1, 2. Ka layusurubei Hesusu lun léigagüdüniwa uguñe weyu, ani ka uagu súdini lubéi lun wasubudiruni katei lan?

“ÍBIRIGU, darí lun bulieiná lan átirihali lan wéiyaasu gama nan aban arütíkulu núhaburugu le ayanuhati luagu le nemegeirubei dántima le nemegeiruni.” Anihán dimurei le tariñagubei aban íbiri tidan aban gárada to tóunahaboun tidoun áfisi to arihiboun tau sun Beteli lidan sun ubóu lun tarufuduni teteingiradi. Susereñahaali san ligiaméme hun? Houn saragu wádangiñe susereeli. Ani moun lumuti taweiridun wanigi luagu le.

² Arufuda lumuti éigini tídangiñeti Bíbülia le weresibirubei lidan dan lagunfuliruñein lan Hesusu, le Lichügüdina damuriguaü, füramasei le ladügübei lánina léigagüdüniwa. Kati layusurubei lun ladügüni? Dan le ladimurehanbei luagu liseinin larúeihan, ariñagati luagu layusurubei lan “musu úaraguati ani gunfuranda ligía” lun líchugun ‘éigini lidan dan’ houn ha lúbiñebaña (aliiha huméi Matéu 24:45-47). * Musu úaraguati layusurubei Hesusu lun léigagüdüniña lani disipulugu ha úaraguabaña lidan lagumuhóun dan le. Súdiniti wasubudiruni katei lan, lugundun megei wamuti lídehan musu úaraguati le lun buidu lan wáhuduragun lun Heowá luma wamadagua luma (Mat. 4:4; Huan 17:3).

3. Ida liña meha tafuranguagüdüni wani agumeiraguagüdüni hénpulu luáguti musu úaraguati?

³ Ligíati, ida luba gunfuranda wamani hénpulu luáguti musu úaraguati ani gunfuranda ligía? Lidan dan le sügühalibei, ariñawagúati meha tidan burí wani agumeiraguagüdüni, lidan lan Pentekosutesi lidan irumu 33, líridei Hesusu musu úaraguati lun ligíaba lan ariha hau ha lúbiñebaña; ani sun lan kristiánugu anuadirúaaña ha awinwandutiña ubouagu lidan furumiñeguarügü dan lúmagiñe irumu ligía hagía lan musu úaraguatibei; tílana lan luban iyubudiri kada aban hádangiñe kristiánugu anuadirúaaña hagía, ani írida lani Hesusu musu úaraguati lun “larihin lau sun lumegen” o sun burí luáguti Larúeihan Bungiu ya ubouagu lúmagiñe irumu 1919. Gama lumoun, lárigiñeya wakutihani katei le buidu, lábugiñe furíei, samina wagía hulili luagun, ariha wamaali mosu lan  wasansiruni ligaburi gunfuranda wamani le lariñagubei Hesusu luagu musu úaraguati ani gunfuranda ligía (Ari. 4:18). Akutiha waméi hénpulu ligía lun warihini ka lan uagu lunti lubéi súdini lan woun dandu anhein hemenigi wabéi wawinwandun sielu o ubouagu.

4-6. Ka uagu gayara lubéi wariñagun lárigiñerügüñein lan irumu 1914 lagumesera lagunfulirun lani Hesusu hénpulu luáguti musu úaraguati?

⁴ Arufuda lumuti bérusu le lubaragiñebei luma le lárigiñebei mama lan lidan irumu 33 lagumesera lagunfulirun hénpulu luáguti musu úaraguati ani gunfuranda ligía, lubaragiñe lira, lagunfuliruña guentó lidan lagumuhóun dan. Ariha waméi ida liña lan tadügün Lererun Bungiu lun wasaminarun ítara.

⁵ Hénpulu le, lídangiñeti lani Hesusu profesía luáguti “liseinin lagiribudun ubouagun luma lagumuchagüle ubóu” (Mat. 24:3). Biámañein wéiyaasu lagunfulirun furumiñeti fánreinti lánina profesía le lídanbei Matéu 24:4-22. Le furumiñeti, gúnfuliti lidan irumu le lárigiñebei irumu 33 darí irumu 70, ani le libiaman —gíbetimati dan lidura— lagunfuliruña lidan wadaani. Mini lan san le biámañein lan giñe lagunfulirun lani Hesusu hénpulu luáguti musu úaraguati? Uá, mama ligía mini lubéi.

