Awonani, Ini Nde Namwi Mazuŵa Ngosi
Awonani, Ini Nde Namwi Mazuŵa Ngosi
‘Awonani, ini nde namwi mazuŵa ngosi mpaka ku umari wa mgonezi wo.’—MAT. 28:20.
SANIYANI KWAMUKA KWA MAFUMBU YANGA:
Nchifukwa wuli tikamba kuti Akhristu akusankhika aja achisanirika pacharu chapasi kutuliya m’chaka cha 100 C.E., kuzifika sonu?
Kumbi Yesu wayenderiyanganji kutuliya mu 1914?
Ndi vinthu wuli vazamuchitika kunthazi, vo vikonkhoskeka mu ntharika yaku Yesu ya tirigu ndi duru?
1. (a) Konkhoskani mwakudumuwa ntharika ya tirigu ndi duru. (b) Kumbi Yesu wangukamba kuti ntharika yeniyi ying’anamuwanji?
NTHARIKA yimoza ya Ufumu yo Yesu wangukamba, yikonkhoska kuti mweneku munda wangumija tirigu mumunda waki kweni murwani wanguza kuzimijamu duru. Duru lo lingukuwa kuruska tirigu kweni mweneku munda wangukambiya aŵanda kuti: “Virekeni vosi viŵi vikuliyi pamoza mpaka chivuna.” Pa nyengu yakuvuna duru lituzgikengemu kweni tirigu wawunjikikengi pamoza. Yesu ndiyu wangukonkhoska ntharika yeniyi. (Ŵerengani Mateyu 13:24-30, 37-43.) Kumbi ntharika yeniyi yilongonji? (Wonani kabokosi kakuti, “Tirigu ndi Duru.”)
2. (a) Kumbi vo vichitika mumunda wo wakonkhoskeka mu ntharika yaku Yesu, vilongonji? (b) Kumbi tikambiskanengenji mu nkhani iyi?
2 Vo vichitika mumunda wa munthu mwenuyu, vilongo nyengu ndipuso mo Yesu wawunganiskiyengi Akhristu akusankhika, wo amiya tirigu. Yiwu azamuwusa nayu mu Ufumu waki ndipu atuliya mu mitundu yosi ya ŵanthu. Kumija tirigu kukwamba pa Pentekoste mu 33 C.E. Ndipu kuvuna kwazamumala asani Akhristu akusankhika wo azamuja ndi umoyu pa umaliru wa mgonezu wunu azipaskika chisimikizgu, pavuli paki aziluta kuchanya. (Mat. 24:31; Chiv. 7:1-4) Nge mo viŵiya ndi munthu yo wakwera pachanya pa phiri kuti wawona vinthu vinandi, ndimuso viliri ndi ntharika iyi, yititiwovya kuziŵa vo vazamuchitika vyaka pafupifupi 2,000. Kumbi ndi vinthu nivi vakukwaskana ndi Ufumu vo tiwona kuti vazamuchitika? Ntharika iyi yikonkhoska nyengu yakumijiya mbewu, yakukuliya kweniso yakuvuniya. Nkhani iyi yikonkhoskengi ukongwa za nyengu yakuvuniya. a
YESU WAŴAWONERIYANGA
3. (a) Nchinthu wuli cho chinguchitika pavuli pa chaka cha 100 C.E.? (b) Mwakukoliyana ndi lemba la Mateyu 13:28, kumbi ndi fumbu nili lo lingufumbika, nanga mbayani wo angufumba? (Wonani mazu ngakumaliya.)
3 Pavuli pa chaka cha 100 C.E., Akhristu aboza angwamba kuziŵika pacharu chapasi, pa nyengu yeniyi ndipu “nganguwoneka maduru.” (Mat. 13:26) Pavuli pa chaka cha 300 C.E., Akhristu wo amiyanga duru ŵenga anandi ukongwa kuruska Akhristu akusankhika. Kumbukani kuti mu ntharika ya tirigu ndi duru, aŵanda angufumba mbuyawu kuti waŵazomerezgi kuchizuwamu duru mumunda. b (Mat. 13:28) Kumbi mbuyawu wangumuka wuli?
4. (a) Kumbi vo Yesu wangumuka vilongonji? (b) Kumbi Akhristu wo amiya tirigu angwamba zukwanji kuziŵika?
