1. (a) Menlau koasoiahda ni mwotomwot duwen war mwahu ko oh dihpw suwed ko. (b) Ia duwen Sises eh ketin kawehwehda wehwehn karasaraso?

 EHU sapwellimen Sises karasaras ko kin koasoia duwen soumwet men me kamwarak weren tuhke mwahu oh imwintihti men kohla oh padokedi dihpw suwed nanpwungen war mwahu ko. Dihpw suwed ko pwarada oh kasokehla war mwahu ko, ahpw soumweto padahkihong nah ladu ko ren “mweidohng pwe irail koaros, dihpw suwed ko oh kisin tuhke mwahu ko, en keirda lao lel ahnsoun rahk.” Ahnsoun rahk wiawi, dihpw suwed ko kasohrala oh tuhke mwahu ko rikirikpene. Sises ketin kawehwehda ia wehwehn karasaras wet. (Wadek Madiu 13:24-30, 37-43.) Dahme karasaras wet kasalehda? (Menlau kilang koakon  “War Mwahu ko oh Dihpw Suwed ko.”)

2. (a) Dahme mwekid kan me wiawi nan en soumweto eh mwahto karasahda? (b) Pali dahieu nan karasaraso me kitail pahn koasoiapene?

² Mwekid kan me wiawi nan en soumweto eh mwahto kin karasahda ia duwen oh iahd me Sises pahn ketikihpene sang sampah pwihnen war mwahu ko koaros, me iei Kristian keidi kan me pahn iang ih kaunda sapwellime Wehio. Ahnsoun kamwarak tepida ni Pendekos pahr 33. Ahnsoun rikirikpeneo pahn imwisekla ni ahnsou me kaimwiseklahn kileldier en irail me keidi kan me momourte ni imwin koasoandi wet pahn wiawi oh eri kohdahla nanleng. (Mad. 24:31; Kaud. 7:1-4) Duwehte atail mi wasa ile ehu oh kak kilang wasa kan koaros, karasaras wet sewese kitail en kilang mwekid kan me pweipweida mpen sounpar 2,000. Sang wasa ile wet, dahme kitail kilang duwen mwekid kan me wiawi me pid Wehio? Karasaraso kasalehda ahnsoun kamwarak, keirda, oh ahnsoun rahk. Iren onop wet pahn koasoia duwen ahnsoun rahk. *

3. (a) Dahme wiawi mpen pahr 100? (b) Nin duwen Madiu 13:28 kasalehda, peidek dahieu me pwarada, oh ihs me idek met? (Menlau kilang ire kan mwurio.)

³ Mpen pahr 100, “dihpw suwed ko ahpw pil pwarada”  ahnsou me Kristian likamw kan sansalda nan mwaht en sampah. (Mad. 13:26) Mwurin pahr 300, Kristian kan me duwehte dihpw suwed ko tohto sang Kristian keidi kan. Taman me nan karasaraso, ladu ko idek rehn arail soumaso ren usada sang dihpw suwed ko. * (Mad. 13:28) Dahme soumaso sapengki?

4. (a) Dahme pasapeng en Soumaso Sises kasalehda? (b) Iahd me Kristian kan me rasehng tuhke mwahu ko sansalda?

⁴ Ni Sises ketin mahsanih duwen war mwahu ko oh dihpw suwed ko, e mahsanih: “Kumwail mweidohng pwe irail koaros, dihpw suwed ko oh kisin tuhke mwahu ko, en keirda lao lel ahnsoun rahk.” Kehkehlik wet kasalehda me sang ni mwehin wahnpoaron ko leledo rahnwet, ahnsou koaros kin mie Kristian keidi kan nin sampah me rasehng tuhke mwahu ko. Met mehlel pwehki Sises ketin padahkihong sapwellime tohnpadahk ko: “I pahn ieiang kumwail rahn koaros lao kaimwiseklahn koasoandi en mehkan.” (Mad. 28:20, NW) Eri, Sises pahn ketin pere Kristian keidi kan rahn koaros lao lel ni imwin ahnsou. Pwehki Kristian likamw ko me rasehng dihpw suwed ko kasokehla Kristian keidi ko, kitail sohte uhdahn ese ihs me iang pwihnen tuhke mwahu ko erein ahnsou reirei wet. Ahpw mpen sounpar 30 mwohn tepidahn ahnsoun rahko, pwihn en tuhke mwahu ko tepida sansalda. Ia duwen met eh wiawi?

