1, 2. ?Jisas i yusum hu blong givim kakae long yumi, mo from wanem i impoten we yumi save slef ya?

WAN sista i raetem leta i go long ol brata we oli wok long hedkwota long Brooklyn, mo hem i talem se: “Ol Brata, plante taem yufala i wokem ol buk mo magasin we oli stret long mi, mo oli kamaot long stret taem.” ?Yu tu yu tingting olsem sista ya? Ating plante long yumi oli tingting olsem. Be yumi no mas sapraes long samting ya.

² Ol kakae long spirit we yumi kasem long stret taem blong hem, oli pruvum se Jisas we hem i Hed blong kongregesen, i holem promes blong hem se bambae hem givim kakae long yumi. ?Be hem i yusum hu blong mekem olsem? Taem hem i tokbaot saen we i soemaot se hem i stap, hem i talem se bambae hem i yusum “slef we i stret mo waes” blong givimaot “kakae long [ol man blong hem] long stret taem blong hem.”(Ridim Matiu 24:45-47.) * Slef ya nao we Jisas i yusum blong givim kakae long ol gudfala man blong hem long taem ya blong ol las dei. I impoten tumas we yumi save slef ya. Yumi nidim slef ya blong yumi stap gud long saed blong spirit mo blong yumi fren gud wetem Jehova.—Mat. 4:4; Jon 17:3.

3. ?Long ol buk blong yumi bifo, yumi talem wanem long saed blong parabol blong slef?

³ ?Wanem mining blong parabol blong Jisas long saed blong slef ya? Long ol buk blong yumi bifo, yumi stap talem se: Long Pentekos long yia 33, Jisas i putumap slef ya blong i lukaot long ol man blong hem. Slef ya hemia olgeta tabu Kristin we oli stap yet long wol, stat long taem blong Jisas i kam kasem taem blong yumi. Mo ol man blong hem, hemia ol tabu Kristin. Long 1919, Jisas i putumap slef ya blong i “lukaot long olgeta samting blong hem,” hemia olgeta samting blong Kingdom we oli stap long wol ya. Be taem yumi stadi gud bakegen mo yumi prea long Jehova blong i givhan long yumi, yumi luksave se yumi nidim blong mekem sam jenis long save we yumi gat fastaem long saed blong slef we i stret mo  waes. (Prov. 4:18) I gud yumi lukluk bakegen long parabol ya blong faenemaot olsem wanem mining blong hem i stret long yumi, nating se bambae yumi laef long heven no long wol.

4-6. ?From wanem yumi talem se parabol blong slef i stat kamtru nomo, afta long 1914?

⁴ Ol vas raonabaot long parabol blong slef we i stret mo waes, oli soemaot se parabol ya i no stat blong kamtru long taem blong Pentekos long yia 33, be hem i stat kamtru long taem blong en. Bambae yumi luk from wanem yumi talem olsem.

⁵ Parabol ya i joen wetem profet tok blong Jisas long saed blong ‘saen we bambae i soemaot we [hem] i stap, mo klosap wol i finis.’ (Mat. 24:3, NW) Fas haf blong profet tok ya i stap long Matiu 24:4-22. Hem i kamtru long tu defren taem. Hem i kamtru fastaem long stat blong yia 33 go kasem yia 70. Mo hem i kamtru bakegen long wan fasin we i bigwan moa, long taem blong yumi. ?Olsem wanem? ?Hemia i min se ol tok blong Jisas long saed blong slef ya bambae i kamtru long tu defren taem tu? Nogat, i no minim olsem.

⁶ Long Matiu 24:29, Jisas i stat blong tokbaot moa, ol samting we bambae oli hapen long taem blong yumi. (Ridim Matiu 24:30, 42, 44.) Hem i tokbaot samting we bambae i hapen long taem blong bigfala trabol, mo i talem se long taem ya, ol man bambae ‘oli save luk Pikinini blong Man, i kamaot long klaod long skae.’ Mo long ol man we oli laef long taem blong ol las dei, hem i talem long olgeta blong oli lukaot gud, i se: “Yufala i no save wanem dei, mi, mi Masta blong yufala, bambae mi kamtru long hem” mo “mi Pikinini blong Man, bambae mi kamtru long taem we yufala i no tingbaot.” * Jisas i tokbaot parabol blong slef, taem hem i stap tokbaot ol samting we bambae oli hapen long ol las dei. From samting ya, yumi save talem se tok blong Jisas long saed blong slef ya i stat blong kamtru nomo, afta we ol las dei oli stat long 1914. Tingting ya i stret. ?From wanem?