⁶ Lúmagiñe lídangiñe dimurei le waliihabei lidan Matéu 24:29, layanuhañatima meha Hesusu luagu sügǘ le lunbei lanügün fulasu lidan wadaani (aliiha huméi Matéu 24:30, 42, 44). Dan le layanuhanbei luagu saragu asufuriruni, ariñagati Hesusu ‘harihibei lan sun gürigia ubouagu dánmeya liábin, Wügüri Garaüwarügüti, lidan huánriñu siélugiñe’. Lárigiñe, aba lariñagun houn ha lúnbaña hawinwandun lidan lagumuhóun dan lun agagudúañu hamá: “Ibidiñeti hun kaba lan oura niabin, au le Habureme [...] —liña— ladüga leme oura magaradahan humá, ligíaba niabin, au le Wügüri Garaüwarügüti”. * Lárigiñe bérusu burí le, —le ídanbei ladimureha luagu burí sügǘ le lunbei lanügün fulasu lidan lagumuhóun dan—, labahüdaguei Hesusu hénpulu luáguti musu úaraguati. Ligíati, gayara lubéi wasaminarun lárigiñerügüñein lan irumu 1914, dan le lagumeserunbei lagumuhóun dan, lagumesera le lariñagubei Hesusu luagu musu úaraguati agunfulira. Ka uagu wasaminara ítara?

7. Ka álügüdahani súdiniti adügǘbei dan le lagumeserubei lidaani alubahani, ani ka uagu?

⁷ Samina humá luagu álügüdahani le ladügübei Hesusu: “Káteitima san músubei úaraguati ani gunfuranda ligía[?]”. Mama meha mosu ladügǘniwa álügüdahani le lidan furumiñeti sígulu. Kei warihini lidan arütíkulu le ásügürübei, adügatiña meha apostolugu milaguru, gayarati giñe meha hadügün lun libihin aban gürigia somu ubafu lídangiñe somu milaguru le hadügübei, ligíati furanguti meha larihíniwa hagía lan gámabalin lídehan Bungiu (Adü. 5:12). Ligíati, kaba meha uagu lálügüdaha somu gürigia ka lan líridubei Hesusu lun ladundehaniña lánigu? Gama lumoun lidan irumu 1914, ámuhali meha katei, lugundun lidan irumu ligía lagumesera alubahani, ani chülüdüga meha lidaani lafanreinrawagun híduru wuribati luéi türigu (Mat. 13:36-43). Gama lumoun, dan le lagumeserunbei lidaani alubahani, gíbetiña meha kristiánugu mama inarünitiña ariñagutiña hawougua hagía lan afalarubalin Hesusu. Ligíati ladügǘnbei álügüdahani súdiniti le: ida luba meha lasubudirúniwa kátaña lan ítarabaña kei türigu o kristiánugu anuadirúaaña? Adundeha lumutiwa hénpulu le labahüdagubei Hesusu lun wadariruni óunabagülei. Hame buga adarirútiña buin lau ariñahani lúmagiñeti Bungiu hagía meha buga kristiánugubaña anuadirúaaña.

8. Ka uagu lariñawagúa hádangiñetiña lan kristiánugu anuadirúaaña musu úaraguati?

⁸ Mosu kristiánuguba lan anuadirúaaña ha awinwandubaña ubouagu lílana musu úaraguati. Houn laguarúa “fádirigu ha eseriwidutiña lun urúei le Bungiu”, ani rúaali kárugu houn lun “hadimurehan luagu burí katei buiti le ladügübei Bungiu” (1 Fe. 2:9). Ligíati, buidu lubéi harufudahani “fádirigu” ha inarüni houn hábirigu lidan afiñeni (Mal. 2:7; Aruf. 12:17).