5. Ia duwen kokohp en Malakai eh pweida ni ahnsou me Sises ketiket sampah?

⁵ Sounpar epwiki kei mwohn Sises ketikihda karasaras en tuhke mwahu ko oh dihpw suwed ko, Siohwa ketin doadoahngki soukohp Malakai en kohpada mwekid kan me sansalda nan sapwellimen Sises karasaraso. (Wadek Malakai 3:1-4.) Sohn Sounpapidais iei ‘meninkeder me kaunopada ahlo.’ (Mad. 11:10, 11) Ni eh pwarada nan pahr 29, ahnsoun kadeikada wehin Israel kerendohr.  Sises iei keriemen en meninkeder. E ketin kamwakelehda tehnpaso nan Serusalem pak riau. Keieun pak iei ni ahnsou me e ketin tepida sapwellime doadoahk en kalohk oh keriaun pak iei ni imwilahn sapwellime doadoahko. (Mad. 21:12, 13; Sohn 2:14-17) Eri, doadoahk en kamwakel wet me Sises ketin wia kin pidada erein ahnsou ehu.

6. (a) Iahd me pweida keieu kesempwal en kokohp en Malakai wiawi? (b) Erein ahnsou dahieu me Sises ketin dauwih koasoandi en kaudok min? (Menlau kilang ire kan mwurio.)

⁶ Iahd me pweida keieu kesempwal en kokohp en Malakai wiawi? Erein sounpar silihsek samwa mwohn pahr 1914, C. T. Russell oh ienge ko wia doadoahk me rasehng dahme Sohn Sounpapidais wia. Doadoahk kesempwal wet kin pidada padahk mehlel kan en Paipel ar pwurehng sansalda. Tohnsukuhl en Paipel kan padahngki mehlelpen wehwehn sapwellimen Krais meirong, kasalehda padahk likamw duwen kalokolok soutuk nan kisiniei, oh kalohki duwen imwiseklahn ahnsoun mehn liki kan. Ahpw miehte pwihnen pelien lamalam tohto me dene irail iei sapwellimen Sises tohnpadahk kan. Eri peidek kesempwal ehu anahne pasapengla: Ihs nanpwungen pwihn pwukat iei tuhke mwahu ko? Pwehn sapengala met, Sises ketin tapiada dauwih koasoandi en kaudok min nan pahr 1914. Doadoahk en dou oh kamwakel wet pidada erein ahnsou ehu, me iei sang pahr 1914 lao lel tepidahn pahr 1919. *

7. Ni Sises eh ketin tapiada sapwellime dou nan pahr 1914, dahme e ketin diarada?

⁷ Ni Sises eh ketin tapiada sapwellime dou, dahme e ketin diarada? E ketin diarada pwihn tikitik ehu en Tohnsukuhl en Paipel ngoang kei me kin kihda arail kehl oh mwohni pwehn wia doadoahk en kalohk erein sounpar 30 samwa. * Sises oh tohnleng kan uhdahn perenkihda arail diar tuhke mwahu kehlail malaulau kei me nein  Sehdan dihpw suwed ko sohte kasokehla. Ahpw miehte anahn en “kamwakelehda samworo kan,” me iei irail me keidi kan. (Mal. 3:2, 3; 1 Pit. 4:17) Dahme kahrehda?

