1, 2. Ié Jesus a ewisa ngeni an epwe amwéngéénikich ikenái, me pwata a kon lamot ach sipwe weweiti ika ié ena?

 EMÉN fin Kraist a apasa an kilisou lón eché néún taropwe ngeni pwiich kewe mi angang lón ach we iolapen ofesilap. Iei met a apasa: “Mongeei kenaan, ese tongeni lea rei ekkewe fansoun oua waalong lepeei ekkewe lesen mi awora ngeniei met ua osupwangan lón ewe fansoun mi fókkun lamot ngeniei.” A pwal ina usun meefiom? Chómmóng me leich sia pwal meefieni meefian na. Nge esap itá ina eú minen ámáirú ngenikich.

² Ewe mwéngé sia angei lón pekin lúkú lón ewe fansoun mi fich a ánnetatá pwe Jesus, ewe Mékúren mwichefel, a akkapwénúetá an we pwon pwe epwe amwéngéénikich. Nge ié a néúnéú an epwe féri ena? Lupwen Jesus a ngenikich esissillen an nónnóm a apasa pwe epwe néúnéú “ewe chon angang mi allükülük o tipachem” ren an epwe awora ngeni néún kewe chón angang “wiser mongö lon fansoun fich.” * (Ppii ewe sópwósópwun pwóróus.) (Álleani Mateus 24:45-47.) Lón ei fansoun lesópwólóón, Jesus a néúnéú ena chón angang mi alúkúlúk an epwe wisen amwéngééni néún kewe chón tapweló mwirin mi enlet. A fókkun lamot ach sipwe weweiti ika ié ena chón angang mi alúkúlúk. Ach péchékkúl lón pekin lúkú me ach riri ngeni Kot a lóngólóng wóón ena chón angang me wisan we.​—Mat. 4:4; Joh. 17:3.

3. Met néúch kewe puk ra fen apasa usun ewe kapas áwewe usun ewe chón angang mi alúkúlúk?

³ Iwe, ifa usun sipwe weweiti án Jesus we kapas áwewe usun ewe chón angang mi alúkúlúk? Me lóóm, iei met néúch kewe puk ra apasa. Lón Pentikost 33 C.E., Jesus a seikaatá ewe chón angang mi alúkúlúk an epwe túmúnú néún kewe chón angang. Seni ena atun, ewe chón angang mi alúkúlúk a wewe ngeni meinisin ekkewe Chón Kraist mi kepit mi nómoppék wóón fénúfan mi usun eú mwich. Ekkewe chón angang ra pwal wewe ngeni ekkena chón kepit, nge a fós usun emén me emén leir. Lón 1919, Jesus a seikaatá ewe chón  angang mi alúkúlúk an epwe “nemeni mettochun meinisin,” weween meinisin pisekin Mwúún Kot we wóón fénúfan. Iwe nge, mwirin ám káéfichi, ekilonei, me iótek usun ekkeei mettóch, a ffat pwe a lamot ach sipwe siwili ach weweiti alon Jesus kewe usun ekkewe chón angang mi alúkúlúk me tipachem. (SalF. 4:18) Sipwe etittina ewe kapas áwewe me ppii ifa usun a weneitikich, ese lifilifil ika sia eáni ewe ápilúkúlúkún manaw wóón fénúfan are lón láng.

4-6. Pwata sipwe ekieki pwe án Jesus we kapas áwewe usun ewe chón angang mi alúkúlúk a kerán chék poputá le pwénútá mwirin 1914?

⁴ Ekkewe wokisin me mwen ena kapas áwewe usun ewe chón angang mi alúkúlúk me tipachem ra pwáraatá pwe pwénútáán a poputá lón ach ei fansoun lesópwólóón, nge sap fen lón ewe Pentikost 33 C.E. Sipwe ppii ifa usun ekkewe Taropwe mi Pin ra álisikich le weweiti ewe popun.