4 Pa nkhani ya tirigu ndi duru, Yesu wangukamba kuti: “Virekeni vosi viŵi vikuliyi pamoza mpaka chivuna.” Vo Yesu wangumuka vilongo kuti Akhristu akusankhika wo amiya tirigu aja achisanirika pacharu chapasi kutuliya m’chaka cha 100 C.E., kuzifika sonu. Venivi vilongo kuti vauneneska chifukwa pavuli paki Yesu wangukambiya akusambira ŵaki kuti: ‘Ini nde namwi mazuŵa ngosi mpaka ku umari wa mgonezi wo.’ (Mat. 28:20) Mwaviyo, Yesu watingi waŵawoneriyengi Akhristu akusankhika mazuŵa ngosi mpaka pa umaliru. Chifukwa chakuti Akhristu aboza wo amiyanga duru ŵenga anandi, tiziŵa cha kuti ndiyani yo wenga nge tirigu pa nyengu yitali yeniyi. Kwa vyaka pafupifupi 30 kuvuna kwechendayambi, Akhristu wo amiyanga tirigu angwamba kuziŵika. Kumbi anguziŵika wuli?
MUTHENGA ‘WANGUNOZGA NTHOWA’
5. Kumbi uchimi waku Malaki ungufiskika wuli mu nyengu ya akutumika?
5 Kutuliya po Yehova wangukambiya mchimi Malaki kuti wakambi vinthu vo vikukonkhoskeka mu ntharika ya tirigu ndi duru, pangujumpha vyaka vinandi kuti Yesu wakambi ntharika yeniyi. (Ŵerengani Malaki 3:1-4.) Yohane M’batizi ndiyu wenga ‘thenga lo lingunozga nthowa.’ (Mat. 11:10, 11) Wati waza m’chaka cha 29 C.E., Ayisraele ŵenga pafupi kweruzgika. Yesu wenga thenga lachiŵi. Iyu wangutowesa kaŵi nyumba yakusopiyamu ya ku Yerusalemu, pakwamba wati wayamba ŵaka uteŵeti waki ndipu kachiŵi, we pafupi kumaliza uteŵeti waki. (Mat. 21:12, 13; Yoh. 2:14-17) Yesu wakhumbikanga kugwira nchitu yakutowesa kwa nyengu yitali.
6. (a) Kumbi ndi uchimi nuwu waku Malaki wo wafiskika? (b) Kumbi Yesu wanguŵayendere zukwanji Akhristu akusankhika kuti wawoni asani alondo vo Yehova wakunozga pa nkhani ya kusopa kwauneneska? (Wonani so mazu ngakumaliya.)
6 Kumbi ndi uchimi nuwu waku Malaki wo wafiskika? Kwa vyaka vinandi chaka cha 1914 chechendafiki, C. T. Russell ndi abwezi ŵaki agwiranga nchitu yakuyanana ndi yo wagwiranga Yohane M’batizi. Nchitu yeniyo yenga yakukhumbika ukongwa chifukwa yinguchitiska kuti uneneska wa m’Bayibolo uziŵiki. Akusambira Bayibolo, asambizanga uneneska wa vo sembi yaku Khristu ying’anamuwa, anguvumbuwa kuti chisambizu chakuti ŵanthu alangika ku motu wamuyaya nchaboza ndipuso apharazganga kuti Nyengu ya Amitundu ye pafupi kumala. Chinanga kuti venga viyo, penga mbwenu ŵanthu anandi wo ŵenga mu visopa, wo akambanga kuti alondonga Khristu. Mwaviyo, penga fumbu lakusuzga kumuka lakuti: Kumbi mbayani pakati pa ŵanthu ŵenaŵa wo amiyanga tirigu? Kuti fumbu lenili limukiki, Yesu wangwamba kwendere mu 1914, kuti wawoni asani Akhristu akusankhika alondo vo Yehova wakunozga pa nkhani ya kusopa kwauneneska. Kwendere kwenuku ndipuso kutowesa, kwakhumbikanga kuchitika kwa nyengu yitali ndipu kunguchitika kutuliya mu 1914 kuzifika mkatikati mwa chaka cha 1919. c
VYAKA VO WANGWENDERE NDIPUSO KUTOWESA
7. Kumbi Yesu wangusaniyanji wati wayamba kwendere m’chaka cha 1914?
7 Kumbi Yesu wangusaniyanji wati wayamba kwendere? Iyu wangusaniya kuti penga Akusambira Bayibolo amanavi wo anguyesesa kwa vyaka vakujumpha 30, kugwiriskiya nchitu nthazi zawu ndipuso chuma chawu kuti apharazgi mwaphamphu. d Yesu ndi angelu atenere kuti angukondwa ukongwa kusaniya kuti ŵanthu amanavi ŵenaŵa ŵenga ndi chivwanu chakukho ndipu ŵengavi kuwere vuli chifukwa cha Akhristu aboza. Kweni pakhumbikanga mbwenu ‘kutozga ŵana ŵaku Levi,’ wo mbakhristu akusankhika. (Mal. 3:2, 3; 1 Pet. 4:17) Nchifukwa wuli akhumbikanga kutoweseka?