8. Mwekid dah kei me wiawi mwurin pahr 1914?

⁸ Kerenlahng imwin pahr 1914, ekei Tohnsukuhl en Paipel kan mworusala pwehki ar sohte kohdahla nanleng. Nan pahr 1915 oh 1916, uhwong sang irail likin pwihn wet kahrehda doadoahk en kalohk en wawaila. Suwedsang met, mwurin Brother Russell mehla nan October 1916, uhwong tepida wiawi nan pwihnen Tohnsukuhl en Paipel ko. Meh pahmen sang sounapwalih (directors) isimen ko en Watch Tower Bible and Tract Society pelianda pilipilda en Brother Rutherford en kaweid pwihn wet. Re song en kahrehda saminimin nanpwungen brother ko, ahpw nan August 1917, re kohkohsang Pedel. Met uhdahn wia doadoahk en kamwakel ehu. Pil ehu, ekei Tohnsukuhl en Paipel kan dukula pahn meteikan pwehki arail masak aramas. Ahpw nin duwen pwihn ehu re mwekidki sapwellimen Sises doadoahk en kamwakelo oh wiahda wekidekla kan me anahn. Eri, Sises ketin kadeikirailda nin duwen Kristian mehlel kei me rasehng tuhke mwahu ko, ahpw e ketin soikala Kristian likamw koaros, pil iangahki koaros me iang pelien lamalam en Kristian likamw kan. (Mal. 3:5; 2 Tim. 2:19) Dahme wiawi mwuhr? Pwehn diarada, kitail pwurehng koasoiapene karasaras en tuhke mwahu ko oh dihpw suwed ko.

9, 10. (a) Dahme kitail pahn koasoiapene met duwen ahnsoun rahko? (b) Dahme keieu wiawi erein ahnsoun rahko?

⁹ Sises mahsanih: “Ahnsoun rahk, iei imwin kawa [“kaimwiseklahn koasoandi en mehkan,” NW].” (Mad. 13:39) Ahnsoun rahko tepida nan pahr 1914. Kitail pahn koasoiapene mwekid limau me Sises ketin kohpada ong ahnsowo.

¹⁰ Keieu iei rikirikpene en dihpw suwed ko. Sises mahsanih: “Ni [ahnsoun rahk] I nek ndaiong soundolung kan re en usada mahs dihpw suwed kan oh kihpene ni kapakap kei.” Mwurin pahr 1914, tohnleng kan tepida “usada” Kristian kan me rasehng dihpw suwed ko ni arail katohreirailsang me keidi kan, me iei “aramas akan me towedahr Wehin Koht.”​—Mad. 13:30, 38, 41.

11. Lao lel atail ahnsou, dahme kasalehda me Kristian mehlel kan weksang Kristian likamw kan?

¹¹ Ni rikirikpene wet eh wiawi, wekpeseng en pwihn riau wet tepida sansalda laud. (Kaud. 18:1, 4) Ni pahr 1919, e sansaldahr me Papilon Lapalap pwupwudier. Dahme keieu kasalehda me Kristian mehlel kan weksang Kristian likamw kan? Doadoahk en kalohk. Irail me tiengla mwowe nanpwungen Tohnsukuhl en Paipel kan tepida kalaudehla kesempwalpen iang doadoahk en kalohki Wehio. Karasepe, kisin pwuhk ehu (To Whom the Work Is Entrusted) me wiawihda nan pahr 1919, kangoange Kristian keidi koaros ren kalohkseli ihmw lel ihmw. Pwuhk wet koasoia: “Doadoahk wet mwomwen inenen laud, ahpw sapwellimen Kauno doadoahk wet, oh pwehki sapwellime kehl me se pahn kapwaiada pwukoa wet. E wia pwais kaselel en iang wia met.” Ia duwen arail mwekidki met? Kahn Iroir (lokaiahn wai) en pahr 1922 koasoia me sang ahnsowo kohdo, Tohnsukuhl en Paipel kan kalaudehla arail doadoahk en kalohk. Sohte pwand, kalohk en ihmw lel ihmw wiahla kilelepen Kristian lelepek ko, duwehte dahme kin wiawi nan atail ahnsou.

