5. Ngmilekerang e mutaut a ulochel a Malakai er sera lengar er a chutem a Jesus?

⁵ Betok el dart el rak er a uchei er a losaod a okesiu a Jesus el kirel aika el dellomel, e a Jehovah a ulemekrael er a profet el Malakai el mo omlaoch el kirel a bebil er a osisiu el tekoi. (Monguiu er a Malakai 3:1-4.) Me ngika el ‘oderuchel el kiltmeklii a rael’ el Malakai a ulemlaoch el kirel a  millutk er a Johanes el Chad er a Techolb. (Mt. 11:10, 11) Me sera lemei er a rak er a 29, e a temel a kerrekeriil el mo er a renged er a Israel a kmal kmedang. A Jesus a mle ongeru el oderuchel. Ngmlo eru el taem el longikiid er a templo er a Jerusalem, el sel kot el taem a ngar er a uchelel a omesiungel e a ongeru el taem a mlo bedul a ulebengelel a omesiungel. (Mt. 21:12, 13; Jn. 2:14-17) Me tia el ureor er a omengikiid el lurruul er ngii a Jesus a dimlak lemereched el mo merek.

6. (a) Ngerang a klou el otutel a ulochel a Malakai? (b) Ngoingerang e a Jesus a mlo merriter er a okesiu el templo? (Momes er a bebil el omesodel.)

⁶ Me ngerang a klou el otutel a ulochel a Malakai? Ngar er aike el rak el me bedul a rak er a 1914, e a C.T. Russell me a resechelil a mirruul er a klou a ultutelel el ureor el ua lurruul er ngii a Johanes el Chad er a Techolb. Te liluut el omeketakl a klemerang er a Biblia. Me a Remesuub er a Biblia a ullisechakl er a mera el belkul a olubet el tengetengel a Kristus, e ulechotii el kmo a osisechakl el kirel a beluu er a ngau a klsuul, e uluuchais el kirel a merekung el ulebongel er a Taem er a Rechisentael. Engdi ngdirk mla er ngii a kakerous el cheldebechel el millekoi el kmo te oltirakl er a Kristus. Me a klou a ultutelel el ker el mle kirel el monger a kmo: Te rua techang er a delongelir tirka el chad a mle ungil el dellomel? A Jesus a ulemuchel el merriter er a okesiu el templo er a rak er a 1914, me bo lemonger tia el ker. Me tia el ureor er a omerriter me a omengikiid a ulemuchel er a rak er a 1914 e millemolem el mo lmuut er a uchelel a rak er a 1919. *

7. Ngera ngmiltik a Jesus er sera lomuchel el merriter er a okesiu el templo er a rak er a 1914?

⁷ Ngera ngmiltik a Jesus er sera lomuchel el merriter er a okesiu el templo? Ngmle metik er a kekerei el cheldellir a Remesuub er a Biblia el blak a rengrir el ousbech a temir me aike el ngar  er ngii er tir el omerk er a klumech el mla mo betok er a 30 el rak. * Ngkmal mlo uchul a klou el deurreng er a Jesus me a rechanghel er a bo lodengei el kmo te ngar er ngii a remekesai e mesisiich el ungil el dellomel el dimlak lemechucheb er a mekngit el dellemelel a Satan! Engdi ngdirk mle kirel a Jesus el “mengikiid er a re prist,” el tirke el ngellitel el Kristiano. (Mal. 3:2, 3; 1 Pe. 4:17) E ngera uchul?