⁵ Ewe kapas áwewe usun ewe chón angang mi alúkúlúk ina chék och kinikinin án Jesus we oesini usun “asisilen fansoun [an] wareto [fósun Krik, pa·rou·siʹa] me ewe fansoun sopolan.” (Mat. 24:3) Ewe kinikinin ei oesini mi mak lón Mateus 24:4-22, epwe wor ruu pwénútáán. Ewe áeúin fansoun an pwénútá, a fis lón ewe ier 33 C.E. tori 70 C.E., nge ewe oruuen fansoun a pwénútá a fis lón ach ei fansoun me a fen kon watte lamotan. Iwe ika ina, weween pwe án Jesus we kapas áwewe usun ewe chón angang mi alúkúlúk epwe pwal pwénútá fán ruu? Aapw.

⁶ Poputá seni ekkewe kapas mi mak lón Mateus 24:29, Jesus a kon menlapei ekkewe mettóch repwe fis lón ach ei fansoun. (Álleani Mateus 24:30, 42, 44.) Atun Jesus a fós usun met epwe fis lón ewe riáfféú mi lapalap, a apasa pwe aramas, “repwe küna Nöün Aramas epwe feito won kuchu.” Mwirin, a pesei chókkewe repwe manaw lón ekkewe ránin lesópwólóón ar repwe mammasafichi, a apasa: “Ousap silei lon meni rän ämi Samol epwe wareto.” A pwal ereniir: “Nöün Aramas epwe war lon eu otun ousap ekieki ngeni.” * (Ppii ewe sópwósópwun pwóróus.) Me lón ekkeei wokisin mi fós usun ekkewe mettóch repwe fis lón ekkewe ránin lesópwólóón, Jesus a eáni ewe kapas áwewe usun ewe chón angang mi alúkúlúk. Iwe, sipwe ekieki pwe minne a apasa usun ewe chón angang mi alúkúlúk, a kerán chék poputá le pwénútá mwirin poputáán ekkewe ránin lesópwólóón lón 1914. A mmen fataffatéch ena áwewe. Pwata?

7. Ifa ewe kapas eis mi kon lamot a ppiitá lepoputáán ewe fansoun kinikin, me pwata a ppiitá?

⁷ Ekieki mwo usun ei kapas eis: “Iö chök ewe chon angang mi allükülük o tipachem?” Lón fansoun ekkewe aposel, ese lamot ena sókkun kapas eis. Sia fen kúna me lón ewe lesen mwen ei pwe ekkewe aposel ra tongeni féri manaman, me ra pwal mwo nge tongeni ngeni ekkóch ewe liffangen manaman. Ekkeei mettóch ra ánnetatá pwe Jiowa a pwapwaitiir. (Föf. 5:12) Iwe, ese lamot án emén epwe eis ika ié Jesus a filatá an epwe wisen emmwen. Iwe nge, lón 1914 a mmen sókkóló. Ewe fansoun kinikin a poputá lón ena ier. Iwe, a tori fansoun káimufesenin ekkewe pétéwélingaw me ekkewe wiich. (Mat. 13:36-43) Lepoputáán ewe fansoun rás, a ppiitá ei kapas eis mi kon lamot: Ifa usun emén a tongeni esilla ekkewe wiich, are Chón Kraist mi kepit, me lein ekkewe chómmóngun tipitipin Chón Kraist mi pwisin erá pwe ra enletin tapweló mwirin Jesus? Ewe kapas áwewe usun ewe chón angang mi alúkúlúk a pélúweni ena kapas eis, pún a affata pwe néún Kraist kewe chón tapweló mwirin mi kepit repwe mwémmwéngé lón pekin lúkú iteitan.

8. Pwata a fich pwe ewe chón angang mi alúkúlúk iir Chón Kraist mi kepit?

⁸ Ese wor tipemwaramwar pwe chókkewe mi chóni ewe chón angang mi alúkúlúk repwe feito me lein ekkewe Chón Kraist mi kepit wóón fénúfan. Chókkana ra iteni “eu mwichen souasor än ewe king” me ra fil pwe repwe ‘arongafeili än Kot kewe föför mi manaman, i ewe mi körirewu seni rochopwak, pwe repwe tolong lon an saram mi amwarar.’ (1 Pet. 2:9) Mi fich ngeni chón ena  “mwichen souasor än ewe king,” ar repwe pwisin wisen asukula ewe enlet ngeni chiener kewe chón lúkú.​—Mal. 2:7; Pwär. 12:17, Testament Mi Fö.