7. ?Wanem kwestin i kamaot long stat blong taem blong tekemaot kakae, mo from wanem?

⁷ Yu traem tingbaot bakegen kwestin ya: “?Hu ya slef we i stret mo waes?” Long taem blong ol fas Kristin, i no gat plante man we i askem kwestin ya. Olsem we yumi luk long las stadi, ol aposol oli save mekem merikel mo oli save pasem presen ya i go long narafala man tu. Hemia i pruvum se Jehova i stap yusum olgeta. (Wok 5:12) Taswe, i no gat man long taem ya we i save askem kwestin ya se, ?Jisas i stap yusum hu blong lidim ol man blong hem? Be long 1914, ol samting oli jenis. Long yia ya, taem blong tekemaot kakae i stat mo hem i taem blong seraotem ol rabis gras long ol gudfala kakae. (Mat. 13:36-43) Long stat blong taem blong tekemaot kakae, wan impoten kwestin i stanap: ?Olsem wanem blong luksave ol gudfala kakae, hemia ol tabu Kristin? ?From we I gat plante giaman Kristin we oli talem se oli trufala man blong Jisas? Parabol blong slef nao bambae i givim ansa blong ol kwestin ya. Yes ol tabu Kristin bambae oli kakae gud long saed blong spirit.

8. ?From wanem i stret blong talem se slef ya i mas ol tabu Kristin?

⁸ Slef ya i mas ol tabu Kristin long wol. Baebol i singaot olgeta se oli “pris” blong mekem wok ya blong ‘talemaot ol gudgudfala wok blong [God]. Hem i singaot [olgeta] finis blong oli aot long tudak, oli kam long gudfala laet blong hem.’ (1 Pita 2:9) I stret nomo blong talem se olgeta we oli olsem ol pris ya, oli mekem wok ya blong tijim trutok long ol narafala Kristin brata blong olgeta.—Mal. 2:7; Rev. 12:17.

9. ?Olgeta tabu Kristin evriwan long wol oli slef ya? Yu eksplenem.

⁹ ?Olsem wanem? ?Olgeta tabu Kristin evriwan long wol oli slef ya? Nogat. I no olgeta tabu Kristin evriwan we oli mekem wok ya  blong givimaot kakae long spirit, long ol Kristin brata sista blong olgeta long fulwol. I gat sam tabu brata we oli mekem wok olsem man blong givhan mo elda long kongregesen blong olgeta. Oli go long ol haos wanwan blong tijim Baebol long ol man, mo oli tij tu insaed long ol kongregesen. Olgeta ya oli agri long ol desisen we oli kamaot long hedkwota. Nating se i olsem, oli no joen long wok ya blong givim kakae long spirit long ol brata sista long fulwol. Mo i gat ol sista tu we oli ol tabu Kristin. Olgeta ya oli gat tingting daon, mo oli no traem blong mekem wok ya blong tij insaed long kongregesen.—1 Kor. 11:3; 14:34.

10. ?Hu ya slef we i stret mo waes?

¹⁰ ?Ale, hu ya slef we i stret mo waes? Olsem we yumi tokbaot finis, Jisas i yusum wan smol grup nomo blong givim kakae long plante man. Taswe, slef ya i wan smol grup blong ol tabu brata we oli mekem wok ya blong rerem ol kakae long spirit mo givimaot olgeta, long taem ya we Jisas i king. Long ol las dei ya, slef ya we hemia smol grup blong ol tabu brata, oli wok long hedkwota. I klia se slef ya hemia Hed Kampani blong ol Witnes blong Jehova. I gud blong makem se long parabol blong Jisas, hem i no tokbaot plante slef, be hem i tokbaot wan slef nomo. Hemia i soemaot se slef ya hem i wan grup blong man we oli wok wanples. Ol memba blong Hed Kampani oli stap mekem ol desisen taem oli joen wanples.

11, 12. (1) ?Wanem tufala samting we slef ya we i stret mo waes i lukaot long hem? (2) ?Wetaem Jisas i putumap slef ya blong i lukaot long ol man blong hem, mo hem i jusum hu?