8. Nchinthu wuli cho chinguchitika pavuli pa chaka cha 1914?
8 Kukumaliya kwa chaka cha 1914, Akusambira Bayibolo anyaki anguguŵa chifukwa chakuti anguluta cha kuchanya. Mu 1915 ndi mu 1916, nchitu yakupharazga yinguwere vuli chifukwa cha kususkika. Mubali Russell wati wafwa mu October 1916, venga vakuchitiska chitima ukongwa kuti Akusambira Bayibolo anyaki nawu angwamba kususka. Pa Akusambira Bayibolo 7 wo alongozganga Watch Tower Bible and Tract Society, anayi angugaruka chifukwa chakuti akananga kuti Mubali Rutherford ndiyu wayambi kulongozga. Yiwu anguyesesa kutimbanyizga abali ndipu mu August 1917, angutuwapu pa Beteli. Iyi yenga nadi nyengu yakutowesa! Akusambira Bayibolo anyaki anguwopa ŵanthu kweni anyaki anguzomera kutoweseka ndi Yesu ndipu angusintha. Yesu wanguŵasankha kuti aje Akhristu auneneska kweni Akhristu wo angugarukiya kusazgapu wosi wo angusanirika mu Visopa va Chikhristu, wanguŵakana. (Mal. 3:5; 2 Tim. 2:19) Nchinthu wuli chinguchitika pavuli paki? Kuti tiziŵi vo vinguchitika, tiyeni tiwere so ku ntharika ya tirigu ndi duru.
VO VAJA VICHICHITIKA KUVUNA KWATI KWAYAMBA
9, 10. (a) Kumbi tikambiskanengenji pa nkhani ya nyengu yakuvuna? (b) Nchinthu wuli cho chingwamba kuchitika pa nyengu yakuvuna?
9 Yesu wangukamba kuti: “Ndipu kuvuna ko nkhamaridu ka mgonezi wo.” (Mat. 13:39) Nyengu yakuvuna yeniyi yikwamba mu 1914. Sonu tikambiskanengi vinthu 5 vo Yesu wangukamba kuti vazamuchitika pa nyengu yakuvuna.
10 Chakwamba, azamuwunjika duru. Yesu wangukamba kuti: “Mu nyengu ya kuvuna ndiŵaneniyengi ŵakuvuna, Unjikani dankha maduru, ngamangeni nchindanchinda.” Pavuli pa chaka cha 1914, angelu angwamba ‘kuwunjika’ Akhristu wo amiya duru, kuŵatuzgaku ku ‘ŵana ŵa ufumu’ akusankhika.—Mat. 13:30, 38, 41.
11. Kutuliya kali kuzifika sonu, nchinthu wuli cho chipambaniska Akhristu auneneska ndi aboza?
11 Nchitu yo yati yalutiriya, kupambana kwa magulu ngaŵi kungwamba kuwoneka kuruska kali. (Chiv. 18:1, 4) Po chafikanga chaka cha 1919, vinguwoneke limu kuti Babiloni Mukulu wawa kung’anamuwa kuti wengavi nthazi pa Akhristu auneneska. Nanga nchinthu wuli cho chingupambaniska Akhristu auneneska ndi aboza? Yenga nchitu yakupharazga. Abali wo alongozganga angwamba kuwona kuti nchitu yakupharazga Ufumu yenga yakukhumbika ukongwa. Mwakuyeruzgiyapu, mu 1919, angusindikiza kabuku ko kanguchiska Akhristu wosi akusankhika kupharazga nyumba ndi nyumba. (To Whom the Work Is Entrusted) Kabuku kenaka kangukamba kuti: “Nchitu yiwoneka kuti njikulu ukongwa kweni nja Ambuya ndipu ndi nthazi zawu tiyigwirengi. Mwe ndi mwaŵi wakugwiraku nchitu yeniyi.” Nchinthu wuli cho chinguchitika? Chigongwi cha Alinda cha Chizungu cha 1922, chingukamba kuti kwambiya nyengu yo kuluta kunthazi Akusambira Bayibolo anguchita phamphu kupharazga. Pangujumpha nyengu yimanavi, Akhristu akugomezgeka ŵenaŵa angwamba kuziŵika ndi nchitu yakupharazga nyumba ndi nyumba, nge mo viliri mazuŵa nganu.