9. Ewe chón angang mi alúkúlúk a wewe ngeni meinisin Chón Kraist mi kepit? Áweweei.

⁹ Ewe chón angang mi alúkúlúk a wewe ngeni meinisin ekkewe mi kepit wóón fénúfan? Aapw. Ren enletin, esap meinisin mi kepit ra awora ewe mwéngé lón pekin lúkú ngeni chiener kewe chón lúkú wóón unusen fénúfan. Me lein ekkewe wiich a wor Chón Kraist mwán mi kepit chónálillisin mwichefel are chónemmwen lón en me an mwichefel. Ra afalafal imw me imw me pwal lón pwisin ar mwichefel, me ra tuppwél le álisatá ekkewe kapasen emmwen seni ach we ofesilap. Nge rese wisen awora mwéngé lón pekin lúkú ngeni ewe mwichen pwipwi wóón unusen fénúfan. Pwal eú, a wor ekkewe fin Kraist mi tipetekison lein ekkewe mi kepit, nge rese fókkun sótun wiseni ewe wis sense lón mwichefel.​—1 Kor. 11:3; 14:34.

10. Ié ewe chón angang mi alúkúlúk me tipachem?

¹⁰ Iwe, ié ewe chón angang mi alúkúlúk me tipachem? Jesus a kan amwéngééni chómmóng aramas ren an néúnéú fitemén chék, iwe, ena chón angang a wewe ngeni eú kúkkún mwichen Chón Kraist mwán mi kepit mi pwisin fiti ewe angangen ammólnatá me awora mwéngé lón pekin lúkú atun án Kraist nónnóm. Lón unusen ekkewe ránin lesópwólóón, ekkewe Chón Kraist mwán mi kepit mi chóni ewe chón angang mi alúkúlúk ra angangfengen lón ach we ofesilap. Lón ekkewe fite ier ra ló, ena chón angang a wewe ngeni ewe Mwichen Soupwúngúpwúng án Chón Pwáraatá Jiowa. Nge sipwe chechchemeni pwe ewe kapas “ewe chon angang” a wewe ngeni emén, ina minne ekkewe chón lón, iir eú chék mwich. Weween met ewe Mwichen Soupwúngúpwúng a apwúngaló a fis ren ar mwichfengen.

11, 12. (a) Ikkefa ekkewe ruu wis ewe chón angang mi alúkúlúk a angei? (b) Ineet atun Jesus a ewisa ngeni ewe chón angang mi alúkúlúk an epwe túmúnú néún kewe chón angang, me ié kewe a filiretá?

¹¹ Nengeni pwe lón án Jesus we kapas áwewe a wor ruu fansoun ewe chón angang mi alúkúlúk me tipachem a seikitá ngeni ruu wis. Áeúin, epwe nemenem wóón ekkewe chón angang. Oruuan wóón meinisin pisekin ewe masta kewe. Pokiten ewe kapas áwewe epwe chék pwénúetá lón ekkeei ránin lesópwólóón, iwe, iir me ruu ekkena wis repwap pwénúetá mwirin ewe ier 1914 atun a poputá án Jesus nónnóm lón wisan wisen King.

¹² Ineet atun Jesus a seikaatá ewe chón angang mi alúkúlúk an epwe túmúnú néún kewe chón angang? Ren an epwe pélú a lamot sipwe liwiniti 1914, poputáán ewe fansoun kinikin rás. Usun  met sia fen káé me mwan, lón ena fansoun a wor chómmóng mwichen aramas ra erá pwe iir Chón Kraist. Iwe, menni mwichen aramas Jesus epwe filatá me seikaatá ewe chón angang mi alúkúlúk seni? Ena kapas eis a pélú mwirin án Jesus me Seman we feito me etittina ewe imwenfel, are ewe kókkótun fel, seni 1914 ngeni ekkewe maram lepoputáán 1919. * (Mal. 3:1) Ra pwapwa ren ekkewe chókúkkún Chón Káé Paipel mi tuppwél iir kewe ra pwáraatá pwe ra enletin tongei Jiowa me an we Kapas. Pwúngún a pwal lamot ngeniir elimelim, nge ra tipemecheres le etiwa lón ewe mwochomwochen fansoun etittin me elimelim. (Mal. 3:2-4) Ekkena Chón Káé Paipel mi tuppwél iir ekkewe wiich, Chón Kraist mi enlet. Lón 1919, Jesus a filatá ekkóch mwán mi kepit me leir mi sipeéch ar repwe wisen ewe chón angang mi alúkúlúk me tipachem me a ewisa ngeniir ar repwe túmúnú néún kewe chón angang.