12. Sang iahd me pwihnen tuhke mwahu ko rikirikpene?

¹² Keriau, rikirikpene en tuhke mwahu ko. Sises ketin padahkihong sapwellime tohnleng kan: “A wahntuhke mwahu kan en kohpene oh nekinekla nan imwei imwen nahk.” (Mad. 13:30) Sang pahr 1919, me keidi kan rikirikpene ong mwomwohdiso en Kristian keidi kan me kamwakeldahr. Ong Kristian keidi pwuko me pahn momour ni kaimwiseklahn imwin koasoandi wet, kaimwiseklahn rikirikpene pahn wiawi ni ahnsou me re ale ketingparail nanleng.​—Dan. 7:18, 22, 27.

13. Ia duwen Kaudiahl 18:7 eh kasalehda duwen madamadau en lihen netiki paliwere de Papilon Lapalap, iangahki Pwihn en Kristian likamw kan ahnsou wet?

 ¹³ Kesiluh, sengiseng oh ngihrail kan tehtehrek. Mwurin tohnleng ko kihpene dihpw suwed ko ong ni kapakap kei, dahme wiawi? Sises ketin mahsanihki irair en dihpw suwed ko: “Wasa re pahn sengiseng ie oh ngihrail kan tehtehrek.” (Mad. 13:42) Ia duwe, met wiwiawi ahnsou wet? Soh. Rahnwet, Pwihn en Kristian likamw kan, kisehn lihen netiki paliwereo, kin ndindahkihte pein ih: “Iet ngehi, lih nanmwarki men me mwomwohdo met! Kaidehn liohdi men ngehi, I sohte mwahn pahn lelohng nsensuwed!” (Kaud. 18:7) Mehlel, Pwihn en Kristian likamw kan pehm me irail me wia kakaun, oh kin mwomwehda ‘lih nanmwarki men me mwomwohd’ pohn irail lapalap kan en pelien koperment. Ahnsou wet, irail me rasehng dihpw suwed ko kin suhsuwei, kaidehn sengiseng. Ahpw met pahn kereniong wekidekla.

14. (a) Iahd oh dahme kahrehda Kristian likamw kan pahn sengiseng laud oh “ngihrail kan tehtehrek”? (b) Ia duwen wekideklahn atail wehwehki Madiu 13:42 eh pahrekiong Melkahka 112:10? (Menlau kilang ire kan mwurio.)

¹⁴ Erein kahn kamakam kowahlapo, mwurin pwihnen pelien lamalam likamw kan koaros sohrala, irail me mahs kin iang pwihn wet pahn tangalahng rukula, ahpw re sohte pahn diar wasa mwahu en rukula. (Luk 23:30; Kaud. 6:15-17) Eri, ni ar esehda me sohte wasa ehu ren pitsang kasohrala, re pahn sengiseng laud oh “ngihrail kan tehtehrek” pwehki ar lingeringer. Nin duwen Sises eh ketin kohpada nan sapwellime kokohp duwen kahn kamakam kowahlapo, ni ahnsoun apwalo, re “pahn nsensuwedlaudkihla.” *​—Mad. 24:30; Kaud. 1:7.

15. Dahme pahn wiawiong dihpw suwed ko, oh iahd me mwekid wet pahn wiawi?

¹⁵ Kapahieu, kesehla nan uhmw mwehl. Dahme pahn wiawiong kapakap kan en dihpw suwed ko? Tohnleng kan pahn “keseiraillahng nan uhmw mwehl.” (Mad. 13:42) Met wehwehki kasohrala unsek. Eri, irail ko me iang pwihn en pelien lamalam likamw kan mahs pahn kasohrala ni kaimwiseklahn kahn kamakam kowahlapo, Armakedon.​—Mal. 4:1.

16, 17. (a) Ia kaimwiseklahn mwekid me Sises ketin mahsanih nan sapwellime karasaraso? (b) Dahme kahrehda kitail kak nda me pweidahn mwekid wet saikinte wiawi?