12. Kumbi Akhristu wo amiya tirigu akwamba zukwanji kuwunganiskika?
12 Chachiŵi, azamuwunjika tirigu. Yesu wangulanguliya angelu kuti: “Tirigu yo rongani mu nkhokwi yangu.” (Mat. 13:30) Kwambiya mu 1919, Akhristu akusankhika aja achiwunjikikiya pamwenga kuti aja achiwunganiskikiya mu mpingu wachikhristu wo wungutoweseka. Akhristu akusankhika wo ajengi ŵeche ndi umoyu mpaka pakumaliya pa mgonezu wunu, azamuwunganiskika kakumaliya pa nyengu yo azamuluta kuchanya.—Dan. 7:18, 22, 27.
13. Kumbi lemba la Chivumbuzi 18:7, lilongo kuti huli pamwenga Babiloni Mukulu kusazgapu Visopa vachikhristu vichitanji?
13 Chachitatu, kuliya ndi kukukuta minyu. Nchinthu wuli cho chatingi chichitikengi pavuli pakuti angelu amanga duru nchindanchinda? Pakukamba za vo atingi achitengi ŵanthu wo amiya duru, Yesu wangukamba kuti: “Kweniko kuŵengi kuliya ndi kukukuta kwa minyu.” (Mat. 13:42) Kumbi venivi vichitika sonu? Awa. Mazuŵa nganu Visopa va Chikhristu vo ve mu gulu la huli, veche kukamba kuti: “Ndija fumukazi ini, kuti ndini choko cha, ndipu kuti nkhawonanga chitenje cha.” (Chiv. 18:7) Mbuneneska, Visopa va Chikhristu vitijiwona kuti ve ndi mazaza, vigomezga kuti ‘ve nge fumukazi’ ndipu vidanjiliya gulu la alongozgi andali. Tingakamba kuti, sonu panu ŵanthu wo amiya duru aliya cha kweni atijitumbwa. Kweni venivi visinthengi pambula kuswera yapa.
14. (a) Ndi zukwanji po Akhristu aboza ‘azamukukuta minyu,’ nanga chifukwa wuli? (b) Kumbi mo sonu tivwiya lemba la Mateyu 13:42, vikoliyana wuli ndi fundu yo yikonkhoskeka pa Sumu 112:10? (Wonani mazu ngakumaliya.)
14 Pa chisuzgu chikulu, asani visopa vosi vaboza vabwangandulika, ŵanthu wo alondo visopa venivi azamuthaŵa kuti akabisami kweni azamusaniya malu cha ngakuti abisameku. (Luka 23:30; Chiv. 6:15-17) Pavuli pakuti aziŵa kuti angathaŵa cha, azamuliya chifukwa chakumala zeru ndipu ‘azamukukuta minyu’ chifukwa chakukwiya. Nge mo Yesu wangukambiya mu uchimi waki za chisuzgu chikulu, pa nyengu yakusuzga yeniyi, ‘azakujipuma ko atenje.’ e—Mat. 24:30; Chiv. 1:7.
15. Nchinthu wuli chichitikiyengi duru, nanga venivi vazamuchitika zuŵanji?
15 Chachinayi, waponyekengi mung’anju ya motu. Nchinthu wuli chichitikiyengi duru? Angelu ‘aponyengi [duru] mung’anju ya motu.’ (Mat. 13:42) Venivi ving’anamuwa kubayika. Wosi wo alondo visopa vaboza azamubayika pakumaliya pa chisuzgu chikulu, po mpha Aramagedoni.—Mal. 4:1.
16, 17. (a) Nchinthu wuli chakumaliya cho Yesu wangukonkhoska mu ntharika yaki? (b) Nchifukwa wuli tikamba kuti venivi vazamufiskika kunthazi?
16 Chachinkhondi, ŵaŵalengi nge ndi lumwi. Yesu wangumaliza kukonkhoska uchimi waki mwakukamba kuti: “Penipo ŵarunji ŵaŵalengi nge ndi dazi [lumwi] mu ufumu wa Auskeu.” (Mat. 13:43) Kumbi venivi vazamuchitika zukwanji, nanga vazamuchitikiya pani? Mazu ngenanga ngazamufiskika kunthazi. Vo Yesu wangukamba ndivu cha vichitika sonu pacharu chapasi kweni vazamuchitikiya kuchanya. f Tiyeni tikambiskani vifukwa viŵi vo tikambiya viyo.