9. Awadigimaridatiña san sun kristiánugu anuadirúaaña kei musu úaraguati? Afuranguagüda huméi hóunabagüle.

⁹ Awadigimaridatiña san sun ha híbiri  kristiánugu anuadirúaaña kei musu úaraguati? Uá, mítaranti. Le linarün katei, mama sun kristiánugu anuadirúaaña íchaahabaña ariñahani tídangiñeti Bíbülia houn sun hapanaagu lidan afiñeni ha lídanbaña sun ubóu. Inarüni añahein lan kristiánugu anuadirúaaña eseriwida kei wéiyaaña lidan afiñeni o ídehatiña lidan damuriguaü haganagua kristiánugu ha ítarabaña kei türigu. Ñǘdüntiña apurichiha muna tuagun muna, arufudaha hagía lidan damuriguaü, ani lau úaraguni falá hamuti adundehani le heresibirubei tídangiñe áfisi to arihiboun tau sun Beteli lidan sun ubóu, gama lumoun mídehantiña lidan lichugún ariñahani tídangiñeti Lererun Bungiu houn íbirigu lidan sun ubóu. Ani haganagua kristiánugu anuadirúaaña ha, añahein giñe íbirigu würiña ǘnabugutiña ha maweiyasunbaña áluga lun hawadigimaridun kei arufudahatiña lidan damuriguaü (1 Ko. 11:3; 14:34).

10. Katei san músubei úaraguati ani gunfuranda ligía?

¹⁰ Káteiti músubei úaraguati ani gunfuranda ligía? Según le meha ladügübei Hesusu dan le layusurunbei fiú lun léigagüdün saragu, yúsuti giñe aban liraüraü sétanu hani íbirigu anuadirúaaña ha nadagimeinbaña aranseha luma íchiga ariñahani tídangiñeti Lererun Bungiu lidan lidaani Larúeihan kei urúei marihúaditi, liraüraü sétanu le ligía músubei úaraguati. Eibu lawanserun lagumuhóun burí dan le, seriwitiña íbirigu anuadirúaaña ha nadagimeinbaña keisi musu úaraguati lidan aban tidan áfisi to arihiboun tau sun Beteli lidan sun ubóu. Uguñe weyu, íbirigu anuadirúaaña ha lídanbaña Sétanu le Arihibei lau Hawadigimari Gefentiña luagu Heowá lidan sun Ubóu músubei úaraguati. Gama lumoun, íbini mámarügüñein lan aban gürigia musu le, adimurehóuati hawagu kéisigubeirügü aban musu. Ligíati, nadagimeintiña lílana Sétanu le Arihibei lau Hawadigimari Gefentiña luagu Heowá lidan sun Ubóu, kamá hamuga ábanrügü gürigia, mini lan lira, desidírü hamá súngubei lidan aban.

11, 12. a) Ka bián wadagimanu ichugúbei lun musu úaraguati ani gunfuranda ligía lun ladügüni? b) Ídabuga líridei Hesusu musu úaraguati lun larihin hau tílana luban, ani kátaña lanúadirubaña?

¹¹ Súdiniti lun wasubudirun luagu lidan lan lani Hesusu hénpulu biámañein lan wéiyaasu liridún musu úaraguati ani gunfuranda ligía. Lidan furumiñeti lúgaaru, iridúati lun larihin hau ha lúbiñebaña o tílana luban liyubudiri; lidan libiaman lúgaaru, lun larihin lau sun lumegen iyubudiri. Gama lumoun, kei lagunfuliruba lan buga lani Hesusu hénpulu lídanrügü lagumuchun dan le, lárigiñeba buga irumu 1914 liridúa musu ligía biángubei wéiyaasu, danme buga rúaali ubafu lun Hesusu lun lagumeserun arúeiha.

¹² Ídabuga líridei Hesusu musu úaraguati lun larihin hau tílana luban? Lun wóunabuni  álügüdahani le, mégeitiwa wagiribudun lidoun irumu 1914, irumu le ídanbei lagumesera lidaani alubahani. Kei buga wakutihani, lidan meha dan ligía, gíbetiña meha sétanu gürigia ariñagutiña hawougua kristiánugu hamá. Lídangiñe sun sétanu le, halíagiñeba bugati lanúadirei Hesusu musu úaraguati le lunbei líriduni hawagu ha lúbiñebaña? Ounabúati álügüdahani le lárigiñebei liabin Hesusu luma Lúguchi arihei ida tiña lan ténpulu —aransehani lánina áhuduraguni inarüniti le ladügübei Bungiu—, le anügübei fulasu lúmagiñe irumu 1914 darí lagumeseha irumu 1919 (Mal. 3:1). * Ma funa lueirin hagundan lau harihin aban liraüraü sétanu Aturiahatiña Bíbülia úaraguatiña arufuda aban lueirin ínsiñeni luagu Heowá luma tuagu Lererun! Le linarün katei, mégeitiña meha buídutima lan hadügün fiú katei, gama lumoun lau ǘnabuguni ígiratiña lun híderawagun asansira luagu fiú dan lánina hóuchawagun luma harumadahóun (Mal. 3:2-4). Ítara haña meha Aturiahatiña Bíbülia hagía kei türigu inarüniti. Lidan irumu 1919, ábaya hagumeserun abuiduragüdei hamadagua luma Bungiu, aba lanúadirun Hesusu fiú hádangiñe íbirigu anuadirúaaña ha afiñerúati hawagu lun hagía lan musu úaraguati ani gunfuranda ligía, ábati líriduniña hawagu tílana luban.