¹⁶ Kelimau, lingalingla. Sises ketin kaimwisekala sapwellime kokohp ni eh mahsanih: “Ni ahnsowo me pwung kan pahn lingalingla duwehte ketipin nan wehin Samarailo.” (Mad. 13:43, NW) Iahd oh ia wasa me met pahn wiawi? Pweidahn mahsen pwukat saikinte wiawi. Sises ketin kohpada, kaidehn mwekid ehu me wiwiawi sampah ahnsou wet, ahpw mwekid ehu me pahn wiawi nanleng ni ahnsou kohkohdo. * Tehk kahrepe riau wet.

¹⁷ Keieu, peidek duwen “iahd.” Sises  mahsanih: “Ni ahnsowo me pwung kan pahn lingalingla.” E sansal me “ni ahnsowo” kin dokedoke mwekid me Sises ahpwtehn mahsanih duwe, me iei “keseiraillahng nan uhmw mwehl.” Met wiawi ni kaimwiseklahn kahn kamakam kowahlap. Eri, “lingalingla” en me keidi kan anahne pil wiawi ni ahnsou kohkohdo. Keriau, peidek duwen “ia wasa.” Sises mahsanih me me pwung kan pahn ‘lingalingla nan wehio.’ Ia wehwehn met? E wehwehki me me keidi lelepek koaros me mihmihte nin sampah pahn kileldier mwurin keieun mwekid en kahn kamakam kowahlap eh pweidahr. Eri, nin duwen me sansalda nan sapwellimen Sises kokohpo duwen kahn kamakam kowahlapo, re pahn rikirikpene ong nanleng. (Mad. 24:31) Ih wasao me re pahn lingalingla “nan wehin Samarailo,” oh mwurinte mahwen en Armakedon, re pahn iang nan “kapwopwoud en Sihmpwulo” nin duwen sapwellimen Sises lih kamwohd peren.​—Kaud. 19:6-9.

18, 19. Ia duwen atail paiekihda atail wehwehkihla sapwellimen Sises kokohp duwen tuhke mwahu ko oh dihpw suwed ko?

¹⁸ Ia duwen atail paiekihda karasaras en tuhke mwahu ko oh dihpw suwed ko? Tehk ahl siluh. Keieu, e kaloalehla atail wehwehki mehkan. Karasaraso kasalehda kahrepe kesempwal ehu duwen dahme kahrehda Siohwa ketin mweidohng suwed en mie. E ketin “kanengamahiong irail kan me milahr pahn sapwellime engieng” pwehn kaunopada irail me “milahr pahn sapwellime kalahngan,” me iei pwihnen tuhke mwahu ko. * (Rom 9:22-24) Keriau, e kakehlakahla atail likih dahme kitail kamehlele. Ni imwio eh kerendohr, atail imwintihti kan pahn kalaudehla arail uhwong kitail, ahpw ‘re sohte pahn kaloweikitaildi.’ (Wadek Seremaia 1:19.) Duwehte Siohwa eh ketin pere pwihnen tuhke mwahu ko sangete mahs, ih duwen Samatail nanleng pahn ketin ieiang kitail “rahn koaros” ni ahnsou kan me kohkohdo sang ni eh ketin doadoahngki Sises oh tohnleng kan.​—Mad. 28:20.

¹⁹ Kesiluh, karasaraso sewese kitail en kak kasawihada pwihnen tuhke mwahu ko. Dahme kahrehda met uhdahn kesempwal? Atail ese ihs Kristian kan me rasehng tuhke mwahu ko kin kesempwal ong atail en diarada pasapeng en peidek me Sises ketikihda nan sapwellime kokohp duwen imwin rahn akan. E ketin keinemwe: “Ihs me uhdahn ladu lelepek oh loalokongo?” (Mad. 24:45, NW) Iren onop riau kan en mwuhr pahn sapengala peidek wet.