17 Chakwamba, tiyeni tikambiskani “nyengu” yo venivi vazamuchitikiya. Yesu wangukamba kuti: ‘Penipo ŵarunji ŵaŵalengi.’ Mazu ngakuti “penipo,” ngalongo nyengu yo vinthu vo Yesu wangukamba vazamuchitikiya pavuli pakuti ‘aponya duru mu ng’anju ya motu.’ Venivi vazamuchitika pakumaliya pa chisuzgu chikulu. Mwaviyo, Akhristu akusankhika ‘azamuŵala nge lumwi’ kunthazi. Chachiŵi, tiyeni tikambiskani “ko” vinthu venivi vazamuchitikiya. Yesu wakukamba kuti arunji ‘azamuŵala nge lumwi mu ufumu.’ Kumbi venivi ving’anamuwanji? Ving’anamuwa kuti Akhristu akusankhika wosi akugomezgeka wo azamukuŵa panu pasi asani chisuzgu chikulu chakapu, azamuja kuti alonde chisimikizgu chawu chakumaliya. Pavuli paki, nge mo valongoreke mu uchimi waku Yesu wo ukamba za chisuzgu chikulu, Akhristu ŵenaŵa azamuwunganiskika kuti aluti kuchanya. (Mat. 24:31) Kweniko, azamuŵala “mu ufumu wa Auskeu.” Asani Aramagedoni yalutapu, pazamujumpha nyengu yimanavi, yiwu azamukondwa ukongwa ndi Yesu ndipu azamuja “nthengwa ya Mwana-mbereri.”—Chiv. 19:6-9.
MO TIYANDULIYA
18, 19. Kumbi tiyanduwa wuli chifukwa chakuziŵa vo ntharika yaku Yesu ya tirigu ndi duru ying’anamuwa?
18 Kumbi tiyanduwa wuli kutuliya mu vinthu vo vazamuchitika kunthazi vo vikonkhoskeka mu ntharika yeniyi? Pe vinthu vitatu vo tiyanduwa. Chakwamba, yatiwovya kuziŵa vinthu vinandi. Yavumbuwa chifukwa chikulu cho Yehova wazomerezge kuti vinthu viheni vichitikengi. Iyu ‘wakulekerezga ŵanthu wo wangukaripa nawu’ kuti wanozgekereski ‘ŵanthu wo akulonde lisungu laki,’ wo amiya tirigu. g (Ŵar. 9:22-24) Chachiŵi, yititiwovya kuti tije ndi chigomezgu chakukho. Po umaliru we pafupi, arwani ŵidu alutengi panthazi kulimbana nasi, ‘kweni kuti ŵakapundanga cha.’ (Ŵerengani Yeremiya 1:19.) Kutuliya kali Yehova waja wachivikiliya Akhristu akusankhika wo amiya tirigu, mwaviyo, kuziya mwaku Yesu ndi angelu, Ada ŵidu akuchanya aŵengi nasi ‘mazuŵa ngosi’ mpaka pa umaliru.—Mat. 28:20.
19 Chachitatu, ntharika yeniyi yititovya kuziŵa vo tirigu wamiya. Nchifukwa wuli kuziŵa venivi nkhwakukhumbika ukongwa? Kuziŵa venivi kutiwovyengi kusaniya kwamuka kwa fumbu lo Yesu wangufumba mu uchimi waki wakukamba za mazuŵa ngakumaliya. Iyu wangufumba kuti: “Na, ndiyani muŵanda wamagomekezgeka yo ndi wakuwamu?” (Mat. 24:45) Nkhani ziŵi zakulondopu zimukengi umampha fumbu lenili.
MAZU NGAKUMALIYA: (Asani muŵerenga ndimi, mazu yanga ngaŵerengeki nge mazu nga mumphata.)