13. Kátaña giñe tílanabaña muna, ani ka uagu?

¹³ Kátaña san tílanabaña muna? Lidan murusun dimurei, gürigia ha éigagüdüwabaña tílanabaña muna. Dan meha le lagumeserunbei lagumuhóun dan, kristiánugu meha anuadirúaaña sun tílana muna. Gama lumoun, dan lárigiñe, aba giñe hayabin saragu gürigia ha amu mudún lun tílanabaña lan muna. Hagía gíbetimabaña lidan “aban farüga” hani mudún ha afalarubalin Kristu (Huan 10:16). Dandu kristiánugu anuadirúaaña kei amu mudún sagatiña buiti lídangiñe ligiaméme éigini tídangiñeti Lererun Bungiu le líchugubei musu úaraguati “lidan dan”. Ka gayarabei lariñawagún hawagu lílana Sétanu le Arihibei lau Hawadigimari Gefentiña luagu Heowá lidan sun Ubóu ha nadagimeinbaña kei musu úaraguati ani gunfuranda ligía uguñe weyu? Mégeitiña giñe heigin tídangiñe Lererun Bungiu, lau ǘnabuguni, gunfuranda hamuti tílana lan muna kada aban hádangiñe ítara kei ha híbiri kristiánugu inarünitiña.

14. a) Ka lueirin buligasion ichugúbei lun musu úaraguati, ani ka wadagimanu lunbei ladügüni? b) Ka eweridihani líchugubei Hesusu lun musu úaraguati ani gunfuranda ligía? (Ariha huméi rekuáduru “Anhein aban lubéi wügüri wuribati musu ligía...”)

¹⁴ Ruti Hesusu aban lueirin buligasion lun musu úaraguati ani gunfuranda ligía. Lidan meha tidaani Bíbülia, mosu meha larihin aban musu le uágubei lafiñerúa, o túniri muna, hau sun ha híbiri musu ha tídanbaña luban liyubudiri (Luk. 12:42). Ítarameme, mosu larihin musu úaraguati ani gunfuranda ligía hau sun lubúeingu Heowá. Anihán fiú lídangiñe wadagimanu le lunbei ladügüni: larihin lau ida liña lan layusurún  lumegen liyubudiri, apurichihani, laransehóun adamurini luma tadügǘn agumeiraguagüdüni tídangiñetu Bíbülia to ayusurúboun lidan apurichihani, dan le haturiahan gürigia hábuguarügü luma lidan adamuridaguni kristiánu. Megei hamuti tílana muna sun burí katei le, le líchugubei musu úaraguati lun líderaguniña lun buidu lan hamadagua luma Bungiu.

15, 16. Ídaba líridei Hesusu musu úaraguati lun larihin lau sun lumegen?

¹⁵ Ídaba líridei Hesusu musu úaraguati luagu libiaman wéiyaasu lun líchuguni ariha lau “sun lumegen”? Ariñagati: “Gúndaabei musu ligía danme le liabin liyubudiri anhein ladarira agunfulira lau lifisiute. Ninarün hau luagu líchugubei lan liyubudiri lun larihin lau sun lumegen” (Mat. 24:46, 47). Ariha huméi luagu lárigiñeba lanme lachülürün Hesusu ani arihaléi luagu ‘lagunfuliruña lan musu le lau lifisiute’, o líchuguña lan éigini le tídangiñeti Lererun Bungiu lau úaraguni, ligíaba lan líriduni luagu libiaman wéiyaasu. Ligíati, ñeinbei buga fiú dan ásügürüti lúmagiñe furumiñeti líriduni lumoun libiaman. Ida lubati ani ídaba líridei Hesusu musu úaraguati lun larihin lau sun lumegen? Lun wóunabuni álügüdahani le, mosu wasubudirun bián katei: ídaba lan lachülüra ani katei burí lan umegeguni le.