13. Ié kewe ra kapachelong lein ekkewe chón angang, iwe pwata?

¹³ Iwe, ié kana chón angang? Iir chókkewe ra angei ener mwéngé lón pekin lúkú. Lepoputáán ekkeei ránin lesópwólóón, meinisin ekkewe chón angang iir mi kepit. Mwirin, eú mwich mi fókkun chóchó seni ekkewe ekkóch siip ra pwal kapachelong lein ekkena chón angang. Lap ngeni chón ewe “eu chök mwichen sip” mi nóm fán nemenien Kraist ra feito seni ekkewe ekkóch siip. (Joh. 10:16) Ekkena ruu mwich ra kúna feiéch seni ekkewe mwéngé lón pekin lúkú ewe chón angang mi alúkúlúk a awora. Nge ifa usun chón ewe Mwichen Soupwúngúpwúng mi wewe ngeni ewe chón angang mi alúkúlúk me tipachem ikenái? A pwal lamot ngeni pwiich kana ar repwe mwéngé lón pekin lúkú. Iwe, fán tipetekison ra mirititi pwe emén me emén leir, ra pwal chék usun meinisin chókkewe mi tapweló mwirin Jesus, iir pwal chón angang.

14. (a) Ifa wisen ewe chón angang mi alúkúlúk, me met a kapachelong lón? (b) Ifa ewe kapasen éúréúr Jesus a ngeni ewe chón angang mi alúkúlúk me tipachem? (Ppii ewe pwóór “Are Ei Chon Angang A Ngau . . .”)

¹⁴ Jesus a ewisa ngeni ewe chón angang mi alúkúlúk me tipachem eú wis mi fókkun aúchea. Lón fansoun lóóm, emén slave, are chón souwan, emén masta a fókkun lúkúlúk wóón a kan wisen túmúnú meinisin mettóchun ewe masta. (Luk. 12:42, Agapé) Pwal ina chék usun, wisen ewe chón angang mi alúkúlúk me tipachem an epwe túmúnú mettóchun Kraist kewe meinisin wóón fénúfan. A kapachelong lón ena wis an epwe túmúnú moni, fénú, imw, kókkótun ewe angangen afalafal, mwichelap, me fférún ekkewe puk mi lóngólóng wóón Paipel sia néúnéú lón ewe angangen afalafal, lón ach pwisin káé me lón ewe  mwichefel. A fókkun lamot ngeni ekkewe chón angang meinisin ekkewe mettóchun lúkú mi kawor me ren ewe chón angang mi alúkúlúk.

15, 16. Ineet Jesus a ewisa ngeni ewe chón angang mi alúkúlúk an epwe nemenem wóón mettóchun kewe meinisin?

¹⁵ Ineet ewe oruuen fansoun Jesus a seikaatá ewe chón angang mi alúkúlúk an epwe nemenem wóón “mettochun meinisin”? Jesus a apasa: “Feiöchün ewe chon angang, are an we masta a küna pwe a föri iei usun lupwen a war. Enlet, üpwe ürenikemi, an we masta epwe seikätä, pwe epwe nemeni mettochun meinisin.” (Mat. 24:46, 47) Chechchemeni pwe ewe oruuen seikitá epwe fis mwirin án Jesus feito me kúna pwe ewe chón angang “a föri” wisan ren an tuppwél le akkawora mwéngé lón pekin lúkú. Iwe epwe wor och fansoun lefilen ekkena ruu seikitá. Ren ach sipwe weweiti ifa usun me ineet Jesus a seikaatá ewe chón angang mi alúkúlúk an epwe nemenem wóón mettóchun kewe meinisin, mi lamot sipwe silei ineet a war me met a kapachelong lón mettóchun kana.

¹⁶ Ineet Jesus epwe war? Pélúwen ei kapas eis a nóm lón ekkewe wokisin lón Mateus 24. Chechchemeni pwe atun ekkeei wokisin ra fós usun án Jesus “feito,” a weneiti ewe fansoun epwe feito pwe epwe apasa me apwénúetá an kapwúng lesópwólóón ei ótót. * (Mat. 24:30, 42, 44) Iwe a ffat pwe án Jesus “feito” are “war,” ewe a mak lón ewe kapas áwewe usun ewe chón angang mi alúkúlúk, epwe fis atun ewe riáfféú mi lapalap.