¹¹ I gud blong makem se long parabol blong Jisas, masta i putumap slef ya we i stret mo waes blong i lukaot long tufala samting. Faswan samting se hem i lukaot long ol man blong masta. Mo namba tu samting se hem i lukaot long olgeta samting blong masta. From we parabol ya i kamtru nomo long ol las dei, tufala wok ya blong lukaot long ol man blong masta mo long olgeta samting blong masta, bambae i kamtru afta long taem ya we Jisas i king long 1914.

¹² ?Wetaem Jisas i putumap slef ya blong i lukaot long ol man blong hem? Blong kasem ansa, yumi mas lukluk bakegen long taem ya blong tekemaot kakae, we i stat long 1914. Long taem ya, i gat plante grup blong man we oli talem se oli Kristin. ?Weswan long olgeta we Jisas bambae i jusum blong putumap olgeta olsem slef? Ansa blong kwestin ya i kamaot afta we Jisas mo Papa blong hem,  tufala i kam blong jekem haos tempol long 1914 i go kasem stat blong 1919. * (Mal. 3:1) Tufala i glad long wan smol grup blong ol Baebol Studen we oli soemaot se oli trastem Jehova mo Tok blong hem. I tru se olgeta ya oli nidim we tufala i mekem oli klin, nao oli gat tingting daon blong letem we Jehova i jekem mo i klinim olgeta long saed blong spirit. (Mal. 3:2-4) Ol Baebol Studen ya oli ol tru Kristin we oli olsem gudfala sid. Long 1919, Jisas i jusum sam long ol tabu brata, blong oli kam slef ya we i stret mo waes. Mo hem i putumap olgeta blong oli lukaot long ol man blong hem.

13. ?Hu ya ol man blong masta, mo from wanem yumi talem olsem?

¹³ ?Hu ya ol man blong masta? Hemia olgeta we oli stap kasem kakae long spirit. Long stat blong ol las dei, ol man blong masta hemia ol tabu Kristin nomo. Be biaen, bigfala kampani blong ol narafala sipsip tu oli kam ol man blong masta. Tufala grup ya oli kam olsem wan “kampani nomo” aninit long Jisas, mo bighaf blong olgeta oli blong bigfala kampani. (Jon 10:16) Tufala grup ya tugeta oli harem gud long semfala kakae long spirit we slef ya i stap givim. ?Be olsem wanem long ol memba blong Hed Kampani, we tede hem i slef ya we i stret mo waes? Ol brata ya tu oli nidim kakae long spirit. Taswe, ol brata ya oli gat tingting daon mo oli luksave se taem oli no joen blong mekem wok olsem wan grup, olgeta wanwan oli olsem ol man blong masta, we olgeta tu oli nidim kakae long spirit.

14. (1) ?Jisas i givim wanem wok long slef ya, mo wanem samting we slef ya i mas lukaot long hem? (2) ?Hem i givim wanem woning long slef we i stret mo waes? (Yu lukluk bokis “Be Sipos Man Ya i Wan Rabis Man . . .”)

¹⁴ Jisas i givim wan impoten wok long slef we i stret mo waes. Long taem bifo, masta i putumap slef we hem i trastem, blong i bos blong ol evri samting we i blong masta. (Luk 12:42) Long sem fasin, tede Jisas i putum slef we i stret mo waes blong i lukaot long evri samting blong hem long wol. Hemia i minim ol samting we i blong yusum long wok blong Kingdom, wok blong prij, ol program blong asembli. Mo tu i minim ol buk blong yusum long wok blong prij, blong stadi yumi wan, mo blong yusum long kongregesen. Ol man blong masta oli nidim ol kakae ya long spirit we slef ya i givim long olgeta.

15, 16. ?Wetaem Jisas i putumap slef ya blong i lukaot long olgeta samting blong hem?

¹⁵ ?Wetaem Jisas i putumap slef ya blong  i lukaot long “olgeta samting blong hem”? Jisas i talem se: “Sipos masta blong hem i kamtru mo i faenem se hem i stap mekem wok ya, slef ya i save harem gud. Tru ya, masta bambae i putumap hem blong lukaot long olgeta samting blong hem.” (Mat. 24:46, 47, NW) I gud blong makem se Jisas i putumap slef ya, afta we hem i kamtru mo i faenem se slef ya i stap “mekem wok ya” blong givimaot kakae long spirit. Taswe, bambae i gat smol taem i pas bitwin taem ya we masta i putumap slef ya blong i lukaot long ol man blong hem, mo taem we hem i putumap hem blong i lukaot long olgeta samting blong hem. Be blong kasem save se wetaem mo olsem wanem Jisas i putumap slef ya blong i lukaot long olgeta samting blong hem, bambae yumi tokbaot tu samting: (1) ?Jisas i kamtru wetaem? mo (2) ?Wanem ya olgeta samting blong hem?