[Mazu ngam’mphata]
a Ndimi 2: [1] Kuti mukumbuki vo fundu zinyaki za ntharika yeniyi zing’anamuwa, titikuchiskani kuti muŵerengi nkhani ya mutu wakuti,“Olungama Adzawala Ngwee Ngati Dzuwa,” mu Chigongwi cha Alinda cha Chichewa, cha March 15, 2010.
b Ndimi 3: [2] Kutuliya pa nyengu yo akutumika aku Yesu akufwiya, Akhristu akusankhika wo ŵeche pacharu chapasi amiya tirigu ndipu aŵanda amiya angelu. Pavuli paki, ntharika yo yikonkhoska kuti angelu ndiwu awunjika duru.—Mat. 13:39.
c Ndimi 6: [3] Fundu yeniyi nja sonu. Kali tagomezganga kuti Yesu wanguza kuziyendere mu 1918.
d Ndimi 7: [4] Kutuliya mu 1910 kuzifika mu 1914, Akusambira Bayibolo angugaŵiya mabuku pafupifupi 4,000,000 kweniso timapepala ndi timabuku takujumpha 200,000,000.
e Ndimi 14: [5] Fundu yeniyi nja sonu pa vo tasanda pa Mateyu 13:42. Mu nyengu yakuvuli, m’mabuku ngidu tingulemba kuti Akhristu aboza aja ‘achiliya ndi kukukuta minyu’ kwa vyaka vinandi, chifukwa chakuti ‘ŵana ŵa ufumu’ anguvumbuwa vo achitanga kuti yiwu “mbana ŵa muheni yo.” (Mat. 13:38) Sonu, tikhumbika kuziŵa kuti fundu ya kukuta minyu yikoliyana ndi vo vazamuchitika pa nyengu yo ŵe pafupi kubayika.—Sumu 112:10.
f Ndimi 16: [6] Lemba la Danyele 12:3, likamba kuti “wo mbavinjeru [Akhristu akusankhika] ŵamuŵala nge nkhung’anima kwa mlengalenga.” Pa nyengu yo ŵeche pacharu chapasi aŵala mwakugwira nchitu yakupharazga. Chinanga kuti ve viyo, lemba la Mateyu 13:43, lilongo kuti azamuŵala nge lumwi kunthazi, mu Ufumu wakuchanya. Kali tagomezganga kuti malemba ngosi ngaŵi ngakamba kuti aŵala mwakugwira nchitu yakupharazga.
g Ndimi 18: Wonani buku lakuti, Yandikirani kwa Yehova, peji 288-289.
[Mafumbu]
[Chithuzi papeji 15]
[Tchati papeji 16, 17]
TIRIGU NDI DURU
MU 33 C.E. KUMIJA TIRIGU KUKWAMBA
WAKUMIJA: Yesu
MBEWU YAMAMPHA YIMIJIKA: Akhristu asankhika
MUNDA: Charu chapasi
‘Munthu wangumija mbeu yamampha mumunda waki’ (Mat. 13:24)
WAMAWONGU: Diabolo
ŴANTHU AGONANGA: Kufwa kwa akutumika
‘Kweni ŵachira ŵanthu, wamawongu wangumijamu maduru’ (Mat. 13:25)
TIRIGU: Akhristu akusankhika
DURU: Akhristu aboza
‘Vosi viŵi vikuliyi pamoza mpaka chivuna’ (Mat. 13:30)
MU 1914 CHIVUNA CHIKWAMBA
AŴANDA/ AKUVUNA: Angelu
Akhristu wo amiyanga duru angutuzgikaku kwa Akhristu akusankhika wo “mbana ŵa ufumu”
Awunjika duru ndipu atilimanga nchindanchinda (Mat. 13:30)
(Wonani ndimi 10-11)
MU 1919 ANGUWUNGANISKIKIYA MUNKHOKWI: Akhristu akusankhika aja achiwunjikikiya pamwenga kuti aja achiwunganiskikiya mu mpingu wachikhristu wo wungutoweseka
NYENGU YACHIVUNA
‘Kuronga tirigu munkhokwi’ (Mat. 13:30) (Wonani pandimi 12)
ARAMAGEDONI
Pa Aramagedoni, duru lazamuponyeka pamotu
AŴALA NGE LUMWI
Asani kwazija kanyengu kamanavi kuti Aramagedoni yichitiki, Akhristu akusankhika akugomezgeka, azamuwunganiskikiya kuchanya
Ŵarunji aŵala nge lumwi mu Ufumu (Mat. 13:43)
(Wonani ndimi 16-17)
Duru liponyekengi mung’anju ya motu (Mat. 13:42) (Wonani pandimi 15)
[Chithuzi]
[Chithuzi]
[Chithuzi]
[Chithuzi]
[Chithuzi]
[Chithuzi]
[Chithuzi]
[Chithuzi]
[Chithuzi]
[Chithuzi]
[Chithuzi papeji 19]
Kukoliyana kwa Visopa vachikhristu ndi alongozgi andali kumalengi pambula kuswera yapa (Wonani pandimi 13)