8. Ngera el tekoi a dilubech er a uriul er a rak er a 1914?

⁸ Ngar er a ulebengelel a rak er a 1914, e a rebebil er a Remesuub er a Biblia a mlo mechitechut a rengrir e le ngdimlak lebo er a eanged. E ngar er aike el rak er a 1915 me a 1916, e ngmlo er ngii a ultok er a ikrel a cheldebechel el uchul me ngmlo mechitechut a ureor er a berkel a klumech. E liluut el kmal mlo meringel er a uriul er a lemad a Brother Russell er a October 1916, e le ultok a mlo er ngii er a chelsel tia el cheldebechel. A reteua er tirke el teuid el director er a Watch Tower Bible and Tract Society a ulemtok er a uldasu el melutk er a Brother Rutherford el mo mengeteklel tia el cheldebechel. Te millasem el omekdubech a klekakeakl er a delongelir a rudam, engdi ngar er a August 1917, e te tilobed el mo diak el ngar er a Bethel. Me tiang a mera mle rolel a omengikiid! Te dirrek el mla er ngii a rebebil el mlo mechitechut e le ngdektir er a rechad a uchul. Engdi a cheldebechel a kilengei er a Jesus me longikiid e losmechokl aike el mle kirel el mesmechokl el tekoi. Me a leuaisei, a Jesus a mlo dongcheterir el kmo te mera el Kristiano el ungil el dellomel, e uleltngakl er tirke el mla er a chelsel a cheldebechel el dimlak lemera el Kristiano me a rokui el chedal aike el klechelid er a Klsuul Klekristiano. (Mal. 3:5; 2 Ti. 2:19) Me ngera dilubech er a uriul? Me deluut el mo mesaod er a okesiu el kirel a ungil me a mekngit el dellomel.

9, 10. (a) Kede mo mesaod a ngerang el kirel a temel a omeridm? (b) Ngera dilubech er a uchelel a omeridm?

⁹ A Jesus a dilu el kmo: “A belsechel omelai el dellomel a sel ulebongel er a beluulchad.” (Mt. 13:39) Me tia el temel a omeridm a ulemuchel er a rak er a 1914, me kede mo mesaod a eim el tekoi el lulemlaoch a Jesus el kirel ngii el taem.

¹⁰ A kot, mo omadel a mekngit el dellomel. A Jesus a millekoi el kirel a temel a omeridm el kmo: “Isei e ak mo dmu er tirkel chad er a ureor me te mo madel e ngmai a ikel mekngit el remenged.” Me a uriul er a rak er a 1914, e a rechanghel a ulemuchel el “omadel” a mekngit el dellomel el tir a klsuul el Kristiano el meleakl er tir er a rengellitel el “chad er a Rengedel a Dios.”​—Mt. 13:30, 38, 41.

11. Ngera el tekoi a rulleterir a remera el Kristiano el mo ileakl er a reklsuul el Kristiano?

¹¹ Me a cherengel a taem el lolemolem tia el ureor, e ngmla lmuut el obeketakl a klekakerous er a ungil me a mekngit el dellomel. (Och. 18:1, 4) Me sera rak er a 1919, e ngmlo bleketakl el kmo a Kloul Babilon a mlo diak a klisichel el orreked er a rechedal a Dios. Ngera el tekoi a rirelleterir a remera el Kristiano el mo ileakl er a reklsuul el Kristiano? A ta er a klou a ultutelel el tekoi a sel urerir er a berkel a klumech. Tirke el ulemekrael er tia el cheldebechel er a Remesuub er a Biblia a ulemuchel el ouchais er a klungel a ultutelel a bo leteloi er a ureor er a berkel a klumech er a Renged. El ua tiang, a babier el A Ureor Ngmla Moterekokl er a Rua Techang a tilobed er a rak er a 1919 el melisiich er a rokui el ngellitel el Kristiano el mo oldingel a obliil. Ngmelekoi el kmo: “A ureor a kmal imis el klou, engdi ngurerel a Rubak me ngmo melisiich er kid me kede meruul er ngii. Me ngar er ngii a ileakl el techellem el mo teloi er tia el ureor.” Me ngera dilubech? A Watch Tower er a rak er a 1922 a uluuchais el kmo ngulemuchel er seikid el taem e a Remesuub er a Biblia a liluut el mo blak a rengrir el omerk er a klumech. Me ngdi mle mereched el obeketakl el kmo a berkel a klumech a olengchelir tirke el blak a rengrir el Kristiano el di uai chelecha el taem.