¹⁶ Ídaba lachülüra Hesusu? Afuranguagüda lumuti le líbiri bérusu. Haritagua huméi dan le lan lariñagun bérusu burí le lubaragiñebei luagu ‘liábinba’ lan Hesusu, ladimurehaña lan luagu lidaani liabin asubudiragüdei lasiadihan luma adüga lun lagungunfulirun (Mat. 24:30, 42, 44). * Ligíati, liabin o lachülürün Hesusu le uágubei ladimurehóua lidan hénpulu luáguti musu úaraguati lagunfuliruba lidan lidaani saragu asufuriruni.

17. Ka burí ‘lumegenbei’ Hesusu?

¹⁷ Katei san “sun lumegen” Hesusu? Mariñagunti yárügüñein lan ubouagu lumegen. Le linarün katei, wéiriti ubafu le lánibei Hesusu sielu.  Ariñagati: “Rúaali sun ubafu nun sielu luma ubouagu” (Mat. 28:18; Efe. 1:20-23). Guentó laganagua lumegen Hesusu anihein Arúeihani, le ichugúbei lun lúmagiñe irumu 1914, ani larúeihaba úara hama lani disipulugu ha anuadirúaañabaña lidan (Aruf. 11:15).

18. Ka uagu gúndaabei lubéi Hesusu lau líchuguni musu úaraguati lun larihin lau sun lumegen?

¹⁸ Lárigiñe le akutiha wamaalibei, ka gayarabei wariñaguni? Danme liabin Hesusu kei aguseragüdüti lídanme saragu asufuriruni, larihubei lagunfuliruña lan musu úaraguati lau luadigimari lau úaraguni lau líchugun ariñahani tídangiñeti Bíbülia houn sun tílana luban liyubudiri lidan dan. Ligíati gúndaabei lubéi Hesusu lau líriduni luagu libiaman wéiyaasu: líridubei lun larihin lau sun lumegen. Hiridúba ha awadigimaridubaña kei musu úaraguati danme heresibiruni hafayeiruaha sielu ani arúeiha hagíame luma Kristu.

19. Wéiritimati san afayeiruahaü le leresibirubei musu úaraguati sielu luéi le heresibirubei ha híbiri kristiánugu anuadirúaaña? Afuranguagüda huméi.

¹⁹ Wéiritimati san afayeiruahaü le leresibirubei musu úaraguati sielu luéi le heresibirubei ha híbiri kristiánugu anuadirúaaña? Uá. Íbini füramasewa lan aban afayeiruahaü lun aban liraüraü sétanu lidan somu dan, lagumuhóun oura gayarati giñe heresibiruni amu gürigia. Aban hénpulu, samina humá luagu le lariñagubei Hesusu houn unsu lani apostolugu úaraguatiña guñoun le lubaragiñebei lounwen (aliiha huméi Lúkasi 22:28-30). Füramaseti lun liraüraü sétanu ligía líchuguba lan aban lubuidun afayeiruahaü houn ladüga úaragua hamá: líchuguba ubafu houn lun harúeihan úara luma. Gama lumoun, irumu burí lárigiñe, ariñagati hañuuruba lan sun kristiánugu anuadirúaaña, san-bián-wein-gádürü-mílugubei luagu lálana arúeihani arúeiha luma (Aruf. 1:1; 3:21). Ítarameme, según lariñagun Matéu 24:47, füramaseti Hesusu líridubei lan liraüraü sétanu —íbirigu anuadirúaaña ha awadigimaridubaña kei musu úaraguati— lun larihin lau sun lumegen. Gama lumoun, le linarün katei, líchuguba Kristu óunwenbu ubafu sielu houn sun 144,000 (Aruf. 20:4, 6).

20. Ka uagu líridei Hesusu musu úaraguati, ani ka desidírü wabéi wadügün?

²⁰ Layusuruñein Hesusu musu úaraguati lun ladügüni le meha ladügübei lidan furumiñeti sígulu: layusurun fiú gürigia lun léigagüdün saragu. Írida lumuti musu le lun lachoururuni luagu habihibei lan buga lani disipulugu ha inarünitiña —dandu anhein anuadirúaaña lubéi o amu lan mudún— éigini tídangiñeti Lererun Bungiu “lidan dan”. Ma lueirin weteingiruni! Ligíati, arufuda waméi teinki wamani luagu katei le lau wíderaguniña íbirigu anuadirúaaña ha nadagimeinbaña kei musu úaraguati ani gunfuranda ligía (Ebü. 13:7, 17).