17. Met a kapachelong lein mettóchun Jesus kewe?

¹⁷ Met a kapachelong lein “mettochun [Jesus] meinisin”? Ika pwe mettóchun Jesus kewe a chék weneiti ekkewe wóón fénúfan, iwe neman esap néúnéú ewe kapas “meinisin.” A ffat pwe a pwal watte án Jesus nemenem lón láng. Iei met a apasa, “Nemenem meinisin won läng me fanüfan a toriei.” (Mat. 28:18; Ef. 1:20-23) Iei, a pwal kapachelong  ewe Mwúún Messaia, ewe a nemeni seni ewe ier 1914, me néún kewe mi kepit repwe fiti le nemenem.​—Pwär. 11:15.

18. Pwata Jesus epwe pwapwa le seikaatá ewe chón angang mi alúkúlúk wóón mettóchun kewe meinisin?

¹⁸ Iwe, met sia káé? Lupwen Jesus epwe war fán iten an epwe nieló ekkewe aramas mi ngaw atun ewe riáfféú mi lapalap, epwe kúna pwe ewe chón angang mi alúkúlúk a fen akkawora ewe mwéngé lón pekin lúkú ngeni ekkewe chón angang. Iwe, Jesus epwe fókkun pwapwa le pwal seikaatá ena chón angang wóón mettóchun meinisin. Ekkewe mi wewe ngeni ena chón angang mi alúkúlúk repwe seikitá atun repwe angei ewe feiéchún manaw lón láng me wiliti chienen Kraist le nemenem.

19. Ewe chón angang mi alúkúlúk a itá angei watteen liwin lón láng lap seni ekkewe lusun mi kepit? Áweweei.

¹⁹ Ewe chón angang mi alúkúlúk me tipachem a itá angei watteen liwin lón láng lap seni ekkewe lusun mi kepit? Aapw. Ika emén a pwon ngeni eú kúkkún mwich lón eú fansoun pwe epwe ngeni och liwin, mwirin epwe pwal tongeni wor ekkóch aramas repwe pachelong lón ena liwin. Áwewe chék, ekieki met Jesus a apasa ngeni néún kewe 11 aposel mi tuppwél lón ewe pwinin mwen an epwele máló. (Álleani Lukas 22:28-30.) Jesus a pwonei pwe mi wor eú liwin mi witiwiti ena kúkkún mwichen aramas pokiten ar akkamwéchú ar tuppwél. Repwe fiti le nemenem lón ewe wis king. Nge fitu ier mwirin, a pwáraatá pwe meinisin ekkewe 144,000 repwe mómmót wóón leenien motun king me fiti le nemenem. (Pwär. 1:1; 3:21) Pwal ina chék usun, lón Mateus 24:47 i a pwonei pwe eú kúkkún mwichen mwán, ekkewe mi kepit mi wewe ngeni ewe chón angang mi alúkúlúk, repwe seikitá pwe repwe nemenem wóón mettóchun kewe meinisin. Nge ren enletin, meinisin ekkewe 144,000 repwe fiti le nemenem lón láng.​—Pwär. 20:4, 6.

20. Pwata Jesus a seikaatá ewe chón angang mi alúkúlúk? Iwe, met kopwe úppós le féri?

²⁰ Jesus a néúnéú ewe chón angang mi alúkúlúk me tipachem le akkawora mwéngé ngeni chómmóng aramas ikenái usun chék met a féri lón fansoun ekkewe aposel. Jesus a seikaatá ena chón angang mi alúkúlúk pwe chókkewe mi enletin tapweló mwirin repwe akkangei ener mwéngé lón pekin lúkú lón ewe fansoun mi fich lón unusen ekkewe ránin lesópwólóón, ese lifilifil ika iir mi kepit are iir seni ekkewe ekkóch siip. Sipwe úppós le pwári ach kilisou ren ach tuppwél le ákkálisatá ekkewe mwán mi kepit mi wewe ngeni ewe chón angang mi alúkúlúk me tipachem.​—Ipru 13:7, 17.