12. Ngulemuchel el mo mechudel er oingerang a ungil el dellomel?

¹² Ongerung, mo mengudel a ungil el dellomel.  A Jesus a dilu er a rechanghel er ngii me bo lolai “a ikel ungil dellomel el mo melecha er a blil a dellomel.” (Mt. 13:30) Me sera rak er a 1919 el mei e a rengellitel a ulemuchel el mo mechudel er a chelsel a mla mekikiid el ongdibel er a Rekristiano. Me tia el ureor er a omengudel a mo merek er sel taem el tirke el ngellitel el Kristiano el dirk chad er a ulebongel er tia el beluulechad er a Satan, a mengai el mo er a eanged.​—Dan. 7:18, 22, 27.

13. A Ocholt 18:7 ngouchais er a ua ngera el blekerdelel a oteruul el dil el ngii a Kloul Babilon el uldimukl er a Klsuul Klekristiano?

¹³ Ongedei, langel me a ongchengchel a uingel. Me a uriul er a lechudel a mekngit el dellomel a rechanghel e ngera mo duubech? A Jesus er a losaod er tirke el chad el ua mekngit el dellomel e ngdilu el kmo: “Me te mo lmangel e olengchongch a ungelir.” (Mt. 13:42) Me tia el tekoi ngmeketmeklang er chelechang? Ngdiak. Chelecha el taem e a oteruul el dil el ngii a Kloul Babilon el uldimukl er a Klsuul Klekristiano, a dirk mesaod er ngii el kmo: “Ngak tiang el dengchokl el kuin! Ng diak kmelakl dil, ng kmal diak bo kcheremii a klengiterreng!” (Och. 18:7) Me a Klsuul Klekristiano a omdasu el kmo ngmengedereder a rokui el tekoi e kuk ngarbab er tirke el mengeteklel a balatiks. Me chelechang e tirke el ua mekngit el dellomel a diak el langel e te bai ousimang er tir. Engdi ngdi kmedung e tia el blekeradel a mo mengodech.

14. (a) Ngoingerang e a reklsuul el Kristiano a mo “olengchongch a ungelir,” e ngera uchul? (b) Ngmekerang a beches el klemedengei er kid er a Mateus 13:42 e di osisiu ngii me a omesodel a Psalm 112:10? (Momes er a bebil el omesodel.)

¹⁴ Ngar sel taem er a kloul ringel el bla lengemed a rokui el klsuul el klechelid, e tirke el mle chedal aika el klechelid a mo remurt el osiik a osebechakl engdi ngmo diak el betik er ngii. (Lk. 23:30; Och. 6:15-17) Me sel lebo lodengei el kmo te ngomedung, e te mo lmangel e “olengchongch a ungelir” el kesib a rengrir. A Jesus a dirrek el ulemlaoch el kirel tia el taem er a chelsel a kloul ringel el kmo te kmal mo mekngit a rengrir e “lmangel.” *​—Mt. 24:30; Och. 1:7.

15. Ngera mo duubech el mo er a mekngit el dellomel, e oingerang e ngmo er ngii tia el tekoi?

¹⁵ Ongeuang, mo obidokl er a chelsel a ngau. Ngera mo duubech el mo er aike el ulechull el mekngit el dellomel? A rechanghel a mo “choititerir er a kmard a ngau er ngii el ollaol.” (Mt. 13:42) El belkul a kmo ngmo nguemed el mo diak. Me tirke el mle chedal aika el klsuul el klechelid a mo nguemed er sel ulebengelel a kloul ringel el ngii a Armakedon.​—Mal. 4:1.