¹⁶ ?Jisas i kamtru wetaem? Ol vas raonabaot long parabol blong Jisas, oli givim ansa. Taem ol vas ya oli talem se Jisas i “kamtru,” oli minim taem we Jisas i kam blong talemaot jajmen blong hem, mo blong jajem ol man long en blong wol ya. * (Mat. 24:30, 42, 44) Taswe, long parabol ya blong slef, taem ya we Jisas i “kamtru,” hemia long taem blong bigfala trabol.

17. ?Wanem ya olgeta samting blong Jisas?

¹⁷ ?Wanem ya “olgeta samting blong [Jisas]”? Taem Jisas i talem “olgeta samting,” hem i no minim ol samting long wol ya nomo. Jisas i gat bigfala paoa long heven. Hem i talem se: “God i givim olgeta paoa long mi, long olgeta samting long heven mo long wol.” (Mat. 28:18; Efes. 1:20-23) Taswe, wan long olgeta samting ya blong hem, hemia Kingdom blong Mesaea, we i blong hem stat long 1914. Ol tabu Kristin bambae oli joen wetem Jisas blong rul long Kingdom ya.—Rev. 11:15.

18. ?From wanem Jisas i glad blong putumap slef ya blong i lukaot long olgeta samting blong hem?

¹⁸ Folem ol save ya we yumi tokbaot,  ?yumi lanem wanem? Taem Jisas i kamtru long taem blong bigfala trabol blong jajem ol man, bambae hem i faenem se slef ya i mekem samting we masta blong hem i wantem. Hem i stap givim kakae long spirit long ol man blong Jisas long stret taem. Nao Jisas i glad tumas blong putumap slef ya bakegen blong i lukaot long olgeta samting blong hem. Bambae ol memba blong slef ya oli kasem wok ya taem oli go long heven, blong rul wetem Kraes.

19. ?Slef ya i kasem praes we i bigwan moa i bitim ol narafala tabu Kristin? Yu eksplenem.

¹⁹ ?Olsem wanem? ?Slef ya i kasem praes long heven we i bigwan moa i bitim praes we ol narafala tabu Kristin oli kasem? Nogat. Jisas i promes blong givim praes long smol grup ya, mo ol narafala tabu Kristin tu bambae oli joen blong kasem praes ya. Yu traem tingbaot samting we Jisas i talem long ol 11 gudfala aposol blong hem, bifo we hem i ded. (Ridim Luk 22:28-30.) Jisas i promes long wan smol grup blong man, se bambae oli kasem praes blong olgeta from we oli mekem wok we Jisas i talem long olgeta. Praes blong olgeta, hemia se bambae oli rul wetem Jisas long Kingdom blong hem. Be afta sam yia i pas, Jisas i talemaot se olgeta 144,000 man, bambae oli sidaon wetem hem, blong joen long hae nem blong hem. (Rev. 1:1; 3:21) Long sem fasin, taem Jisas i talem tok ya long Matiu 24:47 se “masta bambae i putumap hem blong lukaot long olgeta samting blong hem,” hem i stap mekem promes long wan smol grup blong man. Be hem i no stap mekem promes long slef ya nomo, from we olgeta 144,000 man evriwan bambae oli rul wetem hem long heven.—Rev. 20:4, 6.

20. ?From wanem Jisas i putumap slef ya, mo yumi gat strong tingting blong mekem wanem?

²⁰ Jisas i yusum slef we i stret mo waes, long sem fasin we hem i mekem bifo, taem hem i yusum wan smol grup nomo blong givim kakae long plante man. Jisas i putumap slef ya blong meksua se olgeta man blong hem, nomata se oli tabu Kristin no oli blong bigfala kampani, oli kasem kakae long spirit long ol las dei ya. I gud yumi soemaot se yumi gat strong tingting blong sapotem ol tabu brata we oli, slef ya we i stret mo waes.—Hib. 13:7, 17.