16, 17. (a) Ngera sel mo ulebongel el tekoi el ledillii a Jesus el ngar er a okesiu er ngii? (b) Kede mekerang e medengei el kmo tia el tekoi a dirkak leduubech?

¹⁶ Ongeim, mo medidiich. A Jesus a rirekir a ulochel er a ledu el kmo: “Isei e a re chedal a Dios a mo ngar a Rengedel a Demerir e mo medidiich el ua sils.” (Mt. 13:43) Tiang ngoingerang e  mo er ngii er ker? Ngdirkak letaut tia el ulaoch. A Jesus a dimlak lomlaoch el kirel a tekoi el meketmeklang er tia el chutem er chelechang, e ngbai milsaod el kirel a tekoi el mo duubech el ngar er a eanged. * Me bo dosaod a eru el uchul me kede omdasu el uaisei.

¹⁷ A kot, ngmo duubech er oingerang? A Jesus a dilu el kmo: “Isei e a re chedal a Dios a . . . mo medidiich el ua sils.” Me a tekoi el “isei” a ngosukid el mo medengei el kmo tiang a mo duubech er sel taem el aike el mekngit el dellomel a mo obidokl er a “kmard a ngau er ngii el ollaol,” el lulsaod er ngii er a uchei. E tiang a mo duubech er sel ulebengelel a kloul ringel. Ongerung, ngmo er ngii er ker? A Jesus a dilu el kmo a remelemalt a mo “ngar a Rengedel a Demerir e mo medidiich.” Me tiang ngera belkul? Sel bo lengemed a klsuul klechelid er a uchelel a kloul ringel e tirke el blak a rengrir el ngellitel el Kristiano el dirk ngar er a chutem a mla mo merek el nguu a ulebongel el olengchelir. E sola e te mo mengai el mo er a eanged el ua ledilu a Jesus el ngar er sel ulochel el kirel a kloul ringel. (Mt. 24:31) Me ngar isei e te mo dmiich el ua sils el “ngar a Rengedel a Demerir,” e di telkib el taem er a uriul er a mekemad er a Armakedon e ngmo dmeu a rengrir el rongedii a chebechiielir el obengkel a Jesus el ngii a “Ngelekel a Sib.”​—Och. 19:6-9.

18, 19. Ngera el klungiaol a dengai er tia el okesiu er a Jesus el kirel a ungil me a mekngit el dellomel?

¹⁸ Ngera el klungiaol a dengai er tia el okesiu? Me bo dosaod a edei el rolel. A kot e ngdochelii a klemedengei er kid. Tia el okesiu a meketeklii a ta er a klou a ultutelel el uchul me a Jehovah a dirkak lokngemedeterir a remekngit. Ngmenglou er a rengul me bo el sebechel el chudelterir a rengellitel el tir a ua ungil el dellomel. * (Rom 9:22-24) Ongerung, e ngmelisiich a klaumerang er kid. Me sel lorael a ulebongel el lmuut el me kmeed e a recherroued a lmuut el mo mesisiich el oldechelakl er kid, engdi “ng diak el sebechir el mo mesisiich.” (Monguiu er a Jeremia 1:18, 19.) Me a Jehovah a okiu a Jesus me a rechanghel er ngii e mo obengked “el di blechoel el mo lmuut er a ulebongel” el di ua omerellel el mla omekerreu er a rengellitel er a irechar el mei.​—Mt. 28:20.

¹⁹ Ongedei, tia el okesiu a ngosukid el mo sebeched el dongcheterir a rungil el dellomel. Ngera uchul me tiang a klou a ultutelel? Ngklou a ultutelel el bo dodengelterir me bo el sebeched el mo medengelii a nger er a ker el ledillii a Jesus el ngar sel ulochel el kirel a uriul sils el kmo: “Ng techa ngikel blak a rengul e mellomes a rengul el mesiou?” (Mt. 24:45) A ongingil el eru el suobel a mo ungil el smodii a nger er tia el ker.